1. Ano an katuyohan nin Dios para sa daga?

MAKANGANGALAS nanggad an katuyohan nin Dios para sa daga. Gusto ni Jehova na mapano an daga nin mga tawong maogma asin marahay an salud. Sinasabi kan Biblia na an “Dios nagtanom nin hardin sa Eden” asin na ‘pinatubo nia an lambang kahoy na magayon na paghelingon asin masiram na kakanon.’ Pakatapos lalangon nin Dios an enot na lalaki asin babae, si Adan asin Eva, ibinugtak Nia sinda sa magayonon na istaran na iyan asin sinabihan sinda: “Pangagbunga asin pangagdakol kamo asin panoa nindo an daga patin sakopa nindo iyan.” (Genesis 1:28; 2:8, 9, 15) Kaya katuyohan nin Dios na an mga tawo magkaigwa nin mga aki, palakopon sa bilog na daga an hardin na erokan na iyan, asin atamanon an mga hayop.

2. (a) Paano niato naaaraman na maootob an katuyohan nin Dios para sa daga? (b) Ano an sinasabi kan Biblia manongod sa bagay na an mga tawo mabubuhay sagkod lamang?

² Sa paghona daw nindo maootob pa an katuyohan ni Jehova Dios na an mga tawo mabuhay sa sarong paraisong daga? “Itinaram ko iyan,” an ipinahayag nin Dios, “gigibohon ko man iyan.” (Isaias 46:9-11; 55:11) Iyo, an katuyohan nin Dios siertong gigibohon nia! Sia nagsasabi na ‘dai nia linalang an daga na dai nin kapakanan’ kundi ‘hinaman iyan tanganing pag-istaran.’ (Isaias 45:18) Anong klaseng mga tawo an gusto nin Dios na paistaron sa daga? Asin gurano kalawig na gusto nia sindang mabuhay digdi? An Biblia minasimbag: “An mga matanos mismo magmamana kan daga, asin sinda mag-eerok dian sagkod lamang.”​—Salmo 37:29; Kapahayagan 21:3, 4.

3. Ano an makamomondong mga kamugtakan sa daga ngonyan, asin anong mga hapot an pinapalataw kaini?

³ Siempre pa, dai pa ini nangyari. An mga tawo ngonyan nagkakahelang asin nagagadan; sinda nagraralabanlaban asin naggagaradanan pa ngani. Nagkaigwa nin problema. Minsan siring, daing duwa-duwa na bakong katuyohan nin Dios na an daga magin siring kan naheheling niato ngonyan! Ano an nangyari? Taano ta dai naotob an katuyohan nin Dios? Mayo nin libro sa kasaysayan na isinurat nin tawo na makakapagsabi sa sato huli ta an problema nagpoon duman sa langit.

AN GINIKANAN NIN SARONG KAIWAL

4, 5. (a) Siisay talaga an nakipag-olay ki Eva paagi sa sarong halas? (b) Paano tibaad magin parahabon an saro na dating disente, onestong tawo?

⁴ An enot na libro kan Biblia nagsasabi na may sarong paratumang sa Dios na naglataw sa hardin nin Eden. Ilinadawan sia bilang “an halas,” alagad bako siang ordinaryong hayop. Sinasabi kan ultimong libro kan Biblia na sia “an inaapod Diablo asin Satanas, na ilinalagalag an bilog na ineerokan na daga.” Inapod man sia na “an enot na halas.” (Genesis 3:1; Kapahayagan 12:9) Ginamit kan makapangyarihan na anghel na ini, o dai naheheling na espiritung linalang, an sarong halas tanganing magtaram ki Eva, kun paanong an sarong ekspertong tawo kayang paluwason na an saiyang tingog garo baga naggigikan sa sarong kaharaning munyeka. An espiritung personang iyan daing duwa-duwa na yaon kan inaandam nin Dios an daga para sa mga tawo.​—Job 38:4, 7.

⁵ Minsan siring, huling sangkap an gabos na linalang ni Jehova, siisay an naggibo kan “Diablo,” kan “Satanas” na ini? Sa simpleng pagtaram, an saro sa makapangyarihan na espiritung mga aki nin Dios ginibo an saiyang sadiri na magin an Diablo. Paano ini nagin posible? Bueno, ngonyan an sarong tawo na dating disente asin onesto tibaad magin parahabon. Paano iyan nangyayari? Tibaad togotan kan tawong iyan na tumalubo sa saiyang puso an salang pagmawot. Kun padagos niang pinagpaparaisip-isip iyan, an salang pagmawot na iyan tibaad magin makosogon. Dangan kun magkaigwa nin oportunidad, tibaad humiro sia kaoyon kan maraot na pagmawot na pinagpaparaisip-isip nia.​—Santiago 1:13-15.

