Mga Kasal na Kagalanggalang sa Pagheling nin Dios Asin Tawo

“Nagkaigwa nin punsion sa kasal sa Cana . . . Si Jesus asin an saiyang mga disipulo inimbitaran man sa punsion sa kasal.”—JUAN 2:1, 2.

1. An salaysay manongod ki Jesus sa Cana nagdadara kan atension sa ano?

ARAM ni Jesus, kan saiyang ina, asin kan nagkapira sa saiyang mga disipulo an kagayagayahan na puedeng itao kan kagalanggalang na kasal sa tahaw kan banwaan nin Dios. Ginibo pa ngani ni Cristo na pambihira an sarong kasal paagi sa paggibo kan saiyang primerong isinurat na milagro duman, na nakadagdag sa kaogmahan kan okasyon na iyan. (Juan 2:1-11) Tibaad nakaatender na kamo asin naogma sa mga kasal nin mga Kristiano na gustong maglingkod ki Jehova bilang maogmang mga mag-agom. O tibaad inaantisipar nindo na kamo mismo ikakasal o matabang sa sarong katood na magin mapanggana an saiyang kasal. Ano an makakakontribwir sa siring na mapangganang kasal?

2. Anong impormasyon manongod sa mga kasal an yaon sa Biblia?

² Nanompongan kan mga Kristiano na an sadol na yaon sa ipinasabong na Tataramon nin Dios nakakatabang na marhay kun an sarong lalaki asin babae nagpaplanong mag-agom. (2 Timoteo 3:16, 17) Totoo, dai sinasabi nin detalyado kan Biblia an mga prosedimiento para sa Kristianong kasal. Natural sana iyan huli ta nagkakalaenlaen an mga kostumbre asin dawa an legal na mga kahagadan depende sa lugar asin kapanahonan. Halimbawa, sa suanoy na Israel mayo nin pormal na seremonya sa kasal. Sa aldaw kan kasal, dinadara kan nobyo an saiyang nobya sa saiyang sadiring harong o sa harong kan saiyang ama. (Genesis 24:67; Isaias 61:10; Mateo 1:24) An aksion na ini na hayag sa gabos iyo na mismo an kasal, na mayo nin pormal na seremonya na komun sa dakol na kasal ngonyan.

3. Sa anong okasyon sa Cana na si Jesus nagkontribwir sa kaogmahan kaiyan?

³ Rinerekonoser kan mga Israelita an aksion na iyan bilang pag-agoman o kasal. Pakatapos kaiyan, tibaad magkaigwa sinda nin punsion sa pagselebrar, siring kan nasambitan sa Juan 2:1. Tinatradusir kan dakol na bersion nin Biblia an bersikulong iyan nin arog kaini: “Nagkaigwa nin kasal sa Cana.” Alagad an termino sa orihinal na lenguahe angay na trinadusir na “punsion sa kasal” o “bangkete sa kasal.”a (Mateo 22:2-10; 25:10; Lucas 14:8) Malinaw na ipinapaheling kan salaysay na si Jesus presente asin nagkontribwir sa kaogmahan nin sarong punsion na konektado sa sarong Judiong kasal. Minsan siring, an sarong pangenot na punto iyo na an ibinibilang na kasal kan panahon na idto laen sa kun ano an komun ngonyan.

4. Anong klaseng kasal an pinipili nin nagkapirang Kristiano, asin taano?

⁴ Sa dakol na nasyon ngonyan, an mga Kristiano na gustong magpakasal dapat na aboton an nagkapirang legal na kahagadan. Kun magibo na ninda iyan, puede na sindang magpakasal sa ano man na legal na paaging inaako. Iyan puedeng sa sarong sadit, simpleng seremonya na pinapangenotan nin sarong huwes, alkalde, o ministrong autorisado kan Estado. An nagkapira pinipiling magpakasal sa siring na paagi, na posibleng hinahagad sa nagkapirang paryente o katood na Kristiano na magin presente bilang legal na mga saksi o tangani sanang makikabtang sa kagayagayahan kan mahalagang okasyon na ini. (Jeremias 33:11; Juan 3:29) Kaagid kaiyan, an ibang mga Kristiano tibaad magdesisyon na dai magkaigwa nin dakulang punsion sa kasal na mangangaipo nin awad-awad na pagpaplano asin gastos. Imbes, tibaad mag-areglo sinda nin toninong na karakanan kaiba an nagkapirang dayupot na katood. Ano man an satong personal na gusto sa bagay na ini, maninigo niatong rekonoseron na an ibang maygurang na mga Kristiano tibaad may mga punto de vista na laen man kan sa sato.—Roma 14:3, 4.

5. Taano ta dakol na Kristiano an gustong magkaigwa nin pahayag sa kasal pagkinasal sinda, asin ano an itinatampok kaiyan?

⁵ An kadaklan na ikakasal na Kristiano nagdedesisyon na magkaigwa nin pahayag na basado sa Biblia sa saindang kasal.b Rinerekonoser ninda na si Jehova an nagpoon kan pag-agoman asin paagi sa saiyang Tataramon nagtatao nin madonong na sadol sa kun paano an pag-agoman magigin mapanggana asin magbubunga nin kaogmahan. (Genesis 2:22-24; Marcos 10:6-9; Efeso 5:22-33) Asin an kadaklan na ikakasal gusto na an Kristianong mga katood asin paryente makikabtang sa maogmang okasyon na ini. Pero, paano niato mamansayon an kadakol na laen-laen na legal na kahagadan, prosedimiento, asin nangingibabaw pa ngani na lokal na mga kaugalean? Totokaron kan artikulong ini an mga situwasyon sa manlaenlaen na rehion. An nagkapira tibaad laen na marhay sa aram na nindo o ginigibo sa saindong lugar. Minsan siring, puede nindong maheling an nagkapirang komun na prinsipyo o aspekto na mahalaga sa mga lingkod nin Dios.

An Kagalanggalang na Pag-agoman​—Legal na Pag-agoman

6, 7. Taano ta maninigo kitang magin interesado sa legal na mga aspekto nin pagpapakasal, asin paano niato ini puedeng ipaheling?

⁶ Minsan ngani si Jehova an nagpoon kan pag-agoman, an mga gobyerno nin tawo may kontrol minsan paano sa mga hiro-hiro kan mga ikakasal. Angay sana ini. Sinabi ni Jesus: “Itao nindo ki Cesar an mga bagay na ki Cesar, alagad sa Dios an mga bagay na sa Dios.” (Marcos 12:17) Siring man, si apostol Pablo nagdirehir: “An lambang kalag magpasakop sa superyor na mga autoridad, huli ta mayo nin autoridad na dai itinogot nin Dios; an nagdadanay na mga autoridad nagtitirindog sa saindang relatibong mga kamugtakan na itinogot nin Dios.”—Roma 13:1; Tito 3:1.

⁷ Sa kadaklan na kadagaan, si Cesar, o an sibil na autoridad, an nagdedeterminar kun siisay an puedeng magpakasal. Sa siring, kun an duwang Kristiano na may sono sa Kasuratan na katalingkasan magdesisyon na magpakasal, sinusunod ninda sa maatom na paagi an lokal na ley. Tibaad kalabot digdi an pagkua nin lisensia, pagpakasal sa autorisado kan Estado na parakasal, asin tibaad pagparehistro kan ginibong kasal. Kan ipagboot ni Augusto Cesar an sarong ‘pagrehistro,’ si Maria asin Jose nagsunod, na nagbaklay pasiring sa Betlehem “tanganing magparehistro.”—Lucas 2:1-5.

