DAI kayang gibohon nin mga hayop an ginigibo nindo ngonyan. Saro sa kada 6 katawo an dai nakanood na magbasa—parate na huling mayo nin oportunidad na mag-eskuela—asin sa mga nakanood, dakol an bakong regular dian. Pero, an saindong abilidad na magbasa nin mga babasahon nagtotogot sa saindo na sa paaging ini makabiahe sa ibang nasyon, mamidbid an mga tawo na an buhay makadudugang sa kualidad kan saindong buhay, asin magkamit nin praktikal na kaaraman na makatatabang sa saindo na makaya an mga kapurisawan sa buhay.

An abilidad na magbasa nakaiimpluwensia sa kun gurano an pakinabang nin sarong hoben sa saiyang pag-eskuela. Kun sia maghanap nin trabaho, an abilidad nia sa pagbasa puedeng makaimpluwensia sa klase nin trabahong makukua nia asin sa kun pirang oras sia kaipuhan na magtrabaho tanganing mabuhay. An mga agom na babae na matibay magbasa mas may kakayahan na atamanon an saindang pamilya kun dapit sa tamang pagkakan, pangangataman sa salud, asin paglikay sa helang. An mga ina na matibay magbasa puede man na magtao nin positibong marhay na impluwensia sa intelektuwal na progreso kan saindang mga aki.

Siempre, an kadarudakulaing pakinabang sa pagbasa iyo na iyan puedeng magpangyari sa saindo na ‘makua an mismong kaaraman nin Dios.’ (Tal. 2:5) An dakol sa mga paagi na kita naglilingkod sa Dios kalabot an abilidad na magbasa. An Kasuratan asin mga publikasyon na basado sa Biblia binabasa sa mga pagtiripon kan kongregasyon. An pagkaepektibo nindo sa ministeryo sa langtad apektadong marhay kan saindong pagbasa. Asin an pag-andam para sa mga aktibidad na ini may kalabot na pagbasa. Sa dahelan na iyan an saindong espirituwal na pagtalubo dependeng marhay sa saindong mga ugale sa pagbasa.

Aprobetsaran an Oportunidad

An nagkapira na nag-aadal kan mga dalan nin Dios limitado an inadalan. Tibaad kaipuhan nindang tokdoan na magbasa tangani na rumahay an saindang espirituwal na pag-oswag. O tibaad kaipuhan ninda an personal na tabang sa pagparahay sa saindang abilidad sa pagbasa. Kun may lokal na pangangaipo, naghihingoa an mga kongregasyon na mag-organisar nin mga klase para sa pagbasa asin pagsurat basado sa publikasyon na Apply Yourself to Reading and Writing. Rinibo an nakinabang nin dakula sa probisyon na ini. Huli sa importansia nin pakabasa nin matibay, an nagkapirang kongregasyon nag-aareglo nin mga klase para sa pagpakarhay sa pagbasa na gigibohon kadungan kan Teokratikong Paadalan sa Pagmiministro. Dawa sa mga lugar na mayo kan siring na mga klase, puedeng umoswag an saro paagi sa paggamit nin kadikit na oras kada aldaw na magbasa nin makosog asin paagi sa regular na pag-atender saka pagpartisipar sa paadalan.

Makamomondo, huli sa mga komiks asin telebisyon, kabilang sa iba pang bagay, napagilid na an pagbasa sa buhay nin dakol na tawo. An pagdalan nin telebisyon asin limitadong pagbasa puedeng makaolang sa progreso kan abilidad nin sarong tawo sa pagbasa asin kan saiyang abilidad na magin malinaw an kaisipan saka pangangatanosan asin magin matibay na magtaram.

