6. Paano ilinaladawan ni Juan an mga hukbo kan kabalyeriya na sunod niang naheling?

⁶ “Asin an kabilangan kan mga hukbo kan kabalyeriya duwang miriada nin mga miriada: nadangog ko an kabilangan ninda. Asin ini an pagheling ko sa mga kabayo sa bisyon, asin sa mga nakakabayo sainda: igwa sinda nin mga tahob sa daghan na arog kapula sa kalayo asin arog kaasul sa jacinto patin arog kaamarilyo sa asupre; asin an payo kan mga kabayo siring sa payo nin mga leon, asin sa saindang ngoso may nagluluwas na kalayo asin aso patin asupre. Paagi sa tolong damat na ini nagadan an ikatolong kabtang kan mga tawo, huli sa kalayo asin aso patin asupre na nagluluwas sa saindang ngoso.”—Kapahayagan 9:16-18.

7, 8. (a) Sa irarom kan naggigiyang pagdirehir niisay na an kabalyeriyang ini nag-uurog-udog sa pagdalagan? (b) Sa anong mga paagi na an kabalyeriya kaagid kan mga doron na sinundan kaiyan?

⁷ Minalataw na an kabalyeriyang ini nag-uurog-udog sa pagdalagan sa irarom kan naggigiyang pagdirehir kan apat na anghel. Abaa kamakatatakot na paghelingon! Isip-isipa an magigin reaksion nindo kun kamo an punteriya kan siring na pagsalakay nin kabalyeriya! Sa itsura pa sana kaiyan makakamate na kamo nin grabeng takot sa saindong puso. Pero, namangno daw nindo kun gurano kanakakaagid an kabalyeriyang ini sa mga doron na sinundan kaiyan? An mga doron agid sa mga kabayo; sa kabalyeriya may mga kabayo talaga. Kun siring, an duwang ini pareho kalabot sa teokratikong pakikilaban. (Talinhaga 21:31) An mga doron may ngipon na agid kan sa leon; an mga kabayo kan kabalyeriya may payo na agid kan sa leon. Kun siring, pareho iyan konektado sa makosog an boot na Leon na gikan sa tribo ni Juda, si Jesu-Cristo, na iyo an Namomoon, Komandante, asin Arogan ninda.—Kapahayagan 5:5; Talinhaga 28:1.

⁸ An mga doron sagkod an kabalyeriya nakikikabtang sa paghokom ni Jehova. An mga doron nagluwas sa aso na tanda nin grabeng sakit asin mapanlaglag na kalayo para sa Kakristianohan; sa ngoso kan mga kabayo, may nagluluwas na kalayo, aso, asin asupre. An mga doron may batbat na tahob sa daghan, na nangangahulogan na an saindang puso protektado nin marigon na debosyon sa katanosan; an kabalyeriya may mga sulot na tahob sa daghan na kolor pula, asul, asin amarilyo, na naglaladawan sa kalayo, aso, asin asupre kan nakakagadan na mga mensahe nin paghokom na nagluluwas sa ngoso kan mga kabayo. (Ikomparar an Genesis 19:24, 28; Lucas 17:29, 30.) An mga doron may mga ikog na agid sa mga amamatak para sa pagpasakit; an mga kabayo may mga ikog na agid sa mga halas para sa paggadan! Minalataw na an pinonan kan mga doron ipagpapadagos kan kabalyeriya na may orog na intensidad sagkod na matapos.

9. Ano an isinisimbolisar kan kabalyeriya?

⁹ Kaya, ano an isinisimbolisar kan kabalyeriyang ini? Kun paanong pinonan kan linahidan na grupong Juan an garo trumpetang proklamasyon kan paghokom ni Jehova na pamamalos tumang sa Kakristianohan, na may autoridad na ‘manugod asin mangolog,’ aasahan man niato na an nabubuhay na grupo man sanang ini an gagamiton sa ‘pangadan,’ an boot sabihon, sa pagpahayag na an Kakristianohan asin an klero kaiyan biyong gadan sa espirituwal, na isinikwal ni Jehova asin inandam para sa “nagkakalayong horno” nin daing katapusan na kalaglagan. Sa katunayan, dapat na laglagon an bilog na Dakulang Babilonya. (Kapahayagan 9:5, 10; 18:2, 8; Mateo 13:41-43) Minsan siring, bago sia laglagon, ginagamit kan grupong Juan “an espada kan espiritu, arin na baga, an tataramon nin Dios,” sa pagbuyagyag kan garo gadan na kamugtakan kan Kakristianohan. An apat na anghel asin an mga nakasakay sa mga kabayo iyong nagdidirehir sa piguratibong paggadan na ini sa “ikatolong kabtang kan mga tawo.” (Efeso 6:17; Kapahayagan 9:15, 18) Ini nagpaparisa nin tamang pagkaorganisar asin teokratikong pagdirehir sa irarom kan pangangataman kan Kagurangnan na Jesu-Cristo mantang an makangingirhat na grupo nin mga parabalangibog kan Kahadean minasalakay sa pakikilaban.

