Nagkaigwa daw si Jesus nin Pagtubod sa Dios?

Sarong Depisil na Problema nin mga Trinitaryo

“PAANONG nagkaigwa si Jesus nin pagtubod? Sia an Dios; naaaraman nia asin naheheling an gabos na bagay na dai na kaipuhan magsarig sa siisay man. Kun siring an pagtubod eksaktong pagsarig sa iba asin pag-admitir sa dai naheheling; na an Dios-Jesus nagkaigwa nin pagtubod, kun siring, dai iiniiba.”

Sono sa teologong Pranses na si Jacques Guillet, iyan an nangongorog na opinyon sa Katolisismo. An paliwanag daw na ini ikinabibigla nindo? Puwedeng naisip na nindo na mantang si Jesus sarong halimbawa sa gabos na bagay para sa mga Kristiano, siertong sia sarong modelo man nin pagtubod. Kun siring kaiyan an iniisip nindo, dai nindo kinonsiderar an doktrina kan Trinidad nin Kakristianohan.

An hapot manongod sa pagtubod ni Jesus talagang sarong misteryo para sa mga teologong Katoliko, Protestante, asin Ortodokso na naniniwala sa Trinidad bilang “an pangenot na misteryo nin Kristianong pagtubod asin buhay.”a Pero, bakong gabos nagninigar sa pagtubod ni Jesus. Pinatutunayan ni Jacques Guillet na “imposible na dai midbidon na nagkaigwa si Jesus nin pagtubod,” dawa ngani inaadmitir ni Guillet na, sa liwanag kan doktrina nin Trinidad, iyan “masakit paniwalaan pero totoo.”

An Jesuitang Pranses na si Jean Galot, asin siring saiya an mayoriya kan mga teologo, malinaw sa pagsabing sa pagigin “tunay na Dios asin tunay na tawo, . . . si Cristo dai puwedeng magtubod sa saiyang sadiri.” “An pagtubod paniniwala sa saro pa, bakong paniniwala sa mismong sadiri,” an komento kan peryodikong La Civiltà Cattolica. Kaya, an olang sa pagmidbid sa pagtubod ni Jesus iyo an doktrina kan Trinidad, huling an duwang ideya malinaw na nagkokontra sa kada saro.

“An mga Ebanghelyo nungkang nagtataram manongod sa pagtubod ni Jesus,” an sabi kan mga teologo. Huli kaiyan, an mga terminong ginamit sa Kristianong Griegong Kasuratan na pi·steuʹo (maniwala, magkaigwa nin pagtubod) asin piʹstis (pagtubod) sa pankagabsan ipinanonongod sa pagtubod kan mga disipulo sa Dios o ki Cristo, imbes na pagtubod ni Jesus sa saiyang langitnon na Ama. Kun siring maninigo daw kitang magkonklusyon na an Aki nin Dios dai nagkaigwa nin pagtubod? Ano an masasabotan niato sa saiyang ginibo asin sinabi? Ano an sinasabi kan Kasuratan?

Mga Pamibing Mayo nin Pagtubod?

Si Jesus sarong tawo na namimibi. Namibi sia sa lambang okasyon​—kan sia bautismohan (Lucas 3:21); kan magdamlag bago pilion an saiyang 12 apostol (Lucas 6:​12, 13); asin bago kan saiyang milagrosong transpigurasyon sa bukid, mantang kaibanan sinda apostol Pedro, Juan, asin Santiago. (Lucas 9:​28, 29) Namimibi sia kan an saro sa saiyang mga disipulo hinapot sia: “Tokdoi kaming mamibi,” kaya tinokdoan nia sinda kan Pamibi kan Kagurangnan (an “Ama Niamo”). (Lucas 11:​1-4; Mateo 6:​9-13) Namibi sia nin solo asin halawig sa amay na aga (Marcos 1:​35-39); kan mabanggi na, sa sarong bukid, pakapapulia sa saiyang mga disipulo (Marcos 6:​45, 46); kan kaibanan an saiyang mga disipulo asin para sa saiyang mga disipulo. (Lucas 22:32; Juan 17:​1-26) Iyo, an pamibi importanteng kabtang kan buhay ni Jesus.

