Pagpadanay kan Inomon na de Alkohol sa Tamang Lugar Kaiyan

SI Tony, na nasambitan sa enot na artikulo, laen nanggad kutana an nagin buhay—kun inadmitir nia sana na may problema sia sa pag-inom. Minsan siring, huling garo baga nakakaya niang uminom nin dakol na mayo nin risang sintomas, naniniwala sia na kontrolado nia an saiyang buhay. Taano ta salang gayo an saiyang paghusgar sa sadiri nia?

An saiyang paghusgar naapektaran nin sobrang pag-inom. Narealisar man ni Tony o dai, an mismong kabtang kan hawak na nagsusubaybay sa saiyang pisikal, mental, asin emosyonal na kamugtakan—an saiyang hotok—dai nagpupunsionar nin tama kun iyan nasosobrahan nin alkohol. Mientras na mas dakol siang naiinom, mas nagluluya man an kakayahan kan isip nia na husgaran nin tama an saiyang kamugtakan.

An ikaduwang dahelan kan salang paghusgar ni Tony sa saiyang sadiri iyo an nangingibabaw na pagmawot nia na makapagpadagos sa saiyang pag-inom. Kan enot, pignegaran ni Allen, na nasambitan sa naenot na mga artikulo, na may problema sia sa alkohol. “Itinatago ko an sakong pag-inom,” an pag-admitir nia, “asin nangangatanosan ako dapit sa sobrang pag-inom ko saka ginigibo kong sadit na bagay sana iyan. May saro akong katuyohan—makapagpadagos sa pag-inom ko.” Dawa ngani naheheling na nin iba na kinokontrol na nin pag-inom si Tony asin Allen, padagos na sinasabi kan duwa sa saindang sadiri na normal sana an mga bagay-bagay. Kaipuhan nindang duwa na humiro tanganing makontrol an saindang pag-inom. Alagad anong paghiro?

Humiro!

Dakol na nagpondo sa pag-abuso sa inomon na de alkohol an huminiro kaoyon kan mga tataramon ni Jesus: “Kun an toong mata mong iyan nagpapasingkog sa saimo, hulwata iyan asin tapoka iyan. Huli ta orog pang kapakipakinabang para sa saimo na mawara sa saimo an sarong kabtang kan saimong hawak kisa sa bilog mong hawak an iapon sa Gehenna.”—Mateo 5:29.

Siempre, dai sinusuportaran ni Jesus an pagpasakit sa sadiri. Imbes, idinodoon nia sa piguratibong paagi na maninigo kitang magin andam na haleon sa satong buhay an ano man na nakakadanyar sa espirituwal. Totoo, an ginigibo niatong paghiro tibaad makologon. Alagad poprotehiran kita kaiyan sa kaisipan asin mga situwasyon na puedeng magresulta sa pag-abuso sa inomon na de alkohol. Sa siring, kun an iba magpahayag nin pagkahadit na nagigin sobra na an pag-inom nindo, humiro kamo tanganing kontrolon iyan.a Kun malinaw na dai nindo kayang kontrolon an saindong pag-inom, magin andam na haleon iyan sa saindong buhay. Minsan ngani tibaad makolog iyan, mas makolog pa ngani kun maraót an buhay nindo huli kaiyan.

Dawa kun bako kamong alkoholiko, may tendensia daw kamo na uminom nin kadakol? Kun iyo, anong praktikal na mga lakdang an magigibo nindo tanganing matabangan kamo na mapagdanay an inomon na de alkohol sa tamang lugar kaiyan?

Kun Ano an Makakatabang

1. Magtubod sa kapangyarihan nin dayaday asin odok sa pusong pamibi. Itinatao kan Biblia an sadol na ini para sa gabos na gustong mapaogma si Jehova Dios: “Sa gabos na bagay paagi sa pamibi asin pagngayongayo na may pagpasalamat ipahayag nindo sa Dios an saindong mga kahagadan; asin an katoninongan nin Dios na labi sa gabos na kaisipan mag-iingat sa saindong puso asin sa saindong pag-isip paagi ki Cristo Jesus.” (Filipos 4:6, 7) Ano an puede nindong ipamibi tanganing magkaigwa kan arog kaining katoninongan nin isip?