6. Paano nagin Satanas na Diablo an sarong makapangyarihan na espiritung aki nin Dios?

⁶ Nangyari ini ki Satanas na Diablo. Minalataw na nadangog nia na sinabihan nin Dios si Adan asin Eva na magkaigwa nin mga aki asin panoon an daga kan saindang mga aki. (Genesis 1:​27, 28) ‘Tara, an gabos na tawong ini puedeng sumamba sako imbes na sa Dios!’ an minalataw na inisip ni Satanas. Kaya nagtalubo sa saiyang puso an salang pagmawot. Pag-abot nin panahon, huminiro sia tanganing dayaon si Eva paagi sa pagsabi sa saiya nin mga kaputikan manongod sa Dios. (Genesis 3:1-5) Sa siring sia nagin sarong “Diablo,” na nangangahulogan “Parabalobagi.” Kadungan kaini, sia nagin “Satanas,” na nangangahulogan “Paratumang.”

7. (a) Taano ta nagadan si Adan asin Eva? (b) Taano ta naggugurang asin nagagadan an gabos na aki ni Adan?

⁷ Paagi sa paggamit nin mga kaputikan asin panloloko, pinangyari ni Satanas na Diablo na makisuway si Adan asin Eva sa Dios. (Genesis 2:17; 3:6) Bilang resulta, sa kahurihurihi sinda nagadan, siring kan sinabi nin Dios na mangyayari sa sainda kun sinda makisuway. (Genesis 3:17-19) Huling nawara ni Adan an pagkasangkap kan sia magkasala, an gabos niang aki nagmana sa saiya nin kasalan. (Roma 5:12) An situwasyon puedeng ipaghalimbawa sa sarong hormahan na ginagamit sa pagluto nin tinapay. Kun an hormahan may rukmi, ano an mangyayari sa kada tinapay na linuto sa hormahan? An lambang tinapay magkakaigwa nin rukmi, o pagkabakong sangkap. Kaagid kaiyan, an lambang tawo nagmana nin “rukmi” na pagkabakong sangkap ki Adan. Iyan an dahelan kun taano ta naggugurang asin nagagadan an gabos na tawo.​—Roma 3:23.

8, 9. (a) Ano an minalataw na nagin angat ni Satanas? (b) Taano ta dai tolos linaglag nin Dios an mga rebelde?

⁸ Kan papagkasalaon ni Satanas si Adan asin Eva tumang sa Dios, an totoo pinapangenotan nia an sarong pagrebelde. Inaangat nia an paagi nin pamamahala ni Jehova. Garo man sana sinasabi ni Satanas: ‘An Dios bakong marahay na namamahala. Sia nagpuputik asin ipinapanguri nia an marahay na mga bagay sa saiyang mga sakop. Dai kaipuhan kan mga tawo na pamahalaan sinda nin Dios. Puede sindang magdesisyon para sa sainda man sana kun ano an marahay asin kun ano an maraot. Asin mas mapaparahay sinda sa irarom kan sakong pamamahala.’ Ano daw an gigibohon nin Dios sa siring na mapan-insultong angat? Naghohona an iba na maninigo kutanang ginadan na sana nin Dios an mga rebelde. Alagad masisimbag daw kaiyan an angat ni Satanas? Mapapatunayan daw kaiyan na tama an paagi nin pamamahala nin Dios?

⁹ An sangkap na pakamate nin hustisya ni Jehova dai nagtogot sa saiya na gadanon tolos-tolos an mga rebelde. Nagdesisyon sia na kaipuhan na palipason an panahon tanganing masimbag an angat ni Satanas sa nakakakontentong paagi asin tanganing patunayan na putikon an Diablo. Kaya nagdesisyon an Dios na totogotan nia an mga tawo na pamahalaan an saindang sadiri sa laog nin sarong peryodo nin panahon sa irarom kan impluwensia ni Satanas. Totokaron sa Kapitulo 11 kan librong ini kun taano ta ginibo iyan ni Jehova asin kun taano ta pinalihis nia an halawigon na panahon bago nia rinesolberan an mga isyung ini. Pero ngonyan marahay na horophoropon an manongod sa bagay na ini: Tama daw para ki Adan asin Eva na maniwala ki Satanas, na mayo lamang nin ginibong marahay para sa sainda? Tama daw para sa sainda na maniwala na si Jehova, na nagtao sa sainda kan gabos na yaon sa sainda, sarong maringis na putikon? Kun kamo ano an gigibohon nindo?

10. Paano nindo masusuportaran an lado ni Jehova bilang simbag sa angat ni Satanas?

¹⁰ Marahay na horophoropon an mga hapot na ini huli ta an lambang saro sa sato napapaatubang sa kaagid na mga isyu ngonyan. Iyo, may oportunidad kamong suportaran an lado ni Jehova bilang simbag sa angat ni Satanas. Puede nindong akoon si Jehova bilang Namamahala sa saindo asin tumabang sa pagpaheling na putikon si Satanas. (Salmo 73:28; Talinhaga 27:11) Makamomondo, pipira sana sa binilyon na tawo sa kinaban na ini an minapili kaiyan. Nagpapalataw ini nin mahalagang hapot, Itinotokdo daw talaga kan Biblia na si Satanas an namamahala sa kinaban na ini?