An mga publikasyon na nakatatabang sa sato na masabotan an Biblia itinatao kan “fiel asin may diskresion na oripon.” Huli kaini makukua an abundang suplay nin impormasyon may labot sa mahalagang marhay na espirituwal na mga bagay. (Mat. 24:45; 1 Cor. 2:12, 13) An mga iyan nagpapangyari man na kita makasubaybay sa importanteng mga bareta sa kinaban asin sa kahulogan kaiyan, nagtatabang sa sato na mas makaaram manongod sa naturalesa, asin nagtotokdo sa sato nin mga paagi na maatubang an mga isyu na may labot sa sato. Orog sa gabos, iyan nagkokonsentrar sa kun paano makapaglilingkod sa Dios sa maaakong paagi asin makakamtan an saiyang pag-oyon. An siring na nakararahay na pagbasa matabang sa saindo na magtalubo bilang tawong espirituwal.

Siempre, an abilidad na matibay magbasa bako man mismong bentaha. An abilidad na iyan kaipuhan na gamiton sa tamang paagi. Kapareho nin pagkakan, an pagbasa dapat na mapamili. Taano ta makakan nin kakanon na mayo nin itataong tunay na sustansia o na tibaad hihilohon pa kamo? Sa kaagid na paagi, taano ta mabasa nin materyales, dawa insidental sana, na makararaot sa isip asin puso? An mga prinsipyo sa Biblia iyo an maninigong gamiton niatong pamantayan sa kun anong babasahon an pipilion niato. Bago magdesisyon kun ano an babasahon nindo, isaisip an mga teksto na arog kan Eclesiastes 12:12, 13; Efeso 4:22-24; 5:3, 4; Filipos 4:8; Colosas 2:8; 1 Juan 2:15-17; asin 2 Juan 10.

Magbasa na May Tamang Motibo

An halaga kan tamang motibo sa pagbasa nagigin malinaw pakasiyasata kan mga salaysay kan Ebanghelyo. Sa Ebanghelyo ni Mateo, halimbawa, manonompongan niato si Jesus na hinahapot an madodonong na marhay na namomoon sa relihion nin mga hapot na arog kan “Ano dai nindo nabasa?” asin “Ano dai nindo noarin man nabasa ini?” bago nia itao sa sainda an sono sa Kasuratan na simbag sa saindang tusong mga hapot. (Mat. 12:3, 5; 19:4; 21:16, 42; 22:31) An sarong leksion na nanonodan niato digdi iyo na kun sala an motibo niato sa pagbasa, puede na mapasala an satong konklusyon o biyo niatong dai makua an punto. Binabasa kan mga Fariseo an Kasuratan ta paghona ninda paagi kaiyan, magkakamit sinda nin buhay na daing katapusan. An balos na iyan, arog kan sabi ni Jesus, dai itinatao sa mga dai namomoot sa Dios asin nag-aako kan Saiyang paagi nin pagliligtas. (Juan 5:39-43) An intension kan mga Fariseo maimot; huli kaini, sala an dakol nindang konklusyon.

An pagkamoot ki Jehova iyo an puedeng magin pinakadalisay na motibo niato sa pagbasa kan saiyang Tataramon. An siring na pagkamoot nagpapahiro sa sato na aramon an kabotan nin Dios, ta an pagkamoot “naggagayagaya sa katotoohan.” (1 Cor. 13:6) Dawa kun dai kita naoogmang magbasa kaidto, an pagkamoot ki Jehova sa ‘bilog niatong isip’ mapahiro sa sato na entusiastikong gamiton an satong isip sa paglaog dian kan kaaraman sa Dios. (Mat. 22:37) An pagkamoot nakapupukaw sa interes, asin an interes nakaaanimar sa pakanood.

Konsideraron an Rikas

An pagbasa konektadong marhay sa pakamidbid. Ngonyan mismo na kamo nagbabasa, saindong minimidbid an mga termino asin ginigirumdom an kahulogan kaiyan. Maparirikas nindo an saindong pagbasa kun pahihiwason nindo an saindong pakamidbid. Imbes na pumondo sa pagheling sa kada termino, probaran na durungan na helingon an nagkapirang termino. Mantang napatatalubo nindo an abilidad na ini, maririsa nindo na mas malinaw nindong nasasabotan an saindong binabasa.

