Maraot na mga Pangyayari na an Kasunod Paglaom

“Sa huring mga aldaw maabot an delikado asin masakit na mga panahon.”—2 TIMOTEO 3:1.

NABARETAAN mo na daw—o nahiling mismo—an arin man sa minasunod na makamumundong mga pangyayari?

● Dakul an nagadan dahil sa sarong malalang hilang.

● Ginatos an nagadan dahil sa tiggutom.

● Ribo-ribo an nagadan dahil sa linog, asin dakul na iba pa an nawaran nin harong.

Sa masunod na mga pahina, mahihiling mo an nagkapira sa nakakapaisip na mga katotoohan manungod sa mga pangyayaring iyan. Mahihiling mo man na ihinula na kan Bibliya na an arog kaiyan na mga pangyayari magigin kabtang kan peryodo nin panahon na inaapod na “huring mga aldaw.”

Ginibo an mga artikulong ini bako para kumbinsiron ka na nabubuhay kita sa kinaban na kadakul nin problema. Posibleng marhay na aram mo na iyan. Imbes, dinisenyo ini para tawan ka nin paglaom. Ipapahiling kaini saimo na an kautuban kan anom na propesiya nangangahulugan na madali nang matapos an “huring mga aldaw.” Pag-uulayan man sa seryeng ini an nagkapira sa mga parating pagkontra sa pruwebang iyan saka matao man ini nin marahayon na dahilan kun taano ta makakaasa kita na magigin magayon an satong puturo.

Propesiya 1. Linog

“Magkakaigwa nin makusog na mga linog.”—LUCAS 21:11.

● Nailigtas si Winnie, sarong 16 na bulan na umboy, kan makua siya hali sa narumpag na edipisyo sa Haiti. Nadangog kan sarong TV reporter na nagbabareta sa nangyaring linog an maluway na paghibi kan aki. Nakaligtas siya sa linog, pero nagadan an mga magurang niya.

ANO AN IPINAPAHILING KAN REKORD? Kan maglinog sa Haiti nin magnitude 7.0 kan Enero 2010, labing 300,000 katawo an nagadan. Asin 1.3 milyon an nawaran nin harong. Dawa ngani makusugon iyan, bako lang sa Haiti nangyari an arog kaiyan na linog. Dai mababa sa 18 makukusog na linog an nangyari puon kan Abril 2009 sagkod Abril 2010 sa manlain-lain na parte kan kinaban.

ANO AN PARATING PAGKONTRA? Dati man sana an bilang kan nangyayaring mga paglinog; mas naaaraman ta lang iyan ngunyan kisa kaidto dahil moderno na kaya an teknolohiya.

BALIDO DAW AN PAGKONTRANG IYAN? Pag-isipan ini: Bako an bilang kan mga linog sa huring mga aldaw an tinawan nin duon kan Bibliya. Imbes, sinabi kaiyan na magkakaigwa nin sunod-sunod na “makusog na mga linog” sa “manlain-lain na lugar,” na huli kaiyan magigin saro iyan sa risang-risang pangyayari sa mahalagang peryodong ini kan kasaysayan.—Marcos 13:8; Lucas 21:11.

ANO SA HILING MO? Nakakaeksperyensiya na daw kita nin makusog na mga linog, arog kan ihinula sa Bibliya?

Kun mga linog sana an gigibuhon na basehan, tibaad garo baga bako pa iyan masarig na pruweba na nabubuhay na kita sa huring mga aldaw. Pero an mga linog saro pa sana sa mga propesiyang nauutob na ngunyan. Pag-isipan an ikaduwa.

[Blurb]

“An apod mi [na mga geophysicist] diyan makusog na mga linog. Pero an apod diyan kan iba makatatakot na mga trahedya.”—KEN HUDNUT, U.S. GEOLOGICAL SURVEY.

[Picture Credit Line]

© William Daniels/Panos Pictures

Propesiya 2. Tiggutom

“Magkakaigwa man nin kakulangan nin kakanon.”—MARCOS 13:8.