8. May anong puersa an kasal, asin anong prinsipyo kan Mga Saksi ni Jehova an nagpapabanaag kan pakasabot na iyan?

⁸ Kun an duwang Kristiano magpakasal sa legal asin rekonosidong paagi, an pagsasaro na iyan may puersa sa pagheling nin Dios. Huli kaini, an mga Saksi ni Jehova dai nagpapakasal giraray paagi sa paorootrong legal na seremonya, ni inootro man ninda an mga sumpaan sa kasal, siring baga sa ika-25 o ika-50 taon na anibersaryo nin kasal kan mag-agom. (Mateo 5:37) (May mga iglesia na dai inaako an sibil na seremonya sa kasal na aprobado kan ley, na naghihingako na iyan bakong balidong kasal apuera sana kun an sarong padi o klerigo magibo nin ritual o ipapahayag na mag-agom na an lalaki asin babae.) Sa dakol na kadagaan, inaautorisaran kan gobyerno an sarong ministro kan Mga Saksi ni Jehova na magkasal. Kun posible iyan, tibaad gustohon niang gibohon iyan na may kaibang pahayag sa kasal sa Kingdom Hall. Iyan an lokal na lugar nin tunay na pagsamba asin sarong angay na lugar para sa sarong pahayag manongod sa areglong ini, na inestablisar ni Jehova Dios.

9. (a) Mapadapit sa sibil na kasal, ano an tibaad pilion na gibohon nin Kristianong ikakasal? (b) Paano tibaad mapalabot an kamagurangan sa mga plano dapit sa kasal?

⁹ Sa ibang nasyon, hinahagad kan ley sa ikakasal na gibohon an kasal sa sarong opisina kan gobyerno, siring baga kan munisipyo, o sa atubangan nin sarong designadong opisyal kan gobyerno. Sa parate pinipili kan mga Kristiano na sundan an legal na prosedimientong iyan nin sarong pahayag sa kasal sa Kingdom Hall sa aldaw man sanang iyan o sa kasunod na aldaw. (Dai ninda gugustohon na lumihis an dakol na aldaw sa pag-oltanan kan sibil na seremonya asin kan pahayag sa Biblia, huli ta sinda mag-agom na sa atubangan nin Dios asin nin tawo, kaiba an Kristianong kongregasyon.) Kun an ikakasal na nagpaplano nin sibil na kasal gustong magkaigwa nin pahayag sa sarong Kingdom Hall, maninigo nindang hagadon antes pa an permiso kan kamagurangan na minabilog kan Komite sa Paglilingkod kan Kongregasyon. Apuera sa pagkompirmar na an ikakasal may marahay na reputasyon, seseguradohon kan mga paraataman na ini na an oras kan kasal dai makakaolang sa regular na mga pagtiripon asin nakaiskedyul na mga programa sa Kingdom Hall. (1 Corinto 14:33, 40) Rerepasohon man ninda an ano man na preparasyon sa Kingdom Hall na tibaad hagadon kan ikakasal asin madesisyon kun baga magkakaigwa nin paisi manongod sa paggamit kaiyan.

10. Kun magkakaigwa nin sibil na kasal, paano kaini maaapektaran an pahayag sa kasal?

¹⁰ Hihingoahon kan magurang sa kongregasyon na nagtatao kan pahayag sa kasal na gibohon na may init, nakakapakosog sa espirituwal, asin may dignidad an pagtokar. Kun an duwa enot na pinagsaro paagi sa sibil na kasal, lilinawon nia na sinda kasal na segun sa ley ni Cesar. Kun dai nagkaigwa nin sumpaan sa kasal sa sibil na seremonya, puedeng gibohon iyan kan ikinasal durante kan pahayag.c Kun kaiba sa sibil na seremonyang iyan an mga sumpaan sa kasal alagad gusto kan bagong kasalon na magsumpaan sa atubangan ni Jehova asin kan kongregasyon, maninigo nindang sabihon iyan sa pormang past tense, na nagpapaheling na sinda “pinagsaro” na.—Mateo 19:6; 22:21.

11. Sa nagkapirang lugar, paano an pagkasal, asin may anong epekto sa pahayag sa kasal?

¹¹ Sa nagkapirang lugar, tibaad dai man hinahagad kan ley sa ikakasal na kasalon paagi sa sarong seremonya, dawa sa atubangan nin sarong opisyal nin gobyerno. An kasal nangyayari kun isumitir ninda an sarong pirmadong rehistrasyon sa kasal sa sarong opisyal. Pakatapos tolos kaiyan, rehistrado na an sarong sertipiko sa kasal. Sa paaging ini an duwa ibinibilang nang mag-agom, na an petsa kan pagrehistro iyo an petsa kan saindang kasal. Siring kan nasambitan sa enotan, tibaad gustohon kan ikinasal na sundan tolos an rehistrasyon na iyan nin basado sa Biblia na pahayag sa Kingdom Hall. Ipapaaram kan sarong tugang na lalaki na maygurang sa espirituwal, na piniling magpahayag, sa gabos na nag-aatender na an duwa kasal na huli sa katatapos pa sanang rehistrasyon. An ano man na sumpaan gigibohon sono sa nasambitan sa parapo 10 asin sa nota sa ibaba kaiyan. An mga nag-aatender sa Kingdom Hall maggagayagaya kaiba kan ikinasal asin makikinabang sa itinataong konseho hale sa Tataramon nin Dios.—Awit ni Salomon 3:11.

Pinagkatodan Na Asin Sibil na mga Kasal

12. Ano an pinagkatodan nang kasal, asin ano an marahay na gibohon pakatapos nin siring na kasal?

¹² Sa nagkapirang nasyon, an ikakasal minalaog sa inaapod na pinagkatodan nang kasal (o, kasal sa tribo). Ini dai nanonongod sa basta na sana pagsasaro nin duwang indibiduwal, ni iyan man nanonongod sa pakikisaro na tibaad medyo inaako sa nagkapirang lokalidad alagad bakong lubos na legal na pag-agoman.d An pinag-oolayan niato sarong pag-agoman na ginigibo sono sa rekonosido kan publiko na kostumbre kan tribo o lugar. Tibaad kalabot digdi an lubos na pagbayad asin pag-ako kan dote, na paagi kaiyan an duwa nagigin mag-agom sa legal na paagi asin sono sa Kasuratan. Ibinibilang kan gobyerno an siring na pinagkatodan nang kasal na balido, legal, asin may puersa. Pakatapos kaiyan, sa parate posibleng iparekord o iparehistro an ginibong pinagkatodan nang kasal, asin kun magibo na iyan an ikinasal puedeng makaresibi nin opisyal na sertipiko. An pagrehistro puedeng makatao nin proteksion sa ikinasal o sa agom na babae kun ini mabalo asin sa magigin mga aki ninda. Sasadolon kan kongregasyon an siisay man na naglaog sa siring na pinagkatodan nang kasal na iparehistro iyan sa pinakamadaling panahon na mapupuede. Interesante nanggad, minalataw na sa irarom kan Ley ni Moises, opisyal na irinerekord an mga kasal asin pagkamundag.—Mateo 1:1-16.