SIISAY AN NAMAMAHALA SA KINABAN NA INI?

11, 12. (a) Paano ihinahayag nin sarong sugot ki Jesus na si Satanas an namamahala sa kinaban na ini? (b) Ano pa an nagpapatunay na si Satanas an namamahala sa kinaban na ini?

¹¹ Si Jesus dai noarin man nagduda na si Satanas an namamahala sa kinaban na ini. Sarong beses ipinaheling ni Satanas ki Jesus sa milagrosong paagi “an gabos na kahadean kan kinaban asin an kamurawayan kan mga iyan.” Dangan nanuga si Satanas ki Jesus: “Ini gabos itatao ko sa saimo kun ika lumuhod asin gumibo nin sarong akto nin pagsamba sa sako.” (Mateo 4:​8, 9; Lucas 4:​5, 6) Isip-isipon ini. Magigin sugot daw an alok na iyan ki Jesus kun si Satanas bakong an namamahala sa mga kahadean na ini? Dai nagdehar si Jesus na ki Satanas an gabos na gobyernong ini sa kinaban. Sierto nanggad, ginibo kutana iyan ni Jesus kun si Satanas bakong an kapangyarihan sa likod kaiyan.

¹² Siempre, si Jehova an makakamhan sa gabos na Dios, an Kaglalang kan makangangalas na uniberso. (Kapahayagan 4:11) Pero, mayong sinasabi an Biblia na namamahala sa kinaban na ini magsalang si Jehova Dios o si Jesu-Cristo. Sa katunayan, espesipikong inapod ni Jesus si Satanas na “an namamahala sa kinaban na ini.” (Juan 12:31; 14:30; 16:11) Inaapod pa ngani kan Biblia si Satanas na Diablo na an “dios kan sistemang ini nin mga bagay.” (2 Corinto 4:3, 4) Mapadapit sa paratumang na ini, o Satanas, an Kristianong apostol na si Juan nagsurat: “An bilog na kinaban namumugtak sa kapangyarihan kan maraot.”​—1 Juan 5:19.

KUN PAANO HAHALEON AN KINABAN NI SATANAS

13. Taano ta kaipuhan an sarong bagong kinaban?

¹³ Sa kada minaaging taon, an kinaban orog na nagigin peligroso. Iyan pano nin nagraralabanlaban na mga hukbo, madayang mga politiko, mapagsaginsagin na mga namomoon sa relihion, asin mabangis na mga kriminal. An kinaban sa kabilogan dai na puedeng repormaron. Ihinahayag kan Biblia na harani na an panahon na hahaleon na nin Dios an maraot na kinaban durante kan saiyang ralaban nin Armagedon. An kinaban na ini sasalidahan nin sarong bagong kinaban na matanos.​—Kapahayagan 16:14-16.

14. Siisay an pinili nin Dios na magin Namamahala sa Saiyang Kahadean, asin paano ini ihinula?

¹⁴ Pinili ni Jehova Dios si Jesu-Cristo na magin Namamahala sa Saiyang langitnon na Kahadean, o gobyerno. Kaidto pa, ihinula kan Biblia: “Sa satuya namundag an sarong aki, sa satuya itinao an sarong aking lalaki: asin an gobyerno mamumugtak sa saiyang abaga: asin an saiyang ngaran aapodon na . . . Prinsipe nin Katoninongan. An pag-oswag kan saiyang gobyerno asin katoninongan dai matatapos.” (Isaias 9:6, 7, King James Version) Mapadapit sa gobyernong ini, tinokdoan ni Jesus an saiyang mga parasunod na mamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:10) Siring kan maheheling niato sa huri sa librong ini, hahaleon kan Kahadean nin Dios sa dai na mahahaloy an gabos na gobyerno sa kinaban na ini, asin iyan mismo an masalida sa gabos na gobyernong iyan. (Daniel 2:44) Dangan poponan kan Kahadean nin Dios an sarong daganon na paraiso.

HARANI NA AN SARONG BAGONG KINABAN!

15. Ano an “bagong daga”?

¹⁵ Inaasegurar kita kan Biblia: ‘Igwa nin bagong kalangitan asin sarong bagong daga na satong hinahalat segun sa panuga nin Dios, asin sa mga ini magdadanay an katanosan.’ (2 Pedro 3:13; Isaias 65:17) May beses na kun nagtataram an Biblia manongod sa “daga,” nangangahulogan iyan nin mga tawo na nag-eerok sa daga. (Genesis 11:1) Kaya an matanos na “bagong daga” sarong sosyedad nin mga tawo na nag-ako kan pag-oyon nin Dios.

16. Ano an sarong daing kaagid sa halaga na regalo hale sa Dios para sa mga inooyonan nia, asin ano an dapat niatong gibohon tanganing umako kaiyan?

