Ipinaliwanag mismo nin Dios an kahulogan kan saiyang ngaran sa saiyang maimbod na lingkod na si Moises. Kan si Moises maghapot manongod sa ngaran nin Dios, si Jehova nagsimbag: “Ako magigin ano man na gusto kong Ako magin.” (Exodo 3:14) An traduksion ni Rotherham trinadusir an mga tataramon na ini na: “Ako Magigin siring sa ano man na boot ko.” Kaya si Jehova puedeng magin ano man na kaipuhan tanganing otobon an saiyang mga katuyohan.

Ipamugtak ta baga na puede kamong magin ano man na gusto nindong magin. Ano an gigibohon nindo para sa saindong mga katood? Kun an saro sa sainda magkahelang nin grabe, puede kamong magin ekspertong doktor asin parahayon sia nindo. Kun an saro pa malugi sa pinansial, puede kamong magin mayaman na paratabang asin sukorohan sia nindo. Pero an totoo, limitado kamo sa kakayahan na magin ano man na gustohon nindo. Totoo iyan sa sato gabos. Mientras na pinag-aadalan nindo an Biblia, mapapangalas kamong maheling kun paano si Jehova nagigin ano man na kaipuhan tanganing otobon an saiyang mga panuga. Asin ikinakaogma niang gamiton an saiyang kapangyarihan para sa mga namomoot sa saiya. (2 Cronica 16:9) An magayon na mga aspektong ini kan personalidad ni Jehova dai naririsa kan mga dai nakakaaram kan saiyang ngaran.

Malinaw nanggad, an ngaran na Jehova maninigong gamiton sa Biblia. An pakaaram kan kahulogan kaiyan asin paggamit kaiyan nin suelto sa satong pagsamba mapuersang mga pantabang tanganing orog kitang maparani sa satong langitnon na Ama, si Jehova.a

SI PROPETA Daniel nabuhay labing 500 na taon bago namundag si Jesus. Minsan siring, ihinayag ni Jehova ki Daniel an impormasyon na mapangyaring maaraman nin eksakto an panahon na si Jesus lalahidan nin banal na espiritu, o nonombrahan, bilang an Mesiyas, o Cristo. Si Daniel sinabihan: “Aramon mo asin magkaigwa ka nin pakarorop na poon sa pagluwas kan pagboot na ibalik sa dati asin itogdok liwat an Jerusalem sagkod sa Mesiyas na Poon, magkakaigwa nin pitong semana, saka anom na polo may duwang semana.”​—Daniel 9:25.

Tanganing madeterminaran an panahon kan pagdatong kan Mesiyas, kaipuhan nguna niatong maaraman kun saen mapoon an peryodo na masagkod sa Mesiyas. Segun sa hula, iyan “poon sa pagluwas kan pagboot na ibalik sa dati asin itogdok liwat an Jerusalem.” Kasuarin nangyari an “pagluwas kan pagboot” na ini? Segun sa kagsurat kan Biblia na si Nehemias, nagluwas an pagboot na itogdok liwat an mga lanob sa palibot kan Jerusalem “kan ikaduwang polong taon ni Artajerjes na hade.” (Nehemias 2:1, 5-8) Pinapatunayan kan mga historyador na an taon 474 B.C.E. iyo an enot na bilog na taon ni Artajerjes bilang namamahala. Kun siring, an ika-20 taon kan saiyang pamamahala 455 B.C.E. Ngonyan may magagamit na kitang kapinonan para sa Mesiyanikong hula ni Daniel, an boot sabihon, an 455 B.C.E.

Sinabi ni Daniel kun gurano kalawig an panahon na minasagkod sa pagdatong kan “Mesiyas na Poon.” Nasambitan kan hula an “pitong semana, saka anom na polo may duwang semana”​—may total na 69 semana. Gurano kalawig an peryodong ini nin panahon? Nagkomento an nagkapirang traduksion kan Biblia na bako ining mga semana nin pitong aldaw kundi mga semana nin mga taon. An boot sabihon, an kada semana nagrerepresentar sa pitong taon. An ideyang ini nin mga semana nin mga taon, o mga yunit na tigpipitong taon, pamilyar sa mga Judio kan suanoy na mga panahon. Halimbawa, sineselebrar ninda an taon nin Sabbath kada ikapitong taon. (Exodo 23:10, 11) Kun siring, an makahulang 69 semana bale 69 yunit na 7 taon an kada saro, o may total na 483 na taon.

