Mga Aldaw na Arog kan “mga Aldaw ni Noe”
“An daga napano nin kadahasan . . . iyan maraot, huli ta rinaot nin gabos na laman an daga.”—GENESIS 6:11, 12.
1, 2. (a) Anong klaseng mga kadahasan an kaipuhan na atubangon ngonyan nin mga Saksi ni Jehova? (b) Sa anong mga kamugtakan na an banwaan nin Dios naranga kan paglaom sa pagkabuhay liwat?
KADAHASAN! Arog kan aldaw ni Noe, siring man ngonyan, an kadahasan nagin nang ordinaryong termino. Dawa an mga naglalakaw sa kaibanan kan tunay na Dios, kapareho ni Noe, bakong ligtas sa kadahasan. Ini mapuwersang iinapod sa atension kan kinaban kaidtong, kan Hulyo 21 kan nakaaging taon, an sarong Kingdom Hall nin mga Saksi ni Jehova sa Sydney, Australia, rinumpag nin sarong bomba sa oras nin sarong pampublikong pahayag sa Biblia manongod sa kaimbodan sa Dios asin sa pamilya. An sarong Saksi nagadan. Labing 40 an naospital. Sinda gabos naomayan na, minsan ngani an iba may darakulang pinilaan bilang resulta kan kriminal na karatan na ini. An sarong sekreta kan pulis nagkomento: “May 110 katawo sa laog asin sarong milagro nanggad na mayo nin 110 na gadan.”
2 Sa ibang parte kan daga—arog baga sa Northern Ireland, Lebanon, asin El Salvador—an mga Saksi ni Jehova nagbabalangibog kan “maogmang bareta” sa lugar nin daing ontok na kadahasan. May nagkapira na nagadan, an iba mantang nasa ministeryo. Sa dakol na kadagaan an “pagkanorongod,” arog baga nin mga aksidente asin linog, kuminua man nin mahahalagang buhay, na sa mga okasyon na iyan an banwaan ni Jehova nararanga kan paglaom sa pagkabuhay liwat.—Eclesiastes 9:11; 1 Tesalonica 4:13, 14.
3. (a) Ano an puwedeng mangyari sa nagkapira sa banwaan ni Jehova, arog kan ipinaheheling nin bago pa sanang mga pangyayari asin kan Lucas 21:16? (b) Ano an garantiya niato sa pagprotehir nin Dios sa “dakulang kahorasaan”?
3 Kasuarin pa sana sa Mejico, 23 na Saksi asin kaasosyar gabos an nakabilang sa labing 5,000 na nagadan nin sarong mapanlaglag na linog. Sa Puerto Rico, pito pa an nakabilang sa 300 na nawaran nin buhay sa mga baha asin pagtupas kan daga. Ini daw nangangahulogan na si Jehova dai nakapagtao nin proteksion sa nagkapira sa saiyang mga lingkod? Dai nanggad. Kita bakong ligtas sa mga aksidente asin kalamidad. Asin kun dapit sa paglamag, pinatanidan ni Jesus an saiyang mga disipulo, na an sabi: “Gagadanon ninda an nagkapira sa saindo.” Ginatos sa satong mga tugang an nagadan sa madahas na mga kamot kan Nazing si Hitler. Gigirumdomon ni Jehova an gabos na iyan sa pagkabuhay liwat. Minsan siring, kun an ihinulang “dakulang kahorasaan” umabot na sa daga, ipaheheling ni Jehova na kaya niang iligtas an mga nag-aapod sa saiyang ngaran, arog kan ginibo nia kan aldaw ni Noe.—Lucas 21:16-19; Mateo 24:14, 21, 22, 37-39; Isaias 26:20, 21; Joel 2:32; Roma 10:13.
4. Paano an presenteng mga kamugtakan nakakakomparar sa mga ilinaladawan sa Genesis 6:11, 12?
4 Poon kan 1914 an kadahasan nag-oorog sa bilog na globo. Sanggatos na milyon katawo an nagadan sa mga guerra asin pagkatunaw kan siglong ini. An katawohan dinadamat nin mga pagsalakay sa mga eroplano asin barko, pagbomba nin mga terorista, lagduan na mga paggadan, asin pagkainongisan nin mga rasa, asin namemeligro man sa pagdakol nin mga armas nuklear. Tunay nanggad, ini “delikadong mga panahon” na may “kahandalan nin mga nasyon, na dai naaaraman an gigibohon.” (2 Timoteo 3:1-5, 13; Lucas 21:25) Minsan siring, an banwaan ni Jehova ngonyan nabubuhay sa tahaw nin sarong damat na nagtatao nin mas grabeng peligro ki sa kadahasan, minsan ngani iyan parateng konektado sa kadahasan. Iyan labi nang 4,300 na taon an edad pabalik sa aldaw ni Noe. Ano iyan?