13. Pakatapos nin pinagkatodan nang kasal, ano an angay kun dapit sa pahayag sa kasal?

¹³ An legal na pinagsaro paagi sa siring na pinagkatodan nang prosedimiento nagigin mag-agom kun mangyari an siring na kasal. Siring kan nasambitan sa enotan, an mga Kristianong minalaog sa siring na legal na kasal tibaad gustong magkaigwa nin pahayag sa kasal, na may mga sumpaan sa kasal, sa Kingdom Hall. Kun iyan gigibohon, ipapaisi kan ispiker na an duwa ikinasal na kaoyon kan mga ley ni Cesar. Saro sanang pahayag an gigibohon. May sarong kasal, sa kasong ini an legal asin balidong pinagkatodan nang kasal (o kasal sa tribo), asin sarong pahayag na sono sa Kasuratan. An pagpapadanay kan duwang aspektong ini na magkaharani sa panahon sagkod sa mapupuede, na mas marahay kun sa iyo man sanang aldaw, nakakakontribwir sa pagtao nin onra sa Kristianong pag-agoman sa komunidad.

14. Ano an puedeng gibohon nin sarong Kristiano kun pareho posible an pinagkatodan sagkod sibil na kasal?

¹⁴ Sa nagkapirang kadagaan na duman rinerekonoser na legal an pinagkatodan nang kasal, may mga probisyon man para sa sibil (o, sono sa ley) na kasal. An sibil na kasal sa parate ginigibo sa atubangan nin sarong opisyal nin gobyerno, asin tibaad kaiba dian an sumpaan sa kasal sagkod pagpirma sa rehistro. Mas gusto kan nagkapirang ikakasal na Kristiano an sibil na kasal na ini kisa pinagkatodan nang kasal. Dai hinahagad kan ley na gibohon iyan pareho; an kada saro sa prosedimiento legal asin balido. An sinabi sa parapo 9 asin 10 manongod sa pahayag sa kasal asin mga sumpa aplikado man digdi. An pinakamahalaga iyo na an duwa ikinasal sa paagi na kagalanggalang sa atubangan nin Dios asin tawo.—Lucas 20:25; 1 Pedro 2:13, 14.

Papagdanayon an Onra sa Pag-agoman

15, 16. Paano an onra maninigo na kalabot sa pag-agoman?

¹⁵ Kan lumataw an sarong problema sa pag-agoman nin sarong Persianong hade, nagtao nin konseho an sarong pangenot na konsehero na an ngaran Memucan na puedeng magkaigwa nin positibong epekto—‘na an gabos na agom na babae magtao nin onra sa saindang agom na lalaki.’ (Ester 1:20) Sa Kristianong mga pag-agoman, dai kaipuhan na magdekreto kaiyan an siisay man na tawong hade; an mga agom na babae gustong magtao nin onra sa saindang agom na lalaki. Kaagid kaiyan, an Kristianong mga agom na lalaki nagtatao nin onra sa saindang agom asin nag-oomaw sa sainda. (Talinhaga 31:11, 30; 1 Pedro 3:7) An pagtao nin onra sa satong pag-agoman dai maninigong ioktaba sagkod na lumihis an dakol na taon. Iyan maninigo na risang-risa sa kapinonan pa sana, iyo, poon sa aldaw kan kasal.

¹⁶ Bako sana an lalaki asin an babae—an agom na lalaki asin babae—an dapat na magpaheling nin onra sa aldaw kan kasal. Kun an sarong Kristianong magurang sa kongregasyon matao nin pahayag sa kasal, iyan maninigo man na igwa nin onra. An pahayag maninigong ipanongod sa mag-agom. Bilang kabtang kan pagtao nin onra sa sainda, an ispiker dai magtatampok nin pangisi o eroestorya. Dai nia maninigong iiba an personal na marhay na mga komento na tibaad huli kaiyan mapasupog an mag-agom asin an mga naghihinanyog. Imbes, hihingoahon niang magin mainit asin nakakapakosog, na itinatampok an Kagtugdas kan pag-agoman asin an Saiyang marahayon na sadol. Iyo, an may dignidad na diskurso sa kasal kan magurang sa kongregasyon makakakontribwir sa sarong kasal na nagtatao nin onra ki Jehova Dios.

17. Taano ta may legal na aspekto an Kristianong mga kasal?

¹⁷ Posibleng narisa nindo sa artikulong ini an dakol na punto manongod sa legal na mga detalye nin kasal. May mga aspekto na dai direktang minaaplikar sa saindong lugar. Pero, dapat na kita gabos nakakarealisar kun gurano kahalaga na an mga areglo sa kasal sa tahaw kan Mga Saksi ni Jehova maninigong nagpapabanaag kan paggalang sa lokal na mga ley asin sa mga kahagadan ni Cesar. (Lucas 20:25) Sinadol kita ni Pablo: “Itao sa gabos an nanonongod sa sainda, sa saiya na naghahagad nin buhis, an buhis; sa saiya na naghahagad nin tributo, an tributo; . . . sa saiya na naghahagad nin onra, an siring na onra.” (Roma 13:7) Iyo, tama sanang an mga Kristiano, poon mismo sa aldaw kan kasal, magtao nin onra sa areglo na ibinugtak nin Dios para sa presente.

18. Anong opsional na kabtang nin kasal an angay na tawan nin atension, asin saen niato manonompongan an impormasyon manongod sa bagay na ini?

¹⁸ An dakol na Kristianong kasal sinusundan nin sosyal na pagtiripon—punsion, karakanan, o bangkete sa kasal. Girumdomon na pinili ni Jesus na magin presente sa saro kan siring na punsion. Kun igwa nin siring na pagtiripon, paano makakatabang sa sato an konseho hale sa Biblia na seguradohon na iyan magtatao man nin onra sa Dios asin magtatao nin marahay na impresyon sa mga bagong kasal asin sa Kristianong kongregasyon? Ipapaliwanag kan sunod na artikulo an mismong bagay na iyan.e

Patunayan an Saindong Pagtubod Paagi sa Saindong Pamumuhay

“An pagtubod, kun dai nin gibo, gadan sa saiya man sana.”​—SANTIAGO 2:17.

1. Taano an enot na mga Kristiano ta nagtao nin atension sa pagtubod sagkod sa mga gibo?

SA PANGKAGABSAN, pinatunayan kan enot na mga Kristiano an saindang pagtubod paagi sa sainda mismong pamumuhay. Sinadol ni disipulo Santiago an gabos na Kristiano: “Magin kamong mga paraotob kan tataramon, asin bakong mga paradangog sana.” Idinugang nia: “Kun paanong an hawak na daing espiritu gadan, siring man an pagtubod na daing mga gibo gadan.” (Santiago 1:22; 2:26) Mga 35 taon pakatapos na isurat nia iyan, dakol na Kristiano an padagos na pinapatunayan an saindang pagtubod paagi sa angay na mga gibo. Alagad makamomondo ta may nagkapira na bakong arog kaiyan. Si Jesus nagtao nin komendasyon sa kongregasyon sa Smirna; pero, sa dakol na kabilang sa kongregasyon sa Sardis, sinabi nia: “Aram ko an saimong mga gibo, na ika igwa kan ngaran na ika buhay, alagad ta ika gadan.”—Kapahayagan 2:8-11; 3:1.

