LEKSIYON 04
Siisay an Diyos?
Puon pa kan inot na mga panahon, an mga tawo nagsasamba na sa dakul na diyos asin mga diyosa. Pero, may sinasabi an Bibliya na Diyos na “mas urog . . . kisa sa gabos na iba pang diyos.” (2 Cronica 2:5) Siisay siya? Taano ta mayo nang ibang diyos na sinasamba nin mga tawo an makakapantay sa saiya? Aramon sa leksiyon na ini kun ano an gusto kan Diyos na iyan na maaraman mo manungod sa saiya.
1. Ano an pangaran kan Diyos, asin ano an patunay na gusto niyang maaraman ta iyan?
Sa Bibliya, nagpapabisto sa sato an Diyos. Sinabi niya: “Ako si Jehova. Iyan an sakuyang pangaran.” (Basahon an Isaias 42:5, 8.) “Jehova” an translation kan Hebreong pangaran na posibleng marhay na nangangahulugan na “Pinangyayari Niyang Magin.” Gusto ni Jehova na maaraman ta an saiyang pangaran. (Exodo 3:15) Paano ta nasabi iyan? Mahihiling ta sa Bibliya an saiyang pangaran nin labing 7,000 na beses!a An pangaran na Jehova para sana sa “tunay na Diyos sa kalangitan sa itaas asin sa daga sa ibaba.”—Deuteronomio 4:39.
2. Ano an sinasabi sa sato kan Bibliya manungod ki Jehova?
Sinasabi kan Bibliya na sa gabos na diyos na sinasamba nin mga tawo, si Jehova sana an tunay na Diyos. Taano? May nagkapirang dahilan. Si Jehova an may pinakahalangkaw na awtoridad asin siya sana “an Kahuruhalangkawi sa bilog na daga.” (Basahon an Salmo 83:18.) Siya “an Makakamhan sa Gabos” dahil may kapangyarihan siyang gibuhon an ano man na gusto niyang gibuhon. “Linalang [niya] an gabos na bagay”—an uniberso saka an lambang buhay digdi sa daga. (Kapahayagan 4:8, 11) Bakong arog nin siisay man, si Jehova dai nin kapinunan asin dai nin katapusan.—Salmo 90:2.
ARAMON PA
Siyasaton an pagkakaiba kan daing kaagid na pangaran kan Diyos saka kan saiyang mga titulo. Dangan aramon kun paano siya nagpapamidbid sa sato asin kun taano ta gusto niyang mamidbid mo siya.
3. An Diyos kadakul nin titulo, pero saro sana an pangaran niya
Tanganing mahiling an pagkakaiba kan titulo asin kan pangaran nin sarong indibidwal, i-play an VIDEO, dangan pag-ulayan an hapot na ini:
Ano an pagkakaiba nin titulo, arog kan “Kagurangnan,” asin nin pangaran?
Arog mismo kan sinasabi kan Bibliya, an mga tawo nagsasamba sa dakul na diyos asin kagurangnan. Basahon an Salmo 136:1-3, dangan pag-ulayan an hapot na ini:
Siisay an “Diyos nin mga diyos” asin “Kagurangnan nin mga kagurangnan”?
4. Gusto ni Jehova na maaraman mo an pangaran niya saka gamiton iyan
Taano ta masasabi mo na gusto ni Jehova na maaraman mo an pangaran niya? I-play an VIDEO, dangan pag-ulayan an mga hapot na ini:
Sa hiling mo, gusto daw ni Jehova na maaraman nin mga tawo an saiyang pangaran? Taano ta nasabi mo iyan?
Gusto ni Jehova na gamiton kan mga tawo an saiyang pangaran. Basahon an Roma 10:13, dangan pag-ulayan an mga hapot na ini:
Taano ta mahalagang marhay na gamiton ta an pangaran nin Diyos, an Jehova?
Ano an mamamatian mo pag dai nalingawan nin sarong tawo an pangaran mo tapos inapod ka pa niya sa saimong pangaran?
Sa hiling mo, ano an mamamatian ni Jehova pag inapod mo siya sa saiyang pangaran?
5. Gusto ni Jehova na magin amigo ka niya
Sinabi ni Soten na taga Cambodia na maugmahon siya kan maaraman niya an pangaran kan Diyos. I-play an VIDEO, dangan pag-ulayan an hapot na ini:
Sa video, ano an namatian ni Soten kan maaraman niya an pangaran kan Diyos?
Sa parati, pangaran an inot mong naaaraman bago mo magin amigo an sarong tawo. Basahon an Santiago 4:8a, dangan pag-ulayan an mga hapot na ini:
Ano an gusto ni Jehova na gibuhon mo?
Pag aram mo an pangaran kan Diyos saka ginagamit iyan, paano iyan makakatabang na magin mas harani ka sa saiya?
MAY MGA NAGSASABI: “Saro man lang an Diyos, kaya maski ano an apod saiya okey lang ’yan.”
Kumbinsido ka na Jehova an pangaran kan Diyos?
Paano mo ipapaliwanag na gusto kan Diyos na gamiton ta an pangaran niya?
SUMARYO
Jehova an pangaran kan iyo sanang tunay na Diyos. Gusto niyang maaraman ta asin gamiton an pangaran niya tanganing magin mga amigo niya kita.
Rebyu
Taano ta ibang-iba si Jehova sa gabos na iba pang diyos na sinasamba nin mga tawo?
Taano ta dapat niyatong gamiton an pangaran kan Diyos?
Ano an nagpapatunay na gusto ni Jehova na magin harani ka sa saiya?
HILINGON MAN
Pag-isipan an limang nakakakumbinsir na paliwanag na nagpapatunay na may Diyos.
Pag-isipan kun taano ta tama sanang paniwalaan na an Diyos mayong kapinunan asin mayong katapusan.
“Siisay an Naggibo sa Diyos?” (An Torrengbantayan, Setyembre-Oktubre 2014)
Dawa ngani dai ta na aram kun paano an pagpronunsiyar kaidto kan pangaran nin Diyos, aramon kun taano ta dapat tang gamiton an pangaran na iyan.
Mahalaga daw talaga kun ano an apod ta sa Diyos? Aramon kun taano ta masasabi ta na igwa talaga siya nin personal na pangaran.
a Para sa dagdag na impormasyon manungod sa pangaran nin Diyos asin kun taano ta hinali iyan sa ibang bersiyon kan Bibliya, hilingon an Apendise A4 sa Bagong Kinaban na Traduksiyon kan Banal na Kasuratan.