An Pagtubod ni Noe sa Tahaw nin Karumpotan
5, 6. (a) Paano rinaot ni Satanas an katawohan? (b) Sa anong mga paagi na si Noe asin an saiyang pamilya naglataw bilang bakong kabtang kan kinaban?
5 Poon kan pagrebelde sa Eden, si Satanas na Diablo desidido na ‘dayaon an bilog na ineerokan na daga.’ (Kapahayagan 12:9) Pinagbotan ni Jehova an lalaki asin babae na gamiton sa kagalang-galang na paagi an itinao nin Dios na kapangyarihan ninda sa sekso sa laog kan areglo nin pag-agoman, tanganing “panoon an daga” kan saindang klase. (Genesis 1:28; Hebreo 13:4) Alagad ta rinaot kan Diablo an katawohan paagi sa bakong natural na sekso. Paano? An espiritung mga aki nin Dios uminiba ki Satanas sa saiyang pagrebelde. An mga ini nagin mga “demonyo,” na si Satanas an saindang “poon.” (Lucas 11:15) Asin ano an nagin aktibidad kan mga demonyo kaidto? Sinda naghilig digdi sa daga, nagmateryalisar nin mga hawak nin tawo, asin nakidorog sa magagayon na aking babae nin mga tawo. Makatatakot nanggad an nagin resulta!
6 An ibinunga mestisong mga aki, na mga higante na kabangang demonyo, kabangang tawo. An mga ini an mga Nefilim, mapangadan na mga “Paratumba” sa katawohan, arog kan ipinaheheling kan rekord: “Asin an daga nagin maraot sa pagheling kan tunay na Dios asin an daga napano nin kadahasan. Kaya hineling nin Dios an daga asin, uya! iyan maraot, huli ta rinaot nin gabos na laman an daga.” An kadahasan asin seksuwal na karumpotan nagin lakop na gayo kaya solamente manongod sana ki Noe na masasabi: “Pinatunayan nia an saiyang sadiri na daing kasalan sa tahaw kan saiyang mga kapanahon. Si Noe naglakaw sa kaibanan kan tunay na Dios.” An saiyang agom, an saiyang mga aking lalaki, asin an saindang agom—solo-solo sa bilog na katawohan—nagpaheling nin pagtubod asin diosnon na pagkatakot. Malinaw na an pamilya ni Noe dai naolakitan nin seksuwal na karumpotan kan saiyang aldaw.—Genesis 6:4, 9-12, nota sa ibaba kan Ref. Bi.
7. Arog kan ipinaheling kan aldaw ni Noe, paano hinohokoman ni Jehova an maraot asin an matanos? (Ikomparar an Mateo 25:40, 45, 46.)
7 Pinara ni Jehova an madahas, rungaw sa sekso, demonistikong kinaban na idto. Sa pagtao kan dakulang Baha, ipinaanod nia an gabos na maraot. An mestisong mga Nefilim asin marigsok na mga tawo iinanod pasiring sa pagkapara, mantang an demonyong mga dating aki nin Dios duminulag pabalik sa lugar nin mga espiritu—tanganing halaton an paghokom nin Dios sa sainda. Alagad ta may mga nakaligtas! Si Noe asin an saiyang pamilya naligtas. Asin taano? Huli sa saindang pagtubod, na suportado nin mga gibo na pagtogdok kan dahong asin paghuhulit nin katanosan sa kondenadong kinaban na idto.—2 Pedro 2:4, 5.
Mga Moderno, Magmaan Kamo!
8. Sa anong mga paagi na an aldaw ni Noe nagladawan sa satong aldaw?
8 An aldaw ni Noe naglaladawan sa satong aldaw. Paano niato ini naaraman? Bueno, ihinula ni Jesus an kaagid na panahon nin kadahasan, katampalasanan, asin kadaihan nin pagkamoot bilang kabtang kan “tanda” na kita nasa gati na nin sarong “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” Sia nagsabi man: “Mapadapit sa aldaw asin oras na iyan mayo nin siisay man na nakakaaram, . . . kundi an Ama sana.” Dangan idinugang nia: “Kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na magdatong an baha asin iinanod sinda gabos, magigin siring man kaiyan an presensia kan Aki nin tawo.”—Mateo 24:3-21, 36-39.