Minsan siring, kun mas hararom an binabasa nindo, an pakinabang na makukua nindo sa saindong paghihingoa tibaad madugangan sa paggamit nin laen man na paagi. Sa paghatol ki Josue manongod sa pagbasa nia kan Kasuratan, sinabi ni Jehova: “An librong ini kan ley dai dapat sumuhay sa saimong ngoso, asin basahon mo iyan nin pahinghing.” (Jos. 1:8) An pagtaram nin pahinghing parateng ginigibo kun an saro nag-iisip-isip. Kun siring, an termino sa Hebreo na trinadusir na ‘basahon nin pahinghing’ tinatradusir man na “horophoropon.” (Sal. 63:6; 77:12; 143:5) Kun naghohorophorop, an saro nag-iisip-isip nin hararom; dai sia naghihidali. An pagbasa sa may pag-estudyar na paagi minatogot na an Tataramon nin Dios magkaigwa nin mas dakulang epekto sa isip asin puso. An Biblia may hula, hatol, mga talinhaga, berso, mga kapahayagan nin paghokom nin Dios, mga detalye mapadapit sa katuyohan ni Jehova, asin dakol na aktuwal na halimbawa—gabos mahalaga sa mga gustong maglakaw sa mga dalan ni Jehova. Abaa kapakipakinabang na basahon an Biblia sa paagi na minatogot na iyan ikatudok nin hararom sa saindong isip asin puso!

Makanood na Magkonsentrar

Mantang kamo nagbabasa, ibugtak an sadiri nindo sa kada eksenang ilinaladawan. Hingoahon na maheling an mga personahe sa isip nindo, asin imahinaron kun ano an namamatean ninda sa mga eksperyensiang nangyayari sa saindang buhay. Ini pasil sana kun binabasa an salaysay na arog kan manongod ki David asin Goliat, na nasusurat sa 1 Samuel kapitulo 17. Alagad dawa an mga detalye sa Exodo asin Levitico manongod sa pagtogdok kan tabernakulo o pagbugtak sa katongdan kan kabilogan na grupo nin mga saserdote mabubuhay kun ilinaladawan nindo sa isip an mga sokol asin materyales o iniimahinar an parong kan insenso, kan sinanglag na harina, asin kan mga hayop na iinaatang bilang dolot na tinotong. Isip-isipa kun gurano kanakapupukaw nin may pagkangirhat na paggalang an pag-otob sa mga serbisyo kan saserdote! (Luc. 1:8-10) An paglakip kan saindong mga sentido asin kan saindong emosyon sa paaging ini makatatabang sa saindo na masabotan an kahulogan kan saindong binabasa asin magseserbing tabang sa memorya.

Pero, kun dai kamo magmamaan, tibaad magbaragbarag an isip nindo kun kamo naghihingoang magbasa. Tibaad nasa pahina an saindong mga mata, alagad nasa ibang lugar an saindong isip. May musika daw na pinatutugtog? Bukas daw an telebisyon? Nag-oolay daw an mga miembro nin pamilya? Kun puede, pinakamarahay na magbasa sa lugar na toninong. Minsan siring, tibaad hale sa laog an disturbo. Tibaad sibot kamo sa bilog na aldaw. Abaa kapasil na isip-isipon giraray an mga aktibidad kan aldaw! Siempre, marahay na repasohon an mga nangyari kan aldaw na iyan—alagad bakong sa oras na kamo nagbabasa. Tibaad minapoon kamo na konsentrado an saindong isip, o tibaad binubuksan pa nindo nin pamibi an saindong pagbasa. Alagad ta mantang kamo nagbabasa, nagpopoon nang lumupad an saindong isip. Probaran giraray. Disiplinahon an sadiri na papagdanayon na konsentrado an saindong isip sa saindong binabasa. Luway-luway, maheheling nindo an pag-oswag.

