Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 18: Kaimbodan sa Naheheling na Organisasyon nin Dios Ngonyan
1, 2. Paano maninigong saboton an teksto sa Salmo 50:5?
SA SALMO 16:10 nasusurat: “Dai mo pababayaan an sakong kalag sa Sheol. Dai mo itotogot na an saimong maimbod makaheling kan kotkot.” Asin sa Salmo 50:5 nasusurat: “Tipona sa sako an sakong mga maimbod, an mga minaoyon sa sakuyang tipan paagi sa atang.” An mga minaoyon daw sa tipan ni Jehova iyo an nagtatao kan “atang”? Bako, an mga maimbod na ini dai minagibo nin indibiduwal na ‘pag-atang’ kan saindang sadiri, na itinatao an saindang hawak sa laman tanganing makipagtipan sa Dios.
2 Kun siring, paano ginigibo an tipan? Basado sa “atang” kan “maimbod” na an kalag dai pinabayaan sa Sheol kundi binuhay liwat sa mga gadan. Iinaplikar ni apostol Pedro an mga tataramon kan Salmo 16:10 ki Jesu-Cristo asin nagpadagos sa pagsabi: “Sia [si David] patienot na natanaw asin nagtaram manongod sa pagkabuhay liwat kan Cristo, na sia dai pinabayaan sa Hades ni nakaheling man nin kalapaan an saiyang laman. An Jesus na ini binuhay liwat nin Dios.”—Gibo 2:25, 27, 31, 32.
3. Sairisay an mga tinitipon sono sa pagboot sa Salmo 50:5, asin taano sinda ta maninigong mapahirong magmaimbod sa Dios?
3 An binuhay liwat na Jesus na ini iyo an Tagapag-oltanan sa bagong tipan, asin basado sa saiyang atang na ginigibong balido an bagong tipan. (Hebreo 9:15, 17) Kaya sairisay an titiponon sono sa pagboot sa Salmo 50:5? An mga disipulo ni Jesus na yaon sa bagong tipan huli sa saiyang atang. Huli sa pagpasalamat ki Jehova para sa daing kabaing na atang na ini, maninigo sindang mamotibar na magmaimbod sa saiya.
4, 5. (a) Ano an nahimo ni Satanas na Diablo kaidtong enot na guerra mundial sa saiyang mga paghihingoa na laglagon an naheheling na organisasyon ni Jehova? (b) Saen ibinalyo an opisina prinsipal kan Sosyedad, asin taano? (c) Sa modernong katimbang kan Salmo 137:1, ano an saboot, o kamatean, kan maimbod na natatada kun pinaghohorophorop ninda an pilay na kamugtakan kan organisasyon nin Dios?
4 Kan an Kahadean ni Jehova patindogon sa kalangitan kan 1914, an mga nasyon nagkaaranggot tumang sa Kahadean na ini paagi sa pagraralaban sa enot na guerra mundial, asin itinogot ini nin Dios. (Salmo 2:1, 2) Hiningoa ni Satanas na Diablo na gamiton an ralaban na iyan sa kinaban tanganing laglagon an naheheling na kabtang kan organisasyon ni Jehova. Nahimo nia na ipabilanggo an presidente kan Watch Tower Bible and Tract Society sa bilanggoan pederal sa Atlanta, Georgia. An pito pang ibang representante kan Sosyedad nabilanggo kaiba nia.
5 Huli sa paglamag, an opisina prinsipal kan Sosyedad sa Brooklyn, Nueva York, ibinalyo sa arkiladong edipisyo sa Pittsburgh, Pennsylvania. Ini ginibo tanganing ipagpadagos an pagpublikar kan magasin na Watch Tower. An pagpamuraway sa langit kan mga maimbod linalaoman sa dai na mahahaloy. Alagad an mga kabilang sa natatada napapahibi mantang hinohorophorop ninda an api, pilay na kamugtakan kan organisasyon ni Jehova.—Salmo 137:1.
Kaimbodan sa Panahon nin Pagkabilanggo
6-8. Kaidtong sia nabibilanggo, paano an presidente kan Sosyedad, si J. F. Rutherford, nagpaheling nin kaimbodan sa organisasyon ni Jehova?