2. Ano an maninigong ihapot kan mga Kristiano sa saindang sadiri manongod sa saindang pagtubod?

² Huli kaiyan, inenkaminar ni Jesus an mga taga Sardis—asin kun iaaplikar sa mas mahiwas na paagi sa gabos na makakabasa kan saiyang mga tataramon—na patunayan an saindang enot na pagkamoot para sa Kristianong katotoohan asin magin puka sa espirituwal. (Kapahayagan 3:2, 3) Puedeng hapoton kan balang saro sa sato an saiyang sadiri: ‘Kumusta man an sakong mga gibo? Malinaw daw na ipinapaheling kan sakong gawe-gawe na ginigibo ko an sakong pinakamakakaya tanganing patunayan an sakong pagtubod paagi sa gabos na ginigibo ko, dawa sa mga bagay na dai direktang konektado sa paghuhulit o mga pagtiripon kan kongregasyon?’ (Lucas 16:10) Puedeng estudyaran an dakol na aspekto nin buhay, alagad tokaron niato an saro sana: sosyal na mga pagtiripontipon, kaiba an mga pagtiripontipon na sa parate kasunod kan Kristianong mga kasal.

Saradit na Sosyal na Pagtiripontipon

3. Ano an punto de vista kan Biblia manongod sa pakikikabtang sa mga pagtiripontipon?

³ An kadaklan sa sato naoogmang imbitaran sa sarong pagtiripontipon nin maogmang mga Kristiano. Si Jehova an “maogmang Dios,” na gustong magin maogma an saiyang mga lingkod. (1 Timoteo 1:11) Ipinaiba nia sa isinurat ni Salomon sa Biblia an katotoohan na ini: “Inomaw ko mismo an paggayagaya, huli ta para sa katawohan mayo na nin mas marahay sa sirong kan aldaw kundi an magkakan asin mag-inom saka maggayagaya, asin na iyan maninigong kairiba ninda sa saindang kahigosan sa mga aldaw kan saindang buhay.” (Eclesiastes 3:1, 4, 13; 8:15) An siring na paggayagaya tibaad sa pagkakan nin pamilya o sa ibang sadit na sosyal na pagtiripontipon nin tunay na mga parasamba.—Job 1:4, 5, 18; Lucas 10:38-42; 14:12-14.

4. An saro na nag-aareglo nin sarong pagtiripontipon maninigong magin interesado sa ano?

⁴ Kun nag-aareglo kamo nin siring na pagtiripontipon asin may paninimbagan para dian, maninigo nindong pag-adalan na marhay an saindong plano, dawa kun pipira sanang kapagtubod an iimbitaran nindo para sa sarong pagkakan asin makikatood na pag-orolay. (Roma 12:13) Gugustohon nindong masierto na ‘an gabos na bagay mangyari sa disenteng paagi,’ na ginigiyahan kan “kadonongan hale sa itaas.” (1 Corinto 14:40; Santiago 3:17) Si apostol Pablo nagsurat: “Kamo man nagkakakan o nag-iinom o ano pa man an ginigibo, gibohon an gabos na bagay sa ikakamuraway nin Dios. Dai kamo magin mga dahelan nin pagkasingkog.” (1 Corinto 10:31, 32) Ano an nagkapirang aspekto na nangangaipo nin partikular na atension? An pagkonsiderar kaiyan antes pa makakatabang na seguradohon na an gigibohon nindo asin kan saindong mga bisita magpapaheling na iinaaplikar nindo an saindong pagtubod.—Roma 12:2.

Anong Klaseng Pagtiripontipon an Gigibohon?

5. Taano an kag-imbitar ta maninigong magtao nin maingat na atension kun baga sia mapuesto nin inomon na de alkohol asin mapatugtog nin musika?

⁵ An dakol na kag-imbitar napaatubang sa isyu kun baga mapuesto nin inomon na de alkohol. An siring dai kaipuhan tanganing magin nakakapakosog an sarong pagtiripontipon. Girumdomon na si Jesus nagtao nin pagkakan para sa darudakulang grupo na nagdorolok sa saiya—pinadakol nia an tinapay asin sira. An salaysay dai nagsasabi na sia milagrosong nagtao nin arak, minsan ngani aram niato na kaya niang gibohon iyan. (Mateo 14:14-21) Kun magdesisyon kamo na magpuesto nin inomon na de alkohol sa sarong pagtiripontipon, magin tama sana sa kun gurano kadakol an ipupuesto, asin seguradohon na may ibang nakakaakit na alternatibo para sa mga mas gusto kaiyan. (1 Timoteo 3:2, 3, 8; 5:23; 1 Pedro 4:3) Dai nanggad ipamate sa siisay man na sia pinipirit na uminom nin ano man na puedeng kumagat “na siring sa halas.” (Talinhaga 23:29-32) Kumusta man an musika o pagkanta? Kun an saindong pagtiripontipon magkakaigwa nin musika, daing duwa-duwa na maingat nindong pipilion an mga kanta, na kinokonsiderar an kumpas sagkod liriko. (Colosas 3:8; Santiago 1:21) Nanompongan nin dakol na Kristiano na an pagpatugtog nin Kingdom Melodies o dawa an iribang pag-awit kan siring na mga kanta nakakakontribwir sa sarong magayagayang kamugtakan sa palibot. (Efeso 5:19, 20) Asin, siempre, regular na riparohon an kosog kan musika tanganing iyan dai makaolang sa maogmang pag-orolay ni makadisturbo sa siisay man na kataraed.—Mateo 7:12.

6. Paano ikakapaheling kan kag-imbitar na igwa sia nin buhay na pagtubod kun mapadapit sa pag-orolay-olay o sa iba pang mga aktibidad?

⁶ Sa sosyal na pagtiripontipon, an mga Kristiano puedeng mag-orolay manongod sa manlaenlaen na tema, makosog na basahon an sarong impormasyon, o magsaysay nin interesanteng mga eksperyensia. Kun maparayo na an orolay, puedeng mataktikang bagohon iyan kan kag-imbitar. Maninigo man siang magin mapagbantay na dai dinodominar nin saro sanang tawo an orolay. Kun maheling niang nangyayari iyan, puede siang magtaram na may marahay na paghusgar asin iayon sa orolay an iba, tibaad paagi sa pag-agda sa mga hoben na ipahayag an nasa boot ninda o pag-introdusir nin sarong tema na mapaluwas nin manlaenlaen na komento. An mga hoben sagkod gurang maoogmang marhay sa aspektong ini kan pagtiripontipon. Kun, bilang an kag-organisar, ginigiyahan nindo an mga bagay sa madonong asin mataktikang paagi, an saindong ‘pagkarasonable maaaraman’ kan mga presente. (Filipos 4:5) Maririsa ninda na igwa kamo nin buhay na pagtubod na nakakaapektar sa gabos na kabtang kan saindong buhay.

Mga Kasal Asin Punsion sa Kasal

7. Taano ta angay na konsideraron an pagpaplano nin mga kasal asin an konektadong mga pagtiripontipon?

⁷ An sarong espesyal na okasyon tanganing maggayagaya iyo an Kristianong kasal. An suanoy na mga lingkod nin Dios, kaiba si Jesus asin an saiyang mga disipulo, gikan sa boot na nakikabtang sa siring na maogmang mga okasyon, kaiba an konektadong punsion. (Genesis 29:21, 22; Juan 2:1, 2) Minsan siring, kan nakaagi pa sanang mga panahon, malinaw na ipinapaheling kan mga eksperyensia na an pagplano kan sosyal na mga aktibidad na konektado sa mga kasal nangangaipo nin espesyal na paghihingoa tanganing iyan magpabanaag nin marahay na paghusgar asin Kristianong pagkatimbang. Pero, ini normal na mga aspekto kan buhay na nagtatao nin oportunidad sa sarong Kristiano na ipaheling an saiyang pagtubod.

