Paghaloyhaloy, na posibleng kan sinda nasa husto nang edad, si Cain asin Abel kanya-kanyang nagdolot ki Jehova. Huling si Abel sarong pastor, bakong makangangalas na sia nagtao nin “nagkapirang matuang ogbon kan saiyang kahayopan, pati an matatabang pidaso kaiyan.” Sa kabaliktaran, si Cain nagdolot nin “nagkapirang bunga kan daga.” Inako ni Jehova an atang ni Abel, alagad “dai nia hineling na may ano man na pag-oyon si Cain asin an saiyang dolot.” (Genesis 4:3-5) Taano ta dai?

Sinasabi nin nagkapira an bagay na an atang ni Abel hale sa “matuang ogbon kan saiyang kahayopan,” mantang an ki Cain “nagkapira [sanang] bunga kan daga.” Alagad an problema bakong sa kualidad kan idinolot ni Cain, huli ta an tala nagsasabi na hineling ni Jehova na may pag-oyon “si Abel asin an saiyang dolot,” asin na daing pag-oyon “si Cain asin an saiyang dolot.” Kaya sa pangenot si Jehova nagheling sa kamugtakan nin puso kan nagsasamba. Sa paggibo kaiyan, ano an namansayan nia? An Hebreo 11:4 nagsasabi na “huli sa pagtubod” na si Abel nagdolot kan saiyang atang. Kaya minalataw na mayo ki Cain an pagtubod na iyong nagpangyari na akoon an atang ni Abel.

Sa bagay na ini, mahalagang mangnohon na kalabot sa dolot ni Abel an pagpabolos nin dugo. Puedeng tama na ikinonklusyon nia na an panuga nin Dios may labot sa banhi na lulugadon sa bool mangangahulogan kan pag-atang nin buhay. Sa siring an dolot ni Abel nagin pagngayongayo para sa pagtubos, asin iyan nagpahayag nin pagtubod na an Dios matao nin pampagian nin boot na atang para sa mga kasalan sa itinalaan na panahon.

Dai sinasabi kan Biblia kun paano ipinaheling ni Jehova an saiyang pag-oyon sa atang ni Abel. May mga nagsusuherir na iyan tinumtom nin kalayo hale sa langit. Ano man an totoo, kan maaraman na hinaboan an saiyang dolot, “si Cain naanggot na marhay, asin an saiyang lalauogon nagpoon na magmurusdot.” (Genesis 4:5) Pasiring sa kapahamakan si Cain.