Ano an Saindong Magigin Kamugtakan sa Atubangan kan Trono nin Paghokom?

“Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono.”​—MATEO 25:31.

1-3. Ano an satong rason na magkaigwa nin marahay na paglaom mapadapit sa hustisya?

‘MAY SALA O DAING SALA?’ Dakol an nag-iisip-isip kun sinda nakadadangog nin mga bareta manongod sa sarong kaso sa hokoman. An mga hokom asin mga miembro nin hurado tibaad naghihingoang magin sadiosan, alagad parate daw na nangingibabaw an hustisya? Dai pa daw kamo nakabareta manongod sa inhustisya asin mga dai pagkakapantaypantay sa hudisyal na proseso? An siring na inhustisya bakong bago, arog kan satong maheheling sa ilustrasyon ni Jesus na nasa Lucas 18:​1-8.

² Ano man an saindong eksperyensia sa hustisya nin tawo, mangnoha an konklusyon ni Jesus: “Dai daw papangyayarihon nin Dios na magibo an hustisya para sa saiyang mga pinili na nag-aagrangay saiya aldaw asin banggi . . . ? Sinasabi ko saindo, Saiyang papangyayarihon na marikas na magibo an hustisya sainda. Minsan siring, kun dumatong na an Aki nin tawo, makukua daw nanggad nia an pagtubod sa daga?”

³ Iyo, sisiertohon ni Jehova na an saiyang mga lingkod sa katapustapusi mag-ako nin hustisya. Kalabot man si Jesus nangorogna ngonyan huling nabubuhay na kita sa “huring mga aldaw” kan presenteng maraot na palakaw. Sa dai na mahahaloy gagamiton ni Jehova an saiyang makapangyarihan na Aki tanganing paraon an karatan digdi sa daga. (2 Timoteo 3:1; 2 Tesalonica 1:​7, 8; Kapahayagan 19:​11-16) Marororop niato an kabtang ni Jesus gikan sa saro kan ultimong mga ilustrasyon na itinao nia, na parateng inaapod na parabola dapit sa mga karnero asin kanding.

4. Ano an satong nagin pagsabot manongod sa kun noarin mangyayari an parabola dapit sa mga karnero asin kanding, alagad taano ta tatawan niato ngonyan nin atension an parabola? (Talinhaga 4:18)

⁴ Haloy na niatong nasabotan na an parabola naglaladawan sa pagtukaw ni Jesus bilang Hade kan 1914 asin paghokom poon kaidto​—buhay na daing katapusan para sa mga tawong arog-karnero, permanenteng kagadanan para sa mga kanding. Alagad an paghorophorop liwat sa parabola nagtotokdo sa sarong binagong pakasabot dapit sa kun noarin iyan mangyayari asin kun ano an ipinag-iilustrar kaiyan. An pagpakarhay na ini nagdadagdag nin puersa sa halaga kan satong paghuhulit asin sa kahulogan kan reaksion nin mga tawo. Tanganing maheling an basihan para sa mas hararom na pakasabot na ini dapit sa parabola, pag-olayan niato kun ano an ipinaheheling kan Biblia manongod ki Jehova asin ki Jesus, kapwa bilang mga Hade asin Hokom.

Si Jehova Bilang an Supremong Hokom

5, 6. Taano ta angay na mansayon si Jehova bilang pareho Hade asin Hokom?

⁵ An uniberso pinamamahalaan ni Jehova na may kapangyarihan sa gabos. Huling mayo nin kapinonan asin mayo nin katapusan, sia an “Hade na daing katapusan.” (1 Timoteo 1:17; Salmo 90:​2, 4; Kapahayagan 15:3) May autoridad siang gumibo nin mga pagboot, o ley, asin ipaotob an mga ini. Alagad kabale sa saiyang autoridad an pagigin Hokom. An Isaias 33:22 nagsasabi: “Si Jehova iyo an satong Hokom, si Jehova iyo an satong Paraboot, si Jehova iyo an satong Hade; sia mismo an magliligtas sa sato.”

⁶ An mga lingkod nin Dios haloy nang minimidbid si Jehova bilang Hokom sa mga kaso asin isyu. Halimbawa, pakatapos na pagturotimbangon kan “Hokom sa bilog na daga” an ebidensia manongod sa karatan nin Sodoma asin Gomorra, kapwa nia hinusgaran na an mga habitante maninigo sa kalaglagan asin ipinaotob an matanos na paghokom na iyan. (Genesis 18:​20-33; Job 34:​10-12) Maninigo nanggad na makaasegurar sa sato an pakaaram na si Jehova sarong matanos na Hokom na perming kayang otobon an saiyang mga paghokom!

7. Paano si Jehova naghiro bilang Hokom sa Israel?

⁷ Sa suanoy na Israel, may beses na si Jehova direktang naghokom. Dai daw kutana kamo naranga kan panahon na idto na maaraman na sarong sangkap na Hokom an nagdedesisyon sa mga bagay-bagay? (Levitico 24:​10-16; Bilang 15:​32-36; 27:​1-11) An Dios nagtao man nin “mga paghokom” na gabos marahay bilang mga pamantayan para sa paghusgar. (Levitico 25:​18, 19; Nehemias 9:13; Salmo 19:​9, 10; 119:​7, 75, 164; 147:​19, 20) Sia an “Hokom sa bilog na daga,” kaya kita gabos apektado.​—Hebreo 12:23.

8. Anong napapanongod na bisyon an naheling ni Daniel?

⁸ Igwa kita nin patotoo nin “nakaheling” manongod sa bagay na ini. Si propeta Daniel tinawan nin bisyon dapit sa mabangis na mga hayop na nagrepresentar sa mga gobyerno o imperyo. (Daniel 7:​1-8, 17) Idinugang nia: “May mga tronong ibinugtak asin an Suanoy kan mga Aldaw nagtukaw. An saiyang gubing maputi siring kan niebe.” (Daniel 7:9) Mangnoha na si Daniel nakaheling nin mga trono “asin an Suanoy kan mga Aldaw [si Jehova] nagtukaw.” Hapota an saindong sadiri, ‘An naheheling daw digdi ni Daniel iyo an pagin Hade nin Dios?’

