Kinua nin Dios si Enoc​—Paano?

Dai tinogotan ni Jehova si Satanas o an mga lingkod kaini digdi sa daga na gadanon si Enoc. Imbes, an ipinasabong na rekord nagsasabi: “Kinua sia nin Dios.” (Genesis 5:24) Siring kaini an pagkaladawan ni apostol Pablo sa mga bagay: “Huli sa pagtubod si Enoc ibinalyo tanganing dai makaheling nin kagadanan, asin dai na sia nanompongan minsan saen huli ta ibinalyo sia nin Dios; huli ta bago kan pagbalyo sa saiya nagkamit sia kan patotoo na napaoyonan nia an Dios.”​—Hebreo 11:5.

Paano si Enoc “ibinalyo tanganing dai makaheling nin kagadanan”? O siring kan nasa traduksion ni R. A. Knox, paano si Enoc “kinua na dai naeksperyensiahan an kagadanan”? Matoninong na tinapos nin Dios an buhay ni Enoc, na dai ipinamate sa saiya an mga kolog nin kagadanan magsalang bunga nin helang o kadahasan sa kamot kan saiyang mga kaiwal. Iyo, pinahalipot ni Jehova an buhay ni Enoc sa edad na 365​—medyo hoben pa kun ikokomparar sa saiyang mga katemporanyo.

Paano si Enoc tinawan nin “patotoo na napaoyonan nia an Dios”? Ano an saiyang ebidensia? Posible na pinapangyari nin Dios na pangalipadngan si Enoc, kun paanong si apostol Pablo “inagaw,” o ibinalyo, na malinaw na nag-aako nin sarong bisyon kan maabot na espirituwal na paraiso kan Kristianong kongregasyon. (2 Corinto 12:​3, 4) An patotoo, o ebidensia, na an Dios napaooyonan ni Enoc puedeng may kaibang patanaw paagi sa bisyon kan maabot na Paraiso sa daga na dian an gabos na nabubuhay masuportar sa soberaniya nin Dios. Posible na mantang si Enoc nakaeeksperyensia nin siring na nakaoogmang marhay na bisyon na sia kinua nin Dios paagi sa daing kolog na kagadanan tanganing matorog sagkod sa aldaw na sia buhayon liwat. Minalataw na, siring sa nangyari ki Moises, ilinobong ni Jehova an bangkay ni Enoc, huli ta “dai na sia nanompongan minsan saen.”​—Hebreo 11:5; Deuteronomio 34:​5, 6; Judas 9.

Nagduman daw si Enoc sa Langit?

“Huli sa pagtubod si Enoc ibinalyo tanganing dai makaheling nin kagadanan.” Sa pagtradusir ninda kan kabtang na ini kan Hebreo 11:5, an nagkapirang traduksion kan Biblia nagpaparisa na si Enoc dai man talaga nagadan. Halimbawa, an A New Translation of the Bible, ni James Moffatt, nagsasabi: “Huli sa pagtubod kaya si Enoc dinara sa langit kaya sia nungkang nagadan.”

Minsan siring, mga 3,000 na taon pakalihis kan kaaldawan ni Enoc, si Jesu-Cristo nagsabi: “Mayo nin tawo na nagsakat sa langit kundi idtong naghilig hale sa langit, an Aki nin tawo.” (Juan 3:13) An The New English Bible nagsasabi: “Dai nin siisay man na nagsakat sa langit kasuarin man apuera sa saro na naghilig hale sa langit, an Aki nin Tawo.” Kan sabihon iyan ni Jesus, maski sia dai pa nagsakat sa langit.​—Ikomparar an Lucas 7:28.

Sinasabi ni apostol Pablo na si Enoc asin an iba pa na minakompuesto sa dakulang panganoron nin mga saksi kaidtong mga panahon bago kan mga Kristiano “gabos nagkagaradan” asin ‘dai nagkamit kan kaotoban kan panuga.’ (Hebreo 11:​13, 39) Taano? Huli ta an gabos na tawo, kabale si Enoc, nagmana nin kasalan ki Adan. (Salmo 51:5; Roma 5:​12) An solamenteng paagi nin kaligtasan iyo an pantubos na atang ni Cristo Jesus. (Gibo 4:​12; 1 Juan 2:​1, 2) An pantubos na iyan dai pa ibinayad kan kaaldawan ni Enoc. Kun siring, si Enoc dai nagduman sa langit, kundi natotorog sia sa kagadanan na naghahalat nin pagkabuhay liwat digdi sa daga.​—Juan 5:​28, 29.