Paagi sa saiyang Kahadian, madali nang tapuson ni Jehova an gabos tang problema. Marahayon nanggad an baretang iyan, kaya dapat maaraman iyan nin mga tawo. Gusto ni Jesus na ipaabot iyan kan saiyang mga parasunod sa gabos na tawo! (Mateo 28:19, 20) Paano inuutob kan mga Saksi ni Jehova an sugong iyan ni Jesus?

1. Paano nauutob ngunyan an Mateo 24:14?

Ihinula ni Jesus: “An maugmang baretang ini kan Kahadian ihuhulit sa bilog na kinaban.” (Mateo 24:14) Maugmang inuutob kan mga Saksi ni Jehova an gibuhon na iyan. Ibinabalangibog mi an maugmang bareta sa bilog na kinaban sa labing 1,000 lengguwahe! Kaipuhan nanggad nin dakulang paghihinguwa asin mahusay na pag-organisar para sa dakulaon na gibuhon na ini. Dai iyan magigibo kun mayo an tabang ni Jehova.

2. Ano an ginigibo ming paghihinguwa para mahulitan an mga tawo?

Naghuhulit kami sain man may tawo. Arog kan mga Kristiyano kan inot na siglo, naghuhulit kami “sa harong-harong.” (Gibo 5:42) Huli sa sistematikong paaging iyan nin paghuhulit, nakakaulay mi an milyon-milyon na tawo kada taon. Huling dai man pirming nasa harong an mga tawo, naghuhulit man kami sa pampublikong mga lugar. Pirmi kaming naghahanap nin mga oportunidad para sabihon sa iba an manungod ki Jehova asin an saiyang mga katuyuhan.

3. Siisay an may responsabilidad na maghulit kan maugmang bareta?

Responsabilidad kan gabos na tunay na Kristiyano na sabihon sa iba an maugmang bareta. Sineseryoso mi an responsabilidad na iyan. Ginigibo mi an samong pinakamakakaya para maghulit sa iba huling buhay an nakataya. (Basahon an 1 Timoteo 4:16.) Mayo kaming suweldo digdi, huling sinasabi kan Bibliya: “Inako nindong daing bayad, itao nindong daing bayad.” (Mateo 10:7, 8) Bako gabos na hinuhulitan mi nag-aako kan samong mensahe. Pero padagos lang kami sa paghulit huling parte ini kan samong pagsamba asin napapaugma kaiyan si Jehova.

ARAMON PA

4. Hinihinguwa ming mahulitan an gabos na tawo

VIDEO: Paghuhulit sa “Pinakaharayong Parte kan Daga” (7:38)

• Ano an hinahangaan mo sa paghihinguwa kan mga Saksi ni Jehova sa saindang paghuhulit?

Basahon an Mateo 22:39 asin Roma 10:13-15, dangan pag-ulayan an mga hapot na ini:

• Paano pinapatunayan kan samong ministeryo na namumutan mi an samong kapwa?

• Ano an paghiling ni Jehova sa mga naghuhulit kan maugmang bareta?—Hilingon an bersikulo 15.

5. Mga kapwa trabahador kami nin Diyos

Dakul na eksperyensiya an nagpapatunay na ginigiyahan ni Jehova an gibuhon mi. Halimbawa, sarong hapon sa New Zealand, mantang naghaharong-harong an brother na si Paul, naabutan niya an sarong babayi. Kan aga kan mismong aldaw na idto, namibi an babayi na inaapod an pangaran kan Diyos. Namibi siya na lugod may magbisita saiya para tabangan siyang mas mamidbid an Diyos. “Pakalihis nin tulong oras,” an sabi ni Paul, “yaon na ako sa may pinto.”

Basahon an 1 Corinto 3:9, dangan pag-ulayan an hapot na ini:

• Paano pinapatunayan kan mga eksperyensiya, arog kan nangyaring iyan sa New Zealand, na ginigiyahan ni Jehova an paghuhulit?

Basahon an Gibo 1:8, dangan pag-ulayan an hapot na ini:

• Taano ta kaipuhan ta an tabang ni Jehova sa ministeryo?

Aram mo daw?

Kada semana sa samuyang midweek na pagtiripon, nag-aako kami nin mga pagsasanay na nakakatabang sa samo sa paghuhulit. Kun nakaatender ka na sa arog kaiyan na pagtiripon, ano an masasabi mo sa ginigibong pagsasanay diyan?