8, 9. Paano an mga kaugalean sa dakol na kasal nagpapatunay kan mababasa niato sa 1 Juan 2:16, 17?

⁸ An dakol na tawo na dai nakakaaram ni may pakiaram manongod sa diosnon na mga prinsipyo minamansay an kasal bilang sarong okasyon para sa mga pagpalabilabi, o sarong okasyon na dian tibaad an mga pagpalabilabi pinapasensiahan na sana. Sa sarong magasin sa Europa, an sarong bagong ikasal na agom na babae nagsabi manongod sa saiyang garo sa reynang kasal: ‘Nagsakay kami sa sarong karuwahe sa parada na guyod nin apat na kabayo na sinusundan nin 12 kalesa asin sarong karuwahe na sinasakayan nin sarong banda na nagtutugtog nin musika. Dangan igwa kami nin puerte nanggad na menu asin marahayon na musika; pambihirang marhay idto. Siring kan gusto ko, ako an reyna kan aldaw na idto.’

⁹ Minsan ngani nagkakalaenlaen an mga kaugalean segun sa lugar, an siring na mga sentimiento malinaw na nagpapatunay sana sa isinurat ni apostol Juan: “An gabos na nasa kinaban—an mawot kan laman asin an mawot kan mga mata asin an pagpaabaw-abaw kan kaya sa buhay—bakong gikan sa Ama, kundi gikan sa kinaban.” Maiimahinar daw nindo an sarong maygurang na ikakasal na Kristiano na gugustohon na magkaigwa nin garo sa reynang kasal na may magarbong marhay asin garo sa fairy-tale na punsion? Imbes, maninigong ipabanaag kan saindang punto de vista na kinokonsiderar ninda na “an naggigibo kan kabotan nin Dios magdadanay sagkod lamang.”—1 Juan 2:16, 17.

10. (a) Para sa sarong makatanosan na kasal, taano ta kaipuhan an pagpaplano? (b) Paano maninigong magdesisyon manongod sa kun sairisay an iimbitaran?

¹⁰ Gusto kan mga ikakasal na Kristiano na magin realistiko sagkod makatanosan, asin makakatabang sa sainda an Biblia. Minsan ngani mahalaga an aldaw kan kasal, aram ninda na iyan kapinonan sana nin buhay may agom kan duwang Kristiano na may esperansang mabuhay na daing katapusan sa ngapit. Dai sinda obligadong magkaigwa nin engrandeng punsion sa kasal. Kun magdesisyon sindang magkaigwa nin pagtiripontipon, gugustohon nindang kuentahon an gastos sa pagtiripontipon asin isip-isipon kun magigin anong klase iyan. (Lucas 14:28) Sa saindang Kristianong pamumuhay na magkaibanan, an agom na lalaki an magigin payo sono sa Kasuratan. (1 Corinto 11:3; Efeso 5:22, 23) Kaya an nobyo an pangenot na may paninimbagan sa punsion sa kasal. Siempre, mamomoton niang ipapakipag-olay sa saiyang magigin agom an mga bagay na siring baga sa kun sairisay an gusto o kaya nindang imbitaran sa punsion sa kasal. Tibaad bakong posible o praktikal na imbitaran an gabos nindang katood asin paryente; huli kaini, kaipuhan na gumibo nin rasonableng mga desisyon. An ikakasal maninigong magkaigwa nin kompiansa na kun dai ninda maiimbitaran an nagkapirang kapwa Kristiano, an mga ini magigin mapagsabot asin dai makokolgan an boot.—Eclesiastes 7:9.

“Namamahala sa Punsion”

11. Ano an puedeng magin papel nin “namamahala sa punsion” sa sarong kasal?

¹¹ Kun magdesisyon an ikakasal na mag-andam nin pagtiripontipon tanganing iselebrar an kasal, paano ninda masesegurado na magdadanay na may dignidad an okasyon? Sa laog nin dakol na taon na ngonyan, rinerekonoser kan mga Saksi ni Jehova an kadonongan na iiba an sarong aspekto na nasambitan may koneksion sa pagtiripontipon na inatenderan ni Jesus sa Cana. Igwa nin sarong “namamahala sa punsion,” na saro nanggad na responsableng kapagtubod. (Juan 2:9, 10) Kaagid kaiyan, an sarong madonong na nobyo mapili nin sarong Kristianong tugang na lalaki na maygurang sa espirituwal para sa importanteng marhay na papel na ini. Pakatapos na maaraman an mga kamawotan asin gusto kan nobyo, puedeng gibohon kan namamahala sa punsion an mga detalye bago sagkod durante kan pagtiripontipon.

12. Ano an maninigong konsideraron kan nobyo mapadapit sa paggamit nin inomon na de alkohol?

¹² Kaoyon kan tinokar sa parapo 5, nagdesisyon an nagkapirang ikakasal na dai na magpuesto nin inomon na de alkohol sa punsion sa kasal ta tibaad raoton kaini an kaogmahan asin kapangganahan kan okasyon. (Roma 13:13; 1 Corinto 5:11) Pero, kun magpuesto sinda nin inomon na de alkohol, seseguradohon kan nobyo na ini iseserbi nin tama sana. Igwa nin arak sa kasal na inatenderan ni Jesus sa Cana, asin nagtao sia nin de kalidad na arak. Interesante nanggad, an namamahala sa punsion na idto nagkomento: “An gabos na iba pa ilinuluwas nguna an marahay na arak, asin kun burat na an mga tawo, an hababang klase. Itinagama mo an marahay na arak sagkod ngonyan.” (Juan 2:10) Sierto nanggad, si Jesus dai nagkontribwir sa ano man na pagbuburat, huling minamansay nia iyan na sala. (Lucas 12:45, 46) Sa pagpahayag nin pagkasorpresa huli sa kalidad kan arak, lininaw kan namamahala sa punsion na naobserbaran nia na sa nagkapirang pangyayari may mga bisita sa kasal na talagang naburat. (Gibo 2:15; 1 Tesalonica 5:7) Huli kaini, dapat na seguradohon kan nobyo sagkod kan mapagtitiwalaan na Kristiano na pinili nia bilang namamahala sa punsion na sinusunod kan gabos na presente an malinaw na direktiba: “Dai kamo maburat sa arak, na dian igwa nin karigsokan.”—Efeso 5:18; Talinhaga 20:1; Oseas 4:11.

13. Ano an maninigong konsideraron kan ikakasal kun iareglo ninda na magkaigwa nin musika sa punsion sa kasal, asin taano?

¹³ Kun paanong totoo iyan sa iba pang mga pagtiripontipon, kun magkakaigwa nin musika, maninigong magtao nin igong atension sa kosog kan tanog kaiyan tanganing magkadangogan an mga nag-oorolay. An sarong Kristianong magurang sa kongregasyon nagsabi: “Mantang nagrararom an banggi, kun an orolay nagigin nang bibo o nagpoon na an pagbayle, kun beses an tanog nin musika nagkokosog. An musika na dati maluya sana tibaad magin makosog asin makaolang sa pag-orolay. An punsion sa kasal nagtatao nin oportunidad para sa nakakarahay na asosasyon. Makamomondo nanggad kun maraot an oportunidad na ini huli sa makosog na musika!” Sa bagay man na ini, an nobyo asin an namamahala sa punsion kaipuhan na humiro sa responsableng paagi, na dai ipinapabaya sa mga musikero, baga man binayadan o dai, na kontrolon ninda an klase asin kosog kan musika. Si Pablo nagsurat: “Ano man an gibohon nindo sa tataramon o sa gibo, gibohon nindo an gabos na bagay sa ngaran kan Kagurangnan na Jesus.” (Colosas 3:17) Kun pumuli na an mga bisita pakatapos kan punsion sa kasal, magigirumdoman daw ninda an musika na nagpapabanaag na ginigibo kan ikinasal an gabos na bagay sa ngaran ni Jesus? Maninigo na iyan an mangyari.

