Sarong Banwaan na Naglalakaw sa Gira ni Jesus
“Naglakaw kami sa iyo man sanang espiritu, bako daw? Sa iyo man sanang gira, bako daw?”—2 CORINTO 12:18.
1. Taano ta parateng bakong depisil na mamidbid an saro sa mga Saksi ni Jehova?
“BILANG sarong grupo, sinda magalang, responsable, asin matibay sa klase. Dai ini masasabi manongod sa ibang grupo.” Iyan an sabi kan prinsipal sa sarong eskuwelahan sa elementarya sa Estados Unidos. Siisay an sinasabi nia? An mga aki nin mga Saksi ni Jehova na mga eskuwela sa saiyang eskuwelahan. Tunay nanggad, dakol an nakarisa na an mga Saksi ni Jehova, pati an saindang mga aki, parateng nakakapareho nin ibang Saksi sa nagkapirang paagi. Sa nag-aging mga taon orog na naririsa na sinda pambihira an pagkasararo kun manongod sa mga tinutubod asin gawe Kaya bakong depisil na mamidbid an mga Saksi.
2. Ano an kuwalidad na karakteristiko kan enot na Kristianong kongregasyon, asin ano an isinabi ni Pablo manongod digdi?
2 An pagkasararo kan mga Saksi ni Jehova pambihira nanggad sa barangang kinaban na ini. Alagad ta iyan bakong masakit na saboton kun gigirumdomon niato na sinda gabos naghihingoa na maglakaw sa gira ni Jesus. (1 Pedro 2:21) An siring na pagkasararo karakteristiko man kan mga Kristiano kan enot na siglo. Sarong beses, sinadol ni Pablo an kongregasyon sa Corinto: “Ngonyan sinasadol ko kamo, mga tugang, paagi sa ngaran kan satong Kagurangnan na si Jesu-Cristo na kamo gabos maninigong magtaram na may pagkaoroyon, asin na dai magkaigwa nin pagkabaranga dian sa saindo, kundi na kamo dayupot na magkasararo sa saro sanang pag-isip asin sa saro sanang paghonahona.” (1 Corinto 1:10) Si Pablo nagtao man nin ipinasabong na hatol sa kun paano tatrataron an mga tawo na habong magpadanay sa Kristianong pagkasararo.—Helingon an Roma 16:17; 2 Tesalonica 3:6.
3, 4. Paano ilinadawan ni Pablo an pagkakasaro nia asin ni Tito, asin ano an pasisikadan kan pagkakasarong ini?
3 Kaidtong mga taon 55 C.E., isinugo ni Pablo si Tito sa Corinto tanganing tumabang sa pangongolekta para sa mga tugang na nangangaipo sa Judea asin tibaad tanganing helingon kun ano an iginagawe kan kongregasyon sa hatol ni Pablo. Sa pagsurat sa mga taga-Corinto sa huri, nasambitan ni Pablo an bago pa sanang pagsongko ni Tito asin naghapot: “Dai man kamo inaprobetsaran ni Tito, ano? Naglakaw kami sa iyo man sanang espiritu, bako daw? Sa iyo man sanang gira, bako daw?” (2 Corinto 12:18) Ano an boot sabihon ni Pablo sa paglakaw ninda “sa iyo man sanang espiritu” asin “sa iyo man sanang gira“?
4 Ipinahahayag nia an pagkakasaro nia asin ni Tito. Si Tito an kaiba sa pagbiyahe ni Pablo paminsanminsan, asin daing duwa-duwa na dakol an nanodan nia ki Pablo sa paaging ini. Alagad an pagkakasaro kan duwa basado sa bagay na mas makosog pa dian. Idto basado sa saindang marahay na relasyon ki Jehova asin sa bagay na pareho sindang parasunod sa gira ni Cristo. Inarog ni Tito si Pablo kun paanong si Pablo nag-arog ki Cristo. (Lucas 6:40; 1 Corinto 11:1) Kaya sa espiritu ni Jesus asin sa saiyang gira na sinda naglalakaw.