6. Sinusunod mi an pagbuot nin Diyos na maghulit

Kan inot na siglo, hininguwa kan mga nagkokontra na papunduhon sa paghuhulit an mga parasunod ni Jesus. Hininguwa kan inot na mga Kristiyano na “makua an legal na deretso para ihulit [an maugmang bareta].” (Filipos 1:7) Arog man kaiyan an ginigibo kan mga Saksi ni Jehova ngunyan.a

VIDEO: Idinedepensa an Legal na Deretsong Maghulit (2:28)

Basahon an Gibo 5:27-42, dangan pag-ulayan an hapot na ini:

• Taano ta dai kita mapundo sa paghuhulit?—Hilingon an bersikulo 29, 38, asin 39.

SUMARYO

Sinugo ni Jesus an saiyang mga parasunod na ihulit an maugmang bareta sa gabos na nasyon. Tinatabangan ni Jehova an saiyang mga lingkod na magibo iyan.

Rebyu

• Paano naihuhulit an maugmang bareta sa bilog na kinaban?

• Paano ipinapahiling kan samong ministeryo na namumutan mi an samong kapwa?

• Sa hiling mo, maugma daw na maghulit? Taano ta nasabi mo iyan?

HILINGON MAN

Aramon kun paano naghuhulit an mga Saksi ni Jehova sa darakulang siyudad.

Pagpapatotoo sa Darakulang Siyudad sa Paris (5:11)

Ano an ginigibo kan mga Saksi ni Jehova para tabangan an mga refugee?

Pagpanigo sa Espirituwal na Pagkagutom kan mga Refugee (5:59)

Dangugon an sinabi kan sarong full-time na ministro kun gurano siya kaugma sa gibuhon na paghuhulit.

Maugma Ako na Ini an Pinili Kong Karera (6:29)

Aramon an pira sa mahalagang mga desisyon kan korte na nakatabang tanganing mas mapadali an paghuhulit kan maugmang bareta.

“Dinadara kan mga Parahulit kan Kahadian sa Korte an Kaso Ninda” (Namamahala Na an Kahadian nin Diyos!, kapitulo 13)

Itinukdo ni Jesus na an mga Kristiyano dapat na magpabawtismo. (Basahon an Mateo 28:19, 20.) Pero ano an bawtismo? Asin ano an dapat na gibuhon kan saro para maabot an mga kahagadan sa pagpabawtismo?

1. Ano an bawtismo?

An tataramon na “bawtismuhan” hali sa Griegong termino na nangangahulugan na “ilubog” sa tubig. Kan bawtismuhan si Jesus, ilinubog siya sa Salog nin Jordan, dangan ‘naghawas siya sa tubig.’ (Marcos 1:9, 10) Arog ni Jesus, binabawtismuhan an tunay na mga Kristiyano paagi sa paglubog sa tubig kan bilog na hawak.

2. Ano an pinapatunayan nin sarong tawo pag nagpabawtismo siya?

Paagi sa pagpabawtismo, pinapatunayan nin sarong tawo na idinusay na niya an saiyang sadiri sa Diyos na Jehova. Paano ginigibo an pagdusay? Bago bawtismuhan an saro, sinasabi niya ki Jehova sa saiyang personal na pamibi na gusto niyang maglingkod sa Saiya habangbuhay. Nangangako siya na si Jehova sana an sasambahon niya asin na an paggibo kan kabutan nin Diyos an magigin pinakaimportante sa saiyang buhay. Nagdedesisyon siya na ‘tatalikdan an saiyang sadiri saka . . . padagos na susunudon’ an mga tukdo asin halimbawa ni Jesus. (Mateo 16:24) Huli sa saiyang pagdusay asin pagpabawtismo, nagigin posible na magkaigwa siya nin dayupot na pakikiamigo ki Jehova asin sa mga kapwa niya parasamba.