9. Ano an sarong kahulogan nin ‘pagtukaw’ sa trono? Tumao nin mga halimbawa.

⁹ Bueno, kun nababasa ta na an saro “nagtukaw” sa trono, tibaad isipon niato an pagin niang hade, huli ta may beses na ginagamit kan Biblia an siring na pananaram. Halimbawa: “Kan [si Zimri] magpoon na maghade, pagkatukaw tolos nia sa saiyang trono, [saiyang] . . . ” (1 Hade 16:11; 2 Hade 10:30; 15:12; Jeremias 33:17) An sarong hula dapit sa Mesiyas nagsabi: “Sia matukaw asin mamamahala sa saiyang trono.” Huli kaini, an ‘pagtukaw sa trono’ puedeng mangahulogan nin pagin hade. (Zacarias 6:​12, 13) Si Jehova ilinaladawan bilang Hade na nagtutukaw sa trono. (1 Hade 22:19; Isaias 6:1; Kapahayagan 4:​1-3) Sia “Hade na daing katapusan.” Pero, sa pagpahayag nia nin bagong aspekto nin soberaniya, puedeng sabihon na sia nagin Hade, na garo baga nagtukaw liwat sa saiyang trono.​—1 Cronica 16:​1, 31; Isaias 52:7; Kapahayagan 11:​15-17; 15:3; 19:​1, 2, 6.

10. Ano an sarong pangenot na katongdan nin mga hadeng Israelita? Iilustrar.

¹⁰ Alagad uya an sarong mahalagang punto: An sarong pangenot na katongdan nin suanoy na mga hade iyo an pagbista sa mga kaso asin paghusgar. (Talinhaga 20:8; 29:14) Girumdoma an madonong na paghusgar ni Salomon kan may duwang babae na naghingakong ina nin sasarong omboy. (1 Hade 3:​16-28; 2 Cronica 9:8) An saro sa saiyang mga edipisyong pangobyerno iyo an “Portico kan Trono kun saen sia maghohokom,” na inaapod man na “portico nin paghokom.” (1 Hade 7:7) An Jerusalem ilinadawan na lugar kun saen “namumugtak an mga trono para sa paghokom.” (Salmo 122:5) Malinaw nanggad, ‘an pagtukaw sa trono’ puede man na mangahulogan nin pagkapot nin hudisyal na autoridad.​—Exodo 18:13; Talinhaga 20:8.

11, 12. (a) Ano an kahulogan kan pagtukaw ni Jehova, na nasambitan sa Daniel kapitulo 7? (b) Paano nagpapatunay an ibang teksto na si Jehova minatukaw sa paghokom?

¹¹ Ngonyan balikan ta an eksena kun saen naheling ni Daniel na “an Suanoy kan mga Aldaw nagtukaw.” Idinadagdag kan Daniel 7:10: “An Hokoman nagtukaw, asin binuruka an mga libro.” Iyo, an Suanoy kan mga Aldaw nagtutukaw tanganing hokoman an manongod sa pagdominar sa kinaban asin husgaran an Aki nin tawo na angay na mamahala. (Daniel 7:​13, 14) Dangan mababasa ta na “an Suanoy kan mga Aldaw uminabot asin itinao an paghokom apabor sa mga banal,” an mga hinusgaran na angay na mamahala kaiba kan Aki nin tawo. (Daniel 7:22) Sa katapustapusi “tuminukaw an mismong Hokoman” asin sinilotan an ultimong kapangyarihan pankinaban.​—Daniel 7:26.a

¹² Bilang resulta, an pakaheling ni Daniel sa Dios na ‘nagtutukaw sa trono’ nangahulogan kan Saiyang pagdatong tanganing maghokom. Bago kaini si David nag-awit: “Ginibo mo [ni Jehova] an sakong paghokom asin an sakong katuyohan; tuminukaw ka sa trono na naghohokom na may katanosan.” (Salmo 9:​4, 7) Asin si Joel nagsurat: “Magmarata an mga nasyon asin magturukad sa hababang kaplanodohan ni Josafat; huli ta duman ako [si Jehova] matukaw tanganing hokoman an gabos na nasyon.” (Joel 3:12; ikomparar an Isaias 16:5.) Si Jesus asin si Pablo pareho napasa hudisyal na mga kamugtakan na dian tawo an nagtutukaw tanganing magbista sa kaso asin maghusgar.b​—Juan 19:​12-16; Gibo 23:3; 25:6.

An Katongdan ni Jesus

13, 14. (a) Anong kasiertohan an yaon sa banwaan nin Dios na si Jesus magigin Hade? (b) Kasuarin tuminukaw si Jesus sa saiyang trono, asin sa anong sentido na sia namahala poon kan 33 C.E.?

¹³ Si Jehova pareho Hade asin Hokom. Kumusta man si Jesus? An anghel na nagpaisi kan saiyang pagkamundag nagsabi: “Itatao saiya ni Jehova Dios an trono ni David na saiyang ama, . . . asin dai magkakaigwa nin katapusan an saiyang kahadean.” (Lucas 1:​32, 33) Si Jesus magigin permanenteng paramana kan pagkahade ni David. (2 Samuel 7:​12-16) Sia mamamahala gikan sa langit, huli ta si David nagsabi: “An sabi ni Jehova sa sakong Kagurangnan [si Jesus]: ‘Tumukaw ka sa sakong too sagkod na ibugtak ko an saimong mga kaiwal na tongtongan kan saimong mga bitis.’ An sogkod kan saimong kakosogan ipadadara ni Jehova gikan sa Sion, na nagsasabi: ‘Mandaog ka sa tahaw kan saimong mga kaiwal.’”​—Salmo 110:​1-4.

¹⁴ Noarin iyan mangyayari? Si Jesus dai namahala bilang Hade mantang tawo pa. (Juan 18:​33-37) Kan 33 C.E., sia nagadan, binuhay liwat, asin suminakat sa langit. An Hebreo 10:12 nagsasabi: “An tawong ini nagdolot nin sarong atang para sa mga kasalan para sa gabos na panahon asin nagtukaw sa too nin Dios.” Anong autoridad an yaon ki Jesus? “Pinatukaw sia [nin Dios] sa saiyang too sa langitnon na mga kamugtakan, na mas halangkaw kisa sa lambang gobyerno asin autoridad asin kapangyarihan asin pagkakagurangnan . . . asin ginibo siang payo kan gabos na bagay sa kongregasyon.” (Efeso 1:​20-22) Huling kan panahon na idto si Jesus igwa na nin makahadeng autoridad sa mga Kristiano, ikinasurat ni Pablo na “ilinigtas . . . kita [ni Jehova] hale sa autoridad kan kadikloman asin ibinalyo kita sa kahadean kan Aki nin saiyang pagkamoot.”​—Colosas 1:13; 3:1.