6 Nagpapaheling nin kaimbodan sa organisasyon ni Jehova kan sia nabibilanggo, an presidente kan Watch Tower Society, si J. F. Rutherford, kan Disyembre 25, 1918, nagpadara nin espesyal na surat ki J. A. Bohnet, sarong sinasarigan na kapwa lingkod ni Jehova. Idto nakaadres sa saiya sa opisina kan Sosyedad sa Pittsburgh. Arog kaini an isinurat ni Rutherford:
7 “Huling ako nagsayumang makikompromiso sa Babilonya, kundi maimbod na naghingoang paglingkodan an sakuyang Kagurangnan, nabibilanggo ako, na ipinagpapasalamat ko. . . . Mas pipilion ko nanggad an Saiyang pag-oyon asin huyom saka mabilanggo, kisa makikompromiso o padaog sa Hayop saka magin libre asin magkamit kan mga pag-omaw kan bilog na kinaban. Sarong mapalad, mahamis na eksperyensia an magtios huli sa maimbod na paglilingkod sa Kagurangnan. Sa Kahadean pahahalagahan niato an huyom kan Ama nin orog sa gabos na bagay. Ini maninigong nangongorog sa isip nin lambang aki nin Dios. Minamawot niato an pagkasararo na magibo sa satong Saro duman. Naoogma ako, pero minamawot kong maheling giraray kamo gabos. Harani na an kombension asin an taonan na miting. Panoon logod kan espiritu ni Cristo an puso kan lambang mag-atender . . .
8 “Kadakol pa kan dapat na gibohon. Magigin dakulang pribilehiyo na makikabtang. Solamente idtong namomoot sa Saiya nin orog sa gabos asin maimbod an tatawan kan siring na onra. . . . Bago an maogmang aldaw na iyan kaipuhan na ikatao an maigot na patotoo. . . . An nakaaging mga metodo asin paagi dai makaootob sa mga kahagadan, alagad ta an Dios sa Saiyang marahay na paagi magtatagama. . . . Ikinaoogma ko na an eksperyensiang ini nin pagkabilanggo itinagama para sa samo imbes na ki Tugang na Russell. Noarin man dai ko pa lubos na ikinaongis nin arog ngonyan an labi-labing inhustisya asin namotan an katanosan saka minawot na tabangan an iba. . . . An kapangganahan nin Sion harani na.”
An Organisasyon nin Dios Iyo an Saindang “Nangongorog na Dahelan nin Kagayagayahan”
9. Anong kaisipan kan salmista an ipinaheling kan nabibilanggong mga representante kan Sosyedad?
9 Minsan ngani an mga lingkod ni Jehova binansagan sa kinaban bilang bakong maimbod, traydor, asin bakong patriotiko, dai ninda tinalikdan an organisasyon ni Jehova. Nagsayuma sindang makikompromiso huli sa pangigipit na iyan. Mas gugustohon pa nindang mawaran nin kamanungdanan an saindang toong kamot o magin pula kisa lingawan an organisasyon nin Dios asin dai na iyan gibohon na saindang “nangongorog na dahelan nin kagayagayahan.”—Salmo 137:5, 6.
10, 11. (a) Ano an inarang kan maimbod na natatada, asin anong mga tataramon kan salmista an itinaram ninda manongod sa Edom? (b) Ano an nagibo kan mga kaiwal kan naheheling na organisasyon ni Jehova, asin ano an noarin man dai linaoman kan mga kaiwal na iyan?
10 May maraot na motibong ipinag-ogma kan mga kaiwal ni Jehova an ginibo tumang sa daganon na mga representante kan saiyang unibersal na organisasyon. Alagad ta inarang kan mga lingkod ni Jehova na dumatong na logod an saiyang aldaw nin pamalos huli sa gabos na paghamak na ini sa saiyang organisasyon. Itinaram ninda an sinabi kan salmista manongod sa suanoy na Edom: “Girumdoma, O Jehova, an manongod sa mga aki ni Edom kaidtong aldaw nin Jerusalem, na nagsasarabi: ‘Gabaa iyan! Gabaa iyan sagkod sa pasisikadan kaiyan!’” (Salmo 137:7; Galacia 4:26) A, dai, namomotan na gayo ni Jehova an saiyang arog-agom na organisasyon tanganing lingawan an sinasabi asin ginigibo kan mga kabtang kan organisasyon kan Diablo tumang sa mga maimbod sa saiyang daganon na organisasyon.
11 Sa pagheling nin gabos kan panahon na idto, talagang ginaba kan politikal na mga kasorog kan Dakulang Babilonya an naheheling na organisasyon ni Jehova “sagkod sa pasisikadan kaiyan.” Noarin man dai ninda linaoman na maheling iyan na tumindog hale sa kabokabo asin magin an lakop sa kinaban na organisasyon ngonyan.