9. Paano niato malilikayan an kasagkodan kan mga ‘dai nagmamangno’?
9 Iyo, “dai sinda nagmangno.” Alagad kamo dai kaipuhan na magin kapareho ninda. Puwede kamong maligtas kun an Kagurangnan na Jesus mahayag na hale sa langit, na ginigibo an pamalos nin Dios paagi sa paglaglag nin daing sagkod sa “mga dai nakakamidbid sa Dios asin sa mga dai nagkukuyog kan maogmang bareta manongod sa satong Kagurangnan na si Jesus.” (2 Tesalonica 1:7, 8) Dai kamo kaipuhan na magin kapareho nin kinabanon na mga tawo na an pangenot na interes sa buhay mapaoyonan an sadiri, na nagmamaigot na maabot an bantog na karera o materyal na kayamanan, na dai man lamang nagigirumdoman an Dios. Totoo, “an saindang dios iyo an saindang tulak.”—Filipos 3:19.
“Ikaongis Nindo an Maraot”
10, 11. (a) Tanganing kamtan an pag-oyon nin Dios, anong mga bisyo an dapat na likayan? (b) Anong pangalasag an kaipuhan na isolog niato, asin taano?
10 Sa huring mga aldaw na ini, an buhay nin kadakoldakol na tawo nakasentro sa sekso, baga man kasal o dai kasal. Asin para duman sa dakol na may agom, an diborsio o pagrebokar kan kasal nagin uso. Sa dai pag-intindi sa maliwanag na mga patanid kan mga disipulo ni Jesus, an dakol sa Kakristianohan naggigibo nin homoseksuwalidad. Ngonyan pa, an nagkapira sa mga ini “nag-aako [na] sa sainda man sana kan bilog na kabayadan” sa porma nin AIDS asin iba pang mga helang na ikinakaolakit paagi sa pagdodorog. Minsan siring, puwedeng magkaigwa nin paglaom sa kaligtasan dawa para sa siring na mga tawo. Girumdoma, si Jesus nagtaram na may pag-oyon sa mga patotot na lininigan an saindang buhay asin nagtubod sa saiya, bakong arog kan mapaabhaw, daing pagsolsol na relihiyosong mga namomoon kan saiyang aldaw.—Roma 1:26, 27; 2 Pedro 2:9, 10; Judas 6, 7; Mateo 21:31, 32.
11 An siisay man sa banwaan ni Jehova na tibaad naolakitan, o nasusugotan na gumibo, nin inmoral na mga gibo kaipuhan na mapagmata asin magsolog kan bilog na pangalasag na itinatao nin Dios! (Efeso 6:11-18) An mga aldaw na ini tunay na kapareho nanggad kan “mga aldaw ni Noe.” An “nangangarob na leon,” an Diablo, asin an saiyang marumpot na mga demonyo beinte kuwatro oras na nagtatrabaho tanganing isiblag asin siodon an mga lingkod nin Dios. Kaipuhan kitang manindogan tumang sa mga kaiwal na ini, na marigon sa pagtubod.—1 Pedro 5:8, 9.
12. Taano ta mahalaga na kuyugon an hatol kan Salmo 97:10?
12 Nakakakubhan nanggad, minsan an nagkapira na prominente sa organisasyon ni Jehova naholog sa inmoral na mga gibo, pati na an homoseksuwalidad, pagriribayan nin agom, asin pag-abuso sa aki. Mangnohon man na sa nakaaging taon, 36,638 katawo an kinaipuhan na itiwalag sa Kristianong kongregasyon, na an kadaklan huli sa inmoralidad. An organisasyon ni Jehova dapat na mapagdanay na malinig! (1 Corinto 5:9-13) Ini panahon para sa gabos na kamagurangan kan kongregasyon, ministeryal na mga lingkod, asin kan gabos niatong mga tugang na lalaki asin babae na lumikay sa ano man na kamugtakan na puwedeng magbunga nin inmoralidad. An kaimbodan sa mga pamantayan ni Jehova babalosan, arog kan sinasabi kan Salmo 97:10: “O kamong mga namomoot ki Jehova, ikaongis nindo an maraot. Binabantayan nia an mga kalag kan saiyang mga maimbod; sa kamot kan mga tampalasan iliniligtas nia sinda.”