15, 16. (a) Taano ta sinasabi ta na si Jesus dai nagin Hade kan Kahadean nin Dios kaidtong 33 C.E.? (b) Kasuarin nagpoon si Jesus na mamahala sa Kahadean nin Dios?

¹⁵ Minsan siring, kan panahon na idto si Jesus dai naghiro bilang Hade asin Hokom sa mga nasyon. Nakatukaw sia sa kataed nin Dios, na naghahalat kan panahon na humiro bilang Hade sa Kahadean nin Dios. Si Pablo nagsurat dapit sa saiya: “Manongod sa kiisay sa mga anghel na sinabi nia kasuarin man: ‘Tumukaw ka sa sakong too, sagkod na ibugtak ko an saimong mga kaiwal na tongtongan kan saimong mga bitis’?”​—Hebreo 1:13.

¹⁶ An Mga Saksi ni Jehova dakol nang ipinublikar na ebidensia na an panahon nin paghalat ni Jesus natapos kan 1914, kan sia mamahala sa Kahadean nin Dios sa dai naheheling na kalangitan. An Kapahayagan 11:​15, 18 nagsasabi: “An kahadean kan kinaban nagin nang kahadean kan satong Kagurangnan asin kan saiyang Cristo, asin sia mamamahala bilang hade sagkod lamang.” “Alagad an mga nasyon nagkaaranggot, asin an saimong sadiring kaanggotan nagdatong.” Iyo, an mga nasyon nagpahayag nin kaanggotan sa lambang saro durante kan Guerra Mundial I. (Lucas 21:​24) An mga guerra, linog, peste, kakulangan sa kakanon, asin kaagid na mga bagay, na naheling niato poon kan 1914 nagpapatunay na si Jesus namamahala na ngonyan sa Kahadean nin Dios, asin na harani na an pangultimong katapusan kan kinaban.​—Mateo 24:​3-14.

17. Anong mahalagang mga punto an naestablisar na niato?

¹⁷ Bilang halipot na pagrepaso: An Dios puedeng sabihon na nagtutukaw sa trono bilang Hade, alagad sa saro pang sentido puede siang tumukaw sa saiyang trono tanganing maghokom. Kan 33 C.E., si Jesus tuminukaw sa too nin Dios, asin sia ngonyan an Hade kan Kahadean. Alagad si Jesus daw, na ngonyan nagrereynar bilang Hade, nagseserbi man bilang Hokom? Asin taano ta maninigong pag-isipan niato ini, nangorogna sa panahon na ini?

18. Ano an ebidensia na si Jesus magigin man Hokom?

¹⁸ Si Jehova, na may diretsong magnombra nin mga hokom, pinili si Jesus bilang Hokom na nakaaabot sa Saiyang mga pamantayan. Ipinaheling ini ni Jesus kan nagtataram manongod sa mga tawo na nagigin buhay sa espirituwal: “An Ama dai naghohokom sa siisay pa man, kundi itinao nia an gabos na paghokom sa Aki.” (Juan 5:22) Pero, an hudisyal na katongdan ni Jesus labi pa sa klaseng iyan nin paghokom, huli ta sia hokom kan mga buhay asin kan mga gadan. (Gibo 10:42; 2 Timoteo 4:1) Sarong beses nagpahayag si Pablo: “[An Dios] nagtalaan nin aldaw na katuyohan niang hokoman an ineerokan na daga sa katanosan paagi sa sarong lalaki [si Jesus] na saiyang ninombrahan, asin sia nagtao nin garantiya sa gabos na tawo ta binuhay nia sia liwat.”​—Gibo 17:31; Salmo 72:​2-7.

19. Taano ta tama na magtaram dapit ki Jesus na nagtutukaw bilang Hokom?

¹⁹ Sa siring, may katanosan daw kitang magkonklusyon na si Jesus nagtutukaw sa mamurawayon na trono sa espesipikong katongdan nin pagigin Hokom? Iyo. Sinabihan ni Jesus an mga apostol: “Sa paglalang liwat, kun an Aki nin tawo magtukaw na sa saiyang mamurawayon na trono, kamo na nagsurunod sako matukaw man kamo sa doseng trono, na maghohokom sa doseng tribo nin Israel.” (Mateo 19:28) Minsan ngani si Jesus ngonyan Hade kan Kahadean, magigin kabale sa saiyang dugang pang aktibidad na nasambitan sa Mateo 19:28 an pagtukaw sa trono tanganing maghokom durante kan Milenyo. Sa panahon na iyan hohokoman nia an bilog na katawohan, an mga matanos asin an mga bakong matanos. (Gibo 24:15) Makatatabang na girumdomon ini mantang itinatao niato an satong atension sa saro sa mga parabola ni Jesus na may koneksion sa satong panahon asin sa satong buhay.

Ano an Sinasabi kan Parabola?

20, 21. Ano an ihinapot kan mga apostol ni Jesus na may koneksion sa satong panahon, na minagiya sa anong hapot?

²⁰ Kan madali nang magadan si Jesus, hinapot sia kan saiyang mga apostol: “Noarin mangyayari an mga bagay na ini, asin ano an magigin tanda kan saimong presensia asin kan pagtatapos kan palakaw nin mga bagay?” (Mateo 24:3) Si Jesus naghula nin mahalagang mga pangyayari digdi sa daga bago ‘dumatong an katapusan.’ Dai mahahaloy bago an katapusan na iyan, “maheheling [kan mga nasyon] an Aki nin tawo na minadatong sa mga panganoron nin langit na may kapangyarihan asin dakulang kamurawayan.”​—Mateo 24:​14, 29, 30.

²¹ Minsan siring, ano an mangyayari sa mga tawo sa mga nasyon na iyan kun an Aki nin tawo dumatong na sa saiyang kamurawayan? Aramon niato gikan sa parabola dapit sa mga karnero asin kanding, na minapoon sa mga tataramon na: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamurawayon na trono. Asin an gabos na nasyon titiponon sa atubangan nia.”​—Mateo 25:​31, 32.