Ano an ginigibo nindo kun may nanunuparan kamong termino na dai nindo nasasabotan? An nagkapirang termino na bakong pamilyar tibaad tawan nin kahulogan o tokaron sa binabasa nindo. O tibaad mamansayan nindo an kahulogan sa konteksto. Kun dai, magtao nin oras na hanapon an termino sa diksionaryo kun igwa, o tandaan an termino tangani na pagkatapos ikahapot nindo sa iba an kahulogan. Ini makapahihiwas sa saindong bokabularyo asin makakokontribwir sa pagsabot nindo sa saindong binabasa.

Pampublikong Pagbasa

Kan si Timoteo sabihan ni apostol Pablo na padagos na magmaigot sa pagbasa, an partikularmenteng gustong sabihon ni Pablo pagbasa sa kapakinabangan nin iba. (1 Tim. 4:13) An epektibo na pampublikong pagbasa bako sanang makosog na pagbasa nin mga termino hale sa sarong pahina an kalabot. Kaipuhan na masabotan kan nagbabasa an kahulogan kan mga termino asin marorop an mga ideyang ipinahahayag kaiyan. Sa siring sanang kamugtakan na ikapaaabot nia nin tama an mga ideya asin ikapahahayag nin eksakto an mga emosyon. Siempre, ini nagkakaipo nin lubos na pag-andam asin pagpraktis. Huli kaini, nagsadol si Pablo: “Padagos kang magmaigot sa pampublikong pagbasa.” Mag-aako kamo nin mahalagang pagpatood sa abilidad na ini sa Teokratikong Paadalan sa Pagmiministro.

Gumibo nin Paagi na Magkapanahon sa Pagbasa

“An mga plano kan mahigos seguradong nagbubunga nin bentaha, tara an gabos na naghuhumari seguradong mapasiring sa pagkatikapo.” (Tal. 21:5) Kanigoan katotoo kaiyan kun dapit sa satong kamawotan na magbasa! Tangani na kamtan an “bentaha,” kaipuhan na mahigos kitang magplano tangani na an satong pagbasa dai maagawan nin lugar kan ibang mga aktibidad.

Noarin kamo nagbabasa? Nakikinabang daw kamo sa pagbasa kun amay na aga? O mas marigmat kamo sa mas huring kabtang kan aldaw? Kun makatatagama kamo nin dawa 15 o 20 minutos kada aldaw sa pagbasa, mapapangalas kamo kun gurano kadakol kan mahahaman nindo. An importanteng marhay pagigin regular.

Taano ta pinili ni Jehova na ipasurat sa sarong libro an saiyang marahayon na mga katuyohan? Tangani na an mga tawo makakonsulta sa saiyang nasusurat na Tataramon. Ini nagpapangyari sa sainda na estudyaran an makangangalas na mga gibo ni Jehova, isabi ini sa saindang mga aki, asin memoryahon an mga ginibo nin Dios. (Sal. 78:5-7) An apresasyon niato sa pagigin buka an palad ni Jehova sa bagay na ini ikinapaheheling sa pinakamarahay na paagi sa satong pagmamaigot na basahon an saiyang Tataramon na nagtatao nin buhay.

NAPAGMASDAN na daw nindo an mga tawo na namimili nin prutas? An kadaklan inoobserbaran an kolor asin kadakulaan kaiyan tanganing madeterminaran an pagkahinog kaiyan. An nagkapira pinaparong an prutas. An iba dinuduotan iyan, pinipildit pa ngani iyan. An iba pa tinitimbang iyan, na tigsaro an duwang kamot tanganing maaraman kun arin an mas matagok. Ano an iniisip kan mga tawong ini? Saindang inaanalisar an mga detalye, tinitirotimbang an mga pagkakalaen, ginigirumdom an naenot na mga pinili, asin ikinokomparar an naheheling ninda ngonyan sa dati na nindang aram. May naghahalat sa saindang masiram na balos ta tinatawan ninda nin maingat na atension an bagay na iyan.