Ngonyan an gigibohon ta na sana magbilang. Kun kita mabilang nin 483 na taon poon 455 B.C.E., makakaabot kita sa taon 29 C.E. Iyan an eksaktong taon na si Jesus binautismohan asin nagin an Mesiyas!a (Lucas 3:1, 2, 21, 22) Bako daw na iyan sarong pambihirang kaotoban kan hula sa Biblia?

TANGANING matabangan kitang mamidbid an Mesiyas, pinasabngan ni Jehova Dios an dakol na propeta sa Biblia na magtao nin mga detalye manongod sa pagkamundag, ministeryo, asin kagadanan kan ipinanugang Paraligtas na ini. An gabos na hulang ini sa Biblia naotob ki Jesu-Cristo. Iyan daing kasalasala asin detalyado sa makangangalas na paagi. Sa pag-ilustrar kaini, estudyaran niato an nagkapirang hula na nagsabi bago pa kan mga pangyayari na konektado sa pagkamundag asin pagkaniaki kan Mesiyas.

Ihinula ni propeta Isaias na an Mesiyas magigin gikan ni Hadeng David. (Isaias 9:7) Si Jesus namundag nanggad sa linahe ni David.​—Mateo 1:1, 6-17.

Si Miqueas, na saro pang propeta nin Dios, naghula na an aking ini sa katapustapusi magigin namamahala asin na sia mamumundag sa “Betlehem Efrata.” (Miqueas 5:2) Kan panahon na mamundag si Jesus, may duwang banwaan sa Israel na inaapod na Betlehem. An saro harani sa Nazaret sa amihanan na rehion kan nasyon, asin an saro pa, harani sa Jerusalem sa Juda. An Betlehem na harani sa Jerusalem inaapod kaidto na Efrata. Si Jesus namundag sa banwaan na iyan, eksakto nanggad siring kan sinabi sa hula!​—Mateo 2:1.

An saro pang hula sa Biblia nagsasabi na an Aki nin Dios aapodon “hale sa Egipto.” An aking si Jesus dinara sa Egipto. Sia ibinalik pagkagadan ni Herodes, sa siring inootob an hula.​—Oseas 11:1; Mateo 2:15.

Sa tsart na may titulong “Mga Hula Mapadapit sa Mesiyas,” an mga teksto na nakalista sa irarom kan titulong “Hula” igwa kan mga detalye may labot sa Mesiyas. Ikomparar tabi ini sa mga teksto na nakalista sa irarom kan titulong “Kaotoban.” An paggibo kaiyan orog pang mapakosog kan saindong pagtubod sa pagigin totoo kan Tataramon nin Dios.

Mientras na sinisiyasat nindo an mga tekstong ini, girumdomon na an makahulang mga kabtang kaiyan isinurat ginatos na taon bago namundag si Jesus. Si Jesus nagsabi: “An gabos na isinurat sa ley ni Moises asin sa Mga Propeta asin Mga Salmo manongod sa sako kaipuhan na maotob.” (Lucas 24:44) Siring kan mabeberipikar nindo sa saindong sadiring kopya kan Biblia, naotob nanggad an mga iyan​—sa gabos na detalye!

AN MGA naniniwala sa katokdoan nin Trinidad nagsasabi na an Dios kompuesto nin tolong persona​—an Ama, an Aki, asin an Banal na Espiritu. An balang saro sa tolong personang ini sinasabing kapantay kan iba, makakamhan sa gabos, asin mayo nin kapinonan. Kun siring, segun sa doktrina nin Trinidad, an Ama Dios, an Aki Dios, asin an Banal na Espiritu Dios, alagad ta saro sana an Dios.

Inaadmitir kan dakol na naniniwala sa Trinidad na dai ninda kayang ipaliwanag an katokdoan na ini. Pero, nagsasaboot sinda na itinotokdo iyan sa Biblia. Mahalagang mangnohon na an terminong