Mga Hapot Hale sa mga Parabasa
Bubuhayon daw liwat an mga tawo kun sinda dai mag-ako kan tunay na Kristianismo ngonyan asin magadan bago pumoon an dakulang kahorasaan?
Marahay na labanan niato gabos an ano man na tendensia na magpakanghokom, na minimidbid na sa kahurihurihi, an mahalaga iyo an paghokom ni Jehova paagi ki Jesu-Cristo. (Juan 5:22; Gibo 10:42; 2 Timoteo 4:1) Alagad ta an Kasuratan nagtatao nanggad nin nakatatabang na impormasyon bilang simbag sa hapot na nasa itaas.
An lakop sa kinaban na paghuhulit kan maogmang bareta kan Kahadean nin Dios mahalagang kabtang kan ‘tanda kan presensia ni Jesus.’ Naheling an tandang ini poon sa kapinonan kan siglong ini. An paghuhulit nagbubunga nin pagkabanga kan mga tawo sa gabos na nasyon bilang kaotoban kan ilustrasyon ni Jesus manongod sa “mga karnero” asin “kanding.” Kun matapos na an paghuhulit asin pagbubulagbulag na ini, tatapuson kan “dakulang kahorasaan” an presenteng maraot na palakaw nin mga bagay.—Mateo 24:3, 21, 22; 25:31-46.
Si Jehova, kaiba an saiyang Aki, maghohokom kun baga an siisay man na humabo sa mensahe kan Kahadean asin magadan bago an pagputok kan dakulang kahorasaan ibibilang na kanding. Sinabi ni Jesus na an mga kanding “maduman sa pagkaparang daing katapusan.” Kun siring, ikakokonklusyon niato na an dineterminaran nin Dios na kanding dai mag-aako nin pagkabuhay liwat. An paghokom sa sainda kapareho kan mga “magtitios kan silot na daing katapusan na pagkalaglag” sa panahon kan dakulang kahorasaan.—2 Tesalonica 1:9.
Alagad kumusta man an mga garo baga dai nakadangog nin igo kan mensahe kan Kahadean tanganing makagibo nin intelihenteng pagpili apabor sa o tumang sa katotoohan bago sinda magadan sa panahon na ini kan “huring mga aldaw”?—2 Timoteo 3:1.
An dakol na nagadan mantang ginigibo an paghuhulit bago an dakulang kahorasaan malinaw na mag-aako nin pagkabuhay liwat. Ipinaririsa ini kan mababasa niato sa Kapahayagan 6:7, 8 mapadapit sa pagsakay kan simbolikong mga nangangabayo. Dakol an nagadan bilang mga biktima nin mga guerra, mga kakulangan nin kakanon, asin nakagagadan na mga damat. Mantang an “Hades” iyo an minaako sa mga biktimang ini nin “Kagadanan,” sinda bubuhayon liwat sa Milenyal na Paghade ni Cristo, kun iluwas na kan Hades an gabos na gadan na yaon dian. (Kapahayagan 20:13) An nagkapira sa mga bubuhayon liwat tibaad nakadangog na kan mensahe kan Kahadean bago sinda nagadan.
Makapasasalamat nanggad kita na dai iwinalat ni Jesus sa mga tawo an pagdeterminar kun sairisay an siring sa karnero asin kun sairisay an siring sa kanding! Dai kayang turotimbangon nin tama nin mga tawong bakong sangkap kun gurano an nagin oportunidad nin sarong tawo na makadangog asin umako kan maogmang bareta. Kaya daw niatong aramon kun ano an kamugtakan kan saiyang puso o kun baga sia tunay na namomoot sa katanosan? Kaya daw niatong sokolon kun gurano an tibaad epekto sa saiyang reaksion kan saiyang pamilya, kan saiyang relihiyon, o nin iba pang impluwensia? Malinaw na dai. Pero, makaseseguro kita na kaya ni Jehova Dios asin ni Jesu-Cristo na turotimbangon an siring na mga bagay dangan makaabot sa paghokom na sangkap, makatanosan, asin matanos.—Deuteronomio 32:4; Isaias 11:1-5.
Kun siring, mayo kita nin dahelan na magkarkulo kun baga siisay sa mga bago pa sanang nagadan an tibaad bubuhayon liwat o dai. Ini bagay na dai kita autorisadong gibohon. (Ikomparar an Lucas 12:13, 14.) Mas madonong na halaton niato an mga desisyon kan matanos na mga Hokom, si Jehova Dios asin si Jesu-Cristo. Ini matao sato nin orog na katoninongan sa isip bilang mga lingkod ni Jehova. Iyan makatatabang man sato na tawan nin orog na atension an ipinagigibo sato—‘paduman asin gumibo nin mga disipulo sa mga tawo kan gabos na nasyon, na tokdoan sinda na otobon an gabos na bagay na ipinagboot ni Jesus.’—Mateo 28:19, 20.
[Picture Credit Line sa pahina 31]
Mga karnerong Leicester, Meyers