Mag-ingat sa mga Siod kan Diablo!

‘Humale sa siod kan Diablo.’—2 TIM. 2:26.

ANO AN ISISIMBAG NINDO?

Anong pagsiyasat sa sadiri an kaipuhan kun may tendensia kang magin labi-labi kamapagkritika sa iba?

Sa halimbawa ni Pilato asin ni Pedro, ano an manonodan mo manongod sa dai pagpadaog sa takot asin panggigipit?

Paano mo malilikayan an labi-labing pakamate nin kasalan?

1, 2. Anong mga siod kan Diablo an pag-oolayan niato sa artikulong ini?

TUSONG sinusubaybayan kan Diablo an mga lingkod ni Jehova. An katuyohan nia bako man talagang gadanon sinda, siring sa sarong paraayam na ginagadan an hayop na nabiktima nia. Imbes, an pangenot na katuyohan kan Diablo iyo na dakopon na buhay an saiyang biktima asin ipagibo digdi an gusto nia.—Basahon an 2 Timoteo 2:24-26.

² Tanganing madakop na buhay an biktima, an paraayam puedeng gumamit nin sarong klase nin siod. Puede niang probaran na paluwason an hayop sa tagoan kaini tanganing madakop nia ini nin pansiod. O puede siang gumamit nin nakatagong silo na igwa nin mekanismo sa pagdakop tanganing mataraka an hayop. Naggagamit nin kaagid na mga siod an Diablo tanganing dakopon na buhay an mga lingkod nin Dios. Totokaron sa artikulong ini kun paano kita makakapagmaan sa tolong silo na mapanggana nang nagamit kan Diablo sa pagdakop nin mga lingkod nin Dios. An mga ini an (1) daing kontrol na pagtaram, (2) takot asin panggigipit, asin (3) labi-labing pakamate nin kasalan. Totokaron sa sunod na artikulo an duwa pang silo, o siod, ni Satanas.

SIGBOHON AN KALAYO NIN DAING KONTROL NA PAGTARAM

3, 4. Ano an puedeng magin resulta kun dai niato kokontrolon an satong dila? Magtao nin halimbawa.

³ Tanganing paluwason an mga hayop sa tagoan kaini, tibaad suloon nin paraayam an sarong parte kan lugar na may mga tinanom, dangan dadakopon an mga hayop mantang nagpoprobar an mga ini na dumulag. Sa piguratibong paagi, gusto kan Diablo na suloon an Kristianong kongregasyon. Kun sia magin mapanggana, mapapahale nia an mga miembro kaiyan sa ligtas na lugar na iyan tanganing madakop nia. Paano posible na dawa dai niato aram nakikipagtabangan na palan kita sa saiya asin huli kaiyan kita masiod nia?

⁴ Sinabi kan disipulong si Santiago na an dila kaagid nin kalayo. (Basahon an Santiago 3:6-8.) Kun dai niato kokontrolon an satong dila, puede kitang pagponan nin piguratibong kasulo sa kongregasyon. Paano ini puedeng mangyari? Konsideraron an minasunod na eksena: Sa sarong pagtiripon kan kongregasyon, ipinaisi na an sarong sister ninombrahan na regular payunir. