na bagong mga kahagadan na tibaad ihayag ni Jehova durante kan sangribong taon. Sa siring, an mga indibiduwal hohokoman basado sa gigibohon ninda durante kan Aldaw nin Paghokom.

An Aldaw nin Paghokom matao sa binilyon na tawo kan primerong oportunidad ninda na makanood manongod sa kabotan nin Dios asin sumunod dian. Nangangahulogan ini na magkakaigwa nin pagtotokdo na mahiwason an sakop. Tunay na “an katanosan iyo nanggad an manonodan kan mga nag-eerok sa mabungang daga.” (Isaias 26:9) Minsan siring, dai gugustohon kan gabos na sumunod sa kabotan nin Dios. An Isaias 26:10 nagsasabi: “Minsan pa pahelingan nin marahay na boot an sarong maraot, dai nanggad sia makakanood nin katanosan. Sa daga nin katanosan sia magibo nin bakong makatanosan asin dai makakaheling kan kalangkawan ni Jehova.” An mga maraot na ini gagadanon nin permanente durante kan Aldaw nin Paghokom.​—Isaias 65:20.

Sa katapusan kan Aldaw nin Paghokom, an mga makakaligtas ‘mabubuhay’ na nin lubos bilang mga tawong sangkap. (Kapahayagan 20:5) Sa siring, sa Aldaw nin Paghokom an katawohan ibabalik sa orihinal na sangkap na kamugtakan kaini. (1 Corinto 15:24-28) Dangan magkakaigwa nin pangultimong pagbalo. Si Satanas bubutasan sa saiyang pagkabilanggo asin totogotan na probaran na dayaon an katawohan nin saro na sanang beses. (Kapahayagan 20:3, 7-10) Makakamtan kan mga makontra sa saiya an lubos na kaotoban kan panuga kan Biblia: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Iyo, an Aldaw nin Paghokom magigin sarong bendisyon sa gabos na maimbod na katawohan!

MGA 40 taon antes pa, ibinalangibog kan mga estudyante sa Biblia na magkakaigwa nin makahulogan na mga pangyayari kan 1914. Anong mga pangyayari ini, asin anong ebidensia an nagtotokdo sa 1914 bilang mahalaga nanggad na taon?

Siring kan nakasurat sa Lucas 21:24, si Jesus nagsabi: “An Jerusalem babatayan kan mga nasyon, sagkod na maotob an itinalaan na mga panahon kan mga nasyon [“an mga panahon kan mga Hentil,” King James Version].” An Jerusalem nagin an kabiserang siudad kan Judiong nasyon​—an pinakasentro kan pamamahala kan linya nin mga hade na gikan sa dinastiya ni Hadeng David. (Salmo 48:1, 2) Minsan siring, an mga hadeng ini daing kapareho sa tahaw kan mga namomoon sa mga nasyon. Sinda nagtukaw sa “trono ni Jehova” bilang mga representante nin Dios mismo. (1 Cronica 29:23) Sa siring, an Jerusalem nagin simbolo kan pamamahala ni Jehova.

Pero, paano asin kasuarin nagpoon na ‘batayan kan mga nasyon’ an pamamahala nin Dios? Nangyari ini kan 607 B.C.E. kan an Jerusalem sakopon kan mga Babilonyo. An “trono ni Jehova” nabakante, asin naputol an linya nin mga hade na naggikan ki David. (2 Hade 25:1-26) Magpapadagos daw sagkod lamang an ‘pagbatay’ na ini? Dai, huling an hula ni Ezequiel nagsabi mapadapit sa ultimong hade kan Jerusalem, si Zedequias: “Halea an turbante, asin tangkasa an korona. . . . Dai nanggad iyan magigin sadiri nin siisay man sagkod na magdatong sia na igwa kan legal na katanosan, asin iyan itatao ko sa saiya.” (Ezequiel 21:26, 27) Si Cristo Jesus an may “legal na katanosan” sa korona ni David. (Lucas 1:32, 33) Kaya an ‘pagbatay’ matatapos kun magin Hade na si Jesus.

Noarin mangyayari an mahalagang pangyayaring iyan? Ipinaheling ni Jesus na an mga Hentil mamamahala sa laog nin sarong pihong peryodo nin panahon. An salaysay sa Daniel kapitulo 4 an pinakaliabe tanganing makuenta kun gurano kalawig an peryodong iyan. Isinasaysay kaiyan an makahulang pangatorogan ni Hadeng Nabucodonosor nin Babilonya. Naheling nia an sarong grabe kadakulang kahoy na pinalod. An pungo kaiyan dai makatubo huli ta iyan ginakodan nin batbat asin tanso. An sarong anghel nagpahayag: “Palihison dian an pitong panahon.”​—Daniel 4:10-16.