Sadiosan na admitiron na may problema kamo sa alkohol, problema na paninimbagan mismo nindo. Kun sasabihon nindo sa Dios an gusto nindong gibohon manongod dian, bebendisyonan nia an saindong mga paghihingoa na makaginhawa asin makalikay sa mas seryosong mga problema. “Sia na nagtatahob sa saiyang mga kalapasan dai magigin mapanggana, alagad sia na nagtutuga kaiyan asin minabaya dian papahelingan nin pagkaherak.” (Talinhaga 28:13) Sinabi man ni Jesus na puede niatong ipamibi: “Dai mo kami darahon sa sugot, kundi iligtas mo kami sa maraot.” (Mateo 6:13; nota sa ibaba) Pero, paano kamo puedeng humiro kaoyon kan siring na mga pamibi, asin saen kamo makakakua nin mga simbag sa saindong pagngayongayo?

2. Kumua nin kosog sa Tataramon nin Dios. “An tataramon nin Dios buhay asin mapuersa . . . asin nakakabatid kan mga kaisipan asin intension kan puso.” (Hebreo 4:12) Dakol na dating makosog na parainom an natabangan paagi sa aroaldaw na pagbasa asin paghorophorop nin mga bersikulo sa Biblia. “Maogma an tawo na dai naglalakaw sa hatol kan mga maraot,” an isinurat nin matatakton sa Dios na salmista, “kundi an saiyang pagkaogmang marhay yaon sa ley ni Jehova, asin sa saiyang ley sia nagbabasa nin pahinghing aldaw asin banggi. . . . An gabos niang ginigibo magigin mapanggana.”—Salmo 1:1-3.

Si Allen, na napakosog na daogon an pag-abuso sa inomon na de alkohol paagi sa pag-adal sa Biblia kaiba kan mga Saksi ni Jehova, nagsabi, “Kombensido ako na kun bakong huli sa Biblia asin mga prinsipyo sa Biblia na nakatabang sa sako na pondohon an pag-inom, gadan na kutana ako.”

3. Pataluboon an pagpupugol sa sadiri. An Biblia nagsasabi na an mga miembro kan Kristianong kongregasyon na dating paraburat nahugasan na “sa espiritu kan satong Dios.” (1 Corinto 6:9-11) Sa anong paagi? An saro iyo na an pagpatalubo nin pagpupugol sa sadiri nakatabang sa sainda na magpondo sa mga pagburat asin mariribok na pag-ogma. An kualidad na iyan napapatalubo sa tabang kan banal na espiritu nin Dios. “Dai kamo maburat sa arak, na dian igwa nin karigsokan, kundi padagos kamong mapano nin espiritu.” (Efeso 5:18; Galacia 5:21-23) Si Jesu-Cristo nanuga na “an Ama sa langit . . . matao nin banal na espiritu sa mga naghahagad sa saiya.” Kun siring, “padagos kamong maghagad, asin iyan itatao sa saindo.”—Lucas 11:9, 13.

An mga nagmamawot na sambahon si Jehova sa inaakong paagi makakapatalubo nin pagpupugol sa sadiri paagi sa pagbasa asin pag-adal sa Biblia saka paagi sa parate asin hale sa pusong pamimibi. Imbes na magpadara sa pagkadesganar, akoon an panugang ini na nasa Tataramon nin Dios: “Sia na nagtatanom para sa espiritu mag-aani nin buhay na daing katapusan gikan sa espiritu. Kaya dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.”—Galacia 6:8, 9.

