Mga Hapot Hale sa mga Parabasa
Kan an mga soldados ni Saul kumakan nin karne kaiba an dugo, taano ta dai sinda ginadan, mantang iyan an padusa na sinasabi sa Pagboot nin Dios?
An mga lalaking ini nagbalga kan pagboot nin Dios manongod sa dugo, pero puwedeng pinahelingan sinda nin pagkaherak huli ta may paggalang sinda sa dugo, minsan ngani maninigo kutana sindang nagin mas maigot dapit sa pagpaheling kan siring na paggalang.
Horophoropa an situwasyon. An mga Israelita sa pamamahala ni Hadeng Saul asin kan saiyang aking si Jonatan nakikilaban sa mga Filisteo. Sa punto na “an mga lalaki mismo sa Israel nagipit na gayo” sa ralaban, pabiglabiglang nanumpa si Saul na an saiyang mga tawohan maninigong dai magkakan sagkod na madaog an mga kaiwal. (1 Samuel 14:24) Dai nahaloy an saiyang panunumpa nagbunga nin problema.
An saiyang mga tawohan nanggagana sa masakit na ralaban, pero an makuring paghihingoa nagkaigwa nin nakadadanyar na epekto. Nagutom asin napagal sinda. Ano an saindang ginibo sa grabeng situwasyon na iyan? “An banwaan dinagusong may kapasloan an sinamsaman asin nagkua nin mga karnero asin baka saka ogbon na baka asin binono an mga iyan sa ibabaw kan daga, asin an banwaan nagkarakan kaiba an dugo.”—1 Samuel 14:32.
Iyan pagbalga sa pagboot nin Dios manongod sa dugo, siring kan sinabi kan nagkapira sa tawohan ni Saul sa saiya, na nagsasabing: “Uya! An banwaan nagkakasala tumang ki Jehova sa pagkakan kaiba an dugo.” (1 Samuel 14:33) Iyo, an Pagboot nagsabi na kun binobono an mga hayop, an dugo kaipuhan na patoroon bago kakanon an karne. An Dios dai naghagad na gumibo nin panatikong mga paagi sa pagpatoro kan dugo. Paagi sa paggibo nin rasonableng mga tangga sa pagpatoro, makapaheheling nin paggalang an saiyang mga lingkod para sa kahulogan nin dugo. (Deuteronomio 12:15, 16, 21-25) Puwedeng gamiton an dugo nin hayop sa pag-atang sa altar, pero dai iyan dapat na kakanon. An tuyong pagbalga padudusahan nin kagadanan, huli ta sinabihan an banwaan nin Dios: “Dai kamo magkakan kan dugo nin ano man na klase nin laman, huli ta an kalag kan gabos na klase nin laman iyo an dugo kaiyan. An siisay man na magkakan kaiyan gagadanon.”—Levitico 17:10-14.
An mga soldados daw ni Hadeng Saul tuyong binabalga an Pagboot? Sinda daw nagpapaheling nin absolutong pagbasangbasang sa pagboot nin Dios manongod sa dugo?—Ikomparar an Bilang 15:30.
Dai kita maninigong magkonklusyon nin siring. An rekord nagsasabi na ‘binobono ninda an mga hayop sa ibabaw kan daga asin nagkakakan kaiba an dugo.’ Kaya puwedeng guminibo sinda nin mga paghihingoa na patoroon an dugo. (Deuteronomio 15:23) Alagad, sa saindang pagal, gutom na kamugtakan, dai ninda ibinitin an binonong mga hayop asin tinawan nin bastanteng panahon an normal na pagtoro kan dugo. Binono ninda an mga karnero asin baka “sa ibabaw kan daga,” na puwedeng nakaampat sa pagtoro. Asin tolos sindang puminidaso nin karne sa gadan nang mga hayop na tibaad nasa dugo. Kun siring, dawa nasa kaisipan ninda an pagkuyog sa pagboot nin Dios, dai sinda biyong nagkuyog sa tamang mga paagi ni sa igong sokol.
An resulta iyo na “an banwaan nagkarakan kaiba an dugo,” na sarong kasalan. Narisa ini ni Saul asin nagboot na paligidon saiya an sarong dakulang gapo. Pinagbotan nia an mga soldados: “Darahon sako digdi, an kada saro saindo, an saiyang baka asin, an kada saro, an saiyang karnero, asin kaipuhan nindong gibohon an pagbono sa lugar na ini asin an pagkakan, asin dai kamo magkasala tumang ki Jehova paagi sa pagkakan kaiba an dugo.” (1 Samuel 14:33, 34) Nagkuyog an nagkasalang mga soldados, asin “nagpatogdok si Saul nin altar ki Jehova.”—1 Samuel 14:35.
An pagbono nin mga hayop sa ibabaw kan gapo posibleng nagpangyari nin bastanteng pagtoro kan dugo. An karne hale sa mga hayop kakakanon harayo sa lugar nin pagbono. Tibaad ginamit ni Saul sa altar an iba sa pinatorong dugo sa paghagad kan pagkaherak nin Dios sa mga nagkasala. Naherak si Jehova, malinaw na huli ta aram nia kun anong mga paghihingoa an ginibo kan mga soldados dawa ngani pagal asin gutom na sindang marhay. Tibaad kinonsiderar man nin Dios na an pabiglabiglang panunumpa ni Saul ginipit an saiyang tawohan sa makamomondong situwasyon na iyan.
An kasaysayan na ini nagpapaheling na an emerhensiang situwasyon bakong sarahotan sa dai pag-intindi sa pagboot nin Dios. Maninigong makatabang man iyan sato na maheling an pangangaipo para sa maingat na paghorophorop bago manumpa, huling an pabiglabiglang panunumpa puwedeng magcausa nin mga problema para sa sato personalmente asin para sa iba.—Eclesiastes 5:4-6.