Watchtower ONLINE NA LIBRARYA

“Kuyoga Tabi an Tingog ni Jehova”

An Tataramon nin Dios Para sa Sato Paagi ki Jeremias
- 12. Ano kun beses an dapat na gibohon kan kamagurangan tanganing protehiran an kongregasyon?
  
  ¹² Ikinasuya nin dakol na Judio an tabang na paorootrong itinao ni Jehova paagi ki Jeremias. Kaagid kaiyan, an saro na may magabat na kasalan ngonyan tibaad dai nagsosolsol, na sinasayumahan an tabang kan kamagurangan. Sa kamugtakan na iyan, dapat na sunodon kan kamagurangan an sono sa Kasuratan na instruksion na protehiran an kongregasyon paagi sa pagtiwalag sa nagkasala. (1 Cor. 5:11-13; helingon an kahon na “Pamumuhay na Mayo nin Ley,” sa pahina 73.) Alagad iyan daw nangangahulogan na sia dai nang paglaom sagkod lamang, na nungkang makakabalik sa pabor ni Jehova? Dai. An mga Israelita haloy nang rebelde; pero sinabi nin Dios: “Magbalik kamo, rebeldeng mga aki. Papaomayan ko an saindong pagigin rebelde.” (Jer. 3:22)a Inaagda ni Jehova an mga nagkasala na bumalik sa saiya. Iyo, sinasabihan nia sinda na gibohon iyan.
  
  PAMUMUHAY NA MAYO NIN LEY
  
  Ano an nagin kamugtakan kan buhay kan mga Judio pagkalaglag kan Jerusalem? Si Jeremias nagtao sa sato nin parsial na paglaladawan sa Lamentacion 2:9. Gaba an mga lanob kan siudad, na tibaad kabale an mga tata na dating nagpoprotehir sa siudad. Alagad mas grabe pa dian, “mayo nin ley.” Boot daw sabihon ni Jeremias na an mga nakaligtas nagin nang dai makontrol na grupo nin mga tawo? Posibleng marhay na an boot niang sabihon iyo an pagkawara kan espirituwal na seguridad asin kaginhawahan na dating naeeksperyensiahan kan mga Judio kaidtong tinotokdoan sinda sa Ley nin Dios kan maimbod na mga saserdote asin propeta. An falsong mga propeta na hinihinanyog ninda ngonyan mayong itinataong tunay na “bisyon,” o paggiya, gikan ki Jehova; an saindang “bisyon” daing kamanungdanan.—Lam. 2:14.
  
  Tibaad mamatean nin sarong natiwalag sa Kristianong kongregasyon na kapareho kaiyan an saiyang kamugtakan. Dai na nia naeeksperyensiahan an dating maogmang pakikipagkatood sa saiyang espirituwal na mga tugang, siring man an mamomoton na pag-asikaso kan kamagurangan. Asin sia harayo sa mahalagang marhay na espirituwal na pagtotokdo na dati niang inaako. Sa kinaban, na “mayo nin ley” gikan ki Jehova, posibleng nakakamate sia nin dakulang kawaran. Minsan siring, sia puedeng bumalik sa inooyonan na kamugtakan sa pagheling ni Jehova asin mag-ako giraray nin abundang bendisyon. (2 Cor. 2:6-10) Pero, siertong maoyon kamo na mas marahay nanggad na kuyogon si Jehova asin dai noarin man magin mayo nin ley.

“Kuyoga Tabi an Tingog ni Jehova”

An Tataramon nin Dios Para sa Sato Paagi ki Jeremias
- a An kaolay digdi ni Jehova iyo an kahadean nin Israel sa amihanan. An mga kabilang sa sampulong tribong kahadean na iyan mga 100 na taon nang desterado kan ipahayag ni Jeremias an mensaheng ini. Inadmitir nia na sagkod sa panahon nia, dai pa nagsolsol an nasyon na iyan. (2 Ha. 17:16-18, 24, 34, 35) Minsan siring, an mga indibiduwal na Israelita puedeng bumalik sa pabor nin Dios asin makakabalik pa ngani hale sa pagkadistiero.