4. Pumili nin marahay na mga kaibaiba. “Sia na naglalakaw na kaiba nin mga madonong magigin madonong, alagad sia na nakikiiba sa mga mangmang mapaparaot.” (Talinhaga 13:20) Sabihon sa saindong mga katood an determinasyon nindo na kontrolon an paggamit nin inomon na de alkohol. Pero, an Tataramon nin Dios patienot na nagsabi na kun popondohon nindo an “mga pagpalabilabi sa arak, maribok na mga pag-ogma, [asin] mga daraogan sa pag-inom,” an nagkapirang dati nindong kairiba ‘magngangaralas asin padagos na magtataram na may panglilibak manongod sa saindo.’ (1 Pedro 4:3, 4) Magin andam na putolon an pakikiibaiba sa mga nagpapaluya kan determinasyon nindo na kontrolon an saindong pag-inom.

5. Magbugtak nin depinidong mga limitasyon. “Dai na kamo magpamolde sa sistemang ini nin mga bagay, kundi maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.” (Roma 12:2) Kun an totogotan nindo na makatabang sa pagbugtak nindo nin personal na mga limitasyon iyo an mga prinsipyo sa Tataramon nin Dios imbes na an saindong mga kaibaiba o an “sistemang ini nin mga bagay,” magkakaigwa kamo nin pamumuhay na inaako nin Dios. Alagad paano nindo madedeterminaran kun ano an ligtas na limitasyon para sa saindo?

Dikit man o dakol na inomon na de alkohol, kun iyan nakakaraot sa saindong paghusgar asin nakakapaluya sa saindong kakayahan na mangatanosan, iyan sobra na para sa saindo. Huli kaini, kun kamo mainom, bakong madonong na magbugtak nin bakong malinaw na limitasyon na nakadepende sa kun baga kamo nabuburat o dai. Dai pagtogotan na an pagdehar nindo na may problema kamo sa pag-inom makapaluya sa saindong onestong paghusgar dapit sa pag-inom nindo. Magbugtak nin limitasyon na depinido asin mayo nanggad nin posibilidad na kamo lumampas sa pagigin tama sana—an limitasyon na dai maresulta sa pagpalabilabi sa pag-inom.

6. Makanood na magsabi nin dai. “Pabayaan sana na an saindong tataramon na Iyo mangahulogan nin Iyo, an saindong Dai, Dai.” (Mateo 5:37) Makanood na sayumahan sa magalang na paagi an desididong pag-alok nin maboot alagad napapasalang kag-imbitar. “An saindo logod na pagtaram danay na may kabootan, na tinimplahan nin asin, tanganing maaraman nindo kun paano kamo dapat na sumimbag sa lambang saro.”—Colosas 4:6.

7. Maghagad nin personal na tabang. Hagadon an tabang nin mapagsuportar na mga katood na makakapakosog sa determinasyon nindo na kontrolon an saindong pag-inom asin makakatao nin espirituwal na tabang. “Mas marahay an duwa kisa sa saro, huli ta igwa sinda nin marahay na balos sa saindang kahigosan. Huli ta kun an saro sa sainda mapukan, mapapatindog kan saro an saiyang kaibanan.” (Eclesiastes 4:9, 10; Santiago 5:14, 16) An National Institute on Alcohol Abuse and Alcoholism sa Estados Unidos nagsadol man: “Kun beses, tibaad depisil na bawasan an saindong iniinom. Pakiolayan an saindong mga kapamilya asin katood na tabangan kamong maabot an saindong pasohan.”

8. Papagdanayon an saindong determinasyon. “Magin kamong mga paraotob kan tataramon, asin bakong mga paradangog sana, na dinadaya an saindong sadiri nin putik na pangangatanosan. Alagad an nag-aaninaw sa sangkap na ley para sa katalingkasan asin nagdadanay dian, an tawong ini, huli ta sia nagin, bakong malilingawon na paradangog, kundi paraotob kan gibohon, maoogma sa paggibo nia kaiyan.”—Santiago 1:22, 25.