Namibi sia bago gumibo nin mga milagro, halimbawa, bago buhayon liwat an saiyang katood na si Lazaro: “Ama, nagpapasalamat ako saimo na dinangog mo ako. Totoo, aram ko na permi mo akong dinadangog; alagad para sa kadaklan na nagtitirindog sa palibot ako nagtaram, tanganing sinda magtubod na isinugo mo ako.” (Juan 11:41, 42) An kasegurohan na sisimbagon kan saiyang Ama an pamibing iyan nagpaparisa kan karigonan kan saiyang pagtubod. An koneksion na ini sa pag-oltanan nin pamibi sa Dios asin pagtubod sa Saiya maheheling sa sinabi ni Cristo sa saiyang mga disipulo: “An gabos na bagay na saindong ipinapamibi asin hinahagad tubodon nindo na haros naako na nindo.”​—Marcos 11:24.

Kun si Jesus dai nagkaigwa nin pagtubod, taano ta namibi sia sa Dios? An bakong Makakasuratan na katokdoan kan Trinidad nin Kakristianohan, na si Jesus pareho tawo asin Dios man, nagpapalibog sa mensahe kan Biblia. Inoolang kaiyan an mga tawo na masabotan an pagigin simple asin mapuwersa kan Biblia. Siisay an inarangan ni Jesus nin tabang? An saiyang sadiri? Dai daw nia aram na sia Dios? Asin kun sia Dios asin aram iyan, taano ta namibi sia?

An mga pamibi ni Jesus sa huring aldaw kan saiyang buhay sa daga nagtatao sato nin mas hararom pa nganing pakamansay sa saiyang marigon na pagtubod sa saiyang langitnon na Ama. Sa pagpaheling nin paglaom asin may pagsarig na pag-antisipar, saiyang hinagad: “Kaya ngonyan, Ama, pamurawaya ako sa kataed mo kan kamurawayan na dating yaon sa sako bago an kinaban.”​—Juan 17:5.

Sa pakaaram na an saiyang pinakamasakit na mga pagbalo asin an saiyang kagadanan nagrarani na, kan banggi na sia nasa tatamnan nin Getsemane sa Bukid nin mga Olibo, “nagpoon siang magmondo asin mahadit nin makuri,” asin sia nagsabi: “An sakong kalag mamondong gayo, sagkod sa kagadanan.” (Mateo 26:​36-38) Dangan luminuhod sia asin namibi: “Ama, kun boot mo, halea an kopang ini sa sako. Minsan siring, mangyari logod, bakong an boot ko, kundi an boot mo.” Dangan “an sarong anghel hale sa langit tuminunga saiya asin nagpakosog saiya.” Dinangog nin Dios an saiyang pamibi. Huli sa grabeng emosyon nia asin sa kagabatan kan pagbalo, “an saiyang ganot nagin siring sa mga toro nin dugo na nagdadalahay sagkod sa daga.”​—Lucas 22:​42-44.

Ano an ipinaririsa kan mga kasakitan ni Jesus, kan saiyang pangangaipo na pakosogon, asin kan saiyang mga pagngayongayo? “Sarong bagay an sierto,” an surat ni Jacques Guillet, “namibi si Jesus, asin an pamibi sarong mahalagang kabtang kan saiyang buhay asin kan saiyang mga paghiro. Namibi sia kun paanong namimibi an mga tawo, asin namibi sia sa kapakanan nin mga tawo. Kun siring, an mga pamibi nin mga tawo dai mapaniniwalaan kun mayong pagtubod. Mapaniniwalaan daw an mga pamibi ni Jesus kun mayong pagtubod?”

Nakabitay sa hariging pasakitan dai nahaloy bago sia magadan, nagkurahaw si Jesus sa makosog na tingog, na nagkokotar nin sarong salmo ni David. Dangan, paagi sa pagtubod, na may makosog na tingog, nagkurahaw sia nin ultimong pagngayongayo: “Ama, sa saimong mga kamot idinodolot ko an sakong espiritu.” (Lucas 23:46; Mateo 27:46) An sarong traduksion nin manlaenlaen na denominasyon sa Italia, an Parola del Signore, nagsasabi na si Jesus ‘idinolot an saiyang buhay’ sa Ama.