● Sarong lalaki an nagpasiring sa baryo nin Quaratadji, Niger. An mga pinsan saka mga tugang kaini nag-abot man duman hali sa mga puwerang lugar kan nasyon para maghanap nin kakanon. Pero, solong nakahigda ngunyan an lalaki sa sarong banig na nakalatag sa daga. Taano ta solo lang siya? “Mayo siyang maitaong kakanon [sa saiyang pamilya] saka dai niya kayang mahiling sinda na nagugutom,” an paliwanag ni Sidi, na pamayo kan baryo.

ANO AN IPINAPAHILING KAN REKORD? Sa bilog na kinaban, haros 1 sa kada 7 tawo an dai nakakakakan nin igong kakanon kada aldaw. Mas malala sa sub-Saharan Africa ta 1 sa kada 3 tawo an parating nakakaeksperyensiya nin gutom. Para mas masabutan iyan, isipa an sarong pamilya na kompuwesto nin sarong ama, sarong ina, saka sarong umboy. Kun an kakanon igo sana para sa duwa, siisay an dai makakan? An ama? an ina? an umboy? Iyan an pinagdedesisyunan kan arog kaiyan na mga pamilya sa aroaldaw.

ANO AN PARATING PAGKONTRA? Sobra an kakanon na pinoprodusir kan daga para sa gabos. Kaipuhan sanang mas pakarhayon an pagmanehar diyan.

BALIDO DAW AN PAGKONTRANG IYAN? Totoo, mas dakul an kayang maprodusir asin maipadarang kakanon ngunyan kisa kasuarin pa man. Dapat kuta naaasikaso kan mga gobyerno nin tawo an suplay nin kakanon sa daga tanganing maresolberan an problema sa gutom. Pero, dawa pirang dekada na sindang nagmamaigot na magibo iyan, dai pa man giraray ninda iyan nagigibo.

ANO SA HILING MO? Nauutob na daw an sinasabi kan Marcos 13:8? Sa ibong kan pag-uswag sa teknolohiya, lakop daw an kakulangan nin kakanon sa bilog na kinaban?

Sa parati, an kasunod kan mga linog saka tiggutom mga problema na resulta kan saro pang kabtang kan tanda kan huring mga aldaw.

[Blurb]

“Labing 30 porsiyento nin mga aki sa bilog na kinaban na nagadan sa pulmonya, diarrhea saka iba pang mga hilang an dai kuta nagadan kun bako lang sindang kulang sa nutrisyon.”—ANN M. VENEMAN, DATING EXECUTIVE DIRECTOR KAN UN CHILDREN’S FUND.

[Picture Credit Line]

© Paul Lowe/Panos Pictures

Propesiya 3. Hilang

“An mga tawo . . . magkakaigwa nin grabeng mga hilang.”—LUCAS 21:11, Contemporary English Version.

● Ginibo ni Bonzali, sarong public health officer sa sarong nasyon sa Aprika na naapektaran na marhay nin giyera sibil, an saiyang pinakamakakaya para bulungon an mga minero sa saiyang banwa na nagkaigwa kan nakakagadan na Marburg virus.a Naghagad siya nin tabang sa mga opisyal kan sarong mas dakulang siyudad, pero mayo nin nagtabang sa sainda. Pakalihis nin apat na bulan, may nag-abot nang tabang, pero si Bonzali gadan na. Naulakitan siya nin Marburg kan mga minero na pighihinguwa niyang mailigtas.

ANO AN IPINAPAHILING KAN REKORD? An mga lower respiratory infection (arog nin pulmonya), mga hilang na konektado sa pag-diarrhea, HIV/AIDS, tuberkulosis, asin malaria an pira sa pinakanakakagadan na mga hilang na nagtama sa katawuhan. Sa dai pa sana nahahaloy na nakaaging taon, an limang klaseng ini nin hilang guminadan nin 10.7 milyon katawo. Sa ibang pagtaram, poko mas o menos sarong tawo an nagagadan kada tulong segundo sa bilog na taon dahil sa mga hilang na iyan.

ANO AN PARATING PAGKONTRA? An populasyon sa kinaban padagos na nagdadakul, kaya siyempre, mas madakul an kaso nin nagkakahilang ta mas dakul na tawo an puwedeng maulakitan.