Siempre, mas dakulang marhay an mga balos sa pag-adal kan Tataramon nin Dios. Kun an siring na pag-adal may importanteng lugar sa satong buhay, an satong pagtubod mas minakosog, an satong pagkamoot minararom, an satong ministeryo nagigin mas mabunga, asin an mga desisyon na ginigibo niato nagtatao nin mas dakulang ebidensia nin pakamansay saka diosnon na kadonongan. May labot sa siring na mga balos, sinasabi kan Talinhaga 3:15: “An gabos na ibang kinawiwilihan mo dai ikapapantay dian.” Naeeksperyensiahan daw nindo an siring na mga balos? Puedeng makakontribwir an paagi nin saindong pag-adal.—Col. 1:9, 10.

Ano an pag-adal? Iyan bako sanang hababaw na pagbasa. Kalabot dian an paggamit kan saindong kakayahan nin isip sa maingat o halawig na pag-estudyar sa sarong tema. Kaiba dian an pag-analisar sa saindong binabasa, na ikinokomparar iyan sa dati na nindong aram, asin pag-obserbar sa itinaong mga dahelan para sa ginibong mga deklarasyon. Kun nag-aadal, isipon nin hararom an ano man na mga ideyang ipinahayag na tibaad bago sa saindo. Estudyaran man kun paano nindo mas lubos na ikaaaplikar nin personal an hatol sono sa Kasuratan. Bilang Saksi ni Jehova, bobooton man nindong isipon an mga oportunidad na magamit an materyales sa pagtabang sa iba. Siempre pa, kaiba sa pag-adal an paghorophorop.

Pagkaigwa kan Tamang Kamugtakan nin Isip

Kun nag-aandam na mag-adal, ilinuluwas nindo an mga bagay na arog kan saindong Biblia, ano man na publikasyon na plano nindong gamiton, lapis o bolpen, asin tibaad sarong kuaderno. Alagad inaandam man daw nindo an saindong puso? Sinasabi sa sato kan Biblia na “inandam . . . ni Esdras an saiyang puso na konsultahon an ley ni Jehova asin gibohon iyan patin magtokdo sa Israel nin susundon asin hustisya.” (Esd. 7:10) Ano an kalabot sa siring na pag-andam kan puso?

An pamibi nagpapangyari sa sato na magkaigwa nin tamang aktitud sa pag-adal kan Tataramon nin Dios. Boot niato na an satong puso, an satong kairairaroming pagkatawo, andam na umako kan pagtotokdo na itinatao sa sato ni Jehova. Sa kapinonan kan kada pag-adal, hagadon ki Jehova an tabang kan saiyang espiritu. (Luc. 11:13) Arangon sa saiya na tabangan kamong masabotan an kahulogan kan saindong pag-aadalan, kun paano iyan konektado sa saiyang katuyohan, kun paano iyan makatatabang sa saindo na mamansayan an marahay asin maraot, kun paano nindo maninigong iaplikar an saiyang mga prinsipyo sa saindong buhay, asin kun paano nakaaapektar an materyales sa saindong relasyon sa saiya. (Tal. 9:10) Mantang kamo nag-aadal, “padagos [na] maghagad sa Dios” nin kadonongan. (Sant. 1:5) Sadiosan na pagturotimbangon an saindong sadiri sa liwanag kan saindong nanonodan mantang hinahagad nindo an tabang ni Jehova sa paghale kan salang mga kaisipan o nakadadanyar na mga kamawotan. Pirmeng ‘maghimate ki Jehova na may pasasalamat’ para sa mga bagay na saiyang ihinahayag. (Sal. 147:7) An mapagngayongayong pamamaaging ini sa pag-adal nagbubunga nin kadayupotan ki Jehova, ta iyan nagpapangyari sa sato na maghimate sa saiya mantang sia nagtataram sa sato paagi sa saiyang Tataramon.—Sal. 145:18.

An siring na pagigin andam na umako ilinalaen an banwaan ni Jehova sa ibang estudyante. Sa mga mayo nin diosnon na debosyon, uso an pagdudahan asin kuestionon an nasusurat. Alagad bako iyan an aktitud niato. Nagtitiwala kita ki Jehova. (Tal. 3:5-7) Kun may dai kita nasasabotan, dai niato iniisip na may kapangahasan na iyan seguradong sala. Mantang sinisiyasat asin hinahanap an simbag, hinahalat niato si Jehova. (Miq. 7:7) Kapareho ni Esdras, an pasohan niato isagibo asin itokdo an satong nanonodan. Huling may arog kaining inklinasyon an puso, may nakatagama sa satong nagsosopay na mga balos sa satong pag-adal.

