Lakop sa Kinaban na Katiwasayan sa Pagsakop kan “Prinsipe nin Katoninongan”
Kapitulo 19: An Nagdadangadang na “Ralaban kan Dakulang Aldaw nin Dios na Makakamhan sa Gabos”
1. (a) Sa dai na mahahaloy oobligaron kan mga nasyon an Makakamhan sa gabos na Dios na isurat an ano sa “libro kan Mga Pakikilaban ni Jehova,” asin ano an librong iyan? (b) Paagi sa anong ralaban na an librong iyan makaaabot sa mamuraway na kulminasyon?
SA KATAPUSTAPUSI an mga nasyon nakaabot na sa panahon na inoobligar ninda an Makakamhan sa gabos na Dios na isurat an mamuraway na katapusan kan “libro kan Mga Pakikilaban ni Jehova.” (Bilang 21:14) An literal na librong iyan rekord kan mga pakikilaban ni Jehova para sa saiyang banwaan. Maliwanag na nabasa iyan ni Moises. An libro tibaad nagpoon sa mapangganang pakikilaban ni Abraham tumang sa mga hade na buminihag ki Lot, na nakilaban si Jehova para ki Abraham. (Genesis 14:1-16, 20) Dai na mahahaloy, an “libro kan Mga Pakikilaban ni Jehova” dadarahon sa mamuraway na kulminasyon na may nakadagdag na bagong kapitulo—an tala kan saiyang pinakamamuraway na kapangganahan. Iyan “an ralaban kan dakulang aldaw nin Dios na Makakamhan sa gabos” sa Armagedon, an katapusan kun dapit sa palakaw na ini nin mga bagay. (Kapahayagan 16:14, 16) Ipaheheling kan bilog na “libro” na an Makakamhan sa gabos na Dios noarin man dai nadaog sa pakikilaban, o sa guerra.
2, 3. (a) Poon sa kapinonan nin Kakristianohan, ano an totoo kun manongod sa pakikilaban ni Jehova sa militar na “mga pakikilaban”? (b) Ano an maprobokar ki Jehova sa pakikilaban para sa saiyang mga lingkod sa satong panahon?
2 Totoo, poon sa kapinonan nin Kristianismo sagkod ngonyan, iningatan ni Jehova an saiyang banwaan sa paagi na laen sa militar na pakikiguerra. Noarin man dai nakilaban si Jehova para sa saiyang Kristianong mga saksi arog kan ginibo nia para sa Israel na sakop kan Pagboot ni Moises. Alagad ta maabot an panahon sa harani nang ngapit na sia makikilaban sa militar para sa saiyang dusay na mga lingkod sa modernong mga panahon. Ano an poponan kan ralaban na iyan sa Armagedon?
3 Bago pumutok an ralaban nin Dios, an Dakulang Babilonya, an pankinaban na imperyo nin falsong relihiyon, nalaglag na. Si Satanas na Diablo asin an daing relihiyon na politikal na mga paralaglag sa Dakulang Babilonya ikaaanggot an bagay na an mga Saksi ni Jehova iyo an solamenteng relihiyosong grupo na nakaligtas. Dai naotob kan mga namomoon sa kinaban an saindang pasohan na sarong kinaban na daing dios. Kaya, ngonyan, abante sa todo-todong pagsalakay sa mga parasamba ki Jehova, na an unibersal na soberaniya saindang dinideharan asin linalabanan! Kaya sa aktuwal sinda makikilaban tumang sa Dios.—Kapahayagan 17:14, 16; ikomparar an Gibo 5:39.
“Si Jehova nin mga Hukbo” Ibabalik an mga Aktibidad Militar
4. (a) Ano an reaksion ni Jehova sa pagsalakay ni Gog? (b) Ano an patutunayan kan reaksion na iyan, kaoyon sa ngaran na “si Jehova nin mga hukbo”?
4 Si Satanas na Diablo, an simbolikong Gog nin Magog, iyo an magdidirehir sa pagsalakay na ini sa banwaan ni Jehova. Kun gamiton na ni Gog an saiyang ateistikong mga hukbo sa pagsalakay sa banwaan ni Jehova, sa pagsalakat asin paglaglag sa sainda, si Jehova maentra asin makikilaban para sa saiyang banwaan, arog kan ihinula sa Ezequiel 38:2, 12, 18-20. An reaksion ni Jehova ihinula man sa Zacarias 14:3: “Si Jehova maluwas nanggad asin makikilaban tumang sa mga nasyon na idto nin siring sa aldaw kan saiyang pakikilaban, sa aldaw nin pakilaban.” Sa paaging ini an Dios kan Biblia magpapatotoo sa gabos na modernong nasyon na sia sagkod ngonyan Guerrerong Dios, kapareho kaidtong kaaldawan kan suanoy na Israel, na, siring sa nasusurat sa Hebreong Kasuratan, sia inaapod na “si Jehova nin mga hukbo” nin 260 beses.—Salmo 24:10; 84:12.
