Pagdara kan Sakal sa Pagkabarobata
SA ‘DELIKADONG mga panahon na ini na masakit pakibagayan,’ napapaatubang an mga hoben sa grabeng mga pangigipit. (2 Timoteo 3:1) Aroaldaw na pinatatamaan sinda nin propaganda na nag-eenkaminar nin inmoralidad, paninigarilyo, asin iba pang klase nin nakararaot na gawe-gawe. An mga nagkukuyog sa mga pamantayan kan Biblia tibaad tuyaon huli sa pagsayumang makiiba sa kadaklan, asin an nagkapirang Kristiano tibaad makamate na mas madaling sumuko.
Sa pagtatapos kan ikapitong siglo B.C.E., nagsurat si Jeremias: “Marahay sa makosog na tawo na sia magdara kan sakal sa saiyang pagkabarobata.” (Lamentacion 3:27) Ano an boot niang sabihon? Na an pakanood na makapanggana sa mga pagbalo mientras na hoben pa nakatatabang na andamon an saro na atubangon an mga angat nin pagkaadulto. Minsan ngani dai nakaoogma, an mga kasakitan dai maeebitaran kapwa nin Kristianong mga hoben asin adulto. (2 Timoteo 3:12) Alagad an mga pakinabang sa pagigin fiel nakalalabi nanggad sa ano man na temporaryong kaginhawahan na puedeng ibunga nin pakikikompromiso.
Kun ika sarong hoben, atubangon nin diretso an mga pagbalo sa pagtubod. Kun nasusugotan na gumibo nin sala, dai makikompromiso. Dawa ngani sa panahon na iyan tibaad masakit na gibohon ini, sa katapustapusi, mas dikit an saimong magigin mga kahaditan. Nanuga si Jesus: “Pasana nindo an sakong sakal . . . , asin makakukua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”—Mateo 11:29, 30.
Akoa an angat na mamuhay sono sa mga prinsipyo kan Biblia. An paggibo kaiyan matao sa saindo kan pinakamarahay na dalan nin pamumuhay ngonyan asin nin siertong paglaom para sa ngapit. Siring sa sinasabi kan Biblia, “an kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.