22, 23. Anong mga punto an nagpaparisa na an parabola dapit sa mga karnero asin kanding dai nagpoon na maotob kan 1914?

²² An parabola daw na ini minaaplikar kan si Jesus tumukaw na may makahadeng kapangyarihan kan 1914, siring kan haloy na niatong pagsabot? Bueno, an Mateo 25:34 nagtataram nanggad dapit sa saiya bilang Hade, kaya an parabola rasonableng minaaplikar poon kan si Jesus magin Hade kan 1914. Alagad anong paghokom an ginibo nia dai nahaloy pakatapos kaidto? Bako idtong paghokom sa “gabos na nasyon.” Imbes, itinao nia an saiyang atension sa mga naghihingakong minakompuesto kan “harong nin Dios.” (1 Pedro 4:17) Kaoyon sa Malaquias 3:​1-3, si Jesus, bilang mensahero ni Jehova, siniyasat sa hudisyal na paagi an linahidan na mga Kristiano na nawawalat pa digdi sa daga. Panahon man idto para sa hudisyal na pagsentensia sa Kakristianohan, na may kaputikan na naghihingakong iyo an “harong nin Dios.”c (Kapahayagan 17:​1, 2; 18:​4-8) Pero mayong nagpaparisa na kan panahon na idto, o poon kan panahon na idto, si Jesus tuminukaw tanganing sa katapustapusi hokoman an mga tawo sa gabos na nasyon bilang mga karnero o kanding.

²³ Kun aanalisaron niato an aktibidad ni Jesus sa parabola, mamamasdan niato sia na sa katapustapusi naghohokom sa gabos na nasyon. Dai ipinaheheling kan parabola na an paghokom na iyan magpapadagos sa halawig na peryodo nin dakol na taon, na garo baga an kada tawong nagagadan durante kaining nakaaging mga dekada hinokoman na maninigo sa kagadanan na daing katapusan o sa buhay na daing katapusan. Minalataw na an mayoriya na nagadan kan nakaagi pa sanang mga dekada napaduman sa pankagabsan na lolobngan nin katawohan. (Kapahayagan 6:8; 20:13) Minsan siring, ipinaheheling kan parabola an panahon na hohokoman ni Jesus an mga tawo sa “gabos na nasyon” na nabubuhay sa panahon na iyan asin napaaatubang sa paggibo kan saiyang hudisyal na sentensia.

24. Noarin maootob an parabola dapit sa mga karnero asin kanding?

²⁴ Sa ibang pagtaram, an parabola nagtotokdo sa ngapit na an Aki nin tawo madatong sa saiyang kamurawayan. Matukaw sia tanganing hokoman an mga tawong nabubuhay sa panahon na iyan. An saiyang paghokom magigin basado sa nagin pagkatawo ninda. Sa panahon na iyan “an kalaenan kan matanos asin maraot” malinaw nang naestablisar. (Malaquias 3:​18) Magigin limitado an panahon kan aktuwal na pagpahayag asin paggibo nin paghokom. Si Jesus matao nin matanos na mga desisyon basado sa kun ano an nagin hayag manongod sa mga indibiduwal.​—Helingon man an 2 Corinto 5:10.

25. Ano an ipinaheheling kan Mateo 25:31 sa pagtaram dapit sa Aki nin tawo na nagtutukaw sa mamurawayon na trono?

²⁵ Kaya, nangangahulogan ini na an ‘pagtukaw ni Jesus sa saiyang mamurawayon na trono’ para sa paghokom, na nasambitan sa Mateo 25:​31, minaaplikar sa panahon sa ngapit na an makapangyarihan na Hadeng ini matukaw tanganing ipahayag asin gibohon an paghokom sa mga nasyon. Iyo, an eksena nin paghokom na kalabot si Jesus sa Mateo 25:​31-33, 46 ikakokomparar sa eksena sa Daniel kapitulo 7, kun saen an nagrereynar na Hade, an Suanoy kan mga Aldaw, nagtukaw tanganing gibohon an saiyang katongdan bilang Hokom.

26. Anong bagong paliwanag dapit sa parabola an nagigin malinaw?

²⁶ An paaging ini nin pagsabot sa parabola dapit sa mga karnero asin kanding nagpaparisa na an paghokom sa mga karnero asin kanding sa ngapit pa. Iyan mangyayari pagkatapos na pumutok an “kahorasaan” na nasambitan sa Mateo 24:​29, 30 asin ‘dumatong na sa saiyang kamurawayan’ an Aki nin tawo. (Ikomparar an Marcos 13:​24-26.) Dangan, mantang nasa katapusan na an bilog na maraot na palakaw, si Jesus matukaw sa hokoman asin maghohokom.​—Juan 5:30; 2 Tesalonica 1:​7-10.

27. Maninigo kitang magin interesado na maaraman an ano manongod sa ultimong parabola ni Jesus?

²⁷ Linilinaw kaini an satong pakasabot dapit sa kun noarin mangyayari an parabola ni Jesus, na nagpapaheling kun noarin hohokoman an mga karnero asin kanding. Alagad paano ini nakaaapektar sa sato na may kaigotan na naghuhulit kan maogmang bareta kan Kahadean? (Mateo 24:14) Ginigibo daw kaiyan na bako nang gayong mahalaga an satong gibohon, o iyan daw nagdadara nin mas magabat na paninimbagan? Helingon niato sa sunod na artikulo kun paano kita apektado.

Ano an Ngapit Para sa mga Karnero Asin Kanding?

“Pagbubulagbulagon nia an mga tawo, kun paanong ibinubulag nin pastor an mga karnero sa mga kanding.”​—MATEO 25:32.

1, 2. Taano ta maninigo kitang magin interesado sa parabola dapit sa mga karnero asin kanding?

TUNAY na si Jesu-Cristo an pinakadakulang Paratokdo digdi sa daga. (Juan 7:46) An saro sa saiyang mga paagi nin pagtotokdo iyo an paggamit nin mga parabola, o ilustrasyon. (Mateo 13:​34, 35) An mga ini simple pero mapuersa sa pagpasabot nin hararom na espirituwal asin makahulang mga katotoohan.