BALIDO DAW AN PAGKONTRANG IYAN? Duminakul na marhay an populasyon kan kinaban. Pero nag-uswag man an kakayahan nin tawo na ma-diagnose, makontrol, saka mabulong an mga hilang. Kaya, bako daw na dapat mabawasan kuta an mga hilang na nakakaapektar sa mga tawo? Pero kabaliktaran nanggad an nangyayari.

ANO SA HILING MO? Nagkakaigwa daw an mga tawo nin malalang mga hilang arog kan ihinula kan Bibliya?

An mga linog, tiggutom, saka hilang nagdadara nin dakulang danyos sa minilyon na tawo. Pero minilyon man an nagdudusa sa kamot kan kapwa ninda—dakul an nabibiktima kan mga tawong dapat kuta nagpoprotektar sainda. Hilingon ta an propesiya kan Bibliya manungod diyan.

[Nota sa Ibaba]

[Blurb]

“Nakakatakot na marhay an makakan nin sarong leon o nin iba pa, pero nakakatakot man an kakanon nin sarong hilang asin mahiling man na nangyayari man iyan sa iba.”—MICHAEL OSTERHOLM, SARONG EPIDEMIOLOGIST.

[Picture Credit Line]

© William Daniels/Panos Pictures

Propesiya 4. Mayong Natural na Kapadangatan

“An mga tawo . . . mawawaran nin natural na pagpadangat sa saindang mga kapamilya.”—2 TIMOTEO 3:1-3, God’s Word Bible

● Nagtatrabaho si Chris sa sarong grupo na nagtatabang sa mga biktima nin kadahasan sa laog nin pamilya sa North Wales. “Nagigirumduman ko an sarong babayi na nagdulok samo dahil sa ginibong grabeng pambubugbog saiya. Dati ko na siyang nahiling pero haros dai ko na siya mabisto dahil sa ginibo saiya,” an sabi ni Chris. “May mga babayi man na grabe an inaagihan na emosyonal na kulog mala ta pirmi na lang sindang nakahiling sa salog.”

ANO AN IPINAPAHILING KAN REKORD? Sa sarong nasyon sa Aprika, haros 1 sa kada 3 babayi an nakaeksperyensiya nin seksuwal na pang-aabuso kan sinda aki pa. Sa sarong surbey na ginibo sa nasyon man na iyan, labing 30 porsiyento kan mga lalaki an nagsabing bako man maraot na bugbugon an saindang agom. Pero bako sanang kababaihan an biktima nin kadahasan sa laog nin pamilya. Halimbawa, sa Canada, haros 3 sa 10 lalaki an binubugbog o inaabuso kan saindang agom o kasaruan.

ANO AN PARATING PAGKONTRA? Haloy nang may kadahasan sa laog kan pamilya. Mas natatawan lang iyan nin atensiyon ngunyan kisa kaidto.

BALIDO DAW AN PAGKONTRANG IYAN? Sa nakaaging mga dekada, lalo pang natawan nin atensiyon an mga kadahasan sa laog kan pamilya. Pero nabawasan daw kaiyan an bilang nin mga biktima kan kadahasan sa laog kan pamilya. Dai. Mas lakop pa ngunyan an kawaran nin kapadangatan sa mga kapamilya.

ANO SA HILING MO? Nagkakatotoo na daw an sinasabi sa 2 Timoteo 3:1-3? Dakul na daw an nawawaran nin natural na kapadangatan sa mga kapamilya?

Sa ikalimang propesiya na nangyayari na ngunyan apektado an satong istaran, an daga. Pag-isipan an sinasabi kan Bibliya manungod digdi.

[Blurb]

“An kadahasan sa laog kan pamilya an sinasabing saro sa mga pinakadai irinereport na krimen sa sosyedad. Sa average, an sarong babayi makakaeksperyensiya nguna nin 35 beses na pangungulog kan saiyang agom o kasaruan bago siya magsumbong sa pulis.”—SARONG TAGAPAGTARAM KAN WALES DOMESTIC ABUSE HELPLINE.

Propesiya 5. Pagraot sa Daga

“[Lalaglagon nin Diyos] idtong mga nagraraot kan daga.”—KAPAHAYAGAN 11:18.

