3. (a) Paano nagpapamuraway sa Dios an satong pagpatalubo kan “bunga kan espiritu”? (b) Anong mga hapot an pag-oolayan niato?

³ An mga kualidad na bunga kan banal na espiritu kapahayagan kan mismong personalidad kan Gikanan kan espiritung iyan, si Jehova Dios. (Col. 3:9, 10) Ipinarisa ni Jesus an pinakadahelan kun taano ta an mga Kristiano maninigong magmaigot na arogon an Dios kan sabihon nia sa saiyang mga apostol: “An sakong Ama napapamuraway kaini, na kamo padagos na nagbubunga nin dakol.”a (Juan 15:8) Mantang pinapatalubo niato “an bunga kan espiritu,” an mga resulta heling-heling sa satong pagtaram asin paggawe; dangan, ini nagtataong pag-omaw sa satong Dios. (Mat. 5:16) Sa anong mga paagi an bunga kan espiritu laen sa mga ugale kan kinaban ni Satanas? Paano niato mapapatalubo an bunga kan espiritu? Taano ta tibaad depisil sa sato na gibohon iyan? Pag-oolayan niato an mga hapot na ini mantang tinotokar niato an enot na tolong aspekto kan bunga kan espiritu—an pagkamoot, kagayagayahan, asin katoninongan.