Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 2: Inaatubang kan “Prinsipe nin Katoninongan” an Armagedon
1, 2. (a) Anong nakaoogmang mga tataramon an ipinasabong nin Dios ki propeta Isaias na itaram? (b) Kasuarin nagpoon na maotob an mga tataramon na ini?
Kaidtong ikawalong siglo bago an satong Komon na Kapanahonan, si propeta Isaias pinasabngan na magsabi sa banwaan nin Dios: “Huli ta namundag sa sato an sarong aki, may itinao sa satong sarong aking lalaki; asin an makaprinsipeng pamamahala mamumugtak sa saiyang abaga. Asin an saiyang ngaran aapodon na Makangangalas na Parahatol, Makosog na Dios, Amang Daing Katapusan, Prinsipe nin Katoninongan. An kadakolan kan sa-prinsipeng pamamahala asin katoninongan magigin daing kasagkodan, sa trono ni David asin sa saiyang kahadean tanganing iyan marigon na patindogon asin tanganing papagdanayon iyan paagi sa hustisya asin paagi sa katanosan, poon ngonyan asin sagkod sa panahon na daing katapusan.”—Isaias 9:6, 7.
2 An maogmang mga tataramon na iyan nagpoon na maotob kan paghinanapos kan taon 2 B.C.E. Ini kan si Jesus mamundag bilang gikan ni Hadeng David, na naghade sa siudad nin Jerusalem sa 12 tribo nin Israel.
Tipan Para sa Kahadean na Daing Sagkod an Katoninongan
3. (a) Anong pakipagtipan an ginibo nin Dios ki Hadeng David? (b) Sa kiisay na gikan ni Hadeng David itinao ni Jehova an titulong “Prinsipe nin Katoninongan”?
3 Huli sa kaigotan ni David para sa pagsamba sa Dios nin Israel, si Jehova nakipagtipan sa saiya para sa daing katapusan na Kahadean sa saiyang linahe. (2 Samuel 7:1-16) An tipan na iyan suportado kan sumpa nin Dios. (Salmo 132:11, 12) Sono sa tipan na iyan, an kahadean ni David kaipuhan na magtao kan pasisikadan para sa nagdadangadang na Kahadean kan “Prinsipe nin Katoninongan.” Si “Jesu-Cristo, aki ni David,” iyo an tinawan ni Jehova kan titulong “Prinsipe nin Katoninongan.”—Mateo 1:1.
4. (a) Siisay an nagin daganon na ina ni Jesus? (b) Ano an isinabi sa saiya ni anghel Gabriel manongod digdi?
4 An ina ni Jesus sarong babae na namundag sa makahadeng linya ni Hadeng David. Birhen sia kan ipangidam nia an saiyang ipinanugang aki, na magigin an permanenteng magmamana kan trono ni David. An pangingidam na ini nangyari bago sia kuanon ni Jose bilang saiyang agom. (Mateo 1:18-25) Pinaisi kan anghel na si Gabriel an birhen na si Maria: “Uya! ika mangingidam sa saimong matris asin mangangaki nin sarong aking lalaki, asin aapodon mo an saiyang ngaran na Jesus. An sarong ini magigin dakula asin aapodon Aki kan Kaharohalangkawe; asin itatao saiya ni Jehova Dios an trono ni David na saiyang ama, asin sia magsasakop bilang hade sa harong ni Jacob sagkod lamang, asin dai magkakaigwa nin katapusan an saiyang kahadean.”—Lucas 1:31-33.
5. Ano an ihinula ni Isaias na propeta manongod sa paghade kan “Prinsipe nin Katoninongan”?
5 Iyan an dahelan na si propeta Isaias naghula manongod sa “Prinsipe nin Katoninongan” na “mahiwas an saiyang nasasakopan sa sarong katoninongan na mayo nin katapusan, para sa trono ni David asin para sa saiyang sa-hadeng kapangyarihan.” (Isaias 9:6, 7, The Jerusalem Bible) Kaya, sono sa tipan ki David, an Kahadean na ini magigin daing katapusan na gobyerno na mayong sagkod an katoninongan. An saiyang trono magdadanay “sagkod lamang”!
6. (a) Tanganing maotob an tipan sa Kahadean, ano an ginibo nin Dios sa ikatolong aldaw kan pagkagadan ni Jesus? (b) Kasuarin nagpoon na maghade si Jesus bilang an “Prinsipe nin Katoninongan”?
