An Punto-de-Vista kan Biblia

Puwede daw na an Sarong Homoseksuwal Magin Sarong Ministro nin Dios?

ENERO 1987 kaidto, asin si Robert Arpin magagadan na huli sa AIDS. Iyan mismo bako nang pambihira. Alagad si Robert Arpin sarong padi, saro sa nag-oorog na bilang nin hayag na ipinamimidbid na homoseksuwal na klero.

Sa nakaaging mga taon an mga homoseksuwal bako sanang “nagruruluwas na sa pagtatago” kundi sinda man nagruruluwas na sa mga seminaryo. Sarong nasa hababang grado sa Catholic University Theological College sa Estados Unidos an nagsabi sa National Catholic Reporter: “Sa sakuyang kalkulo 60 sagkod sa 70 porsiento kan sakong klase an bakla asin an kaagid na bilang sa seminaryo.” Sa pagkomento manongod sa kausohan nin homoseksuwalidad sa mga seminaryo, si Anthony Kosnick, an editor kan Human Sexuality, nagsabi: “Orog ining uso kisa sa sakuyang hinohona.”

An laen-laen na relihiyon nagpahayag nin kadakol na laen-laen na opinyon kun baga an sarong homoseksuwal maninigong magin sarong ministro o dai. Alagad an kadakol na tawo bakong interesado sa mga opinyon na naporma paagi kan presenteng mga kausohan kundi, imbes, sa kun ano an sinasabi kan Biblia. Ano, kun siring, an pamantayan nin Dios para sa mga ministro? Kuwalipikado daw an sarong homoseksuwal?

Mga Saserdote sa Israel

Sa suanoy na Israel halangkaw an pamantayan para sa mga saserdote ni Jehova Dios. (Levitico, kapitulo 21) Mantang nagrerepresentar sinda sa Sarong Kabanalbanale, maninigo sindang magdanay na malinig sa espirituwal, pisikal, asin sa moral. “An siisay man na magdoot sa altar maninigong magin banal,” an pagboot nin Dios. Kaya, kan an enot na halangkaw na saserdote nin Israel, si Aaron, asin an saiyang mga aking lalaki ibinugtak bilang mga saserdote, sarong pitong aldaw na seremonya an ginibo tanganing pakangbanalon sinda para sa saindang banal na mga gibohon.—Exodo 29:37.

An mga saserdote may paninimbagan man na magtokdo kan Pagboot nin Dios asin, kairiba kan mga hokom, siertohon na sinusunod ini. (Malaquias 2:7) Kairiba sa Pagboot na iyan an malinaw na pagkondenar sa homoseksuwalidad. Nagboot an Dios: “Kun an sarong lalaki dumorog sa lalaki na siring kan pagdorog sa babae, pareho sinda nakaginibo nin makababaldeng bagay. Maninigo sindang gadanon na daing liban.” (Levitico 20:13) Dai nin pagbabago, an mga saserdote maninigong mabuhay oyon sa iyo man sanang Pagboot.

Kun an mga saserdote dai nakasunod sa banal na pagboot, sinda sinasagwe, siring sa kamugtakan kan sarong halangkaw na saserdote, si Eli, asin an saiyang duwang inmoral na aking lalaki. (1 Samuel 2:12-35; 4:17, 18) Pakatapos, kan panahon ni propeta Ezequiel, si Jehova nagsabi: “An mga saserdote [kan Israel] nagralapas sa sakong pagboot, asin padagos nindang linalanghadan an sakong banal na mga lugar.” Huli kaini, isinikwal sinda nin Dios.—Ezequiel 22:26, 31.

An Kristianong Pamantayan

Halangkaw man an pamantayan para sa mga nangengenot sa pagsamba sa Kristianong kongregasyon. Kairiba sa mga kuwalipikasyon na nakatala sa Biblia, mangnohon ini: “dai nin kanawayan,” “tamang-tama sana sa mga pag-uugale,” “marahay an kaisipan,” “kuwalipikadong magtokdo,” “[igwa] nin marahay na patotoo hale sa mga tawo sa luwas.” (1 Timoteo 3:1-7) Kaya, an sarong Kristianong paraataman maninigong magin daing kasagwean. An saiyang pagmansay sa kun ano an angay asin an bakong angay na mga gawe maninigong basado sa Biblia, asin an saiyang sadiring ugale maninigong dai magsirrado kan mga kaisipan kaidtong saiyang minamawot na tokdoan. Naaabot daw nin sarong homoseksuwal an Makakasuratan na mga pamantayan na iyan?