¹⁶ Nanuga si Jesus na sa maabot na bagong kinaban, an mga inooyonan nin Dios maako kan regalong “buhay na daing katapusan.” (Marcos 10:30) Buksan tabi nindo an saindong Biblia sa Juan 3:16 asin 17:​3, asin basahon an sinabi ni Jesus na dapat niatong gibohon tanganing umako nin buhay na daing katapusan. Ngonyan estudyaran nindo gikan sa Biblia an mga bendisyon na makakamtan kan mga kualipikadong mag-ako kan makangangalas na regalong iyan na hale sa Dios sa maabot na daganon na Paraiso.

17, 18. Paano kita makakaseguro na magkakaigwa nin katoninongan asin katiwasayan sa gabos na lugar digdi sa daga?

¹⁷ An karatan, guerra, krimen, asin kadahasan mawawara na. “An maraot mawawara na . . . Alagad an mga mahoyo mismo makakasadiri kan daga.” (Salmo 37:​10, 11) Magkakaigwa nin katoninongan huli ta ‘papaontokon nin Dios an mga guerra sagkod sa kaporoporohi kan daga.’ (Salmo 46:9; Isaias 2:4) Dangan “an matanos mamumurak, asin an kadakolan nin katoninongan sagkod na mayo na nin bulan”​—asin an boot sabihon kaiyan sagkod lamang!​—Salmo 72:7.

¹⁸ An mga nagsasamba ki Jehova mamumuhay sa katiwasayan. Sagkod na an Dios kinukuyog kan mga Israelita kaidtong mga panahon kan Biblia, sinda namuhay sa katiwasayan. (Levitico 25:18, 19) Kanigoan karahay na kamtan an kaagid na katiwasayan sa Paraiso!​—Isaias 32:18; Miqueas 4:4.

19. Taano ta naaaraman niato na magigin abunda an kakanon sa bagong kinaban nin Dios?

¹⁹ Dai na magkakaigwa nin kakulangan nin kakanon. “Magkakaigwa nin abundang tipasi sa ibabaw kan daga,” an inawit kan salmista. “Maglilipwas sa alitoktok kan kabukidan.” (Salmo 72:16) Si Jehova Dios mabendisyon sa saiyang mga matanos, asin “an daga mismo magtatao kan bunga kaiyan.”​—Salmo 67:6.

20. Taano ta makakaseguro kita na magigin paraiso an bilog na daga?

²⁰ An bilog na daga magigin paraiso. Totogdokan nin magagayon na bagong harong asin gigibohon na hardin an daga na dating rinaot nin makasalan na mga tawo. (Isaias 65:21-24; Kapahayagan 11:18) Sa pag-agi nin panahon, an mga kabtang kan daga na napakarhay na malakop sagkod na an bilog na globo magin siring kagayon asin kamabunga kan hardin nin Eden. Asin an Dios dai noarin man masalto sa ‘pagbiklad nia kan saiyang kamot asin pagpanigo sa mawot nin lambang bagay na may buhay.’​—Salmo 145:16.

21. Ano an nagpapaheling na magkakaigwa nin katoninongan sa pag-oltanan nin mga tawo asin hayop?

²¹ Magkakaigwa nin katoninongan sa pag-oltanan nin mga tawo asin hayop. An mabangis asin magarong mga hayop iribang masabsab. Dai na katatakotan dawa kan sadit na aki an mga hayop na peligroso ngonyan.​—Isaias 11:6-9; 65:25.

22. Ano an mangyayari sa helang?

²² Mawawara na an helang. Bilang Namamahala sa langitnon na Kahadean nin Dios, magpapaomay si Jesus sa mas dakula nanggad na paagi kisa kaidtong yaon pa sia digdi sa daga. (Mateo 9:35; Marcos 1:40-42; Juan 5:5-9) Dangan “mayo nin nag-eerok na masabi: ‘Naghehelang ako.’”​—Isaias 33:24; 35:5, 6.

23. Taano ta magtatao nin kagayagayahan sa satong puso an pagkabuhay liwat?

²³ An nagadan na mga namomotan bubuhayon liwat na may esperansang dai na noarin man magadan. An gabos na nagtotorog sa kagadanan na nasa memorya nin Dios bubuhayon liwat. An totoo, “magkakaigwa nin pagkabuhay liwat an mga matanos sagkod an mga bakong matanos.”​—Gibo 24:15; Juan 5:28, 29.

24. Ano an saboot nindo manongod sa pag-erok sa Paraiso digdi sa daga?

²⁴ Kanigoan kamakangangalas na ngapit an naghahalat sa mga piniling makanood manongod sa satong Kaharohalangkaweng Kaglalang, si Jehova Dios, asin maglingkod sa saiya! An maabot na Paraiso sa daga an sinasabi ni Jesus kan pinanugaan nia an paragibo nin maraot na nagadan kaabay nia: “Ika makakaibahan ko sa Paraiso.” (Lucas 23:43) Mahalagang marhay na kita makanood nin orog pa manongod ki Jesu-Cristo, na paagi sa saiya gigibohon na posible an gabos na bendisyon na ini.