5. Ano an malalaoman sa mga tawo ngonyan na nag-aarog ki Pablo asin Tito sa saindang paglakaw “sa iyo man sanang espiritu” asin “sa iyo man sanang gira”?
5 Kaya bakong makangangalas na an mga Kristiano sa ika-20 siglong ini, na naglalakaw “sa iyo man sanang espiritu” asin “sa iyo man sanang gira” na kapareho ni Pablo asin Tito, may daing kapantay na pagkasararo. Sa katunayan, an pagkabaranga nin mga Kristiano sana sa ngaran nagbubuyagyag sa sainda bilang palsipikadong mga Kristiano, na dai naglalakaw sa gira kan Poon na hinihingako nindang saindang sinusundan. (Lucas 11:17) An risang gayong pagkakalaen na ini kan mga Kristianong tunay asin sa ngaran sana ikakailustrar sa laen-laen na paagi. Sambiton niato an apat.
An Kabanalan kan Dugo
6, 7. (a) Anong tamang punto-de-vista manongod sa dugo an napapalabot sa paglakaw sa gira ni Jesus? (b) Ano an pagkakalaen kan mga Saksi ni Jehova asin nin iba ngonyan na nagsasayumang pasalin nin dugo?
6 Kaidtong mga taon 49 C.E., an namamahalang grupo sa kongregasyon kan enot na siglo nagpaluwas nin surat na suminimbag sa hapot na: Maninigo daw na kumuyog sa Pagboot ni Moises an mga Kristianong bakong Judio? Ini an sabi kan surat: “Pinagmarahay kan banal na espiritu asin niamo na dai na kamo dugangan nin pasan, puwera sana sa kinakaipuhan na mga bagay, na kamo maglikay sa mga bagay na idinolot sa mga ladawan asin sa dugo asin sa mga bagay na tinook patin sa pakikisaro.” (Gibo 15:28, 29) Mangnoha na kabilang sa “kinakaipuhan na mga bagay” an paglikay sa dugo. An paglakaw sa gira ni Jesus mangangahulogan nin dai paglaog nin dugo sa hawak baga man paagi sa ngoso o sa ibang paagi.
7 An prinsipyong ini hayag na linapas sa Kakristianohan paagi kan ugaleng pagsasalin nin dugo. Totoo, sa nakaaagi pa sanang mga taon may mga tawo na nakaaram sa peligro sa salud nin pagsasalin nin dugo asin nagsayuma dian huli sa medikal na mga dahelan. Ini partikularmenteng totoo ta dakol an nagka-AIDS gikan sa isinalin na dugo. Alagad siisay an nagsusuportar sa kabanalan nin dugo huli sa paggalang sa pagboot nin Dios, na ginigibo iyan bilang sarong grupo? Kun an pasyente nagsasayumang pasalin, automatikong iniisip kan doktor na ano sia? Bako daw na parateng sinasabi kan doktor: ‘Seguro saro ka sa mga Saksi ni Jehova’?
8. Paano binendisyonan an sarong Saksi sa Italia huli sa determinasyon nia na otobon an pagboot nin Dios sa bagay na ini?
8 Si Antonietta taga-Italia. Kaidtong mga walong taon na an nakaagi grabe an helang nia, asin hababaon an blood count nia kaya an mga doktor nag-insister na kaipuhan an pagsasalin tanganing ikaligtas an saiyang buhay. Nagsayuma sia asin kinontra sia kapwa nin mga doktor asin paryentes. Pati an duwa niang aking lalaki nakimaherak: “Mama, kun talagang namomotan mo kami, akoon mo na an dugo.” Alagad si Antonietta determinado na magdanay na maimbod, asin makaoogma ta dai sia nagadan. Pero, grabe an kamugtakan nia kaya may doktor na nagsabi: “Dai mi ikapaliwanag kun taano ta buhay pa sia.” Pero kan oras na maponan an sarong klase nin pagbolong na puwede, marikason an pagrahay nia kaya may saro pang doktor na nagkomento: “Dai ako makatubod—imposible na ika narahayan nin siring kadali, dawa pa ika sinalinan mi nin dugo sa bilog na aldaw.” Ngonyan, sia regular payunir, asin an duwa niang aki, na ngonyan 12 asin 14 anyos na, marahay an pag-oswag sa katotoohan. Si Antonietta mapusong inotob an ‘kinakaipuhan na bagay’ na iyan, an kabanalan nin dugo. An gabos na Saksi ni Jehova arog man kaiyan an punto-de-vista mantang sinda naglalakaw sa gira ni Jesus.