5, 6. (a) Anong ralaban an maputok, asin siisay an mangengenot sa langitnon na mga hukbo sa pakikilaban? (b) Anong pagsaysay an itinatao ni apostol Juan manongod sa pakikilaban kan langitnon na mga hukbo?
5 Pag-abot kan “dakulang aldaw nin Dios na Makakamhan sa gabos,” iyan na an panahon para sa “ralaban” na matanda sa aldaw na iyan. Si Jehova tatawan nin senyal an saiyang Field Marshal, si Jesu-Cristo. Sa ngaran ni Jehova, sia asin an langitnon na hukbo nin manurosampulong ribo nin mga anghel masalakay, na garo nakasakay sa mga kabayong panguerra. (Judas 14, 15) Kapareho nin parabareta sa guerra, si apostol Juan nagtatao sato nin patienot na pagkasaysay kan mapanronot na kapangganahan na kakamtan kan Field Marshal ni Jehova sa “ralaban kan dakulang aldaw nin Dios na Makakamhan sa gabos”:
6 “Naheling ko an langit na nabukasan, asin, uya! sarong maputing kabayo. Asin an saro na nangangabayo dian inaapod Maimbod asin Totoo, asin sia naghohokom asin nakikipaglaban sa katanosan. An saiyang mga mata laad nin kalayo, asin nasa saiyang payo an dakol na diadema . . . Siring man, an mga hukbo na yaon sa langit nagsusurunod sa saiya na nangangabayo sa maputing mga kabayo, asin sinda nagugubingan nin maputi, malinig, pinong lino. Asin sa saiyang ngoso nagluluwas an sarong matarom na halabang minasbad, tanganing ipanlugad nia sa mga nasyon, asin sia magpapastor sa sainda paagi sa sogkod na batbat. Binabatayan man nia an ligisan kan kaanggotan kan kabangisan nin Dios na Makakamhan sa gabos. Asin sa saiyang pan-ibabaw na gubing, minsan sa saiyang paa, igwa sia nin ngaran na nasusurat, Hade nin mga hade asin Kagurangnan nin mga kagurangnan.”—Kapahayagan 19:11-16.
7. Ano an magigin kahulogan para sa mga nasyon kan pagbatay sa simbolikong ligisan kan kaanggotan nin Dios?
7 An makahadeng Field Marshal, si Jesu-Cristo, pangengenotan an langitnon na mga hukbo sa sarong mapangganang pagsalakay tumang sa gabos na iribang kaiwal sa Armagedon. Gigibohon niang dakulang ligisan an kampo de batalyang iyan! Mantang an Hade nin mga hade ‘binabatayan man an ligisan kan kaanggotan kan kabangisan nin Dios na Makakamhan sa gabos,’ ini nangangahulogan na an mga nasyon biyong roronoton. Iaapon sinda na garo hinog na ubas sa dakulaon na “ligisan,” na dian “an kaanggotan kan kabangisan nin Dios na Makakamhan sa gabos” roronoton sinda. An langitnon na mga hukbo makikiiba sa pagbatay sa “dakulang ligisan kan kaanggotan nin Dios.”—Kapahayagan 14:18-20.
8. Paano ilinaladawan ni Jehova an saiyang mga taktika sa pakikilaban?
8 An mga Saksi ni Jehova sa daga dai mabingat nin “espada” tumang sa mga hukbo ni Gog, pero si Jehova iyo. Ini saiyang pakikilaban! Asin ngonyan sa katapustapusi maheheling siang makilaban kan mga nasyon sa kinaban na ini na progresibo sa siensia! Hinanyoga mantang ilinaladawan nia an saiyang mga taktika sa pakikilaban: “‘Aapodon ko tumang sa saiya [si Gog] sa gabos kong kabukidan an sarong espada,’ an sabi kan Soberanong Kagurangnan na Jehova. ‘An espada nin lambang saro magigin tumang sa saiyang sadiring tugang. Asin maghohokom ako sa saiya, na dara an peste asin dugo; asin an makosogon na oran asin mga gapong graniso, kalayo asin asupre paooranon ko sa saiya asin sa saiyang mga kairiba patin sa dakol na banwaan na kaibanan nia. Asin padadakulaon ko nanggad an sakong sadiri asin papakangbanalon ko an sakong sadiri patin ipapamidbid ko an sakong sadiri sa mga mata nin dakol na nasyon; asin makakaaram sinda na ako si Jehova.’”—Ezequiel 38:21-23.