Kun Paano Mag-aadal

Imbes na pumoon sana sa parapo 1 asin magpadagos sagkod sa katapusan, tawan nguna nin panahon an preliminaryong pagheling sa enterong artikulo o kapitulo sa materyales. Pumoon paagi sa pag-analisar sa pagkasabi kan titulo. Ini an pinakatema kan saindong pag-aadalan. Dangan maingat na obserbaran kun paano konektado sa pinakatema an mga subtema. Siyasaton an ano man na ilustrasyon, tsart, o kahon sa pagtokdo na kaiba kan artikulo. Ihapot sa sadiri: ‘Basado sa preliminaryong pagheling na ini, ano an inaasahan kong manodan? Paano iyan magigin mahalaga sa sako?’ Nagtatao ini nin direksion sa saindong pag-adal.

Ngonyan kuanon an mga detalye. An mga artikulong pag-aadalan sa Torrengbantayan asin an nagkapirang libro may inimprentang mga hapot. Mantang binabasa nindo an kada parapo, kapakipakinabang na markahan an mga simbag. Dawa mayo nin mga hapot sa pag-adal, puede pa man giraray nindong markahan an importanteng mga punto na boot nindong magirumdoman. Kun bago sa saindo an sarong ideya, tawan iyan nin kadikit na ekstrang panahon tanganing masierto na nasasabotan nindo iyan na marhay. Bantayan an mga ilustrasyon o pangangatanosan na magagamit nindo sa ministeryo sa langtad o ikaiiba sa nagdadangadang na pahayag na asignado sa saindo. Umisip nin espesipikong mga tawo na tibaad mapakokosog an pagtubod kun ipaaabot nindo sa sainda an saindong pinag-aadalan. Markahan an mga puntong gusto nindong gamiton, asin repasohon iyan pagkatapos kan saindong pag-adal.

Mantang ineestudyaran nindo an materyales, basahon an sitadong mga teksto. Analisaron kun paano an kada teksto konektado sa pangenot na punto kan parapo.

Tibaad may manuparan kamong mga punto na dai tolos nindo nasasabotan o gusto nindong siyasaton nin mas detalyado. Imbes na pabayaan iyan na makalingling sa saindo, inotar na tawan ini nin dagdag na pag-estudyar sa huri. Parate na nakaklaro an mga punto mantang binabasa nindo an materyales. Kun dai, puede kamong gumibo nin dagdag na pagsiyasat. Ano daw na mga bagay an puedeng inotar para sa siring na atension? Tibaad may kinotar na teksto na dai nindo nasasabotan nin malinaw. O tibaad dai nindo tolos nasasabotan kun paano iyan aplikado sa temang pinag-oolayan. Tibaad naniniwala kamo na nasasabotan nindo an sarong ideya sa materyales alagad bakong igo tanganing ikapaliwanag iyan sa iba. Imbes na basta na sana ini lihisan, tibaad madonong na iyan siyasaton pagkatapos nindo kan pinonan nindong adalan.