13. Anong marahay na hatol an itinao ni apostol Pablo asin Pedro?
13 Sa pinakahuri, paparaon kan “dakulang kahorasaan” an gabos na “makababalde sa saindang ramog.” Kita dapat nanggad na maongis, iyo, mabalde, asin likayan an kinabanon na karumpotan! Dapat kitang “dumulag sa pakikisaro”! (Kapahayagan 21:8; 1 Corinto 6:9, 10, 18) Si apostol Pedro, pakapagtao nin patanid tumang sa nagsasabwag nin pagduda na mga apostata asin dapit sa katunayan kan “aldaw ni Jehova,” nagsasadol sato nin “banal na mga gawe asin gibo nin diosnon na debosyon.” Idinugang nia: “Alagad igwa nin bagong kalangitan asin sarong bagong daga na satong hinahalat oyon sa saiyang panuga, asin dian an katanosan an magdadanay. Kaya, mga namomotan, mantang naghahalat kamo kan mga bagay na ini, giboha an bilog nindong makakaya na sa katapustapusi makua niang daing digta asin dai nin kanawayan patin nasa katoninongan.” Kanigoan nanggad na kaogmahan na makaabot sa “bagong daga,” na dian an Dios ‘gigibohon na bago an gabos na bagay’ asin malinig!—2 Pedro 3:3-7, 10-14; Kapahayagan 21:1, 4, 5.
Kuyogon an Dagdag Pang ‘mga Halimbawang Nagpapatanid’
14. Taano ta temporaryo sana an paglinig kan Baha?
14 Pakatapos na an daga malinigan kan dakulang Baha sa gabos na ramog nin mga demonyo asin tawo, inotro ni Jehova an pagboot na kan enot itinao ki Adan, paagi sa pagsabi ki Noe asin sa saiyang mga aki: “Pangagbunga asin pangagdakol kamo asin panoa nindo an daga.” (Genesis 9:1) Sa simbolikong paagi ginibo ninda ini, 70 “pamilya”—sarong kabilangan na sangkap sa piguratibong paagi—an nalilista sa Genesis kapitulo 10. Alagad an katawohan nasa irarom pa man giraray kan mga epekto nin kasalan na namana ki Adan. Asin malinaw na an impluwensia nin demonyo nagdara na naman sa mga tawo na maholog sa seksuwal na karumpotan.
15. Ano an manonodan niato sa paghokom nin Dios sa Sodoma?
15 Pag-abot nin panahon, an “katood” ni Jehova, si Abraham, asin an sobrino ni Abraham na si Lot nagbalyo sa lugar nin Canaan. Pinili ni Lot na bumalyo sa Distrito nin Jordan, na “garo tatamnan ni Jehova.” Alagad arog daw iyan kaiyan sa moral? Dai nanggad! An siudad nin Sodoma, na pinag-istaran ni Lot, asin an kataed na Gomorra sagom sa homoseksuwalidad. Mayo nganing makukua dian na sampulong matanos na tawo. Sa dahelan na ini, dinara ni Jehova sa mga siudad na ini an “silot na kalayong daing katapusan.” An marumpot na mga siudad na iyan noarin man dai na itotogdok giraray! Sinitar ni Jesus an paghokom nin Dios sa Sodoma, kaiba kan nangyari “kan mga aldaw ni Noe,” sa pagdodoon kan pangangaipo na kita magmaan!—Genesis 13:10; 18:32; Judas 7; Lucas 17:26-30.