14. Ano an maninigong magirumdoman na may kaogmahan kan mga Kristiano manongod sa sarong kasal?

¹⁴ Iyo, an marahay an pagkaareglong kasal magigirumdoman na may kaogmahan. Si Adan asin Edyta, na 30 taon nang mag-agom, nagkomento manongod sa sarong kasal: “Mamamatean talaga nindo an Kristianong kamugtakan sa palibot. May mga awit na nag-oomaw ki Jehova alagad igwa man nin nagkapirang marahayon na nakakaaling na presentasyon. An pagbayle asin musika sekondaryo sana. Nakakaogma asin nakakapakosog iyan, asin an gabos na bagay kaoyon kan mga prinsipyo sa Biblia.” Malinaw nanggad, dakula an magigibo kan nobya asin nobyo tanganing ipaheling na pinapatunayan ninda an saindang pagtubod paagi sa saindang mga gibo.

Mga Regalo sa Kasal

15. Anong konseho sa Biblia an puedeng iaplikar mapadapit sa mga regalo sa kasal?

¹⁵ Sa dakol na nasyon ordinaryo sana para sa mga katood asin paryente na magtao nin regalo sa mga ikinakasal. Kun maregalo kamo, ano an puede nindong girumdomon? Bueno, girumdoma an komento ni apostol Juan manongod sa “pagpaabaw-abaw kan kaya sa buhay.” Ikinonektar nia an siring na pagpaabaw-abaw, bakong sa mga Kristiano na nagpapaheling kan saindang pagtubod paagi sa gawe-gawe, kundi sa ‘kinaban na maagi sana.’ (1 Juan 2:16, 17) Huli sa ipinasabong na komento ni Juan, maninigo daw na ianunsio sa publiko kan bagong kasal an ngaran kan mga nagtao nin regalo? An mga Kristiano sa Macedonia asin Acaya nagtao nin mga kontribusyon sa mga tugang sa Jerusalem, alagad mayo nin nagpaparisa na iinanunsio sa publiko an ngaran ninda. (Roma 15:26) Gugustohon kan dakol na Kristiano na nagtatao nin regalo sa kasal na magdanay na dai midbid imbes na mag-apod nin dai maninigong atension sa saindang sadiri. Mapadapit sa bagay na ini, repasohon an konseho ni Jesus na yaon sa Mateo 6:1-4.

16. Paano malilikayan kan mga bagong kasal na makolgan an boot nin iba kun dapit sa mga regalo sa kasal?

¹⁶ An pag-anunsio kan ngaran kan mga nagtatao nin regalo puedeng magbunga nin ‘pagpukaw nin pagdaraogan’ kun dapit sa kun arin an mas marahay o mas mahal na regalo. Huli kaini, lilikayan kan madonong na mga bagong kasal na Kristiano an pag-anunsio sa publiko kan ngaran kan mga nagtao nin regalo. An pag-anunsio kan ngaran kan mga nagtao tibaad makapasupog sa iba na tibaad dai kayang magtao nin regalo. (Galacia 5:26; 6:10) Totoo, bakong maraot na maaraman kan nobya asin nobyo kun siisay an nagtao nin partikular na regalo. Posible nindang maaraman iyan paagi sa angay na kard na kaiba kan regalo alagad dai iyan binabasa sa publiko. Kun nagbabakal, nagtatao, asin nag-aako nin mga regalo sa kasal, kita gabos may oportunidad na patunayan na dawa sa siring na pribadong bagay, an satong pagtubod nakakaapektar sa satong gawe-gawe.a

17. An mga Kristiano maninigong magkaigwa nin anong pasohan mapadapit sa saindang pagtubod asin mga gibo?

¹⁷ Tunay nanggad na labi pa kisa pamumuhay na may marahay na moral, pag-atender sa Kristianong mga pagtiripon, asin pakikikabtang sa paghuhulit an kalabot sa pagpapatunay sa satong pagtubod. Logod na an lambang saro sa sato magkaigwa nin buhay na pagtubod na nakakaapektar sa gabos na ginigibo niato. Iyo, puede niatong ipaheling an satong pagtubod paagi sa mga gibo na “lubos na ginigibo,” kaiba an mga aspekto nin buhay na tinokar sa enotan.—Kapahayagan 3:2.

18. Paano nagigin totoo an Juan 13:17 may koneksion sa Kristianong mga kasal asin pagtiripontipon?

¹⁸ Pakatapos na magtao si Jesus nin marahayon na halimbawa sa saiyang maimbod na mga apostol paagi sa hamak na akto nin paghanaw sa saindang mga bitis, sia nagsabi: “Kun aram nindo an mga bagay na ini, maogma kamo kun gibohon nindo iyan.” (Juan 13:4-17) Sa rehion na iniistaran niato ngonyan, tibaad dai kaipuhan o bakong normal na hanawan an bitis nin ibang tawo, arog baga nin sarong bisita sa satong harong. Minsan siring, arog kan natokar na niato sa artikulong ini, may iba pang mga aspekto nin buhay na dian puede niatong ipaheling an satong pagtubod paagi sa mamomoton, makonsiderasyon na gawe-gawe, kaiba na an may koneksion sa sosyal na mga pagtiripontipon asin Kristianong kasal. Totoo iyan baga man kita ikakasal o bisita sa sarong kasal o sa kasunod na maogmang pagtiripontipon nin mga Kristiano na gustong ipaheling an saindang pagtubod paagi sa saindang gawe-gawe.

[Nota sa Ibaba]

Ano an Isisimbag Nindo?

Paano nindo papatunayan an saindong pagtubod

• kun nag-oorganisar nin sarong sosyal na pagtiripontipon?

• kun nag-oorganisar nin sarong kasal o punsion sa kasal?

• kun nagtatao o nag-aako nin mga regalo sa kasal?

[Ritrato sa pahina 24]

Dawa kun dikit sana an iimbitaran, magpagiya kamo sa “kadonongan hale sa itaas”

Dugangan an Kagayagayahan Asin Dignidad kan Saindong Aldaw kan Kasal

“AN ALDAW kan kasal ko an saro sa pinakamakahulogan asin pinakamagayagayang aldaw sa buhay ko,” an sabi ni Gordon, na haros 60 taon nang may agom. Ano an nagpapangyari sa aldaw kan kasal na magin makahulogan nanggad para sa tunay na mga Kristiano? Iyan an aldaw na sinda naggigibo nin sagradong kapanugaan sa saindang mga namomotan na marhay—sa saindang agom asin ki Jehova Dios. (Mateo 22:37; Efeso 5:22-29) Iyo, an mga magkailusyon na nagpaplanong mag-agom gustong magin maogma sa aldaw kan saindang kasal, alagad gusto man nindang tawan nin onra an Kagtugdas nin pag-agoman.—Genesis 2:18-24; Mateo 19:5, 6.