Nagkomento si Jacques Guillet: “Sa pagpaheling sa sato kan ipinakong Cristo, na nagkukurahaw sa saiyang Ama na nagkokotar nin mga salmo sa Israel, kinokombensir kita kan mga kagsurat kan Ebanghelyo na an pagkurahaw na iyan, an pagkurahaw kan bugtong na Aki, sarong kurahaw nin biyong kamondoan, sarong kurahaw nin lubos na pagsarig, iyo an kurahaw nin pagtubod, an kurahaw nin sarong kagadanan na may pagtubod.”

Napapaatubang sa malinaw asin dramatikong ebidensiang ini nin pagtubod, may mga teologo na naghihingoang gumibo nin pagkakalaen sa pag-oltanan nin pagtubod asin “pagsarig.” Pero, an siring na pagkakalaen bakong basado sa Kasuratan.

Alagad ano man nanggad an ihinahayag dapit sa pagtubod ni Jesus kan grabeng mga pagbalo na tinagalan nia?

An “Parasangkap kan Satong Pagtubod” Ginibong Sangkap

Sa ika-11 kapitulo kan saiyang surat sa mga Hebreo, sinasambit ni apostol Pablo an dakulang panganoron nin maimbod na mga lalaki asin babae kan mga panahon bago-Kristiano. Nagkonklusyon sia, na itinotokdo an pinakadakula asin sangkap na halimbawa nin pagtubod: “Kita nagheheling nin maingat sa Pangenot na Ahente asin Parasangkap kan satong pagtubod, si Jesus. Huli kan kagayagayahan na ibinugtak sa atubangan nia tinios nia an pasakitan na kahoy, hinamak an kasopganan . . . Paghorophoropa nindo nin marhay an saro na nagtios nin siring na paglibak nin mga parakasala tumang sa saindang sadiring kapakanan, tanganing dai kamo mapagal asin manluya sa saindong kalag.”​—Hebreo 12:​1-3.

An mayoriya sa mga teologo nagsasabi na an bersikulong ini dai nagtataram dapit sa “personal na pagtubod ni Jesus” kundi, imbes, sa saiyang kabtang bilang an “nagpoon o kagpundar nin pagtubod.” An terminong Griego na te·lei·o·teś na minalataw sa fraseng ini nanonongod sa saro na nagsasangkap, na inootob o linulubos an sarong bagay. Bilang an “Parasangkap,” linubos ni Jesus an pagtubod sa sentido na an saiyang pagdigdi sa daga nakaotob sa mga hula sa Biblia asin sa siring nakaestablisar nin mas marigon na pasisikadan para sa pagtubod. Pero nangangahulogan daw ini na sia dai nagkaigwa nin pagtubod?

An mga teksto sa surat sa mga Hebreo na maheheling nindo sa kahon sa pahina 15 dai mapagdududahan. Ginibong sangkap si Jesus kan saiyang mga kasakitan asin kan saiyang pagkuyog. Maski ngani sangkap nang tawo, an saiyang mga eksperyensia ginibo siang sangkap asin lubos sa gabos na bagay, dawa sa pagtubod, tanganing sia magin biyong kuwalipikado bilang Halangkaw na Saserdote para sa kaligtasan kan tunay na mga Kristiano. Nagngayongayo sia sa saiyang Ama “na may makosog na mga pagtangis asin luha,” sia “maimbod” sa Dios, asin igwa sia nin “diosnon na takot.” (Hebreo 3:​1, 2; 5:7-9) Sia “nabalo sa gabos na bagay” nin eksakto “arog sa sato,” sabi sa Hebreo 4:15, an boot sabihon, arog sa siisay man na maimbod na Kristiano na an pagtubod minaagi sa “manlaenlaen na pagbalo.” (Santiago 1:2, 3) Makatanosan daw na maniwala na si Jesus puwedeng baloon “arog” sa saiyang mga parasunod na dai binabalo sa saiyang pagtubod siring sa sainda?

An mga pagngayongayo, pagkuyog, kasakitan, mga pagbalo, kaimbodan, asin diosnon na takot nagpapatunay sa lubos na pagtubod ni Jesus. An mga iyan nagpaparisa na sia nagin an “Parasangkap kan satong pagtubod” pakatapos sanang gibohon na sangkap sa saiya mismong pagtubod. Malinaw nanggad, bako sia an Dios Aki, arog sa iiniinsister kan doktrina nin Trinidad.​—1 Juan 5:5.

