Ano an Pinaghalian kan Halloween?
An simbag kan Bibliya
Mayong sinasabi an Bibliya manungod sa Halloween, na sarong okasyon na isineselebrar kan dakul kada taon pag Oktubre 31. Pero, an pinaghalian kan Halloween saka an mga tradisyon diyan kontra sa itinutukdo kan Bibliya.
Sa artikulong ini
Kasaysayan saka mga tradisyon kan Halloween
Samhain: An Halloween hali sa sarong “suanoy na paganong kapiyestahan na isineselebrar kan mga Celt labing 2,000 na taon na an nakaagi,” an sabi kan The World Book Encyclopedia. “Nagtutubod an mga Celt na sa panahon na ini, an mga gadan nakakaibanan kan mga buhay. Sa panahon kan Samhain, kaibanan kan mga buhay an mga gadan sa pagbisita.”—Hilingon an “Taano ta inaapod ining Halloween?”
Mga kostyum sa Halloween, dulse, saka trick or treat: Uyon sa sarong reperensiya, an nagkapirang Celt nagsusulot nin nakakatakot na mga kostyum “tanganing mamaluan sinda kan naglalagaw-lagaw na mga espiritu na mga espiritu man” asin dai sinda pag-anuhon. An iba nagtatao nin mga dulse sa mga espiritu para dai maanggot asin kulgan an mga tawo. a
Sa Europa, kan mga 500 C.E. sagkod 1500 C.E., an mga klero kan Katoliko ipinagibo naman an paganong mga kostumbre sa saindang mga miyembro asin sinabihan na magduman sa mga harong na nakakostyum saka maghagad nin mga regalo.
Mga multo, bampira, werewolf, mangkukulam, asin zombie: Haloy nang ikinokonektar an mga ini sa runa nin maraot na mga espiritu. Inaapod sinda na “ekstraordinaryong mga impakto,” sinasabi kan librong Halloween Trivia na an mga linalang na ini “konektadong marhay sa kagadanan, sa gadan o sa pagkatakot na magadan.”
Mga pumpkin sa Halloween, o jack-o’-lanterns: Sa Britania kaidtong mga 500 C.E. sagkod 1500 C.E., an mga tawo “nagduduman sa mga harong asin naghahagad nin pagkakan karibay nin pangadyi para sa gadan,” asin may dara-dara sindang “ilawan na gibo sa turnip na hinalian nin laog asin ilinaag diyan an kandila, na nagsisimbolisar sa kalag na dai makahali sa purgatoryo.” (Halloween—From Pagan Ritual to Party Night) Sinasabi kan nagkapirang reperensiya na an mga ilawan ginagamit para pahalion an maraot na mga espiritu. Kaidtong ika-19 siglo sa North America, ginamit na an mga pumpkin imbes na turnip ta mas dakul iyan asin madaling halian nin laman saka kortehan.
Importante daw an paganong pinaghalian kan Halloween?
Iyo. Para sa ibang tawo, nakakaugma an Halloween saka mayo man maraot diyan. Pero an mga ginigibo kan mga tawo para iselebrar an Halloween kontra sa itinutukdo kan Bibliya. Kaya an Halloween basado sa salang mga paniniwala manungod sa gadan asin sa dai nahihiling na mga espiritu, o mga demonyo.
Pag-isipan an minasunod na mga teksto na nagpapahiling kan pagmansay nin Diyos sa mga paniniwala may koneksiyon sa Halloween:
“Dai dapat magkaigwa sa saindo nin siisay man . . . na nagkokonsulta sa sarong espiritista, o parahula, o nin siisay man na naghahapot sa gadan.”—Deuteronomio 18:10-12.
Buot sabihon: Dai inuuyunan nin Diyos an ano man na paagi nin pakikikomunikar sa mga gadan o maski ngani an sagin man ngayang pakikikomunikar sa mga nagadan.
“An mga gadan dai na lamang nin naaaraman.”—Eclesiastes 9:5.
Buot sabihon: Huling an mga gadan daing pag-aram, dai ninda magigibong makikomunikar sa mga buhay.
‘[Dai] magin kahiras kamo kan mga demonyo. Dai kamo puwedeng mag-inom sa kalis nin Kagurangnan asin sa kalis kan mga demonyo.”—1 Corinto 10:20, 21, An Marahay na Bareta Biblia.
Buot sabihon: Kun gusto kan saro na mapaugma an Diyos dapat niyang likayan an ano man na may koneksiyon sa mga demonyo.
“[Tumindog] kamo nin marigon laban sa mga tusong gibo kan Diyablo; huli ta igwa kita nin pakikipaglaban . . . sa maraot na mga puwersang espiritu.”—Efeso 6:11, 12.
Buot sabihon: Dapat na labanan kan mga Kristiyano an maraot na mga puwersang espiritu imbes na sagin man ngayang makiselebrar sa sainda.
a Hilingon an librong Halloween: An American Holiday, an American History, pahina 4.