Kan isurat ni apostol Pablo an detalyado niang surat sa mga Kristianong Hebreo, nagpondo nguna sia sa kabangaan kaiyan tanganing sabihon: “Iyo ini an prinsipal na punto.” (Heb. 8:1) Tinatawan daw nindo nin pagirumdom na arog kaiyan an saindong sadiri kun minsan? Estudyare kun taano ta ginibo iyan ni Pablo. Sa naeenot na mga kapitulo kan saiyang ipinasabong na surat, tapos na niang sabihon na si Cristo bilang dakulang Halangkaw na Saserdote nin Dios luminaog sa langit mismo. (Heb. 4:14⁠–5:10; 6:20) Pero, paagi sa pagsiblag kaiyan sa iba asin pagdodoon kan prinsipal na puntong iyan sa kapinonan kan kapitulo 8, inandam ni Pablo an isip kan mga nagbabasa kan surat nia na isipon nin hararom kun paano iyan konektado sa saindang buhay. Sinabi nia na si Cristo tuminindog sa atubangan nin Dios para sa sainda asin binuksan an dalan na sinda mismo makalaog sa “banal na lugar” na iyan sa langit. (Heb. 9:24; 10:19-22) An kasiertohan kan saindang paglaom makatatabang na mapahiro sinda na iaplikar an dagdag pang hatol na yaon sa surat na ini mapadapit sa pagtubod, pakatagal, asin Kristianong gawe-gawe. Siring man, kun kita nag-aadal, an pagsentro kan atension sa prinsipal na mga punto makatatabang sa sato na mamansayan an pagkabilog kan pinakatema asin itutudok sa satong isip an marahay na mga dahelan na gumawe oyon dian.

Pahihiroon daw kamo kan saindong personal na pag-adal? Ini hapot na mahalagang marhay. Kun may nanonodan kamo, ihapot sa sadiri: ‘Paano ini maninigong makaapektar sa sakong aktitud asin sa sakong mga pasohan sa buhay? Paano ko ikaaaplikar an impormasyon na ini sa pagresolber sa sarong problema, pagdedesisyon, o pakaabot sa sarong pasohan? Paano ko iyan magagamit sa sakong pamilya, sa ministeryo sa langtad, sa kongregasyon?’ Mapagngayongayong estudyaran an mga hapot na ini, na hinohorophorop an tunay na mga situwasyon na dian magagamit nindo an saindong kaaraman.

Pakatapos nin sarong kapitulo o artikulo, tawan nin panahon an halipot na repaso. Helingon kun baga magigirumdoman nindo an prinsipal na mga punto asin an nagsusuportar na mga argumento. An paaging ini makatatabang sa saindo na matandaan an impormasyon tanganing magamit sa ngapit.

Kun Ano an Pag-aadalan

Bilang banwaan ni Jehova, kadakol niatong pag-aadalan. Alagad saen daw kita maninigong pumoon? Aroaldaw, marahay na adalan niato an teksto asin komento sa Pagsiyasat sa Kasuratan Aroaldaw. Kada semana, nag-aatender kita sa mga pagtiripon kan kongregasyon, asin an pag-adal bilang pag-andam para digdi makatatabang sa sato na mas makinabang. Dugang pa digdi, an nagkapira madonong na nagtao nin panahon sa pag-adal sa nagkapira sa satong Kristianong mga publikasyon na inimprenta bago ninda nanodan an katotoohan. An iba minapili nin sarong kabtang kan saindang semanal na babasahon sa Biblia asin pinag-aadalan nin mas hararom an mga bersikulong iyan.

Ano kun dai itinotogot kan saindong kamugtakan na maingat na adalan an gabos na impormasyon na pag-oolayan sa semanal na mga pagtiripon kan kongregasyon? Likayan an natatagong mga peligro nin naghihidaling pagbasa kan materyales tangani sanang matapos iyan o, mas grabe pa, dai na logod pag-adal sa arin man dian ta dai nindo kayang adalan an gabos. Imbes, aramon kun gurano an kaya nindong adalan, asin gibohon iyan nin toltol. Gibohon iyan kada semana. Pag-abot nin panahon, hingoahon na dagdagan tanganing ikaiba an ibang pagtiripon.

“Pakosogon an Saimong Kairiba sa Harong”

Rinerekonoser ni Jehova na an mga payo nin pamilya dapat na maghigos tanganing masustentohan an saindang mga namomotan. “Andama an saimong gigibohon sa luwas,” sabi kan Talinhaga 24:27, “asin andama iyan para sa saimo sa oma.” Pero, dai puedeng lipasan an espirituwal na mga pangangaipo kan saindong pamilya. Huli kaini, nagpapadagos an bersikulo: “Pagkatapos dapat man na saimong pakosogon an saimong kasararo sa harong.” Paano ini magigibo nin mga payo nin pamilya? Sinasabi kan Talinhaga 24:3: “Paagi sa pakamansay [an kasararo sa harong] magigin masarig.”