1. Anong bantog na pamibi an sisiyasaton niato ngonyan?

MINILYON na tawo sa bilog na kinaban an pamilyar sa pamibi na inaapod kan dakol na Ama Niamo, o Pamibi kan Kagurangnan. An duwang fraseng iyan nanonongod sa sarong bantog na pamibi na itinao ni Jesu-Cristo mismo bilang modelo. Iyan sarong makahulogan na marhay na pamibi, asin an pag-estudyar sa enot na tolong kahagadan dian makakatabang sa saindo na orog pang manodan an manongod sa kun ano man nanggad an itinotokdo kan Biblia.

2. Ano an tolo sa mga bagay na itinokdo ni Jesus na ipamibi kan saiyang mga disipulo?

² Sa kapinonan kan modelong pamibi na ini, tinokdoan ni Jesus an saiyang mga paradangog: “Kun siring mamibi kamo nin arog kaini: ‘Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an kabotan mo, kun paano sa langit, siring man sa daga.’” (Mateo 6:9-13) Ano an kahulogan kan tolong kahagadan na ini?

3. Ano an kaipuhan niatong maaraman manongod sa Kahadean nin Dios?

³ Dakol na kitang nanodan manongod sa ngaran nin Dios, an Jehova. Asin minsan paano natokar na niato an kabotan nin Dios​—kun ano na an nagibo nia asin gigibohon pa para sa katawohan. Pero, ano an pinapanongdan ni Jesus kan sinabihan nia kita na mamibi: “Dumatong logod an kahadean mo”? Ano an Kahadean nin Dios? Paanong an pagdatong kaiyan masantipikar kan ngaran nin Dios, o mapabanal kaiyan? Asin paanong an pagdatong kan Kahadean konektado sa paggibo kan kabotan nin Dios?

KUN ANO AN KAHADEAN NIN DIOS

4. Ano an Kahadean nin Dios, asin siisay an Hade kaiyan?

⁴ An Kahadean nin Dios sarong gobyerno na inestablisar ni Jehova Dios na may sarong Hade na pinili nin Dios. Siisay an Hade sa Kahadean nin Dios? Si Jesu-Cristo. Si Jesus bilang Hade mas dakula kisa gabos na namamahalang tawo asin inaapod na “an Hade kan mga namamahala bilang mga hade asin Kagurangnan kan mga namamahala bilang mga kagurangnan.” (1 Timoteo 6:15) May kapangyarihan sia na gumibo nin mas dakol nanggad na karahayan kisa siisay man na namamahalang tawo, dawa an pinakamarahay sa sainda.

5. Gikan saen mamamahala an Kahadean nin Dios, asin sa ano iyan mamamahala?

⁵ Gikan saen mamamahala an Kahadean nin Dios? Bueno, haen si Jesus? Siertong nagigirumdoman nindo na nanodan nindo na sia ginadan sa hariging pasakitan, dangan sia binuhay liwat. Dai nahaloy pakatapos kaiyan, sia nagsakat sa langit. (Gibo 2:33) Huli kaini, yaon duman an Kahadean nin Dios​—sa langit. Iyan an dahelan na inaapod iyan kan Biblia na “langitnon na kahadean.” (2 Timoteo 4:18) Minsan ngani an Kahadean nin Dios nasa langit, iyan mamamahala sa daga.​—Kapahayagan 11:15.

6, 7. Ano an nagpapangyaring magin marahayon na Hade si Jesus?

⁶ Ano an nagpapangyari na magin marahayon na Hade si Jesus? An sarong dahelan, dai sia noarin man magagadan. Sa pagkomparar ki Jesus sa mga hadeng tawo, inaapod sia kan Biblia na “an saro na solamenteng daing kagadanan, na nag-eerok sa dai maranihan na liwanag.” (1 Timoteo 6:16) Nangangahulogan ini na an gabos na ginigibong marahay ni Jesus magdadanay. Asin talagang magibo sia nin darakula asin mararahay na bagay.

⁷ Estudyaran nindo an hulang ini sa Biblia manongod ki Jesus: “Sa saiya matogdon an espiritu ni Jehova, an espiritu nin kadonongan asin nin pakasabot, an espiritu nin konseho asin nin pagkamakakamhan, an espiritu nin kaaraman asin nin takot ki Jehova; asin maoogma sia sa pagkatakot ki Jehova. Asin dai sia maghohokom oyon sa pakaheling sana kan saiyang mga mata, o magsasagwe oyon sana sa nadadangog kan saiyang mga talinga. Asin sa katanosan dapat niang hokoman an mga hamak, asin sa pagkatanos dapat siang magsagwe para sa mga mahoyo kan daga.” (Isaias 11:2-4) Ipinapaheling kan mga tataramon na iyan na si Jesus magigin matanos asin mapagmalasakit na Hade sa mga tawo sa daga. Gusto daw nindong magkaigwa nin siring kaiyan na namamahala?