Marahay na Moral
9. Ano an saro pang kinakaipuhan na bagay’ na napapalabot sa pagsunod sa gira ni Jesus, asin ano an nangyayari sa mga dai nakakaotob digdi?
9 An saro pang ‘kinakaipuhan na bagay’ na idinoon sa surat na idto hale sa namamahalang grupo kan enot na siglo iyo an “maglikay . . . sa pakikisaro.” Sa enot niang surat sa mga taga-Corinto, orog pa ining ipinaliwanag ni Pablo, na sinasabi: “Ni an mga parapakisaro, ni an mga parasamba sa ladawan, ni an mga parasambay, ni an mga binabae, ni an mga lalaki na minadurog sa kapwa lalaki . . . dai magmamana kan kahadean nin Dios.” (1 Corinto 6:9, 10) Tinatabangan nin mga Kristiano an mga tawo na boot na maglingkod ki Jehova na haleon sa sadiri ninda an marigsok na mga gibong ini. Minsan an mga miembro kan kongregasyon na nasisiod kaiyan tinatabangan na linigan an saindang sadiri kun sinda nagbabakle asin nagsosolsol. (Santiago 5:13-15) Alagad kun may Kristiano na maholog sa marigsok na mga gibong iyan asin habong magsolsol, minaaplikar an prangkang reglamento kan Biblia. Si Pablo pinasabngan nin Dios na magsabi: “Umontok sa pakikiiba sa siisay man na inaapod na tugang na nagin parapakisaro. . . . ‘Haleon nindo an maraot na tawo dian sa tahaw nindo.’”—1 Corinto 5:11, 13.
10, 11. (a) Siisay an dapat na manimbag sa hababang mga pamantayan sa moral sa Kakristianohan, asin taano (b) Paano an eksperyensia nin sarong lalaki sa Pilipinas nagpapaheling na, bilang sarong grupo pinapagdadanay nin mga Saksi ni Jehova an halangkaw na mga pamantayan sa moral?
10 Sa ibong kan malinaw na katokdoan na ini, an Kakristianohan pano-pano nin inmoralidad. An mga klerigo na pinabababa an banal na mga pamantayan iyo an dapat na basolon sa kamugtakan na ini, siring man an nagsusuportar sa mga pamantayan kan Biblia paagi sa saindang ngoso alagad dai iyan mapusong ipinaootob sa saindang kongregasyon. Minsan siring, sa bagay man na ini, an mga Saksi ni Jehova bilang sarong banwaan naglalakaw sa mga gira ni Jesus.
11 Helinga Si Jose, na taga-Pilipinas. 17 anyos pa sana sia midbid na siang makiiwalon asin hugador. Parate siang burat, inmoral an pamumuhay, asin parateng napipreso huli sa paghabon. Dangan nanompongan sia kan mga Saksi ni Jehova. “An pag-adal sa Biblia biyong nakaliwat sa sakong buhay,” sabi nia. “Dai na ako nag-iinom asin nagsisigarilyo, asin nakanood akong pogolan an sakong kaanggotan. Malinaw na an konsensia ko ngonyan na saro na sana an agom ko. Nakamtan ko man an paggalang kan sakong pagtaraed, na kaidto inaapod akong ‘si Joseng barumbado’ asin ‘si Joseng impakto.’ Ngonyan inaapod ninda akong ‘Si Joseng Saksi ni Jehova.’ An sakong aki asin sobrino ministeryal na mga lingkod sa kongregasyon na pinaglilingkodan ko bilang magurang asin regular payunir.” Si Jose asin an minilyon pang ibang Kristianong Saksi ni Jehova naglalakaw sa gira ni Jesus bilang mga Kristianong malinig sa moral.