6 Tanganing maotob an tipan na ini sa Kahadean, binuhay liwat kan Makakamhan sa gabos na Dios si Jesus hale sa mga gadan sa ikatolong aldaw kan saiyang pagkagadan bilang martir. Ini kan ika-16 na aldaw kan Judiong bulan nin Nisan, kan taon 33 kan satong Komon na Kapanahonan. Bilang nakaheling mismo sa binuhay liwat na Aki nin Dios, si apostol Pedro nagsabi na si Jesus “ginadan sa laman, alagad binuhay sa espiritu.” (1 Pedro 3:18) Ilinangkaw sia kan Kaharohalangkaweng Dios sa Saiyang toong kamot. Duman, poon kan matapos an Mga Panahon nin mga Hentil, o “an itinalaan na mga panahon kan mga nasyon,” sa pagpopoon nin Oktubre kan taon 1914, sia naghahade na bilang an “Prinsipe nin Katoninongan.”—Lucas 21:24.
7. (a) Ano an inatubang ni Jesus poon sa pagpopoon kan saiyang paghade? (b) Siisay an nagbabalangibog kan paghade ni Jesus sa gabos na nasyon, asin bilang kaotoban kan ano?
7 Poon kan magpoon an saiyang paghade sa langit, sia napaatubang sa sarong anggot na kinaban, arog kan ipinaririsa kan duwang guerra mundial sa isyu nin kun baga siisay an maghahade sa daga. Sia ngonyan napapaatubang sa organisasyon na Naciones Unidas. Paagi sa lakop sa daga na pagbalangibog kan mga Saksi ni Jehova kan maogmang bareta kan Kahadean, na naghuhulit sa labing 200 na kadagaan, an saiyang aktibong paghade sa kalangitan dinadara sa atension nin gabos na nasyon. Ini kaotoban kan ihinula mismo kan “Prinsipe nin Katoninongan,” arog kan mababasa niato sa Mateo 24:14: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”
8. Taano ta masasabi na kita nasa poro na kan “pagtatapos kan palakaw nin mga bagay” na ini?
8 An isyu nin pagsakop sa kinaban dapat na husayon na sa madali. Ngonyan, labi nang 70 taon poon kan matapos an “itinalaan na mga panahon kan mga nasyon” kan 1914, kita nasa poro na kan “pagtatapos kan palakaw nin mga bagay” na ini. An kapag-arakian kan 1914 nakaheling sa pagpopoon kan makahulogan na mga pangyayari sa kinaban na ihinula ni Jesus. (Mateo 24:3-14) An kapag-arakian na iyan, sabi ni Jesus, dai makalilihis sagkod na maotob an gabos na bagay na ini. Iyan haranihon nang matapos.—Mateo 24:34.
9, 10. (a) Paano ipinaabot sato an makahulang impormasyon sa libro nin Kapahayagan? (b) Ano an ihinuhula kan Kapahayagan 16:13, 14, 16 manongod sa Har–Magedon, o Armagedon?
9 Kaya, ano an natatagama sa haranihon nang ngapit, asin ano an inaatubang kan “Prinsipe nin Katoninongan”? Sia mismo ginamit na ihula ini sa pinakaultimong libro kan Biblia, an Kapahayagan, o Apocalipsis, na itinao sa saiya nin Dios asin ipinaabot nia sa gurang nang apostol na si Juan paagi sa sarong anghel. (Kapahayagan 1:1, 2) Iyan nangyari sa paghihinanapos kan enot na siglo kan satong Komon na Kapanahonan. Sa Kapahayagan 16:13, 14, 16, pinasabngan ni Jesus si apostol Juan na magtao kan makahulogan na pagsambit na ini sa Har–Magedon, o Armagedon:
10 “Asin naheling ko an tolong maating ipinasabong na mga tataramon na garo mga talapang na nagluwas sa ngoso kan dragon asin sa ngoso kan mabangis na hayop asin sa ngoso kan falsong propeta. An mga ini, sa katotoohan, mga tataramon na ipinasabong nin mga demonyo asin naggigibo nin mga tanda, asin nagduduman sinda sa mga hade kan bilog na ineerokan na daga, tanganing tiriponon sinda sa ralaban kan dakulang aldaw nin Dios na Makakamhan sa gabos. Asin sinda tiniripon ninda sa lugar na sa Hebreo inaapod Har–Magedon.”
(Ipagpapadagos sa masunod na luwas.)