² Sa parabola dapit sa mga karnero asin kanding, si Jesus nagtokdo sa sarong panahon na sia mahiro sa sarong espesyal na katongdan: “Kun an Aki nin tawo dumatong na sa saiyang kamurawayan, asin . . .” (Mateo 25:31) Maninigo kitang magin interesado digdi huli ta sa ilustrasyon na iyan tinatapos ni Jesus an saiyang simbag sa hapot na: “Ano an magigin tanda kan saimong presensia asin kan pagtatapos kan palakaw nin mga bagay?” (Mateo 24:3) Alagad ano an kahulogan kaini para sa sato?

3. Sa pagpoon kan saiyang diskurso, ano an sinabi ni Jesus na mangyayari pagkapoon tolos kan dakulang kahorasaan?

³ Si Jesus naghula nin pambihirang mga pangyayari na maabot “pakatapos tolos” kan pagputok kan dakulang kahorasaan, mga pangyayari na satong hinahalat. Sinabi nia na sa panahon na iyan malataw “an tanda kan Aki nin tawo.” Ini magkakaigwa nin dakulang epekto sa “gabos na tribo kan daga” na ‘makaheheling sa Aki nin tawo na minadatong sa mga panganoron nin langit na may kapangyarihan asin dakulang kamurawayan.’ An Aki nin tawo iibanan kan “saiyang mga anghel.” (Mateo 24:​21, 29-31)a Kumusta man an parabola dapit sa mga karnero asin kanding? An modernong mga Biblia ibinugtak iyan sa kapitulo 25, alagad kabtang iyan kan simbag ni Jesus, na nagtatao nin dugang na detalye manongod sa saiyang pagdatong sa kamurawayan asin nagkokonsentrar sa saiyang paghokom sa “gabos na nasyon.”​—Mateo 25:32.

Mga Representasyon sa Parabola

4. Paano nasambitan si Jesus sa kapinonan kan parabola dapit sa mga karnero asin kanding, asin sairisay pa an nasambitan?

⁴ Pinoponan ni Jesus an parabola paagi sa pagsabi: “Kun an Aki nin tawo dumatong na.” Posibleng midbid nindo kun siisay “an Aki nin tawo.” An mga kagsurat kan Ebanghelyo parateng iinaplikar ki Jesus an ekspresyon na iyan. Pati mismo si Jesus, na daing duwa-duwa na nasa isip an bisyon ni Daniel dapit sa “saro na kaagid sa aki nin tawo” na minadolok sa Suanoy kan mga Aldaw tanganing mag-ako nin “pamamahala asin kamahalan patin kahadean.” (Daniel 7:​13, 14; Mateo 26:​63, 64; Marcos 14:​61, 62) Minsan ngani si Jesus an pangenot sa parabolang ini, dai sia nagsosolo. Sa kapinonan kan diskursong ini, na kinotar sa Mateo 24:​30, 31, sinabi nia na kun an Aki nin tawo ‘magdatong na may kapangyarihan asin dakulang kamurawayan,’ an saiyang mga anghel magkakaigwa nin mahalagang kabtang. Kaagid kaiyan, an parabola dapit sa mga karnero asin kanding ipinaheheling an mga anghel na kaiba ni Jesus kun sia ‘magtukaw na sa saiyang mamurawayon na trono’ tanganing maghokom. (Ikomparar an Mateo 16:27.) Alagad an Hokom asin an saiyang mga anghel nasa langit, kaya pinag-oolayan daw an mga tawo sa parabola?

5. Paano niato mamimidbid an “mga tugang” ni Jesus?

⁵ An pag-obserbar sa parabola naghahayag nin tolong grupo na kaipuhan niatong mamidbid. Apuera sa mga karnero asin kanding, idinagdag kan Aki nin tawo an ikatolong grupo na an pakamidbid sa sainda mahalagang marhay sa pagmidbid sa mga karnero asin kanding. An ikatolong grupong ini inaapod ni Jesus na saiyang espirituwal na mga tugang. (Mateo 25:​40, 45) Sierto nanggad na sinda tunay na mga parasamba, ta si Jesus nagsabi: “An siisay man na naggigibo kan kabotan kan sakong Ama . . . , sia man an sakong tugang na lalaki, asin tugang na babae, patin ina.” (Mateo 12:50; Juan 20:17) Orog pang napapanongod dian, si Pablo nagsurat dapit sa mga Kristiano na kabtang kan “banhi ni Abraham” asin mga aki nin Dios. An mga ini inapod niang “mga tugang” ni Jesus asin “mga may kabtang sa langitnon na pag-apod.”​—Hebreo 2:​9–3:1; Galacia 3:​26, 29.

6. Sairisay an “pinakasadangoton” sa mga tugang ni Jesus?

⁶ Taano ta sinambit ni Jesus an “pinakasadangoton” kan saiyang mga tugang? Inootro kan mga tataramon na iyan an nadangog kan mga apostol na sinabi nia bago kaini. Kan ipinaheheling an kalaenan ni Juan Bautista, na nagadan bago ki Jesus asin kaya igwa nin daganon na paglaom, sa mga magkakamit nin langitnon na buhay, si Jesus nagsabi: “Mayo pa nin sarong ibinangon na orog na dakula kisa ki Juan Bautista; alagad an saro na sadit sa kahadean kan kalangitan orog pa kadakula kisa saiya.” (Mateo 11:11) An ibang mapalangit tibaad prominente kaidto sa kongregasyon, arog kan mga apostol, asin an iba bakong gayo, alagad sinda gabos espirituwal na tugang ni Jesus. (Lucas 16:10; 1 Corinto 15:9; Efeso 3:8; Hebreo 8:11) Sa siring, dawa kun an iba garo bakong mahalaga digdi sa daga, sinda mga tugang nia asin maninigong trataron nin siring kaiyan.

Sairisay an Karnero Asin Kanding?

7, 8. Ano an sinabi ni Jesus manongod sa mga karnero, kaya ano an puedeng ikonklusyon niato manongod sa sainda?

