HAPOT KAN MGA HOBEN
Paano Ko Mababawasan an Timbang Ko?
Kaipuhan ko daw talagang magbawas nin timbang?
May mga tin-edyer na nagsasabing gusto nindang magbawas nin timbang. Pero . . .
Mas ikinakahadit nin dakul an manungod sa itsura ninda kisa saindang salud. Para mabawasan an timbang, pigpupurbaran kan iba an mga madalian na solusyon para magbawas an timbang, arog kan pagpalipas nin pagkakan o pag-inom nin mga produktong nakakapabawas nin timbang. An mga pamamaaging ini sa parati napapatunayan na bakong epektibo asin peligroso pa ngani minsan.
“An ibang mga babayi ginugutom an sadiri ninda para mas marikas an resulta. Sa parati maraot an nagigin epekto kaini, tapos haloy bago makabawi an hawak sa danyos kaiyan.”—Hailey.
An dakul na nahahadit sa timbang ninda dai man talaga dapat mahadit. Okey man an timbang ninda—pero tibaad pagmati ninda mataba sinda pag ikinukumparar an sadiri ninda sa saindang mga kaedad o sa sinasabi kan media na “magayon” na hawak.
“Kan 13 anyos ako, ikinukumparar ko an sadiri ko sa mga amigo ko. Iniisip ko na mas magugustuhan ninda ako pag kapareho ninda ako—an buot sabihon kaipuhan kong magin maniwang na garo kawayan.”—Paola.
Sa ibong na lado, may mga hoben na kaipuhan talagang magbawas nin timbang. Sigun sa sarong report kan World Health Organization . . .
Sa bilog na kinaban, mga 340 milyon na hoben na an edad 5 sagkod 19 an sobra sa timbang.
Kan 1975, 4 porsiyento sana kan mga nasa edad na 5-19 an sobra sa timbang. Pero kan 2016, luminangkaw iyan sa 18 porsiyento.
Sa dakul na nasyon sa bilog na kinaban, mas komun an mga tawong sobrang taba kisa kulang sa timbang.
An pagigin sobrang taba komun man sa tios na mga nasyon, dawa sa mga pamilya na may mga miyembrong kulang sa nutrisyon.
Ano an pinakamarahay na paagi para mabawasan an timbang?
Ano an pipilion mo?
Magpalipas nin pagkakan.
Mag-ehersisyo asin magin balanse sa pagkakan.
Mag-inom nin mga produktong nakakapabawas nin timbang.
Tamang simbag: Paagi 2: Mag-ehersisyo asin magin balanse sa pagkakan.
An pagpalipas nin pagkakan o an dai pagkakan nin sarong grupo nin pagkakan tibaad magtao nin madalian na mga resulta. Pero an mga paaging iyan tibaad bakong marahay sa salud, asin posibleng bumalik sa dati an timbang mo pag nagbalik ka na man sa kinaugalian mong pagkakan.
Sa kabaliktaran, kun an pasuhan mo iyo na magkaigwa nin marahay na salud, mas marahay an magigin resulta. “An pinakaligtas, pinakamarahay sa salud, asin pinakanagdadanay na mga resulta makukua paagi sa . . . pagbago kan istilo kan pamumuhay mo na kaya mong ipagpadagos sa bilog mong buhay,” an isinurat ni Dr. Michael Bradley.a Ano an buot sabihon kaiyan? Kun gusto mong mabawasan an timbang mo, dai magpokus sa pagsunod sa sarong klase nin diet kundi sa pagkaigwa nin tamang istilo nin pamumuhay.
An puwede kong gibuhon
Sinasabi sato kan Bibliya na magin “balanse sa paggawi saka pag-uugali”—kaiba diyan an kaugalian sa pagkakan. (1 Timoteo 3:11) Espesipiko pa nganing sinabi kaiyan na likayan an sobrang pagkakan. (Talinhaga 23:20; Lucas 21:34) Mantang isinasaisip an mga prinsipyong iyan, purbaran an minasunod para magkaigwa nin mas marahay na istilo nin pamumuhay:
Aramon kun ano an kaiba sa pagkakan nin masustansiya.
Dai mo man kaipuhan na magin sobra kaistrikto sa kinakakan mo, pero kun may aram ka maski dikit manungod sa nutrisyon, makakatabang na marhay iyan para magkaigwa ka nin balanseng pagkakan. An pagigin balanse sa pagkakan an saro sa pinakamarahay na paagi para mapagdanay mo an tamang timbang.
Mag-ehersisyo nin regular.
Isipon an mga puwede mong gibuhon sa aroaldaw para magdanay na aktibo. Halimbawa, maghagyan ka imbes na mag-elevator. An kabangang oras mo sa pag-video game gamiton mo na sana para sa brisk walking.
Magkakan nin masustansiya imbes na junk food.
“Hinihinguwa ko na pirming magkaigwa nin masustansiyang mga mirindalan arog nin mga prutas saka gulay,” an sabi kan tin-edyer na si Sophia. “Paagi kaiyan, dai ako natetentaran na magparakakan nin bakong masustansiya.”
Magkakan nin luway-luway.
May mga tawo na marikason magkakan kaya dai ninda naririsa na basog na palan sinda! Kaya luway-luway sana. Magpundo nguna bago magkua giraray nin kakanon. Tibaad marisa mo na basog ka na palan.
Imonitor an nakokonsumo mong calorie.
Basahon an mga nutrition label para mahiling kun pirang calorie an yaon sa kakanon. Clue: An mahamis na mga soft drink, fast food, asin mga dessert halangkaw an calorie asin nakakadagdag sa timbang.
Magin balanse.
Si Sara, na 16 anyos, nagsabi: “May panahon kaidto na pirmi ko na sanang pigbibilang an calorie sa kinakakan ko kaya pag naghihiling ako sa pagkakan, puro numero an nahihiling ko!” Dai magin “calorie accountant.” Paminsan-minsan, puwede ka man magkakan kan mga gusto mong kakanon na halangkaw sa calorie.
Tip: Ipakipag-ulay sa saimong doktor an mga ikinakahadit mo manungod sa timbang mo. Puwede niyang analisaron an kondisyon kan saimong salud asin tabangan kang sundan an sarong programa na makakatabang na marhay sa saimo.
a Hali sa librong When Things Get Crazy With Your Teen.