16. Anong aktibidad nin demonyo an naghahagad na kita makipaglaban nin maigot para sa pagtubod?
16 Dai kamo masala! Si Satanas asin an saiyang mga demonyo sagkod ngonyan naghahanap nin mga biktima! Minsan ngani iinapon sa piguratibong “mga bobon nin kadikloman” asin pinagbawalan na magsulot nin mga laman na hawak, an marumpot na mga espiritung iyan desidido na raoton an mga tawo, asin nangorogna an mga lingkod ni Jehova. (2 Pedro 2:4-6) Daing duwa-duwa na inimpluwensiahan kan mga demonyo si Canaan na gibohon an saiyang inmoral na akto sa saiyang apoon na si Noe. (Genesis 9:22-25) Segurado na idinuyag ninda an mga karigsokan na nagin ‘kaugalean kan daga nin Canaan,’ kaya sa katapustapusi isinuka kaiyan an mga nag-eerok dian. (Levitico 18:3-25) Siring man, pinaooswag kan mga demonyo an bakong natural na mga gibo sa sekso na lakop sa dakol na komunidad ngonyan. Sa pakikipaglaban nin maigot para sa pagtubod, kaipuhan na paglabanan niato an ano man na pagsalakay kan nagkasalang mga anghel na iyan na nagtutulod sa mga tawo na ‘magsagibo nin labi-labing pakikisaro asin magsunod sa laman sa kagamitan na bakong natural.’—Judas 3, 6, 7.
Magtogdok Para sa Pagkapreserbar
17. Kapareho ni Noe asin kan saiyang pamilya, paano niato puwedeng ipaheling na kita bakong kabtang kan kinaban?
17 Huli sa pagkaseryoso kan satong mga panahon, paano niato manonompongan an dalan nin kaligtasan? Bueno, paano nakaligtas si Noe asin an saiyang pamilya? “Huli sa pagtubod si Noe . . . kinondenar an kinaban.” (Hebreo 11:7) Siring man ngonyan, an mga Saksi ni Jehova “bakong kabtang” kan maraot na kinaban. Saro pa, ipinaheling niato an satong pagtubod paagi sa pagdusay kan satong buhay ki Jehova asin pagpabautismo sa tubig tanganing magin mga disipulo ni Jesu-Cristo.—Juan 17:14, 16; Mateo 28:19.
18. Ano an ipinagladawan kan pagtogdok kan dahong?
18 Dugang pa, nakikikabtang kita sa gibohon ni Jehova para sa aldaw na ini, an espirituwal na pagtotogdok na pinangengenotan kan Orog Kadakulang Noe, si Jesu-Cristo. Bilang lugar nin katiwasayan asin kaligtasan, an dahong nagrerepresentar sa espirituwal na paraiso na itinotogdok ni Jehova sa tahaw kan saiyang mga parasamba poon kan 1919. Iyan an kamugtakan nin nakabalik na matoninong na relasyon sa Dios. Iyan an Saiyang areglo para mapreserbar an antitipikong pamilya kan Orog Kadakulang Noe sa “dakulang kahorasaan.”—Mateo 24:21; 1 Corinto 3:9, 11; 2 Corinto 12:3, 4; Kapahayagan 7:13, 14.
19. Si Noe, an saiyang pamilya, asin an saindang gibohon nagladawan nin ano?
19 “Si Noe nakakua nin biyaya sa mga mata ni Jehova.” Tamang-tama sia naglaladawan ki Jesu-Cristo, na mapakumbabang naglakaw sa kaibanan nin Dios digdi sa daga, na daing ano man na ginibo sa sadiri niang kabotan! (Genesis 6:8; Mateo 17:1, 5; Juan 8:28) An duwa pareho parahulit nin katanosan—sarong marahay na halimbawa para sa gabos na saksi ni Jehova. Asin makaseseguro kita na an agom ni Noe, na nanganino kan natatada pa sa mga linahidan sa daga ngonyan, sarong modelo nin pagpapasakop. (2 Pedro 2:5; Lucas 4:14-19; Efeso 5:21-24) Kun iisip-isipon niato kun gurano kadakula kan trabahong pagtogdok kan dahong nin kaligtasan, maiimahinar niato kun gurano kaogma kan gurang nang si Noe na sia may mga katabang na tolong makokosog na aking lalaki asin an saindang agom! Tamang-tama an mga ini naglaladawan sa presenteng “dakulang kadaklan” na nagsasaabaga kan kadaklan sa espirituwal na gibong pagtotogdok sa mga huring aldaw na ini bago an antitipikong Baha.—Kapahayagan 7:9, 15.
20, 21. (a) Anong maogmang mga paglaom an naghahalat sa mga parasamba ki Jehova sa nalinigan na daga? (b) Anong kaogmahan an makakamtan dawa ngonyan?
