• Pahalagahan an Daing Kaparehong Papel ni Jesus sa Katuyohan nin Dios
    An Torrengbantayan—2008 | Disyembre 15

    • An Ihinulang “Banhi”

      18. Anong hula an itinaram pakatapos na magkasala si Adan, asin ano an ihinayag paghaloyhaloy mapadapit sa hulang ini?

      18 Duman sa Eden, kan garo baga nawara na nin katawohan an gabos na bagay​—an malinig na kamugtakan sa atubangan nin Dios, buhay na daing katapusan, kaogmahan, asin Paraiso—​ihinula ni Jehova Dios an sarong Paraligtas. An sarong ini inapod na an “banhi.” (Gen. 3:15) An misteryong Banhi na ini nagin tema nin dakol na hula sa Biblia sa bilog na nakaaging mga panahon. Sia magikan ki Abraham, Isaac, asin Jacob. Siring man, sia magikan sa linahe ni Hadeng David.​—Gen. 21:12; 22:16-18; 28:14; 2 Sam. 7:12-16.

      19, 20. (a) Siisay an ipinanugang Banhi? (b) Taano ta masasabi na bako sanang si Jesus an kaiba sa ihinulang banhi?

      19 Siisay an ipinanugang Banhi na ini? An simbag sa hapot na ini makukua sa Galacia 3:16. (Basahon.) Minsan siring, sa huring kabtang kan kapitulo man sanang iyan, sinabi pa ni apostol Pablo sa linahidan na mga Kristiano: “Dugang pa, kun kamo ki Cristo, kamo talagang banhi ni Abraham, mga paramana mapadapit sa sarong panuga.” (Gal. 3:29) Paanong si Cristo iyo an ipinanugang Banhi, asin taano man ta may iba pang kairiba?

      20 Hinihingako nin minilyon na sinda naggikan ki Abraham, asin may mga nag-aakto pa ngani bilang mga propeta. May mga relihion na nagtatao nin dakulang importansia sa paghihingako na an saindang mga propeta naggikan ki Abraham. Alagad an gabos daw na ini iyo an ipinanugang Banhi? Dai. Siring kan sinabi ni apostol Pablo paagi sa pagpasabong, bakong gabos na naggikan ki Abraham makakapagsabi na sinda an ipinanugang Banhi. An mga naggikan sa ibang mga aki ni Abraham dai ginamit tanganing bendisyonan an katawohan. An banhi na gagamiton sa pagbendisyon magigin paagi sana ki Isaac. (Heb. 11:18) Sa katapustapusi, saro sanang tawo, si Jesu-Cristo​—na dokumentado sa Biblia an kasaysayan nin linahe bilang naggikan ki Abraham—​an pangenot na kabtang kan ipinanugang banhi na iyan.b An gabos na iba pa na paghaloyhaloy nagin sekondaryong kabtang kan banhi ni Abraham nagin siring huling sinda “ki Cristo.” Iyo, tunay na daing kapareho an papel ni Jesus sa pag-otob kan hulang ini.