● Nagtatrabaho si Mr. Pirri bilang parakolekta nin tuba sa Kpor Nigeria. Naapektaran na marhay an saiyang hanapbuhay kan pagkaula nin krudo sa Niger Delta. “Nagadan kaiyan an mga sira mi, nagkahilang kami sa kublit, naatian an samong mga salog,” an sabi niya. “Mayo na akong hanapbuhay.”

ANO AN IPINAPAHILING KAN REKORD? Sigun sa nagkapirang eksperto, 6.5 milyon na tonelada nin basura an napapaduman sa mga kadagatan taon-taon. Kinakarkulo na 50 porsiyento kaiyan mga basurang plastik na iaanod-anod nin ginatos na taon bago matunaw. Apuwera sa pag-ati sa daga kan mga tawo, marikas man nindang inuubos an natural na yaman kaiyan. Sigun sa mga pag-adal, sarong taon may limang bulan an kaipuhan kan daga para makabawi sa kinonsumo kan mga tawo sa laog nin sarong taon. “Kun magpapadagos an pagdakul kan populasyon asin an pagkonsumo kan mga tawo, kakaipuhanon ta nin duwang Daga sa 2035,” an sabi kan diyaryo sa Australia na Sydney Morning Herald.

ANO AN PARATING PAGKONTRA? Mapamaagi an mga tawo. Kaya tang maresolberan an mga problemang ini saka mailigtas an daga.

BALIDO DAW AN PAGKONTRANG IYAN? Dakul na indibidwal saka grupo an nagsagibo nin mga kampanya para ingatan an kapalibutan. Pero padagos na naggagrabe an polusyon saka pagraot sa daga.

ANO SA HILING MO? Kaipuhan daw maghiro kan Diyos para iligtas an satong planeta sa pagkaraot—arog kan ipinanuga niya?

Apuwera sa limang propesiya na pinag-ulayan ta, ihinula man kan Bibliya an mga positibong mangyayari sa huring mga aldaw. Hilingon ta an sarong halimbawa sa ikaanom na propesiya.

[Blurb]

“Pagmati ko, an dating garo sarong paraisong pagsasadiri ko, ngunyan nagin nang tambakan nin basurang nakakahilo.”—ERIN TAMBER, SARONG RESIDENTE KAN GULF COAST, ESTADOS UNIDOS, MANUNGOD SA MGA EPEKTO KAN PAGKAULA NIN KRUDO SA GULPO NIN MEXICO KAN 2010.

[Kahon]

Diyos Daw an May Kagigibuhan?

Huling ihinula kan Bibliya an maraot na mga kamugtakan na nangyayari ngunyan, buot sabihon daw kaiyan an Diyos an may kagigibuhan kan mga iyan? Siya daw an dahilan kan mga pagsakit ta? Mahihiling mo an nakakaugmang simbag sa mga hapot na iyan sa kapitulo 11 kan librong Ano Man Nanggad an Itinotokdo kan Biblia? na ipinublikar kan Mga Saksi ni Jehova.

[Picture Credit Line]

U.S. Coast Guard photo

Propesiya 6. Paghuhulit sa Bilog na Kinaban

“An maugmang baretang ini kan Kahadian ihuhulit sa bilog na kinaban.”—MATEO 24:14.

● Nakaistar si Vaiatea sa sarong puwerang isla sa Dagat Pasipiko sa Tuamotu Archipelago. Dawa ngani an Tuamotu kompuwesto nin haros 80 isla na nakawarak sa labing 802,900 kilometro kuwadrado, mga 16,000 katawo sana an populasyon kaiyan. Pero, nakaulay kan mga Saksi ni Jehova si Vaiatea saka an saiyang mga pagtaraid. Taano? Dahil gusto kan mga Saksi na ipaabot an maugmang bareta kan Kahadian nin Diyos sa gabos na tawo—sain man sinda nakaistar.

ANO AN IPINAPAHILING KAN REKORD? An mensahe kan Kahadian nakakaabot na sa gabos na lugar sa daga. Kaidto sanang 2010, labing 1.6 bilyon na oras an ginamit kan mga Saksi ni Jehova sa paghuhulit kan maugmang bareta sa 236 na kadagaan. Buot sabihon, sa average, 30 minutos kada aldaw an ginagamit kan lambang Saksi sa paghuhulit. Kan nakaaging dekada, nakaprodusir saka nakadistribwir sinda nin labing 20 bilyon na kopya nin mga literatura sa Bibliya.