Bago isinurat an mga susundan na yaon sa itaas, nagpatanid si apostol Pablo ki Timoteo manongod sa nagkapirang miembro na nagmamawot na “magin mga paratokdo kan katogonan.” Maninigong pagbotan ni Timoteo ining mga nanriribok kan pagtubod na “dai magtokdo nin laen na doktrina.” Masunod, pinatanidan nia si Timoteo kan “mga tampalasan asin masumbikal, asin maraot,” asin dangan espisipiko niang inapod an “mga lalaki na nakikidorog sa mga lalaki” na “tumang sa marahay na katokdoan.” (1 Timoteo 1:3-11) Sierto nanggad, an sarong nangengenot sa pagsamba kan kongregasyon maninigong dai mag-olang sa kapakipakinabang na mga katokdoan kan Biblia sa tataramon man o sa estilo nin buhay.—Ikomparar an Roma 2:21.

An puwersa kan sadol na ini maheheling man sa isinurat ni Pablo ki Tito sa Creta. Sa pagbubugtak nin mga kahagadan sa “pag-ordenar sa kamagurangan” (King James Version), espisipikong hinagad nia an saindang pagigin “dai nin kanawayan,” “matanos,” “mapagpogol,” “marigon na nangangapot sa maimbod na tataramon kun dapit sa saiyang abilidad sa pagtotokdo.” (Tito 1:5-9) Kairiba sa “maimbod na tataramon” na iyan an mas amay na surat ni Pablo sa mga Kristiano na nag-iistar sa Corinto, na nagsasabi na an “mga lalaki na minadorog sa kapuwa lalaki” dai magmamana kan Kahadean nin Dios. (1 Corinto 6:9, 10) An pangangapot sa “maimbod na tataramon” magpapangyari sa sarong ministro “tanganing makapagsagwe sa mga minatumang.” (Tito 1:9) Paano makapagsagwe sa iba an sarong homoseksuwal na ministro mantang an saiyang sadiring estilo nin pamumuhay minatumang sa “maimbod na tataramon”? Al kontraryo, si apostol Pedro nagsabi manongod sa “falsong mga paratokdo” na “dakol an masunod sa saindang malaswang mga gawe.”—2 Pedro 2:1, 2.

‘Sakuyang Isisikwal Ka’

Konsideraron man ini: Sa sarong bisyon, naheling ni propeta Zacarias kan ikaanom na siglo B.C.E. an halangkaw na saserdoteng si Josue na nakasulot nin naatian na mga gubing. Paano nia malilinigan idto tanganing makapagpadagos sia bilang saserdote? “Kun kukuyogon mo an sakong mga pagboot asin gigibohon an mga katongdan na inasignar ko sa saimo,” an sabi nin Dios, “kun siring magpapadagos ka na mamahala sa sakuyang Templo.” (Zacarias 3:7, Today’s English Version) Sa mga indibiduwal na dai nagkukuyog kan banal na mga pagboot, kairiba idtong nagbabawal sa homoseksuwal na mga gawe, sinasabi nin Dios: “Huli ta an kaaraman iyo an saimong isinikwal, sakuya man na isisikwal ka sa paglilingkod bilang saserdote sa sakuya.”—Oseas 4:6.

Kun siring, puwede daw na an sarong homoseksuwal magin sarong ministro ni Jehova Dios? Dai. An mga tawong dai kuwalipikado sono sa “marahay na katokdoan” na nakasurat sa Biblia bakong an mga tunay na ministro nin Dios.—Tito 2:1; 1 Timoteo 1:10; helingon man an Roma 1:24-27, 32.

[Ritrato sa pahina 11]

Paano daw an sarong ministro tamang makapagtotokdo sa iba mantang an saiyang sadiring estilo nin pamumuhay minatumang sa “maimbod na tataramon”?