Paano madudugangan kan nobyo an dignidad kan maogmang okasyon na ini? Ano an magigibo kan nobya tanganing magpaheling nin onra sa saiyang agom asin ki Jehova? Paano an ibang nag-aatender makakadugang sa kagayagayahan kan aldaw kan kasal? An pag-estudyar sa nagkapirang prinsipyo sa Biblia makakatabang tanganing masimbag an mga hapot na iyan, asin an pag-aplikar kan mga prinsipyong iyan makakaina sa posibleng mga problema na puedeng makabawas sa halaga kan espesyal na okasyon na ini.

Siisay an May Paninimbagan?

Sa dakol na nasyon, an sarong ministro kan Mga Saksi ni Jehova puedeng legal na mangenot sa seremonya sa kasal. Dawa sa mga lugar na an legal na lakdang dapat na isagibo nin sarong opisyal sibil, an ikakasal tibaad gustong magkaigwa nin pahayag na basado sa Biblia. Sa siring na pahayag, parateng hinahagad sa nobyo na horophoropon an tao nin Dios na katongdan bilang payo kan pamilya. (1 Corinto 11:3) Huli kaiyan, an nobyo an may pangenot na paninimbagan sa kun ano an mangyayari sa kasal. Siempre, an mga areglo para sa mismong seremonya sa kasal asin para sa ano man na pagtiripontipon na tibaad kasunod parateng pinaplano nanggad antes pa. Taano ta tibaad magin depisil ini?

An sarong dahelan iyo na an mga paryente sa man-ibong-ibong na lado tibaad magprobar na magkaigwa nin nangingibabaw na impluwensia sa mga plano sa kasal. Si Rodolfo, na dakol na an ikinasal, nagsasabi: “Kun beses, napapaatubang an nobyo sa grabeng pangigipit kan mga paryente, nangorogna kun sinda nagtatabang sa gastos para sa punsion sa kasal. Tibaad igwa sinda nin makosog na mga opinyon manongod sa kun ano an maninigong mangyari durante kan seremonya asin punsion sa kasal. Puedeng paluyahon kaini an sono sa Kasuratan na katongdan kan nobyo bilang an saro na may paninimbagan sa okasyon.”

Si Max, na labing 35 taon nang nagkakasal, nagkokomento: “Narisa ko an tendensia na an nobya an nangengenot sa pagdesisyon sa kun ano an mangyayari sa kasal asin punsion, na mayong gayong nasasabi an nobyo.” Si David, na dakol na man an ikinasal, nagkokomento: “An mga nobyo tibaad bakong tuod na iyo an mangenot asin parateng bakong imbuelto nanggad sa mga preparasyon sa kasal.” Paano epektibong ikakasaabaga kan nobyo an saiyang paninimbagan?

An Komunikasyon Nakakadugang sa Kagayagayahan

Tanganing mapangganang magibo kan nobyo an saiyang paninimbagan para sa mga preparasyon sa kasal, dapat siang makikomunikar nin epektibo. An Biblia direktang nagsasabi: “Nasusudya an mga plano kun mayo nin pribadong orolay.” (Talinhaga 15:22) Minsan siring, malilikayan an dakol na pagkasudya nin linalaoman kun ipapakipag-olay nguna kan nobyo an mga preparasyon sa kasal sa nobya, mga miembro kan pamilya, asin iba pa na makakatao nin madonong na sadol na basado sa Biblia.

Iyo, mahalagang marhay na pag-olayan nguna kan magkatratong pakasal an saindang mga plano asin linalaoman. Taano? Bueno, hinanyoga an nagkapirang komento gikan ki Ivan asin sa saiyang agom na si Delwyn, na dakol nang taon na maogmang nag-iibanan bilang mag-agom alagad gikan sa magkalaen na kultura. Ginigirumdom an saindang mga plano sa kasal kaidto, si Ivan nagsabi: “Igwa ako nin depinidong mga ideya manongod sa kun ano an gusto ko para sa kasal ko, kaiba na an sarong punsion na presente an gabos kong mga katood, sarong keik sa kasal, asin an sakong nobya na nakasulot nin puting trahe de boda. Sa ibong na lado, gusto ni Delwyn an sarong kasal na dikit sana an tawo asin simple na mayo na nin keik. Inisip nia ngani na magsulot nin ordinaryong bado imbes na trahe de boda.”

Paano rinesolberan kan ikakasal na ini an mga pagkakalaen na ini? Paagi sa maboot asin onestong komunikasyon. (Talinhaga 12:18) Idinugang ni Ivan: “Pinag-adalan niamo an basado sa Biblia na mga artikulo manongod sa mga kasal, siring kan mga ipinublikar sa The Watchtower na Abril 15, 1984.a An artikulong ini nakatabang sa samo na magkaigwa nin espirituwal na punto de vista mapadapit sa okasyon. Huli sa pagkakalaen kan pinaghalean niamo, kinaipuhan niamong magpahunod sa nagkapirang kabtang nin personal na gusto. Pareho mi binago an samong aktitud.”

Iyan man an ginibo ni Aret asin Penny. Mapadapit sa aldaw kan saindang kasal, si Aret nagsasabi: “Pinag-olayan niamo ni Penny an samong magkalaen na kamawotan para sa kasal, asin nahimo niamong magkaoyon. Namibi kami para sa bendisyon ni Jehova sa aldaw kan kasal. Hinagad ko man an sadol kan samong mga magurang asin iba pang maygurang na mag-agom sa kongregasyon. Nakatabang na marhay an saindang mga suhestion. Bilang resulta, nagin magayon an kasal niamo.”

Pagpapadanay nin Dignidad sa Paggubing Asin Pag-alinyar

Natural sana na an nobya sagkod nobyo gustong magin magayon an bulos sa saindang kasal. (Salmo 45:8-15) Tibaad maggamit sinda nin panahon, paghihingoa, asin kuarta para sa angay na gubing. Arin na mga prinsipyo sa Biblia an makakatabang sa sainda na pilion kun ano an may dignidad sagkod magayon na gubing?

Estudyare kun ano an isinusulot kan nobya para sa okasyon. Minsan ngani nagkakalaenlaen an gusto nin lambang tawo sa lambang nasyon, an konseho kan Biblia aplikado sa gabos na lugar. An mga babae kaipuhan na “magsamno sa saindang sadiri nin husay na gubing, na may kabinian asin toltol na isip.” Iyan minaaplikar sa mga Kristiana sa gabos na panahon, asin siertong kabale dian an aldaw kan kasal. An katunayan iyo na an sarong magayagayang kasal dai nangangaipo nin “mamahalon na gayong gubing.” (1 Timoteo 2:9; 1 Pedro 3:3, 4) Nakakakontento nanggad kun iinaaplikar an sadol na ini!

Si David, na nasambitan sa kapinonan, nagkokomento: “An kadaklan na ikakasal naghihingoa na sunodon an mga prinsipyo sa Biblia, asin sinda maninigo sa komendasyon. Pero, may mga pangyayari na bakong mabini an mga trahe de boda kan mga nobya asin abay sa kasal, na haka-haka an daghan o silag.” Sa saiyang pakikipag-olay sa nobya asin nobyo antes pa, an sarong maygurang na Kristianong magurang sa kongregasyon tinabangan sinda na mapagdanay an espirituwal na pagmansay. Paano? Paagi sa paghapot sa sainda kun baga an iniisip nindang isusulot magigin talagang mabini na isulot sa Kristianong pagtiripon. Totoo, an estilo nin gubing tibaad laen sa komun na gubing para sa pagtiripon, asin an isinusulog para sa kasal tibaad magpabanaag kan lokal na kostumbre, alagad an kabinian maninigong kaoyon kan may dignidad na Kristianong mga pamantayan. Dawa kun an nagkapira sa kinaban tibaad mansayon na labi-labi kanakakalimitar an moral na mga susundon sa Biblia, gusto kan tunay na mga Kristiano na labanan an mga pagprobar kan kinaban na moldehon sinda kaini.—Roma 12:2; 1 Pedro 4:4.