20 Kun nalinigan na an dagang ini, na andam nang gibohon na literal na paraiso, an mga ilinadawan kan mga aking lalaki asin manugang ni Noe tibaad sa kadikit na panahon magkaigwa nin mga aki sa katanosan. Dangan an milagro nin pagkabuhay liwat kokompletohon an pagpano sa daga nin mga tawo. An gabos na umako kan pribilehiyo na magin “ibang karnero” ni Jesus ibabalik sa pagkasangkap, asin kun makaligtas sa ultimong pagbalo pagkatapos na iintrega ni Cristo an Kahadean sa saiyang Ama, an mga ini ipahahayag na matanos para sa buhay na daing sagkod.—Juan 5:28, 29; 10:16; 1 Corinto 15:24-26; Salmo 37:29; Kapahayagan 20:7, 8.
21 Kanigoan na mga kaogmahan an nakatagama sa maimbod na mga parasamba ni Jehova! Alagad may dakulang kaogmahan na manonompongan dawa ngonyan paagi sa bilog na pusong pakikikabtang sa pagtogdok kan modernong dahong para sa kaligtasan. Kumusta an gibohon na iyan? An masunod na luwas kan magasin na ini magtatao kan simbag.
ANO AN ISISIMBAG NINDO?
◻ Paano kita maninigong mapatanidan kan mga pangyayari bago kan Baha?
◻ Anong leksion an maninigo niatong manodan sa Mateo 24:37-39?
◻ Taano ta napakahalaga na “ikaongis nindo an maraot”?
◻ Paano kita puwedeng makikabtang sa pagtotogdok kan antitipikong dahong?
[Kahon sa pahina 19]
AROG KAN ‘ALDAW NI NOE’—
“40 porsiento sana sa mga paratokdo nin relihiyon sa kolehiyo . . . an nagtutubod na inmoral para sa dai kasal na lalaki asin babae na makidorog.”—Saturday Oklahoman & Times, Disyembre 29, 1984
[Kahon sa pahina 20]
Mahalaga Daw an mga Prinsipyo kan Biblia?
An sarong pading Episcopaliano naghinanyog sa pahayag sa paglobong na ginibo nin saro sa mga Saksi ni Jehova. Pakalihis kaiyan, sa imbitasyon kan padi, an duwang ministro hale sa Watch Tower Society nag-atender sa pakikipag-olay sa nagkapirang klerigo sa Brooklyn Heights, Siudad nin Nueva York.
Naglataw an hapot manongod sa homoseksuwalidad. Liniwanag kan mga Saksi na an Biblia nangangalad kaini asin na itinitiwalag nin mga Saksi an mga tawo na naggigibo nin ano man na klase nin inmoralidad. (Roma 1:24-27; 1 Corinto 6:9, 10; Judas 7) Hinapot kan mga Saksi an mga klerigo manongod sa saindang paninindogan sa bagay na ini asin nakaako kan minasunod na simbag:
Sarong ministrong Kongregasyonal: “Sa paghona ko igwa kami kan reglamento nin pagtitiwalag sa mga reglamento kan samong iglesya, alagad mawaran man ako nin buhay, dai ko nagigirumdoman kun kasuarin mi ginamit an pagboot na iyan!”
An pading Episcopaliano: “Kun gamiton niamo an pagboot na iyan, mayo na kaming [matatadang] miembro.”
Sarong monsenyor na Katoliko: “Kun gamiton mi an pagboot na iyan, mayo na kaming [matatadang] padi.”
Dawa ngani tibaad pinasosobrahan man an mga bagay kan mga komentong ini kan mga klerigo, ikinaoogma kan mga Saksi ni Jehova an saindang marigon na paninindogan na mapagdanay na malinig an kongregasyon. Sinda “bakong kabtang kan kinaban.”—Juan 15:19.
[Kahon sa pahina 21]
AROG KAN ‘ALDAW NI NOE’—
“An sarong pampublikong eskuwelahan para sa mga homoseksuwal na mga estudyante sa haiskul sa Siudad nin Nueva York nagbukas sa Manhattan.” An maestro dian nagsabi: “Boot niamong magkaigwa nin lugar na an mga aking bakla asin tomboy dai mapapasairarom nin mga tin-edyer na bakong maygurang.”—The New York Times, Hunyo 6, 1985
[Kahon sa pahina 22]
AROG KAN ‘ALDAW NI NOE’—
“An mga miembro kan Iglesya nin Riverside inaprobaran kasuodma an sarong palakaw na apabor sa mga bakla na inaako an mga homoseksuwal na relasyon bilang kabtang kan pagkasabot manongod sa Kristianong buhay pampamilya.”—New York Post, Hunyo 3, 1985