Kun Ano an Puedeng Itokdo sa Sato kan mga Gamgam
“MASDAN nindo nin odok an mga gamgam sa langit, huli ta sinda dai nagsasabwag nin banhi o nag-aani o nagtitipon sa mga tambobong; pero pinakakakan sinda kan saindong langitnon na Ama. Bako daw na kamo orog na mahalaga kisa sainda?” (Mateo 6:26) Sinabi ni Jesu-Cristo an mga tataramon na ini sa sarong bantog na sermon na itinao sa abaga kan bukid na harani sa Dagat nin Galilea. An mga nagdadangog sa saiya bako sana an saiyang mga parasunod. Yaon kaidto an dakulang kadaklan nin potensial na mga disipulo hale sa gabos na kabtang kan nasyon. An dakol sa sainda mga tawong dukha na dinara an mga may helang tanganing ipabolong ki Jesus.—Mateo 4:23–5:2; Lucas 6:17-20.
Kan mabolong na an mga may helang, si Jesus nagtaong atension sa mas mahalagang espirituwal na mga pangangaipo. Kabilang sa mga leksion na itinokdo nia an nasambitan sa enotan.
An mga gamgam sa langit haloy nang nag-eeksister. An nagkapira sa sainda an kinakakan mga insekto, an iba prutas asin mga pisog. Kun itinatao nin Dios an siring na abundang pagkakan para sa mga gamgam, segurado nanggad na kaya niang tabangan an saiyang mga lingkod na tawo na makakua kan saindang tinapay sa aroaldaw. Puede niang gibohon ini paagi sa pagtabang sa sainda na makakua nin trabaho tanganing magganar nin kuartang pambakal nin kakanon. O puede nia sindang tawan nin kapangganahan sa pagtanom kan saindang sadiring kakanon. Mapadapit sa mga panahon nin emerhensia, kayang pahiroon nin Dios an puso kan maboot na mga kataed asin katood na ihiras sa mga nangangaipo an ano man na kakanon na igwa sinda.
Kadakol pa kitang manonodan paagi sa maingat na pagmasid sa buhay nin gamgam. Linalang nin Dios an mga gamgam na igwa nin makangangalas na mga naturalesa tanganing gumibo nin mga salag na dian ninda inaataman an saindang mga siwo. Mangnoha an duwang klase nin salag. An retrato sa wala iyo an salag nin sarong African rock martin. Hinaman iyan sa ibabaw nin sarong dakulang gapo o sa lanob nin sarong harong. An atop kan siring na mga salag iyo an nakauldot sa tangod na dakulang gapo o, siring kan maheheling sa retratong ini, an barisbisan nin sarong edipisyo. An salog kan salag gibo sa saradit na binilogbilog na laboy na pinagdurokot na magin korteng tasa. An lalaki sagkod babaeng gamgam mahigos na nagkukua nin mga binilogbilog na laboy asin ini puedeng maglabing sambulan sagkod na matapos an saindang salag. Dangan hinahapinan ninda iyan nin mga doot asin balukag. Pareho sinda nagpapakakan sa saindang mga siwo. An maheheling sa ibaba iyo an salag nin sarong lalaking masked weaver. An mahigos na gamgam na ini sa Aprika ginigibo an salag kaiyan na mga dahon nin doot o ubak nin ibang tinanom an ginagamit. Puedeng matapos kaiyan an sarong salag sa sarong aldaw asin puedeng makahaman nin labing 30 sa sarong kapanahonan kaiyan!
An leksion? Kun an mga gamgam tinatawan nin Dios nin siring na mga kakayahan asin abundang materyales tanganing makagibo nin mga salag, segurado nanggad na matatabangan nia an saiyang mga lingkod na tawo na makakua nin kinakaipuhan na istaran. Minsan siring, ipinaheling ni Jesus na may iba pang kaipuhan kun gusto ta na tabangan kita ni Jehova Dios na makua an satong materyal na mga pangangaipo. “Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo,” an ipinanuga ni Jesus. (Mateo 6:33) Tibaad isip-isipon nindo, ‘Ano daw an kalabot sa paghanap nguna kan Kahadean nin Dios?’ An mga Saksi ni Jehova, na nagdidistribwir kan magasin na ini, maoogmang simbagon an hapot na iyan.