• Pakikilaban sa Duwang Maisog na Hayop
    Kapahayagan—Harani Na an Mamuraway na Kulminasyon Kaiyan!

    • 25. (a) Paano ilinaladawan ni Juan an saro pang simbolikong mabangis na hayop na naglataw sa kinaban? (b) Ano an ipinaparisa kan duwang sungay kan bagong mabangis na hayop asin kan pagbutwa kaiyan sa daga?

      25 Alagad ngonyan may saro pang mabangis na hayop na naglataw sa kinaban. Si Juan nagbabareta: “Asin naheling ko an saro pang mabangis na hayop na nagbubutwa sa daga, asin iyan igwa nin duwang sungay siring sa kordero, alagad ta iyan nagpoon na magtaram na siring sa dragon. Asin iyan nagkakapot kan gabos na autoridad kan enot na mabangis na hayop na nasa atubangan kaiyan. Asin pinapasamba kaiyan an daga asin an mga nag-eerok dian sa enot na mabangis na hayop, na an nakakagadan na tama naomayan. Asin iyan naggigibo nin darakulang tanda, mala ta napapababa ngani kaiyan an kalayo hale sa langit pasiring sa daga sa atubangan nin mga tawo.” (Kapahayagan 13:11-13) An mabangis na hayop na ini may duwang sungay, na nagpaparisa nin pagtinabangan nin magkapadis na kapangyarihan politikal. Asin iyan sinasabing hale sa daga, bakong hale sa dagat. Sa siring, iyan hale sa dati nang establisadong daganon na sistema nin mga bagay ni Satanas. Iyan seguradong sarong pambilog na kinaban na kapangyarihan, na dati nang nag-eeksister, na nagkakaigwa nin mahalagang papel sa aldaw kan Kagurangnan.

      26. (a) Ano an mabangis na hayop na may duwang sungay, asin ano an koneksion kaiyan sa orihinal na mabangis na hayop? (b) Sa anong sentido na an mga sungay kan hayop na may duwang sungay agid sa kordero, asin paano na iyan “siring sa dragon” kun nagtataram? (c) Ano an talagang sinasamba nin nasyonalistikong mga tawo, asin sa ano ibinaing an nasyonalismo? (Helingon an nota sa ibaba.)

      26 Ano daw iyan? An Pambilog na Kinaban na Kapangyarihan na Anglo-Amerikano—na iyo man sana an ikapitong payo kan enot na mabangis na hayop alagad may espesyal na papel! An pagsolo kaiyan sa bisyon bilang separadong mabangis na hayop nakakatabang sato na mas malinaw na maheling kun paano iyan independienteng minahiro sa kinaban. An piguratibong mabangis na hayop na ini na may duwang sungay kompuesto nin duwang magkadungan, independiente, alagad nagtitinabangan na kapangyarihan politikal. An duwang sungay kaiyan na “siring sa kordero” nagsusuherir na iyan nagsasagin mahoyo asin matoninong, na may sibilisadong klase nin gobyerno na maninigong dolokan kan bilog na kinaban. Alagad iyan nagtataram na “siring sa dragon” ta iyan naggagamit nin pamimirit asin mga paghuma patin nin kadahasan pa ngani saen man dai akoon an klase nin pamamahala kaiyan. Dai iyan nag-eenkaminar nin pagpasakop sa Kahadean nin Dios na pinapamahalaan kan Kordero nin Dios kundi, imbes, sa intereses ni Satanas, an dakulang dragon. Pinalakop kaiyan an nasyonalistikong mga pagkabaranga asin pagkaongis na an resulta pagsamba sa enot na mabangis na hayop.c

  • Pakikilaban sa Duwang Maisog na Hayop
    Kapahayagan—Harani Na an Mamuraway na Kulminasyon Kaiyan!

    • c An mga komentarista nagsasabi na an nasyonalismo garo man sana sarong relihion. Huli kaini, an mga tawong nasyonalistiko talagang nagsasamba sa kabtang kan mabangis na hayop na irinerepresentar kan nasyon na saindang iniistaran. Mapadapit sa nasyonalismo sa Estados Unidos, mababasa niato: “An nasyonalismo, na ibinibilang na sarong relihion, may dakulang pagkakapareho sa ibang darakulang relihiosong sistema kan mga nakaagi . . . An relihiosong nasyonalista sa presenteng panahon nakakamate nin pagsarig sa sadiri niang nasyonal na dios. Namamatean nia an pangangaipo sa Saiyang makapangyarihan na tabang. Sia an rinerekonoser niang ginigikanan kan saiyang pagkasangkap asin kaogmahan. Sa estriktong relihiosong sentido, sia nagpapasakop sa Saiya. . . . An nasyon pinaghohonang daing sagkod, asin an kagadanan kan saiyang maimbod na mga aki nakakadagdag sana sa saiyang daing kasagkodan na kabantogan asin kamurawayan.”—Carlton J. F. Hayes, segun sa pagkakotar sa pahina 359 kan librong What Americans Believe and How They Worship, ni J. Paul Williams.