Neutralidad
12. Anong kaisipan nin tunay na mga Kristiano an itinampok ni Jesus sa saiyang pamibi na nasusurat sa Juan kapitulo 17?
12 Sa halabang pamibi ni Jesus sa ultimong banggi na kaiba nia an saiyang mga disipulo, nasambitan nia an saro pang paagi na an saiyang mga parasunod ‘maglalakaw sa saiyang gira.’ Sa pagtaram manongod sa saiyang mga disipulo, sia nagsabi: “Sinda bakong kabtang kan kinaban, kun paanong ako bakong kabtang kan kinaban.” (Juan 17:16) Ini nangangahulogan na an mga Kristiano neutral. Imbes na makikabtang sa politika o nasyonal na iriwal, sinasabi ninda sa iba an manongod sa Kahadean nin Dios, an solamenteng solusyon sa mga problema kan kinaban na ini.—Mateo 6:9, 10; Juan 18:36.
13, 14. (a) Paano napapalaen an Kakristianohan sa mga Saksi ni Jehova kun manongod sa neutralidad? (b) Paano an pagpapadanay sa politikal na neutralidad nin sarong Saksi sa Hapon nagbunga kan kapakinabangan kan bilog na kasararoan nin mga tugang?
13 An prinsipyong ini nin neutralidad liningawan na nin kadaklan na miembro nin Kakristianohan, na para sa sainda an nasyonal na ginikanan parateng mas mahalaga kisa naaayonan na relihiyon. An kolumnista sa nagkapirang peryodiko na si Mike Royko nagsabi na “an mga Kristiano” noarin man dai “nasisikmol manongod sa pakikiguerra sa ibang Kristiano,” na idinugang pa: “Kun iyo, dai kutana noarin man nangyari an kadaklan sa pinakamainit na mga guerra sa Europa.” Aram na gayo an bagay na an mga Saksi ni Jehova nagdadanay sa estriktong Kristianong neutralidad sa mga panahon nin guerra. Alagad bilang mga parasunod ni Jesus, sinda neutral man sa sosyal asin politikal na mga isyu. Kaya, mayo nin ano man na nakariribok sa saindang pambihirang pagkasararo na lakop sa kinaban.—1 Pedro 2:17.
14 An saindang neutralidad kun beses nagtatao nin dai linalaoman na mga resulta. Sa distrito nin Tsugaru sa parteng amihanan nin Hapon, halimbawa, isinasaboot nanggad an mga eleksion. Alagad si Toshio, katabang na manedyer kan Finance Department sa sarong lokal na opisina kan gobyerno, nagsayuma huli sa konsensia na makilabot sa pagkampanya para sa reeleksion kan alkalde. Ini nagbunga kan pagbugtak sa saiya sa hababang katongdan sa Department of Sewage. Alagad, pakalihis nin sarong taon, an alkalde inarestar asin napiritan na magdemetir huli sa maraot na mga gibo. Naelehir an bagong alkalde. Kan mabaretaan nia an pagkababa ni Toshio, ibinalik nia sia sa mas halangkaw na katongdan administratibo, asin ini nagtao nin bendisyon sa Kristianong mga tugang ni Toshio. Paano? Ipinaliliwanag ni Toshio na depisilon na kumua nin permiso na gamiton an mga gymnasium para sa mga pagtiripon apuwera sa karawat. Alagad sa presente niang katongdan, “nagamit ako ni Jehova”—sa pagkotar sa sadiring tataramon ni Toshio—“na magamit an siring na mga gymnasium para sa tolong pandistritong kombension asin apat na pansirkitong asamblea.” Sia nagkonklusyon: “Basta kita magmaimbod, bubukasan ni Jehova an dai iniimahinar na mga paagi na magamit kita.”