Pakabutas sa Pagkaadikto

Bakong gabos na nag-iinom nin sobra nagigin alkoholiko. Alagad an nagkapira nagpopoon na uminom nin kadakol—o parateng gayo—kaya sinda nagigin adikto sa inomon na de alkohol. Huling kaiba sa pagkaadikto sa alkohol an pagdepende kan hawak asin isip sa sarong makosog na kemikal, an siring na mga tawo tibaad mangaipo nin orog pa sa determinasyon asin espirituwal na tabang tanganing makatalingkas sa alkoholismo. “Kan ipinopondo ko an pag-inom,” an paggirumdom ni Allen, “grabe an sakit ko sa pisikal. Kaidto ko narealisar na kaipuhan ko nin medikal na pagbolong, apuera pa sa espirituwal na tabang na inaako ko.”

Dakol na parainom an nangangaipo nin medikal na pagbolong na mapakosog sa saindang espirituwal na pakikilaban tanganing makatalingkas asin danay na makalikay sa pag-abuso sa inomon na de alkohol.b An nagkapira kaipuhan na magdanay nguna sa ospital tanganing makaya an grabeng mga sintomas nin pagpondo o mag-ako nin pagbolong na makakaina sa grabeng pagmawot sa inomon na de alkohol asin makakatabang na magdanay na dai nag-iinom. An naggigibo nin mga milagro na Aki nin Dios nagsabi: “An mga marahay an salud dai nangangaipo nin parabolong, alagad an mga naghehelang iyo.”—Marcos 2:17.

Mga Pakinabang sa Paghimate sa Instruksion nin Dios

An madonong na sadol kan Biblia dapit sa inomon na de alkohol naggigikan sa tunay na Dios, na nagmamawot kan pinakamarahay para sa sato—bako sanang para sa presenteng kaogmahan niato kundi para man sa nagdadanay na kapakinabangan niato. Beinte-kuatrong taon pagkatapos na magpondo si Allen sa pag-inom, nagigirumdoman nia: “Nakakaogma na maaraman na puede akong magin laen, na manodan na gusto ni Jehova na tabangan akong itanos an sadiri ko, na sia . . . ” Si Allen nagpondo nguna huling napapahibi sia mantang ginigirumdom nia an mga pangyayari. “Um, . . . na maaraman na si Jehova nakakasabot asin nagmamakolog saka nagtatao kan kinakaipuhan na tabang—pambihira nanggad iyan.”

Kun siring, kun kamo kinokontrol nin salang paggamit o pagkaadikto sa inomon na de alkohol, dai tolos sumuko o magkongklusyon na mayo na nin paglaom. Inagihan ni Allen asin nin dakol na iba pa an inaagihan nindo ngonyan, pero nakaya nindang bawasan o biyong haleon an pag-inom. Mayo sindang pinagbabasolan asin dai man kamo mabasol.

Baga man personalmente kamong nagdesisyon na uminom nin tama sana o talagang dai na, himateon nindo an mamomoton na pakiolay nin Dios: “O kun ika sana kutana totoong matao nin atension sa sakong mga togon! Dangan an saimong katoninongan magigin siring nanggad sa salog, asin an saimong katanosan siring sa mga alon kan dagat.”—Isaias 48:18.

[Mga Nota sa Ibaba]

[Kahon/Ritrato sa pahina 8]

Kinokontrol na daw Ako nin Inomon na de Alkohol?

Puede mong hapoton an saimong sadiri:

• Mas dakol daw an iniinom ko ngonyan kisa kaidto?

• Mas parate daw akong nag-iinom ngonyan kisa kaidto?

• Mas makosog na inomon na daw an iniinom ko?

• Ginagamit ko daw an inomon na de alkohol tanganing makaya an tension o makadulag sa mga problema?

• May katood o kapamilya daw ako na nagpahayag nin pagkahadit manongod sa sakong pag-inom?

• An pag-inom daw nagigin dahelan na nin mga problema ko sa harong asin trabaho o kun nagbabakasyon?

• Masakit daw para sa sako na palipason an sarong semana na dai nag-iinom?