Duwang Miriada nin mga Miriada

10. Sa anong sentido na duwang miriada nin mga miriada an kabalyeriya?

¹⁰ Paano magkakaigwa nin duwang miriada nin mga miriada an kabalyeriyang ini? An sarong miriada sa literal 10,000. Kaya an duwang miriada nin mga miriada bale 200 milyones.a Nakakaogma ta igwa na ngonyan nin minilyon na parabalangibog kan Kahadean, alagad an kabilangan ninda kulang na marhay sa ginatos na milyon! Pero, girumdoma an mga tataramon ni Moises sa Bilang 10:36: “Pagbalik, O Jehova, sa mga miriada kan ribo-ribo nin Israel.” (Ikomparar an Genesis 24:60.) Iyan mangangahulogan, sa literal, ‘Pagbalik sa manampulong milyon nin Israel.’ Minsan siring, an Israel may kabilangan sanang mga duwa o tolong milyon kan panahon ni Moises. Kun siring, ano an boot sabihon ni Moises? Daing duwa-duwa na an nasa isip nia an mga Israelita maninigong dai nin kabilangan “siring kan mga bitoon sa kalangitan asin siring kan mga baybay sa baybayon,” imbes na bilangon. (Genesis 22:17; 1 Cronica 27:23) Kaya ginamit nia an termino para sa “miriada” tanganing iparisa an kabilangan na dakula alagad dai sinasabi nin eksakto. Sa siring, an pagkatradusir kan The New English Bible sa bersikulong ini: “Magpahingalo ka, KAGURANGNAN kan dai mabilang na rinibo nin Israel.” Kaoyon ini kan ikaduwang pakahulogan sa termino para sa “miriada” na yaon sa mga diksionaryong Griego asin Hebreo: “sarong kaburunyogan na dai mabilang,” sarong “kaburunyogan.”—The New Thayer’s Greek-English Lexicon of the New Testament; A Hebrew and English Lexicon of the Old Testament ni Gesenio, trinadusir ni Edward Robinson.

11. Tanganing an grupong Juan magin mga miriada dawa sa simbolikong sentido, ano an kaipuhan?

¹¹ Minsan siring, an mga kabilang sa grupong Juan na yaon pa digdi sa daga mayo pang 10,000 an kabilangan—kulang pa sa sarong literal na miriada. Paano sinda ikakaagid sa dai mabilang na rinibong kabalyeriya? Tanganing magin mga miriada dawa sa simbolikong sentido, dai daw sinda nagkakaipo nin dagdag na mga soldados? Iyan an kaipuhan ninda, asin huli sa dai na kutana maninigong kabootan ni Jehova, iyan an inako ninda! Saen hale an mga ini?

12, 13. Anong historikong mga pangyayari poon kan 1918 sagkod 1935 an nagparisa kan paghahalean kan dagdag na mga soldados?

¹² Poon 1918 sagkod 1922, pinonan na ialok kan grupong Juan sa nasasakitan na katawohan an maogmang paglaom na “an minilyon na nabubuhay ngonyan dai na noarin man magagadan.” Kan 1923 ipinahayag man na an mga karnero sa Mateo 25:31-34 magmamana nin buhay digdi sa daga sakop kan Kahadean nin Dios. Iinalok an kaagid na paglaom sa pulyetong Freedom for the Peoples, na ilinuwas sa internasyonal na kombension kan 1927. Sa kapinonan kan dekada nin 1930 an tanos na grupong Jonadab asin an “mga tawo na nag-aaragagha asin nag-aaragrangay” huli sa makamomondong kamugtakan sa espirituwal kan Kakristianohan ipinaheling na iyo man sana an simbolikong mga karnero na may paglaom sa daganon na buhay. (Ezequiel 9:4; 2 Hade 10:15, 16) Sa paggiya sa mga ini pasiring sa “mga siudad na pailihan” sa presenteng aldaw, an The Watchtower kan Agosto 15, 1934, nagsabi: “An mga kabilang sa grupong Jonadab nakadangog kan tanog kan trumpeta nin Dios asin naghimate sa patanid paagi sa pagdulag pasiring sa organisasyon nin Dios asin pakikiasosyar sa banwaan nin Dios, asin dapat na sinda magdanay dian.”—Bilang 35:6.