Sa Harong
15. Paano si Jesus nagwalat nin modelo para sa saiyang mga parasunod kun manongod sa pag-iriba-iba sa pamilya?
15 An saro pang langtad na dian an mga Kristiano ‘nagsusunod sa gira ni Jesus’ iyo an harong. Iniestablisar kan Biblia an halimbawa ni Jesus bilang modelo sa relasyon sa laog kan pamilya kan iyan magsabi: “Magpasarakopsakop kamo huli sa pagkatakot ki Cristo. Magpasakop an mga agom na babae sa saindang agom nin siring sa Kagurangnan, huli ta an lalaki iyo an payo kan saiyang agom kun paanong si Cristo iyo man an payo kan kongregasyon . . . Sa katunayan, kun paanong an kongregasyon nagpapasakop ki Cristo, siring man an mga babae sa saindang agom sa gabos na bagay. Mga agom na lalaki, padagos nindong mamotan an saindong mga agom na babae, kun paanong si Cristo namoot man sa kongregasyon asin iinatang an saiya man sana dahelan kaiyan —Efeso 5:21-25.
16, 17. (a) Ano an maraot na kamugtakan sa Kakristianohan kun manongod sa relasyon sa laog kan pamilya? (b) Paano sana mapakakarhay an relasyon sa pamilya, arog kan ipinaheheling kan eksperyensia nin sarong mag-agom sa Brazil?
16 An Kakristianohan ngonyan sa kadaklan nagbibinongog sa hatol na ini asin kun siring pano nin laglag na mga pamilya. Uso an nagkasuruwaysuway na pamilya, asin parateng hararomon an pagkarinaotan kan boot nin magurang asin aki. “Nagkakasuruwaysuway an pamilya,” an komento nin sarong propesor sa sikolohiya kaidtong mga pirang taon na an nakaagi. An mga sikologo sa aki, parahatol sa mag-agom, asin sikiyatrista limitado sana an kapangganahan sa paghihingoang dai malaglag an namemeligrong mga pamilya. Alagad an mga Saksi ni Jehova naghihingoa na iaplikar an mga prinsipyo kan Biblia asin midbid sa mas marahay kisa kadaklan na pag-iriba-iba nin pamilya.
17 Si Aldemar, halimbawa, tenyente sa pulis militar nin Brazil asin may mga problema sa pamilya. Binayaan sia kan saiyang agom asin naghagad nin separasyon legal. Nagpoon siang mag-inom nin sobra asin nagprobar pa nganing maghugot. Dangan, an saiyang mga paryentes na mga Saksi ni Jehova, kinaolay sia manongod sa Biblia. Nagustohan nia an saiyang nadangog asin nagpoon na mag-adal. Sa pagmawot na ioyon an saiyang buhay sa paninindogan sa neutralidad na dian midbid an mga Saksi ni Jehova, naghagad siang makahale sa militar. Naresolberan ni Aldemar asin kan saiyang agom an dai ninda pagkasinabotan paagi sa pag-aplikar kan mga prinsipyo sa Biblia na nanonodan ni Aldemar. Ngonyan, sinda nagsusunod sa gira ni Jesus, na magkaibanan naglilingkod ki Jehova bilang mga regular payunir.
Makinuyog Huli sa Pagkamoot
18. Taano an mga Saksi ni Jehova ta binibendisyonan sa espirituwal ngonyan? (b) Paano naootob ngonyan an Isaias 2:2-4?
18 Maliwanag na an mga Saksi ni Jehova sararong naglalakaw sa espiritu asin sa gira ni Cristo Jesus. Bilang mga indibiduwal asin bilang sarong grupo, sinda binibendisyonan sa espirituwal huli kaiyan. (Salmo 133:1-3) An risang mga ebidensia nin pagbendisyon nin Dios sa sainda nagmotibar sa dakol na may sadiosan na puso na gumawe kaoyon kan hula sa Isaias 2:2-4. Sa nakaaagi pa sanang limang taon, 987,828 an guminibo kan kinakaipuhan na mga tangga pasiring sa pagdusay dangan nagpresentar na pabautismo sa tubig. Mamomoton, si Jehova dai nagbugtak nin bakong makatanosan na limite sa bilang nin mga tawo na makagigibo kaini bago umabot an “dakulang kahorasaan”!—Kapahayagan 7:9, 14.