“Imbes na mansayon an mga gubing o an punsion bilang an pinakamahalagang bagay,” an sabi ni Penny, “nagkonsentrar kami ni Aret sa seremonya, an espirituwal na kabtang kan okasyon. Iyan an pinakamahalagang parte kan aldaw. An espesyal na mga bagay na sakong nagigirumdoman, bakong kun ano an sakong gubing o kinakan, kundi kun sairisay an kaiba ko kan aldaw na idto asin an kaogmahan na namatean ko sa pagpakasal sa lalaking namomotan ko.” Marahay na girumdomon kan ikakasal na Kristiano an siring na mga kaisipan mantang pinaplano ninda an saindang kasal.

An Kingdom Hall—Sarong May Dignidad na Lugar

Dakol na ikakasal na Kristiano an nagmamawot na gibohon an saindang seremonya sa kasal sa Kingdom Hall kun may puedeng gamiton. Taano ta mas suno ninda ini? Ipinaliwanag nin sarong ikakasal an saindang rason: “Narealisar niamo na an pag-agom sagradong areglo ni Jehova. An pagpakasal sa Kingdom Hall, an satong lugar nin pagsamba, nakatabang na itudok sa isip niamo poon sa kapinonan na kaipuhan na magin kabtang si Jehova sa pag-agoman mi. An saro pang pakinabang sa pagsagibo kan seremonya sa Kingdom Hall imbes na sa ibang lugar iyo na ipinaheling kaiyan sa dai nagtutubod na mga paryente niamo na nag-atender kun gurano kahalaga para sa samo an pagsamba ki Jehova.”

Kun an kamagurangan sa kongregasyon na responsable para sa Kingdom Hall magtao nin permiso na duman gibohon an kasal, an ikakasal maninigong ipaaram sa sainda nin patienot an mga preparasyon na pinaplano. An sarong paagi na an nobya asin nobyo makakapaheling nin tamang paggalang para sa mga imbitado sa kasal iyo an pagigin desididong umabot sa nakaiskedyul na oras kan kasal. Asin gusto nanggad ninda na seguradohon na gigibohon an gabos na bagay sa may dignidad na paagi.b (1 Corinto 14:40) Sa siring, lilikayan ninda an bako nang disenteng mga paheling na karakteristiko nin dakol na kinabanon na kasal.—1 Juan 2:15, 16.

An mga nag-aatender sa kasal makakapaheling man na igwa sinda kan punto de vista ni Jehova mapadapit sa kasal. Halimbawa, dai ninda lalaoman na malabawan kan kasal an ibang Kristianong mga kasal, na garo may kompetensia sa kun kiisay na kasal an mas magarbo. Narerealisar man kan maygurang na mga Kristiano na an pagigin presente sa Kingdom Hall para sa pahayag na basado sa Biblia mas mahalaga asin kapakipakinabang kisa sa pagigin presente sa punsion sa kasal o sa pagtiripontipon na tibaad sumunod. Kun saro sana sa duwang ini an puedeng atenderan nin sarong Kristiano huli sa panahon o mga kamugtakan, mas marahay nanggad an pagigin presente sa Kingdom Hall. An sarong magurang sa kongregasyon na an ngaran William nagsasabi: “Kun an mga bisita mayo sa Kingdom Hall dawa makakaduman man kutana alagad presente sa punsion, ini nagpapaheling nin kadaihan nin pag-apresyar sa pagigin sagrado kan okasyon. Dawa kun bako kitang imbitado sa punsion, puede niatong ipaheling an satong suporta sa nobya saka nobyo asin magtao nin marahayon na patotoo sa dai nagtutubod na mga paryente na yaon sa kasal paagi sa pag-atender sa seremonya sa Kingdom Hall.”

Kagayagayahan na Nagpapadagos Pakatapos kan Aldaw kan Kasal

An selebrasyon nin kasal ginibong dakulang negosyo kan kinaban nin komersio. Oyon sa sarong bareta kasuarin pa sana, an promedyong kasal sa Estados Unidos “nagkakantidad nin $22,000, o kabanga kan promedyong [taonan] na ginaganar nin sarong pamilya sa Amerika.” Huling naimpluwensiahan kan komersial na propaganda, dakol na bagong kasal o an saindang pamilya an nagkakaigwa nin nakakapagabat na utang para sa sarong aldaw na iyan, na pasan-pasan ninda sa laog nin dakol na taon. Iyan daw an madonong na paagi sa pagpoon nin pag-agom nin saro? An mga mayong aram o mayong labot sa mga prinsipyo sa Biblia tibaad pilion an siring na pagkamagarbo, alagad laen nanggad sa tahaw nin tunay na mga Kristiano!

Paagi sa paglimitar sa kabilangan kan maatender sa saindang kasal sa kun ano an tama sana saka kaya kan badyet asin paagi sa pagkonsentrar sa espirituwal na aspekto kan okasyon, dakol na ikakasal na Kristiano an nahimong gamiton an saindang panahon asin kuarta kaoyon kan saindang pagdusay sa Dios. (Mateo 6:33) Estudyare an halimbawa ni Lloyd asin Alexandra, na nagpadagos sa bilog na panahon na ministeryo sa laog nin 17 taon poon kan sinda ikasal. Si Lloyd nagkomento: “An nagkapira tibaad minansay an samong kasal bilang medyo simpleng okasyon, alagad ogmahon kami ni Alexandra. Namatean niamo na an aldaw kan kasal mi maninigong, bakong pinansial na pagabat na aatubangon, kundi sarong selebrasyon na areglo ni Jehova tanganing magtao nin dakulang kaogmahan sa duwang tawo.”

Idinugang ni Alexandra: “Ako nasa ministeryo bilang payunir bago kami ikinasal, asin habo kong butasan an pribilehiong ini tanganing magkaigwa sana nin magarbong kasal. Espesyal na marhay an aldaw kan kasal niamo. Minsan siring, iyan kapinonan sana kan bilog na buhay na kami magkaibanan. Inaplikar niamo an sadol na likayan an pagkonsentrar na marhay sa pagpakasal asin hinagad niamo an paggiya ni Jehova sa samong buhay bilang mag-agom. Ini tunay na nagbunga sa samo nin bendisyon ni Jehova.”c

Iyo, an aldaw kan kasal nindo sarong espesyal na okasyon. An mga aktitud asin ginigibo na risang-risa sa aldaw na iyan puedeng magtao nin arogan sa saindong ngapit bilang mag-agom. Kun siring, magtiwala ki Jehova para sa paggiya. (Talinhaga 3:5, 6) Papagdanayon na pangenot sa isip an espirituwal na kahulogan kan aldaw na iyan. Suportaran an lambang saro sa saindong tao nin Dios na mga katongdan. Sa siring, makakagibo kamo nin masarig na pundasyon para sa saindong pag-agoman, asin paagi sa bendisyon ni Jehova, magkakaigwa kamo nin kagayagayahan na nagdadanay pakatapos kan aldaw kan saindong kasal.—Talinhaga 18:22.