8. Sairisay an mamamahala kaiba ni Jesus?

⁸ Uya an saro pang katotoohan manongod sa Kahadean nin Dios: si Jesus dai mamamahala nin solo. Magkakaigwa sia nin kaibang mga namamahala. Halimbawa, sinabihan ni apostol Pablo si Timoteo: “Kun padagos kitang magtagal, kita man iribang mamamahala bilang mga hade.” (2 Timoteo 2:12) Iyo, si Pablo, Timoteo, asin iba pang maimbod na pinili nin Dios mamamahalang kaiba ni Jesus sa langitnon na Kahadean. Pira an magkakaigwa kan siring na pribilehio?

9. Pira an mamamahala kaiba ni Jesus, asin kasuarin pinonan nin Dios na pilion sinda?

⁹ Siring kan sinabi sa Kapitulo 7 kan librong ini, si apostol Juan tinawan nin bisyon na dian naheling nia na “an Kordero [si Jesu-Cristo] nagtitindog sa Bukid nin Sion [an saiyang sa hadeng posisyon sa langit], asin sa kaibanan nia an sanggatos may apat na polo may apat na ribo na igwa kan saiyang ngaran asin kan ngaran kan saiyang Ama na nasusurat sa saindang angog.” Sairisay an 144,000 na idto? Si Juan mismo nagsasabi sato: “An mga ini iyo an padagos na nagsusunod sa Kordero minsan sia magsaen. An mga ini binakal hale sa katawohan bilang enot na mga bunga sa Dios asin sa Kordero.” (Kapahayagan 14:1, 4) Iyo, sinda maimbod na mga parasunod ni Jesu-Cristo na espesyalmenteng pinili na mamahala sa langit kaiba nia. Pakatapos na ibangon hale sa kagadanan pasiring sa langitnon na buhay, “sinda mamamahala bilang mga hade sa daga” kaiba ni Jesus. (Kapahayagan 5:10) Poon kan kaaldawan kan mga apostol, nagpipili an Dios nin maimbod na mga Kristiano tanganing makompleto an kabilangan na 144,000.

10. Taano ta sarong mamomoton na areglo na si Jesus asin an 144,000 mamahala sa katawohan?

¹⁰ Mamomoton nanggad an ginibong areglo na si Jesus asin an 144,000 mamahala sa katawohan. Enot, aram ni Jesus kun paano an magin tawo asin magdusa. Sinabi ni Pablo na si Jesus “bakong saro na dai makakapakidamay sa satong mga kaluyahan, kundi saro na nabalo na sa gabos na bagay arog niato, alagad dai nin kasalan.” (Hebreo 4:15; 5:8) An saiyang kairibang namamahala nagdusa asin nagtagal man bilang mga tawo. Dugang pa, sinda nakipagtusayan sa pagkabakong sangkap asin nagtagal nin gabos na klase nin helang. Segurado nanggad, masasabotan ninda an mga problema na inaatubang nin mga tawo!

ANO AN GIGIBOHON KAN KAHADEAN NIN DIOS?

11. Taano ta sinabi ni Jesus na maninigong mamibi an saiyang mga disipulo na gibohon logod an kabotan nin Dios sa langit?

¹¹ Kan sabihon ni Jesus na maninigong mamibi an saiyang mga disipulo na dumatong logod an Kahadean nin Dios, sinabi man nia na maninigo sindang mamibi na gibohon logod an kabotan nin Dios “kun paano sa langit, siring man sa daga.” An Dios nasa langit, asin an saiyang kabotan pirmeng ginigibo duman kan maimbod na mga anghel. Minsan siring, sa Kapitulo 3 kan librong ini, nanodan niato na sarong maraot na anghel an nagpondo sa paggibo kan kabotan nin Dios asin pinapagkasala si Adan asin Eva. Sa Kapitulo 10, orog pa niatong manonodan an manongod sa itinotokdo kan Biblia mapadapit sa maraot na anghel na iyan, na midbid niato bilang si Satanas na Diablo. Si Satanas asin an espiritung mga linalang na anghel na piniling sumunod sa saiya​—na inapod na mga demonyo—​tinogotan na magdanay sa langit nin dikit na panahon. Huli kaini, bakong gabos na nasa langit kaidto naggigibo kan kabotan nin Dios. Maliliwat iyan kun an Kahadean nin Dios magpoon nang mamahala. An bagong patukawon sa trono na Hade, si Jesu-Cristo, makikiguerra ki Satanas.​—Kapahayagan 12:7-9.

12. Anong duwang mahalagang pangyayari an ilinaladawan sa Kapahayagan 12:10?

¹² Ilinaladawan kan minasunod na makahulang mga tataramon kun ano an mangyayari: “Nadangog ko an makosog na tingog sa langit na nagsabi: ‘Nangyari na an kaligtasan asin an kapangyarihan patin an kahadean kan satong Dios asin an autoridad kan saiyang Cristo, huli ta ihinulog na an parasumbong sa satong mga tugang [si Satanas], na nagsusumbong sa sainda aldaw asin banggi sa atubangan kan satong Dios!’” (Kapahayagan 12:10) Narisa daw nindo an duwang mahalagang marhay na pangyayari na ilinadawan sa bersikulong iyan kan Biblia? Enot, an Kahadean nin Dios na pinapamahalaan ni Jesu-Cristo nagpopoon nang mamahala. Ikaduwa, si Satanas pinalayas sa langit asin ihinulog sa daga.