• Bako daw akong komportable kun may iba na naglilikay sa pag-inom?

• Itinatago ko daw sa iba kun gurano kadakol an iniinom ko?

Kun iyo an simbag mo sa saro o labi pa sa mga hapot na ini, tibaad kaipuhan mong gumibo nin mga paagi tanganing kontrolon an pag-inom mo.

[Kahon/Ritrato sa pahina 9]

Madonong na Pagdesisyon Dapit sa Inomon na de Alkohol

Bago uminom, mag-isip-isip:

• Marahay daw para sa sako na mag-inom, o ako daw maninigong dai uminom?

Rekomendasyon: An saro na dai kayang limitaran an saiyang pag-inom maninigong dai uminom.

• Gurano kadakol an iinomon ko?

Rekomendasyon: Aramon kun gurano kadakol na inomon an dai makakaapektar sa saimong paghusgar.

• Noarin ako mainom?

Mga rekomendasyon: Bakong bago magmaneho o makikabtang sa mga aktibidad na nangangaipo nin pagigin alisto; bakong bago makikabtang sa relihiosong mga aktibidad; bakong durante nin pagbados; bakong kasabay nin nagkapirang bolong.

• Saen ako mainom?

Mga rekomendasyon: Sa sarong marahay na kamugtakan; bakong sa hilom na lugar tanganing itago an pag-inom; bakong sa lugar na may mga dai naoogma kun igwa nin nag-iinom.

• Siisay an makakaibanan ko sa pag-inom?

Mga rekomendasyon: Nakakapakosog na mga katood o kapamilya; bakong an mga may problema sa pag-inom.

[Kahon/Ritrato sa pahina 10]

Natabangan kan Tataramon nin Dios an Sarong Dating Paraburat

Si Rantsan,c na taga Thailand, sarong makosog na parainom. Kan enot, banggi sana kun sia mag-inom. Luway-luway, nagpoon siang uminom kun aga dangan kun udto man. Sa parate, sia nag-iinom tangani sanang magburat. Alagad nagpoon siang makipag-adal sa Biblia sa mga Saksi ni Jehova. Kan manodan ni Rantsan na dai inaako ni Jehova Dios an pagburat, nagpondo sia sa pag-inom. Pero, pakalihis nin dikit na panahon, nagbalik sia sa dati niang bisyo na pag-inom. Nagmondong gayo an saiyang pamilya.

Minsan siring, namomotan pa ni Rantsan si Jehova asin gusto niang sambahon Sia sa tamang paagi. An mga katood ni Rantsan padagos na nagtabang sa saiya asin dinagka ninda an saiyang pamilya na magtagama nin mas dakol na panahon na makaibanan sia asin dai sumuko sa pagtabang sa saiya. Kan panahon na iyan, an prangkang sinabi sa 1 Corinto 6:10 na an ‘mga paraburat dai magmamana kan kahadean nin Dios’ nakatabang ki Rantsan na masabotan kun gurano kaseryoso an saiyang kamugtakan. Narealisar nia na kaipuhan niang gumibo nin desididong paghihingoa na mapangganahan an saiyang problema sa pag-inom.

Kan panahon na iyan, determinado na si Rantsan na biyong magpondo sa pag-inom. Pag-abot nin panahon, paagi sa kapangyarihan kan banal na espiritu nin Dios, paggiya kan Tataramon nin Dios, asin tabang kan saiyang mga kapamilya asin kakongregasyon, si Rantsan nagkaigwa nin espirituwal na kosog asin napangganahan an saiyang pagmawot na uminom. Naogmang marhay an saiyang pamilya kan mabautismohan sia bilang simbolo kan saiyang pagdusay sa Dios. Ngonyan, si Rantsan igwa nin dayupot na relasyon sa Dios na pirme niang minamawot kaidto pa, asin ginagamit nia an saiyang panahon tanganing tabangan an iba sa espirituwal na paagi.

[Nota sa Ibaba]