ANO AN PARATING PAGKONTRA? Rinibong taon nang ihinuhulit an mensahe kan Bibliya.

BALIDO DAW AN PAGKONTRANG IYAN? Totoo, dakul na an naghulit kan mensahe kan Bibliya. Pero, an kadaklan sainda ginibo iyan sa halipot sanang panahon saka sa pirang lugar sana. Sa kabaliktaran, organisadong naghuhulit an mga Saksi ni Jehova sa bilog na kinaban asin minilyon an nakakaulay ninda sa saindang kampanya nin paghuhulit. Nagpadagos an paghuhulit kan mga Saksi sa ibong kan grabeng pagpersegir kan pira sa pinakamakapangyarihan saka pinakamaringis na mga organisasyon sa kasaysayan.a (Marcos 13:13) Apuwera pa diyan, dai pigsusuwelduhan an mga Saksi ni Jehova sa ginigibo nindang paghuhulit. Imbes, gikan sa buot nindang itinatao an saindang panahon, asin inaalok ninda an saindang mga literatura nin daing bayad. An saindang gibuhon sinusuportaran gabos nin boluntad na mga donasyon.

ANO SA HILING MO? Ihinuhulit na daw an ‘maugmang bareta kan Kahadian’ sa bilog na kinaban? An kautuban daw kan propesiyang ini nangangahulugan na igwa nin magayon na mga mangyayari sa dai na mahahaloy?

[Nota sa Ibaba]

[Blurb]

“Sagkod na itinutugot ni Jehova, padagos tang maigot na ihuhulit an maugmang bareta kan Kahadian, na ginigibo an gabos na paagi para mapaabutan an mga tawo.”—2010 TAUNANG AKLAT NG MGA SAKSI NI JEHOVA.

Magayon na Buhay na Madali Ta Nang Maeksperyensiyahan!

“Dikit na sanang panahon, asin an mga maraot mawawara na . . . Alagad magigin pagsadiri kan mga mahuyo an daga, asin makakanumpong sinda nin labi-labing kaugmahan huli sa abundang katuninungan.”—SALMO 37:10, 11.

GUSTO mo daw magkatotoo an propesiyang iyan na sinambit sa itaas? Siguradong iyo an simbag mo. Igwa nin masarig na mga dahilan na magtubod na madali nang mangyari iyan.

Napag-ulayan sa nainot na mga artikulo an pira sana sa mga propesiya sa Bibliya na malinaw na nagpaparisa na nabubuhay na kita sa “huring mga aldaw.” (2 Timoteo 3:1-5) Pinasabngan kan Diyos an mga kagsurat kan Bibliya na ihula an mga pangyayaring idto para magkaigwa kita nin paglaom. (Roma 15:4) An kautuban kan mga propesiyang iyan nangangahulugan na madali nang mawara an satong mga problema.

Ano an kasunod kan huring mga aldaw? Mamamahala na an Kahadian nin Diyos sa bilog na katawuhan. (Mateo 6:9) Hilinga an paglaladawan kan Bibliya sa magigin mga kamugtakan sa kinaban pag-abot kaiyan:

● Mawawara na an gutom. “Magkakaigwa nin abundang tipasi sa ibabaw kan daga; masurobra iyan sa alituktok kan kabukidan.”—Salmo 72:16.

● Mawawara na an hilang. “Mayo nin residente an magsasabi: ‘May hilang ako.’ ”—Isaias 33:24.

● Magigin magayon giraray an daga. “An kaawagan asin an alang na daga maggagaya-gayang marhay, asin an disyertong kapatagan magigin maugma asin mamumurak arog kan azafran.”—Isaias 35:1.

Pira sana an mga iyan sa nakakapakusog sa buot na mga propesiya sa Bibliya na madali nang mautob. Puwede mong haputon an mga Saksi ni Jehova kun taano ta talagang kumbinsido sinda na madali nang mag-abot an sarong magayon na puturo.