13. Ano an nagin resulta kan pagpalayas ki Satanas sa langit?

¹³ Ano an nagin mga resulta kan duwang pangyayaring idto? Mapadapit sa nangyari sa langit, mababasa niato: “Huli kaini mag-ogma, kamo kalangitan asin kamo na nag-eerok dian!” (Kapahayagan 12:12) Iyo, an maimbod na mga anghel sa langit naggagayagaya huli ta, mantang mayo na si Satanas asin an saiyang mga demonyo, an gabos na nasa langit maimbod na ki Jehova Dios. Igwa nin lubos, nagpapadagos na katoninongan asin armoniya duman. An kabotan nin Dios ginigibo sa langit.

14. Ano an nangyari huling si Satanas ihinulog na sa daga?

¹⁴ Pero kumusta man an daga? An Biblia nagsasabi: “Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.” (Kapahayagan 12:12) Si Satanas anggot huli sa pagpalayas sa saiya sa langit asin sa natatadang halipot na sanang panahon nia. Huli sa saiyang kaanggotan nagtatao sia nin grabeng sakit sa daga. Manonodan niato nin orog pa an manongod sa grabeng sakit na iyan sa sunod na kapitulo. Alagad nasa isip iyan, puede niatong ihapot, Paano papangyayarihon kan Kahadean na an kabotan nin Dios gibohon sa daga?

15. Ano an kabotan nin Dios para sa daga?

¹⁵ Bueno, girumdomon kun ano an kabotan nin Dios para sa daga. Nanodan nindo iyan sa Kapitulo 3. Sa Eden, ipinaheling nin Dios na kabotan nia na an daga na ini magin paraiso na pano nin dai nagagadan, matanos na rasa nin tawo. Pinapagkasala ni Satanas si Adan asin Eva, asin naapektaran kaiyan an kaotoban kan kabotan nin Dios para sa daga alagad dai iyan nabago kaiyan. Katuyohan pa man giraray ni Jehova na “an mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Asin gigibohon iyan kan Kahadean nin Dios. Sa anong paagi?

16, 17. Ano an sinasabi sato kan Daniel 2:44 manongod sa Kahadean nin Dios?

¹⁶ Estudyaran nindo an hula na yaon sa Daniel 2:44. Mababasa niato dian: “Sa mga aldaw kan mga hadeng idto an Dios nin kalangitan mapatindog nin sarong kahadean na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.” Ano an sinasabi kaini sato manongod sa Kahadean nin Dios?

¹⁷ Enot, sinasabi kaiyan sato na an Kahadean nin Dios eestablisaron “sa mga aldaw kan mga hadeng idto,” o mantang nag-eeksister pa an ibang mga kahadean. Ikaduwa, sinasabi kaiyan sato na an Kahadean magdadanay sagkod lamang. Iyan dai masasakop asin masasalidahan nin ibang gobyerno. Ikatolo, naheheling niato na maggeguerra an Kahadean nin Dios asin an mga kahadean kan kinaban na ini. An Kahadean nin Dios magigin mapanggana. Sa katapustapusi, iyan an magigin solamenteng gobyernong nakakasakop sa katawohan. Dangan makakamtan kan katawohan an pinakamarahay na pamamahala kasuarin pa man.

18. Ano an apod sa pangultimong guerra kan Kahadean nin Dios asin kan mga gobyerno kan kinaban na ini?

¹⁸ Dakol an sinasabi kan Biblia manongod sa pangultimong guerra na iyan kan Kahadean nin Dios asin kan mga gobyerno kan kinaban na ini. Halimbawa, itinotokdo kaiyan na mientras na padangadang an katapusan, an maraot na mga espiritu mapalakop nin mga kaputikan tanganing dayaon an “mga hade kan bilog na ineerokan na daga.” Sa anong katuyohan? “Tanganing tiriponon sinda [an mga hade] sa guerra kan dakulang aldaw nin Dios na Makakamhan sa Gabos.” An mga hade kan daga titiriponon sa “lugar na sa Hebreo inaapod Har–Magedon.” (Kapahayagan 16:14, 16) Huli sa sinabi sa duwang bersikulong iyan, an pangultimong guerra kan mga gobyerno nin tawo asin kan Kahadean nin Dios inaapod na ralaban nin Har–Magedon, o Armagedon.

19, 20. Ano an nakakaolang na an kabotan nin Dios gibohon sa daga ngonyan mismo?