Banal na mga Armas na Gagamiton Tumang sa Kaiwal
9. Ano an pira sa mga armas sa pakikilaban na gagamiton ni Jehova tumang sa saiyang mga kaiwal?
9 Bilang mga armas sa pakikilaban, gagamiton ni Jehova an mga puwersa nin naturalesa: nakakapabahang oran, mga granisong nakagagadan huli sa kadakulaan, oran nin minakurit na kalayo asin asupre, tubig na nagpupulsit sa irarom kan daga, asin nagkikirikiting kikilat. Sa pagkilyab kan mga pangadan nin Dios sa saiyang mga kaiwal, magigin makosogon an liwanag sa aldaw asin sa banggi kaya an natural na aldaw asin bulan garo baga dai na kaipuhan sa pagtao nin liwanag. Garo baga sinda mapondo, na dai na nagtatao nin liwanag kundi pinababayaan an maliwanag na mga misil ni Jehova na mag-eksibir nin maliwanag na puwersa. (Habacuc 3:10, 11) Si Jehova kadakol kan ngangalasan sa naturalesa na magagamit sa pakikilaban.—Josue 10:11; Job 38:22, 23, 29.
10. Sono sa Zacarias 14:12, ano pa an gagamiton ni Jehova sa nagdadangadang na “aldaw nin pakilaban”?
10 Sa nagdadangadang na “aldaw nin pakilaban,” gagamiton man ni Jehova an peste asin “damat.” Si propeta Zacarias nagsurat manongod digdi: “Iyo ini an magigin damat na ipanlulugad ni Jehova sa gabos na banwaan na makikilaban tumang sa Jerusalem: Malalapa an laman, mantang an saro nagtitindog sa saiyang mga bitis; asin an mismong mga mata nin saro malalapa sa namumugtakan kaiyan, asin an mismong dila nin saro malalapa sa saiyang ngoso.”—Zacarias 14:12.
11. Ano an mangyayari pagtama kan “damat” sa mga parapakilaban na minasalakay sa banwaan ni Jehova?
11 Baga man magigin literal o bako an “damat,” paaalohon kaiyan an mga ngoso na binuka sa pagpahayag nin makatatakot na mga pan-uuma! Malalapa an mga dila! Mawawara an mga kapangyarihan sa pakaheling, kaya an mga mananalakay na may matatarom na pagheling dai nang maginibo kundi sumalakay nin buta. Malalapa an mga mata! An mga kalamnan nin makokosog na parapakilaban mawawaran nin kosog mantang sinda nagtitindog—bakong kun sinda tumba na sa daga bilang mga bangkay. Malalapa an kalamnan na nakapapatos sa saindang kalabera!—Ikomparar an Habacuc 3:5.
12. Paano maaapektaran kan “damat” an mga kampo militar asin kasangkapan kan kaiwal?
12 An “damat” biglang maabot sa saindang mga kampo militar. An mga nag-aandar na kasangkapan sa pagsalakay dai na makahihiro! (Zacarias 14:15; ikomparar an Exodo 14:24, 25.) Ipinaririsa kan mga tataramon sa Zacarias 14:6 kun gurano mawawaran nin kamanungdanan an saindang mga kasangkapan militar: “Mangyayari sa aldaw na iyan na dai magkakaigwa nin mahalagang ilaw—an mga bagay magigin kortado.” Mayong langitnon na ilaw nin banal na pag-oyon na masirang sa sainda. An artipisyal na mga ilaw nin modernong siensia dai makahahale sa kadikloman nin banal na kaanggotan. An mga kasangkapan na nag-aandar dai na makahihiro, na garo tuminagas sa lipot—kortado.
13. Ano an makadudugang sa takot na pupukawon ni Jehova sa tahaw kan mga nananalakay?
13 Ini gabos makatatakot na! Alagad makadudugang pa sa takot an karibarawan na pupukawon nin Dios sa tahaw kan mga masalakay. Malalaglag an pagkasararo kan saindang paghiro tumang sa mga Saksi ni Jehova. Siring sa mga gladiador na may nakatatahob na takop sa payo sa Romanong ampiteatro, sinda butang magkikinologan. An nakagagadan na karibarawan malakop mantang sinda naggagaradanan.—Zacarias 14:13.