⁷ Mababasa ta mapadapit sa paghokom sa mga karnero: “[Si Jesus] masabi sa mga yaon sa saiyang too, ‘Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban. Huli ta ako nagutom asin pinakakan nindo ako; napaha ako asin pinainom nindo ako. Estranghero ako asin inistimar nindo ako; huba, asin ginubingan nindo ako. Naghelang ako asin inataman nindo ako. Nabilanggo ako asin dinumanan nindo ako.’ Dangan an mga matanos masimbag sa saiya sa mga tataramon na, ‘Kagurangnan, kasuarin mi ika naheling na nagugutom asin pinakakan ka, o paha, asin pinainom ka? Kasuarin mi ika naheling na estranghero asin inistimar ka, o huba, asin ginubingan ka? Kasuarin mi ika naheling na naghehelang o nabibilanggo asin dinumanan ka?’ Asin sa pagsimbag an hade masabi sa sainda, ‘Sa katotoohan sinasabi ko sa saindo, Huli ta ginibo nindo iyan sa saro sa pinakasadangoton kan sakong mga tugang, ginibo nindo iyan sa sako.’”​—Mateo 25:​34-40.

⁸ Malinaw nanggad, an mga karnero na hinusgaran na angay na mapasa toong kampi nin onra asin pag-oyon ni Jesus nagrerepresentar sa sarong grupo nin mga tawo. (Efeso 1:20; Hebreo 1:3) Ano an saindang ginibo asin kasuarin? Sinasabi ni Jesus na sinda maboot, magalang, buka an palad na nagtao sa saiya nin kakanon, inomon, asin gubing, na tinatabangan sia kan sia naghehelang o nabibilanggo. Kan sabihon kan mga karnero na dai ninda ini personal na ginibo ki Jesus, idinoon nia na sinda nagsuportar nanggad sa saiyang espirituwal na mga tugang, an natatada kan linahidan na mga Kristiano, kaya sa sentidong iyan ginibo ninda iyan sa saiya.

9. Taano an parabola ta bakong aplikado durante kan Milenyo?

⁹ An parabola bakong aplikado durante kan Milenyo, ta sa panahon na iyan an mga linahidan bako nang tawo na nag-aagi nin gutom, pagkapaha, helang, o pagkabilanggo. Minsan siring, dakol sa sainda an nakaeeksperyensia nin siring durante kan pagtatapos kan palakaw na ini nin mga bagay. Poon kan iholog si Satanas digdi sa daga, an natatada ginibo niang espesyal na punteriya kan saiyang kabangisan, na nagdadara sa sainda nin pag-olog-olog, pagpasakit, asin kagadanan.​—Kapahayagan 12:17.

10, 11. (a) Taano ta bakong rasonableng isipon na kabale sa mga karnero an gabos na naggigibo nin kabootan sa mga tugang ni Jesus? (b) Sairisay an angay na irinerepresentar kan mga karnero?

¹⁰ Sinasabi daw ni Jesus na an lambang naggigibo nin sadit na kabootan sa saro kan saiyang mga tugang, arog baga kan pag-alok nin sarong tinapay o sarong baso nin tubig, nagigin kualipikado bilang saro sa mga karnerong ini? Totoo, an paggibo nin siring na mga kabootan puedeng magparisa nin sa-tawong kabootan, alagad an totoo, minalataw na labi pa an napapalabot sa mga karnero sa parabolang ini. Halimbawa, dai nanggad pinanonongdan ni Jesus an mga ateista o klerigo na nangyaring nakagibo nin maboot na akto sa saro kan saiyang mga tugang. Sa kabaliktaran, an mga karnero duwang beses na inapod ni Jesus na “mga matanos.” (Mateo 25:​37, 46) Kaya an mga karnero siertong mga tawo na sa sarong peryodo nin panahon nagtabang sa​—aktibong sinusuportaran an—​mga tugang ni Cristo asin naggibo nin pagtubod sagkod na nagkamit nin matanos na kamugtakan sa atubangan nin Dios.

¹¹ Sa nakaaging mga siglo, dakol arog baga ki Abraham an nagkamit nin matanos na kamugtakan. (Santiago 2:​21-23) Si Noe, Abraham, asin iba pang maimbod kabilang sa “ibang karnero” na magmamana nin buhay sa Paraiso sa irarom kan Kahadean nin Dios. Sa dai pa sana nahahaloy na mga panahon minilyon pa an nag-ako sa tunay na pagsamba bilang ibang karnero asin nagin “sarong aripompon” kaiba kan mga linahidan. (Juan 10:16; Kapahayagan 7:9) An mga ini na may daganon na mga paglaom minimidbid an mga tugang ni Jesus bilang mga embahador kan Kahadean asin kaya tinatabangan ninda sinda​—sa literal asin sa espirituwal. Ibinibilang ni Jesus na ginigibo sa saiya an ginigibo kan ibang karnero sa saiyang mga tugang digdi sa daga. An mga iyan na buhay pagdatong nia tanganing maghokom sa mga nasyon huhusgaran bilang mga karnero.

12. Taano ta puedeng maghapot an mga karnero kun paano sinda nakagibo nin mga kabootan ki Jesus?

¹² Kun an ibang karnero ngonyan naghuhulit kan maogmang bareta sa kaibanan kan mga linahidan asin nagtatabang sa sainda, taano ta ihahapot ninda: “Kagurangnan, kasuarin mi ika naheling na nagugutom asin pinakakan ka, o paha, asin pinainom ka?” (Mateo 25:37) Puedeng laen-laen an dahelan. Ini sarong parabola. Paagi kaiyan, ipinaheheling ni Jesus an saiyang hararom na pagmakolog sa saiyang espirituwal na mga tugang; sia nakikidamay sa sainda, nagtitios sa kaibanan ninda. Bago kaini si Jesus nagsabi: “An minaako sa saindo minaako man sa sako, asin an minaako sa sako minaako man sa saiya na nagsugo sa sako.” (Mateo 10:40) Sa ilustrasyon na ini, pinaaabot ni Jesus an prinsipyo, na ipinaheheling na an ginigibo (marahay o maraot) sa saiyang mga tugang nakaaabot pa ngani sagkod sa langit; iyan garo baga ginigibo sa saiya sa langit. Siring man, idinodoon digdi ni Jesus an pamantayan ni Jehova sa paghokom, na linilinaw na an paghokom nin Dios, baga man paborable o pagkondenar, balido asin matanos. An mga kanding dai puedeng manarahotan na, ‘Bueno, kun naheling mi sana kutana ika mismo.’