¹³ Kan 1935 an mga kabilang sa grupong Jonadab espesyalmenteng inimbitaran na umatender sa kombension kan Mga Saksi ni Jehova sa Washington, D.C., E.U.A. Duman, kan Biernes, Mayo 31, itinao ni J. F. Rutherford an saiyang bantog na pahayag na “An Dakulang Kaburunyogan,” na dian malinaw niang ipinaliwanag na an grupong ini sa Kapahayagan 7:9 (King James Version) iyo man sana an mga karnero sa Mateo 25:33—sarong nagdusay na grupo na may daganon na paglaom. Bilang tanda kan mga bagay na maabot, sa kombension na idto 840 bagong Saksi an nabautismohan, na an dakol sa sainda kabilang sa dakulang kadaklan.b

14. Magkakaigwa daw nin kabtang an dakulang kadaklan sa simbolikong pagsalakay kan kabalyeriya, asin anong desisyon an ipinahayag kan 1963?

¹⁴ Nagkaigwa daw nin kabtang an dakulang kadaklan na ini sa pagsalakay kan kabalyeriya na nagpoon kan 1922 asin tinawan nin partikular na pagdodoon sa kombension sa Toronto kan 1927? Iyo nanggad, sa pagdirehir kan apat na anghel, an linahidan na grupong Juan! Sa naglilibot sa kinaban na “Daing Katapusan na Maogmang Bareta” na Asamblea kan 1963, iyan uminiba sa grupong Juan sa sarong nakakapukaw nin boot na resolusyon. Ini nagpahayag na an kinaban “napapaatubang sa garo linog na kariribokan sa kinaban na kasuarin man dai pa kaiyan inagihan, asin an gabos na politikal na institusyon kaiyan asin an modernong relihiosong Babilonya kaiyan yuyugyugon sagkod na magkaroronot.” Ipinahayag an desisyon na “ipagpapadagos niamong ipahayag sa gabos na tawo na mayo nin pagpalaenlaen an ‘daing katapusan na maogmang bareta’ may labot sa Mesiyanikong kahadean nin Dios asin may labot sa saiyang mga paghokom, na garo mga damat sa saiyang mga kaiwal alagad gigibohon tanganing mapatalingkas an gabos na tawo na boot na sumamba nin akseptable sa Dios na Kaglalang sa espiritu asin sa katotoohan.” An resolusyon na ini entusiastikong inaprobaran sa 24 asamblea sa bilog na daga nin total na 454,977 kombensionista, na an labing 95 porsiento kabilang sa dakulang kadaklan.

15. (a) Kan 2005 anong porsiento kan mga trabahador na ginagamit ni Jehova sa langtad an dakulang kadaklan? (b) Paano ipinapahayag kan pamibi ni Jesus sa Juan 17:20, 21 an pakikisumaro kan dakulang kadaklan sa grupong Juan?

¹⁵ Padagos na ipinahayag kan dakulang kadaklan an lubos na pakikisumaro kaiyan sa grupong Juan sa pagbubo kan mga damat sa Kakristianohan. Kan 2005 an dakulang kadaklan na ini labing 99.8 porsiento kan mga trabahador na ginagamit ni Jehova sa langtad. An mga miembro kaiyan bilog na pusong kaoyon kan grupong Juan, na may labot sa sainda si Jesus namibi sa Juan 17:20, 21: “Ako nakikimaherak, bako sanang may labot sa mga ini, kundi may labot man sa mga nagtutubod sa sako paagi sa saindang tataramon; tanganing sinda gabos magin saro, kun paanong ika, Ama, kasaro ko asin ako kasaro mo, na sinda man magin kasaro niato, tanganing an kinaban magtubod na ako isinugo mo.” Mantang nangengenot an linahidan na grupong Juan na sakop ni Jesus, an maigot na dakulang kadaklan nakikiiba sa sainda sa pinakanakakalaglag na pagsalakay nin kabalyeriya sa bilog na kasaysayan nin tawo!c