Paano makikinabang sa pakamansay an saindong kasararo sa harong? An pakamansay iyo an abilidad kan isip na bako sanang an risang-risa an helingon. Masasabi nanggad na an epektibong pampamilyang pag-adal minapoon sa pag-adal sa mismong pamilya nindo. Kumusta an espirituwal na pag-oswag kan mga miembro kan saindong pamilya? Maingat na maghinanyog kun kamo nakikipag-olay sa sainda. May espiritu daw nin pagrereklamo o paghinanakit? Materyalistikong mga pinag-aaabot daw an importante? Kun kamo nasa ministeryo sa langtad kaiba an saindong mga aki, komportable daw sindang ipamidbid an saindang sadiri bilang Mga Saksi ni Jehova sa atubangan kan saindang mga kaedad? Ikinaoogma daw ninda an saindong programa nin pampamilyang pagbasa kan Biblia asin pag-adal? Talaga daw na ginigibo nindang dalan nin pamumuhay an dalan ni Jehova? Ihahayag nin maingat na pagmasid kun ano an kaipuhan na gibohon nindo, bilang payo nin pamilya, tangani na establisaron asin pakosogon an espirituwal na mga kualidad sa kada miembro nin pamilya.

Helingon an Torrengbantayan asin Awake! para sa mga artikulo na dapit sa espesipikong mga pangangaipo. Dangan sabihan an pamilya antes pa kun ano an pag-aadalan tangani na mapag-isip-isip ninda an impormasyon. Papagdanayon an mamomoton na kamugtakan sa palibot durante kan pag-adal. Dai man estriktong sinasagwe o sinusupog an siisay man na miembro nin pamilya, tawan nin pagdodoon an halaga kan pinag-oolayan na materyales, na may espesipikong aplikasyon sa mga pangangaipo kan saindong pamilya. Papagdanayon na kalabot an kada miembro. Tabangan an lambang saro na maheling kun paano an Tataramon ni Jehova “sangkap” sa pagtao kan eksaktong kaipuhan sa buhay.—Sal. 19:7.

Pag-ani kan mga Balos

An mapagmasid na mga tawo na mayo nin espirituwal na pakasabot puedeng adalan an uniberso, an mga nangyayari sa kinaban, asin pati an saindang sadiri alagad dai masabotan an tunay na kahulogan kan saindang naheheling. Sa ibong na lado, sa tabang kan espiritu nin Dios, an mga tawo na regular na nag-aadal kan Tataramon nin Dios puedeng mamansayan sa mga bagay na ini an ginibo nin Dios, an kaotoban kan hula sa Biblia, asin an pagkahayag kan katuyohan nin Dios sa pagbendisyon sa makinuyog na mga tawo.—Mar. 13:4-29; Roma 1:20; Kap. 12:12.

Dawa gurano iyan kamakangangalas, dai iyan maninigong magin dahelan na kita magin mapalangkaw. Imbes, an pagsiyasat kan Tataramon nin Dios aroaldaw nakatatabang sa sato na magdanay na mapakumbaba. (Deut. 17:18-20) Nagpoprotehir man iyan sa sato sa “mapandayang kapangyarihan nin kasalan” ta kun buhay sa satong puso an Tataramon nin Dios, mas kadikit an posibilidad na madaog kan pan-akit nin kasalan an determinasyon niato na labanan iyan. (Heb. 2:1; 3:13; Col. 3:5-10) Sa siring, kita ‘malakaw na angay ki Jehova sa katuyohan na lubos na makapaogma sa saiya mantang kita padagos na namumunga sa lambang marahay na gibo.’ (Col. 1:10) An paggibo nin siring iyo an satong obheto sa pag-adal kan Tataramon nin Dios, asin an pakagibo kaiyan iyo an kadarudakulaing balos.