14. (a) Gurano kahiwas kan pangadan sa panahon na iyan, asin paano an mga gamgam asin hayop makihihiras sa mga pakinabang kan kapangganahan ni Jehova? (b) Ano an magigin kaisipan kan mga nakaligtas manongod sa “pangagaradanon ni Jehova”?
14 An lagduan na paggaradanan sa aldaw nin mga aldaw na iyan magigin grabe nanggad, huli ta dakulaon an mga hukbo na nasa lado ni Gog sa ralaban na iyan. (Kapahayagan 19:19-21) Iyan magigin nanggad panglobong ralaban, huli ta mayo nin lugar sa daga na makaliligtas sa kalaglagan. Dugang pa, an mga gagadanon sa Armagedon dai ilolobong na may mga lapida sa paggirumdom sa sainda. An gabos na klaseng gamgam asin an mga hayop makihihiras sa mga pakinabang sa kapangganahan nin Dios asin, kadungan kaiyan, matabang sa paglinig sa daga kan dakol na bangkay na mawawarak sa daga na garo abono, dai tinatangisan, dai ilinobong, ikinababalde kan mga nakaligtas. (Ezequiel 39:1-5, 17-20; Kapahayagan 19:17, 18) “An pangagaradanon ni Jehova” nagkamit nin daing sagkod na maraot na dangog para sa sainda man sana.—Jeremias 25:32, 33; Isaias 66:23, 24.
An Ngaran ni Jehova Napagayon
15. Anong pambihirang okasyon an mangyayari sa panahon na iyan, asin may anong epekto sa ngaran ni Jehova?
15 Kaya, “si Jehova nin mga hukbo” paagi sa saiyang Field Marshal, si Jesu-Cristo, magkakamit nin daing sagkod na kamurawayan para sa saiya man sana. Sa panahon na iyan nangyari na an pinakadakulang okasyon sa kasaysayan nin uniberso—an pagkabindikar kan unibersal na soberaniya ni Jehova asin an pagpakangbanal sa saiyang banal na ngaran. (Ezequiel 38:23; 39:6, 7) Si Jehova magibo nin ngaran para sa saiya man sana na nakalalabi sa ano man na isinaysay sa “libro kan Mga Pakikilaban ni Jehova” asin sa Hebreong Kasuratan kan Banal na Biblia. (Ikomparar an Isaias 63:12-14.) Kanigoan kagayon na ngaran an gigibohon ni Jehova para sa saiya man sana paagi sa saiyang makangingirhat na kapangganahan sa “ralaban kan dakulang aldaw nin Dios na Makakamhan sa gabos”! An gabos na namomoot sa ngaran na iyan may pag-ogmang oomawon iyan sagkod lamang, na inaawit an mga pag-omaw dian!
16. Huli sa nagdadangadang na “ralaban kan dakulang aldaw nin Dios na Makakamhan sa gabos,” ano an pamibi para sa “dakulang kadaklan”?
16 Kun siring, abante tabi sa pakikilaban, O Jehova nin mga hukbo, kaiba an saindong makahadeng Aking si Jesu-Cristo! (Salmo 110:5, 6) Togoti na an saindong maimbod na mga saksi digdi sa daga magin an maogmang mga saksi sa saindong daing kaagid na kapangganahan paagi sa saindong Hadeng Jesu-Cristo sa “ralaban kan dakulang aldaw nin Dios na Makakamhan sa gabos.” Togoti na an “dakulang kadaklan” maogmang ‘lumuwas sa dakulang kahorasaan’ tanganing magin saindong daganon na mga saksi sagkod lamang. (Kapahayagan 7:14) Sa saindong mamomoton na pangataman, togoti sindang makaligtas pasiring sa daing ralaban na Milenyal na Paghade kan saindong mapangganang “Prinsipe nin Katoninongan.” Togoti sinda na magin naheheling na patotoo sa bubuhayon liwat na mga gadan sa pagkabindikar kan soberaniya na talagang sa saindo sa bilog na uniberso. Salamat po sa pagsurat kan mamuraway na katapusan kan “libro kan Mga Pakikilaban ni Jehova.” Sagkod sa panahon na daing katapusan, togoti na an kasaysayan na ini kan saindong daing kaagid na kapangganahan magdanay sa rekord kan unibersal na kasaysayan!