13. Taano an mga arog-kanding ta tibaad mag-apod ki Jesus na “Kagurangnan”?

¹³ Oras na masabotan niato kun noarin ginigibo an paghokom na ipinaheheling sa parabolang ini, mas malinaw niatong naheheling kun siisay an mga kanding. An kaotoban mangyayari sa panahon na “an tanda kan Aki nin tawo malataw sa langit, dangan an gabos na tribo kan daga mananangis, asin maheheling ninda an Aki nin tawo na minadatong . . . na may kapangyarihan asin dakulang kamurawayan.” (Mateo 24:​29, 30) An mga makaliligtas sa kahorasaan kan Dakulang Babilonya na naongis sa mga tugang ni Jesus tibaad desesperado ngonyan na mag-apod sa Hokom na “Kagurangnan,” na naglalaom na iligtas an saindang buhay.​—Mateo 7:​22, 23; ikomparar an Kapahayagan 6:15-17.

14. Basado sa ano hohokoman ni Jesus an mga karnero asin kanding?

¹⁴ Minsan siring, an paghokom ni Jesus dai ibabasar sa desesperadong mga paghihingako nin dating mga parasimba, ateista, o iba pa. (2 Tesalonica 1:8) Imbes, rerepasohon kan hokom an kamugtakan nin puso asin nakaaging mga ginibo nin mga tawo sa minsan “saro sa pinakasadangoton [kan saiyang mga tugang].” Totoo, nagdidikit na an linahidan na mga Kristianong nawawalat digdi sa daga. Minsan siring, sagkod na an mga linahidan, na minakompuesto sa “maimbod asin madonong na oripon,” padagos na nagtatao nin espirituwal na kakanon asin paggiya, an magigin mga karnero may oportunidad na gibohan nin marahay an grupong oripon, arog kan ginigibo kan ‘dakulang kadaklan hale sa gabos na nasyon asin tribo patin banwaan.’​—Kapahayagan 7:9, 14.

15. (a) Paano ipinaheling kan dakol na sinda arog sa mga kanding? (b) Taano ta maninigo niatong likayan an pagsabi kun baga an saro karnero o kanding?

¹⁵ Ano an nagin pagtratar sa mga tugang ni Cristo asin sa minilyon na ibang karnero na kasaro ninda bilang sarong aripompon? An dakol na tawo tibaad dai man personal na inaatake an mga representante ni Cristo, alagad dai man ninda tinatratar an saiyang banwaan sa mamomoton na paagi. Mas gusto an maraot na kinaban, an mga arog-kanding nagsasayuma sa mensahe kan Kahadean, baga man nadadangog iyan nin direkta o bakong direkta. (1 Juan 2:15-17) Siempre, sa katapustapusi, si Jesus an ninombrahan na maghokom. Bakong sa sato an pagdeterminar kun sairisay an karnero asin kun sairisay an kanding.​—Marcos 2:8; Lucas 5:22; Juan 2:​24, 25; Roma 14:​10-12; 1 Corinto 4:5.

Ano an Ngapit Para sa Kada Grupo?

16, 17. Ano an magigin ngapit kan mga karnero?

¹⁶ Hinokoman ni Jesus an mga karnero: “Madia, kamong mga binendisyonan kan sakong Ama, manaha nindo an kahadean na inandam para sa saindo poon pa kan lalangon an kinaban.” Mainit nanggad na pangagda​—“Madia”! Sa ano? Sa buhay na daing katapusan, siring kan pagkapahayag nia bilang sumaryo: “An mga matanos [malaog] sa buhay na daing katapusan.”​—Mateo 25:​34, 46.

¹⁷ Sa parabola dapit sa mga talento, ipinaheling ni Jesus kun ano an hinahagad sa mga mamamahala kaiba nia sa langit, alagad sa parabolang ini ipinaheheling nia kun ano an linalaoman sa mga sakop kan Kahadean. (Mateo 25:​14-23) Sa diretsong pagtaram, huli sa saindang dai nababangang pagsuportar sa mga tugang ni Jesus, an mga karnero magmamana nin sarong lugar sa daganon na rona kan saiyang Kahadean. Magkakamit sinda nin buhay sa sarong paraisong daga​—sarong paglaom na inandam nin Dios para sa sainda “poon pa kan lalangon an kinaban” nin mga tawo na puedeng balukaton.​—Lucas 11:​50, 51.

18, 19. (a) Ano an magigin paghokom ni Jesus sa mga kanding? (b) Paano kita nakasisierto na an mga kanding dai maagi nin daing sagkod na pagsakit?

¹⁸ Kabaliktaran nanggad an paghokom sa mga kanding! “Dangan masabi man sia sa mga nasa saiyang wala, ‘Rumayo kamo sa sako, kamong mga isinumpa, pasiring sa daing katapusan na kalayo na inandam para sa Diablo asin sa saiyang mga anghel. Huli ta ako nagutom, alagad ta dai nindo ako pinakakan, asin ako napaha, alagad ta dai nindo ako pinainom. Estranghero ako, alagad ta dai nindo ako inistimar; huba, alagad ta dai nindo ako ginubingan; naghelang asin nabilanggo, alagad ta dai nindo ako inataman.’ Dangan sinda man masirimbag na nagsasabi, ‘Kagurangnan, kasuarin mi ika naheling na nagugutom o napapaha o estranghero o huba o naghehelang o nabibilanggo asin dai mi ika pinaglingkodan?’ Dangan sia masimbag sa sainda na nagsasabi, ‘Sa katotoohan sinasabi ko sa saindo, Mantang dai nindo iyan ginibo sa saro kan mga pinakasadangoton na ini, dai nindo iyan ginibo sa sako.’”​—Mateo 25:​41-45.

¹⁹ Aram kan mga estudyante sa Biblia na ini dai puedeng mangahulogan na an inmortal na kalag nin mga arog-kanding magsasakit sa daing sagkod na kalayo. Dai, ta an mga tawo iyo an kalag; mayo sinda nin inmortal na kalag. (Genesis 2:7; Eclesiastes 9:​5, 10; Ezequiel 18:4) Paagi sa pagsentensia sa mga kanding sa “daing katapusan na kalayo,” an boot sabihon kan Hokom kalaglagan na mayong malalaoman sa ngapit, na iyo man an permanenteng katapusan para sa Diablo asin sa saiyang mga demonyo. (Kapahayagan 20:​10, 14) Huli kaini, magkabaliktad an mga paghokom kan Hokom ni Jehova. Sinasabihan nia an mga karnero, “Madia”; an mga kanding, “Rumayo kamo sa sako.” An mga karnero magmamana nin “buhay na daing katapusan.” An mga kanding mag-aako nin “pagkaparang daing katapusan.”​—Mateo 25:46.b

Ano an Kahulogan Kaiyan Para sa Sato?