¹⁹ Ano an mahahaman kan Kahadean nin Dios paagi sa Armagedon? Isipon giraray nindo kun ano an kabotan nin Dios para sa daga. Katuyohan ni Jehova Dios na an daga mapano nin matanos, sangkap na rasa nin tawo na naglilingkod sa saiya sa Paraiso. Ano an nakakaolang na mangyari iyan ngonyan mismo? Enot, kita makasalan, asin kita nagkakahelang asin nagagadan. Minsan siring, nanodan niato sa Kapitulo 5 na si Jesus nagadan para sa satuya tanganing kita mabuhay sagkod lamang. Posibleng marhay na nagigirumdoman nindo an mga tataramon na nakasurat sa Ebanghelyo ni Juan: “An Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.”​—Juan 3:16.

²⁰ An saro pang problema iyo na an dakol na tawo naggigibo nin maraot. Sinda nagpuputik, nandadaya, asin naggigibo nin inmoralidad. Habo nindang gibohon an kabotan nin Dios. An mga tawong naggigibo nin maraot lalaglagon sa guerra nin Dios sa Armagedon. (Salmo 37:10) An saro pang dahelan kun taano ta dai ginigibo an kabotan nin Dios sa daga iyo na dai ineenkaminar kan mga gobyerno an mga tawo na gibohon iyan. An dakol na gobyerno nagin maluya, maringis, o maraot. Prangkang sinasabi kan Biblia: “An tawo nagsakop sa tawo sa saiyang ikakaraot.”​—Eclesiastes 8:9.

21. Paano papangyayarihon kan Kahadean na an kabotan nin Dios gibohon sa daga?

²¹ Pakatapos kan Armagedon, an katawohan magigin sakop nin saro na sanang gobyerno, an Kahadean nin Dios. An Kahadean na iyan magibo kan kabotan nin Dios asin matao nin makangangalas na mga bendisyon. Halimbawa, hahaleon kaiyan si Satanas asin an saiyang mga demonyo. (Kapahayagan 20:1-3) An puersa kan atang ni Jesus iaaplikar tanganing an maimbod na mga tawo dai na magkahelang asin magadan. Imbes kaiyan, sa irarom kan pamamahala kan Kahadean sinda mabubuhay sagkod lamang. (Kapahayagan 22:1-3) An daga gigibohon na paraiso. Sa siring papangyayarihon kan Kahadean na an kabotan nin Dios gibohon sa daga asin sasantipikaron kaiyan an ngaran nin Dios. Nangangahulogan ini nin ano? Iyan nangangahulogan na sa kahurihurihi sa irarom kan pamamahala kan Kahadean nin Dios an gabos na nabubuhay magtatao nin onra sa ngaran ni Jehova.

NOARIN MAHIRO AN KAHADEAN NIN DIOS?

22. Taano ta naaaraman niato na an Kahadean nin Dios dai nagdatong kan si Jesus uya pa digdi sa daga o ensegida pakatapos na buhayon sia liwat?

²² Kan sabihon ni Jesus sa saiyang mga parasunod na mamibi, “Dumatong logod an kahadean mo,” maliwanag na dai pa nagdatong an Kahadean kan panahon na idto. Nagdatong daw iyan kan si Jesus sumakat sa langit? Dai, huling si Pedro sagkod si Pablo nagsabi na pakatapos na buhayon liwat si Jesus, an hula sa Salmo 110:1 naotob sa saiya: “An sabi ni Jehova sa sakong Kagurangnan: ‘Tumukaw ka sa sakong too sagkod na ibugtak ko an saimong mga kaiwal na tungtongan kan saimong mga bitis.’” (Gibo 2:32-35; Hebreo 10:​12, 13) May peryodo nin paghalat.

23. (a) Kasuarin nagpoon na mamahala an Kahadean nin Dios? (b) Ano an totokaron sa sunod na kapitulo?

²³ Gurano kahaloy? Durante kan ika-19 asin ika-20 siglo, luway-luway na nasabotan kan sinserong mga estudyante sa Biblia na matatapos an peryodo nin paghalat kan 1914. (Mapadapit sa petsang ini, helingon an Apendise na “1914​—Sarong Makahulogan na Taon sa Hula kan Biblia.”) Pinapatunayan kan mga pangyayari sa kinaban na nagpoon kan 1914 na tama an pakasabot kan sinserong mga estudyanteng ini sa Biblia. An kaotoban kan hula sa Biblia nagpapaheling na kan 1914, si Cristo nagin Hade asin nagpoon na mamahala an langitnon na Kahadean nin Dios. Huli kaini, kita nabubuhay na sa ‘halipot na panahon’ na natatada ki Satanas. (Kapahayagan 12:12; Salmo 110:2) Masasabi man niato na may kasiertohan na sa dai na mahahaloy mahiro an Kahadean nin Dios tanganing an kabotan nin Dios gibohon sa daga. Makangangalas daw na bareta ini para sa saindo? Nagtutubod daw kamo na totoo ini? An sunod na kapitulo matabang saindo na maheling na itinotokdo talaga ini kan Biblia.