19. (a) Ano an namamatean na mga pakinabang na puwedeng ibunga kan paglilingkod ki Jehova, asin ano an maninigong magin pagheling dian? (b) Ano an pundamental na dahelan niato sa pagkuyog sa mga pagboot ni Jehova?
19 Arog kan ipinaheheling kan mga eksperyensia sa enotan, an espirituwal na mga bendisyon na nakakamtan kan banwaan nin Dios parateng may kaibang namamatean na mga pakinabang. Halimbawa, paagi sa paglikay sa pagsisigarilyo, paagi sa moral na pamumuhay, asin paagi sa paggalang sa kabanalan nin dugo, tibaad makalikay sinda na mabiktima nin nagkapirang helang. O huli sa pamumuhay kaoyon sa katotoohan, tibaad sinda makinabang sa ekonomiko. sosyal, o pampamilyang paagi. An ano man na namamatean na pakinabang na arog kaiyan ibinibilang na bendisyon gikan ki Jehova, asin pinatutunayan kaiyan an pagkapraktikal kan mga pagboot ni Jehova. Alagad an posibilidad na kamtan an siring na praktikal na mga pakinabang bakong iyo an mayor na dahelan sa pagkuyog sa mga pagboot nin Dios. An tunay na mga Kristiano nagkukuyog ki Jehova huli ta sia namomotan ninda, huli ta sia maninigo nindang sambahon, asin huli ta an pag-otob sa saiyang kabotan iyo an solamenteng tamang gibohon. (1 Juan 5:2, 3; Kapahayagan 4:11) Si Satanas an naghihingako na an mga tawo naglilingkod sana sa Dios para sa paslong pakinabang.—Helingon an Job 1:9-11; 2:4, 5.
20. Paano an mga Saksi ni Jehova ngonyan naglalakaw sa espiritu na kapareho kan tolong maimbod na Hebreong Saksi kan suanoy na mga panahon?
20 An mga Saksi ni Jehova sa modernong aldaw naglalakaw sa espiritu na kapareho kan tolong maimbod na hoben na Hebreong saksi kan kaaldawan ni Daniel. Kan umaon na iapon sa naglalaad na horno, an mga ini nagsarabi: “Kun mangyari man, an samong Dios na samuyang pinaglilingkodan kayang magligtas sa samo. Hale sa naglalaad na horno asin hale sa saimong kamot, O hade, ililigtas nia kami. Alagad kun dai [an boot sabihon, dawa kun togotan nia kaming magadan], maisihan mo logod, O hade, na an saimong mga dios bakong iyo an samong pinaglilingkodan, asin an ladawan nin bulawan na saimong ipinatindog dai mi sasambahon.’ (Daniel 3:17, 18) Ano man an namamatean na pakinabang o resulta sa mismong panahon na ini, an mga Saksi ni Jehova magpapadagos na sumunod sa gira ni Jesus, sa pakaaram na segurado an daing katapusan na buhay sa bakong kinaban nin Dios! Bilang sararong banwaan, sinda magpapadagos na lumakaw “sa iyo man sanang espiritu” asin “sa iyo man sanang gira,” ano man an mangyari!
Ikapaliliwanag daw Nindo:
◻ Taano ta nagkakasararo an mga Saksi ni Jehova?
◻ Sa anong mga bagay napapalaen an mga Saksi ni Jehova sa mga Kristiano sana sa ngaran?
◻ Ano an mayor na dahelan kun taano an tunay na mga Kristiano ta naglilingkod ki Jehova?
◻ Ano an pagheling kan banwaan nin Dios sa mga pakinabang na bunga kan pagkuyog ki Jehova?
[Ritrato sa pahina 19]
Kun an pasyente nagsasayumang pasalin nin dugo parateng ipinamumugtak na sia saro sa mga Saksi ni Jehova
[Ritrato sa pahina 21]
An dakol na naghihingakong Kristiano dai nasikmol manongod sa pagralabanlaban ninda sa guerra—na may bendisyon kan saindang klero