3, 4. (a) Ano sa pundamental an hinahagad sa sato ni Jehova ngonyan? (b) Taano ta maninigo niatong sunodon nin estrikto an mga lakad ni Jesus?

³ Durante kan ultimong taon kan ministeryo ni Jesus, an saiyang mga apostol na si Pedro, Santiago, asin Juan uminiba sa saiya sa sarong halangkaw na bukid, na posibleng sarong parte kan Bukid nin Hermon. Duman ninda naheling an sarong makahulang bisyon ni Jesus na nasa kahangahangang kamurawayan asin nadangog an mismong tingog nin Dios na nagpahayag: “Ini an sakong Aki, an namomotan, na sakong inoyonan; maghinanyog kamo sa saiya.” (Mateo 17:1-5) Sa pundamental, iyan an hinahagad sa sato ni Jehova—maghinanyog sa saiyang aki asin sunodon an saiyang halimbawa asin mga katokdoan. (Mateo 16:24) Sa siring, si apostol Pedro nagsurat: “Si Cristo nagtios para sa saindo, na winalatan kamo nin modelo tanganing sunodon nindo nin estrikto an saiyang mga lakad.”—1 Pedro 2:21.

5. Anong ley an nakasasakop sa mga Kristiano, asin kasuarin nagpunsionar an ley na iyan?

⁵ Ano an kalabot sa paghinanyog ki Jesus asin pag-arog sa saiya? Nangangahulogan daw iyan nin pagigin sakop nin sarong ley? Si Pablo nagsurat: “Ako mismo bakong sakop nin ley.” An boot sabihon nia digdi iyo an “daan na tipan,” an tipan nin Ley na ipinakipagtipan sa Israel. Talagang rinekonoser ni Pablo na sia “sakop kan ley ki Cristo.” (1 Corinto 9:20, 21; 2 Corinto 3:14) Kan matapos an daan na tipan nin Ley, nagpoon man na magpunsionar an sarong “bagong tipan” kaiba an “ley kan Cristo” na obligadong kuyogon kan gabos na lingkod ni Jehova ngonyan.—Lucas 22:20; Galacia 6:2; Hebreo 8:7-13.