3. Ano an mga kaipuhan gibuhon nin saro para mabawtismuhan?

Mahalagang magkaigwa ka nin kaaraman asin makusog na pagtubod ki Jehova. (Basahon an Hebreo 11:6.) Mantang nagrararom an saimong kaaraman asin nagkukusog an pagtubod mo, mas lalo mo man na mamumutan si Jehova. Dangan siguradong gugustuhon mo na sabihon sa iba an manungod sa saiya asin mamuhay kauyon kan mga pamantayan niya. (2 Timoteo 4:2; 1 Juan 5:3) Pag an saro namumuhay na “nin maninigo para ki Jehova tanganing lubos siyang mapaugma,” posibleng marhay na magdesisyon siya na idusay na sa Diyos an saiyang sadiri asin magpabawtismo.—Colosas 1:9, 10.a

ARAMON PA

4. Kun ano an manunudan ta sa pagpabawtismo ni Jesus

Basahon an Mateo 3:13-17 para maaraman pa an mga detalye manungod sa pagpabawtismo ni Jesus. Dangan pag-ulayan an mga hapot na ini:

• Umboy pa daw si Jesus kan bawtismuhan siya?

• Paano siya binawtismuhan? Binubuan sana daw nin tubig an saiyang payo?

Pagkatapos na bawtismuhan, pinunan ni Jesus na gibuhon an importanteng ipinapagibo nin Diyos sa saiya digdi sa daga. Basahon an Lucas 3:21-23 asin Juan 6:38, dangan pag-ulayan an hapot na ini:

• Pagkatapos na bawtismuhan si Jesus, anong gibuhon an nagin panginot sa buhay niya?

5. Kaya mong maabot an pasuhan na magpabawtismo

Sa primero, tibaad maisip mo na dai mo kayang idusay an sadiri mo asin magpabawtismo. Pero, puwede kang umuswag sagkod sa punto na magkaigwa ka na nin kumpiyansa para gibuhon an importanteng desisyon na iyan. Para mabisto an pira sa naggibo kaiyan, i-play an VIDEO.

VIDEO: Kun Paano Ka Magigin Mas Harani ki Jehova (1:11)

Basahon an Juan 17:3 asin Santiago 1:5, dangan pag-ulayan an hapot na ini:

• Ano an makakatabang sa saro para magin handa siya sa pagpabawtismo?

1. Pag nagdusay kita ki Jehova, sinasabi ta sa saiya na gusto ta siyang paglingkudan habangbuhay

2. Pag nagpabawtismo kita, ipinapahiling ta sa publiko na idinusay ta na an satong buhay sa Diyos

6. Pag nabawtismuhan an saro, nagigin parte siya kan pamilya ni Jehova

Pag nabawtismuhan ka, magigin parte ka kan nagkakasararo asin pambilog na kinaban na pamilya. Sain man kita nakaistar o ano man an kamugtakan ta sa buhay, saro sana an satong paniniwala saka an sinusunod na mga pamantayan sa moral. Basahon an Salmo 25:14 asin 1 Pedro 2:17, dangan pag-ulayan an hapot na ini:

• Pag an saro nagpabawtismo, nagkakaigwa siya nin anong relasyon ki Jehova saka sa ibang mga nagsasamba sa Saiya?

SUMARYO

Itinukdo ni Jesus na kaipuhan kan mga Kristiyano na magpabawtismo. Para maabot an pasuhan na iyan, an saro dapat na magkaigwa nin makusog na pagtubod ki Jehova, mamuhay kauyon kan mga pamantayan Niya, asin idusay an sadiri niya sa Saiya.

Rebyu

• Ano an bawtismo, asin taano ta importante iyan?

• Ano an pinapatunayan nin sarong tawo pag nagpabawtismo siya?

• Ano an kaipuhan gibuhon nin saro bago niya puwedeng idusay an saiyang sadiri asin magpabawtismo?

HILINGON MAN

Aramon kun ano talaga an buot sabihon kan bawtismo.

“Ano an Bawtismo?” (Artikulo sa jw.org/bcl)

Rebyuhon kun ano an mga puwedeng gibuhon nin saro para mabawtismuhan.

“An Pagkamuot Asin Pasasalamat ki Jehova Makakapahiro sa Saimo na Magpabawtismo” (An Torrengbantayan, Marso 2020)

Basahon kun paanong an desisyon nin sarong lalaki na magpabawtismo bako sanang dahil sa emosyon.

“Gusto Nindang Aramon Ko Mismo an Katotoohan” (An Torrengbantayan, Marso-Abril 2013)

Pag-isipan kun taano ta an bawtismo sarong marahayon na pasuhan asin kun paano mo iyan mapaghahandaan.

“Dapat Na ba Akong Magpabautismo?” (Ang mga Tanong ng mga Kabataan—Mga Sagot na Lumulutas, Tomo 2, kabanata 37)