“Paoomayan ko sinda asin pahahayagan ko sinda nin abundang katoninongan asin katotoohan.”​—JEREMIAS 33:6.

3. Bilang kaotoban kan mga tataramon ni Jehova paagi ki Jeremias, anong makasaysayan na mga pangyayari an nagtokdo sa Israel nin ikaduwang mahalagang leksion manongod sa katoninongan?

³ Minsan siring, bago bumagsak an Jerusalem ihinayag ni Jehova na sia, bakong an Egipto, matao nin tunay na katoninongan sa Israel. Nanuga sia paagi ki Jeremias: “Paoomayan ko sinda asin pahahayagan ko sinda nin abundang katoninongan asin katotoohan. Asin ta pababalikon ko an mga bihag nin Juda asin an mga bihag nin Israel, asin patitindogon ko sinda nin siring kan enot.” (Jeremias 33:​6, 7) An panuga ni Jehova nagpoon na maotob kaidtong 539 B.C.E. kan masakop an Babilonya asin tinawan nin katalingkasan an mga disterradong Israelita. (2 Cronica 36:​22, 23) Kan huring kabtang kan 537 B.C.E., sa kaenot-enote sa laog nin 70 taon sarong grupo nin mga Israelita an nagselebrar kan Kapiestahan nin mga Payag-payag sa daga nin Israel! Pakatapos kan kapiestahan, pinonan nindang itogdok liwat an templo ni Jehova. Ano an namatean ninda manongod kaini? An rekord nagsasabi: “Sinda nagkururahaw nin makosog na kurahaw sa pag-omaw ki Jehova huli sa pagbugtak kan pundasyon kan harong ni Jehova.”​—Esdras 3:11.