20, 21. (a) An mga Kristiano igwa nin anong mahalagang gigibohon? (b) Anong pagbubulagbulag an ginigibo ngonyan? (c) Ano an magigin situwasyon nin mga tawo kun magpoon nang maotob an parabola dapit sa mga karnero asin kanding?

²⁰ An apat na apostol na nakadangog kan simbag ni Jesus manongod sa tanda kan saiyang presensia asin kan pagtatapos kan palakaw dakol an dapat na horophoropon. Kaipuhan sindang magdanay na puka asin mapagbantay. (Mateo 24:42) Kaipuhan man na gibohon ninda an pagpapatotoo na nasambitan sa Marcos 13:10. An Mga Saksi ni Jehova aktibong nakikikabtang sa gibohon na iyan ngonyan.

²¹ Minsan siring, ano an kahulogan para sa sato kan bagong pakasabot na ini sa parabola dapit sa mga karnero asin kanding? Bueno, may pinipili nang lado an mga tawo. An iba nasa ‘halakbang na dalan na pasiring sa kalaglagan,’ mantang an iba naghihingoang magdanay sa ‘hayakpit na dalan na pasiring sa buhay.’ (Mateo 7:​13, 14) Alagad an panahon na si Jesus magpapahayag nin pangultimong paghokom sa mga karnero asin kanding na ilinadawan sa parabola sa ngapit pa. Kun an Aki nin tawo dumatong na bilang Hokom, dedeterminaran nia na an dakol na tunay na Kristiano​—an totoo “sarong dakulang kadaklan” nin dusay na mga karnero—​makukualipikar na makabalyo sa ultimong kabtang kan “dakulang kahorasaan” pasiring sa bagong kinaban. An paglaom na iyan maninigo ngonyan na magin gikanan nin kagayagayahan. (Kapahayagan 7:​9, 14) Sa ibong na kampi, kadakol hale sa “gabos na nasyon” an magigin arog sa matagas an payong mga kanding. Sinda “maduman sa pagkaparang daing katapusan.” Kanigoan na kaginhawahan para sa daga!

22, 23. Mantang sa ngapit pa an kaotoban kan parabola, taano ta mahalaga an satong paghuhulit ngonyan?

²² Minsan ngani an paghokom na ilinaladawan sa parabola nasa harani nang ngapit, maski ngonyan may mahalaga nang nangyayari. Kitang mga Kristiano nakikikabtang sa nagliligtas-buhay na gibohon na pagbalangibog nin mensahe na nagpapangyari nin pagbubulagbulag sa tahaw nin mga tawo. (Mateo 10:​32-39) Si Pablo nagsurat: “Huli ta ‘an gabos na nag-aapod sa ngaran ni Jehova maliligtas.’ Alagad, paano sinda mag-aapod sa saiya na dai ninda tinutubod? Asin paano man sinda matubod sa saiya na dai man ninda nadangog? Asin paano man sinda makadadangog kun mayo nin parahulit?” (Roma 10:​13, 14) An satong paghuhulit sa publiko nakaaabot sa mga tawo sa labing 230 kadagaan na dara an ngaran nin Dios asin an saiyang mensahe nin kaligtasan. An gibohon na ini padagos pang pinangengenotan kan linahidan na mga tugang ni Cristo. Mga limang milyon nin ibang karnero an uminiba sa sainda ngonyan. Asin an mga tawo sa bilog na globo naghihimate sa mensahe na ibinabalangibog kan mga tugang ni Jesus.

²³ Dakol an pamilyar na sa satong mensahe mantang kita naghuhulit sa harong-harong o sa impormal na paagi. An iba tibaad nabaretaan an dapit sa Mga Saksi ni Jehova asin sa satong irinerepresentar sa mga paagi na dai niato aram. Kun dumatong na an panahon nin paghokom, sagkod saen kokonsideraron ni Jesus an paninimbagan kan bilog na komunidad asin an merito nin pamilya? Dai niato masasabi, asin daing saysay na magbanabana. (Ikomparar an 1 Corinto 7:14.) Dakol ngonyan an nagbibinongog, nag-oolog-olog, o nakikikabtang sa direktang paglamag sa banwaan nin Dios. Huli kaini, ini sarong mahalagang marhay na panahon; an mga siring tibaad nagigin an mga hohokoman ni Jesus na kanding.​—Mateo 10:22; Juan 15:20; 16:​2, 3; Roma 2:​5, 6.

24. (a) Taano ta mahalaga na an mga indibiduwal maghimate sa satong paghuhulit? (b) An pag-adal na ini personal na nakatabang sa saindo na magkaigwa nin anong kaisipan dapit sa saindong ministeryo?

²⁴ Minsan siring, nakaoogma na dakol an naghihimate, nag-aadal kan Tataramon nin Dios, asin nagigin Saksi ni Jehova. An iba na ngonyan garo mga arog-kanding tibaad magbago asin magin arog sa karnero. An punto iyo na an mga naghihimate asin aktibong nagsusuportar sa natatada kan mga tugang ni Cristo sa paaging iyan nagtatao ngonyan nin ebidensia na magigin basihan tanganing sinda ibugtak sa too ni Jesus kun, sa harani nang ngapit, sia tumukaw na sa saiyang trono tanganing maghokom. An mga ini binebendisyonan asin padagos na bebendisyonan. Sa siring, an parabolang ini maninigong magpahiro sa sato sa mas maigot na aktibidad sa Kristianong ministeryo. Bago magin huri nang marhay, minamawot niatong gibohon an gabos niatong makakaya na ibalangibog an maogmang bareta kan Kahadean asin sa paaging iyan tawan nin oportunidad na maghimate an iba. Dangan si Jesus na an bahalang maghokom, pagkondenar man o paborable.​—Mateo 25:46.