Dai daw Sia Naniwala sa Tataramon nin Dios?

An doktrina kan Trinidad minomolde nanggad an kaisipan kan mga teologo kaya nakakaabot sinda sa sobrang punto-de-vista nin paninindogan na si Jesus “dai puwedeng maniwala sa Tataramon nin Dios asin sa mensahe kaiyan” huli ta “bilang an mismong Tataramon nin Dios, ikakabalangibog sana nia an tataramon na iyan.”​—Angelo Amato, Gesù il Signore, na igwa nin eklesiastikong pag-oyon.

Minsan siring, ano an talagang ipinaheheling kan padagos na pagsambit ni Jesus sa Kasuratan? Kan sia sugotan, nagkotar sia nin tolong beses sa Kasuratan. An saiyang ikatolong simbag sinabihan si Satanas na an Dios an solamenteng sinasamba ni Jesus. (Mateo 4:​4, 7, 10) Sa nagkapirang okasyon sinambit ni Jesus an mga hula na aplikado sa saiyang sadiri, na nagpapaheling nin pagtubod sa mga kaotoban kaiyan. (Marcos 14:​21, 27; Lucas 18:​31-33; 22:37; ikomparar an Lucas 9:22; 24:​44-46.) Sa pagsiyasat na ini kaipuhan na ikonklusyon niato na aram ni Jesus an Kasuratan na ipinasabong kan saiyang Ama, kinuyog nia iyan na may pagtubod, asin igwa sia nin lubos na pagtitiwala sa kaotoban kan mga hula na naghula kan mga pagbalo, kasakitan, kagadanan, asin pagbuhay liwat saiya.

Si Jesus, an Modelo nin Pagtubod na Dapat Arogon

Kaipuhan na makipaglaban si Jesus kan pakilaban nin pagtubod sagkod sa katapusan tanganing mapagdanay an kaimbodan sa saiyang Ama asin tanganing ‘madaog an kinaban.’ (Juan 16:33) Kun mayong pagtubod, imposibleng makamtan an siring kadakulang kapangganahan. (Hebreo 11:6; 1 Juan 5:4) Huli sa mapangganang pagtubod na iyan, sia nagin halimbawa sa saiyang maimbod na mga parasunod. Siertong nagkaigwa sia nin pagtubod sa tunay na Dios.

[Nota sa Ibaba]

[Kahon sa pahina 11]

Si Jesus, an “Parasangkap,” Ginibong Sangkap

Hebreo 2:10: “Angay para sa saro na an gabos na bagay manongod sa saiya asin an gabos na bagay paagi sa saiya, sa pagdara nin dakol na aki sa kamurawayan, na gibohon na sangkap an Pangenot na Ahente kan saindang kaligtasan paagi sa mga pagtios.”

Hebreo 2:17, 18: “Sia kinaipuhan na magin kabaing kan saiyang ‘mga tugang’ sa gabos na bagay, tangani na sia magin maheherakon asin maimbod na halangkaw na saserdote sa mga bagay na manonongod sa Dios, tanganing makapagdolot nin pantubos na atang para sa mga kasalan kan banwaan. Huli ta mantang sia mismo nagtios kaidtong binabalo, sia makasosorog sa mga binabalo.”

Hebreo 3:2: “Sia maimbod sa Saro na guminibo sa saiyang magin siring, arog man ki Moises sa bilog na harong kan Sarong iyan.”

Hebreo 4:15: “An satong halangkaw na saserdote, bakong saro na dai makakapakidamay sa satong mga kaluyahan, kundi saro na nabalo na sa gabos na bagay arog sa sato, alagad dai nin kasalan.”

Hebreo 5:7-9: “Sa mga aldaw kan saiyang laman si Cristo nagdolot nin mga pagngayongayo patin nin mga kahagadan sa Saro na makapagliligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot. Minsan ngani sia Aki, sia nakanood nin pagkuyog hale sa mga bagay na saiyang tinios; asin pakatapos na sia ginibong sangkap nagtao sia nin daing katapusan na kaligtasan.”