Sa Biblia, an mga kahoy kun beses ginagamit tanganing magrepresentar sa pamamahala. (Ezequiel 17:22-24; 31:2-5) Kaya an pagpalod sa simbolikong kahoy nagrerepresentar sa kun paano puputolon an pamamahala nin Dios, na irinerepresentar kan mga hade sa Jerusalem. Minsan siring, ipinapaisi kan bisyon na an ‘pagbatay na ini sa Jerusalem’ temporaryo​—sa laog kan peryodo nin “pitong panahon.” Gurano kalawig an peryodong iyan?

Sinasabi kan Kapahayagan 12:6, 14 na an katimbang kan tolo may kabangang panahon “sangribo may duwang gatos may anom na polong aldaw.” Kun siring, an “pitong panahon” doble kaiyan an lawig, o 2,520 aldaw. Alagad an mga nasyon na Hentil dai nagpondo sa ‘pagbatay’ sa pamamahala nin Dios 2,520 aldaw sana pakatapos na bumagsak an Jerusalem. Kun siring, minalataw na mas halawig pa nanggad na peryodo nin panahon an sakop kan hulang ini. Kun ibabasar sa Bilang 14:34 asin Ezequiel 4:6, na nagtataram manongod sa “sarong aldaw para sa sarong taon,” an “pitong panahon” malawig nin 2,520 taon.

An 2,520 taon nagpoon kan Oktubre 607 B.C.E., kan an Jerusalem buminagsak sa kamot kan mga Babilonyo asin an hade na naggikan sa dinastiya ni David hinale sa saiyang trono. Natapos an peryodong iyan kan Oktubre 1914. Kan panahon na iyan, natapos “an itinalaan na mga panahon kan mga nasyon,” asin si Jesu-Cristo pinatukaw bilang langitnon na Hade nin Dios.a​—Salmo 2:1-6; Daniel 7:13, 14.

Siring kan ihinula ni Jesus, an saiyang “presensia” bilang langitnon na Hade tinandaan nin nakakaapod nin atension na mga pangyayari sa kinaban​—guerra, tiggutom, mga linog, mga peste. (Mateo 24:3-8; Lucas 21:11) An siring na mga pangyayari nagtatao nin mapuersang patotoo na tunay nanggad na namundag an langitnon na Kahadean nin Dios asin nagpoon an “huring mga aldaw” kan presenteng maraot na sistemang ini nin mga bagay kan 1914.​—2 Timoteo 3:1-5.

DAI parateng nasasambitan sa Biblia an espiritung linalang na inaapod na Miguel. Minsan siring, kun sia nasasambitan, sia may ginigibo. Sa libro nin Daniel, si Miguel nakikilaban sa maraot na mga anghel; sa surat ni Judas, sia nakikidiskutiran ki Satanas; asin sa Kapahayagan, sia nakikiguerra sa Diablo asin sa mga demonyo kaini. Paagi sa pagsurog sa pamamahala ni Jehova asin pakikilaban sa mga kaiwal nin Dios, pinapatunayan ni Miguel na angay sa saiya an kahulogan kan saiyang ngaran​—“Siisay an Arog nin Dios?” Alagad siisay si Miguel?

Kun beses, may mga indibiduwal na bako sanang sa sarong ngaran midbid. Halimbawa, an patriarkang si Jacob midbid man bilang Israel, asin si apostol Pedro, bilang Simon. (Genesis 49:1, 2; Mateo 10:2) Kaagid kaiyan, ipinaparisa kan Biblia na an Miguel ibang ngaran ni Jesu-Cristo, bago asin pakatapos kan saiyang buhay digdi sa daga. Estudyaran niato an mga dahelan na sono sa Kasuratan para sa konklusyon na iyan.

Arkanghel. Si Miguel inaapod kan Tataramon nin Dios na “arkanghel.” (Judas 9) An terminong ini nangangahulogan nin “poon na anghel.” An terminong “arkanghel” minalataw sana sa Biblia sa singular, nungkang sa plural. Isinusuherir kaini na saro sana an siring na anghel. Dugang pa, si Jesus ikinonektar sa katongdan nin arkanghel. Mapadapit sa binuhay liwat na Kagurangnan na Jesu-Cristo, an 1 Tesalonica 4:16 nagsasabi: “An Kagurangnan mismo mahilig hale sa langit na may tingog na nagboboot, may tingog nin arkanghel.” Sa siring an tingog ni Jesus ilinaladawan bilang tingog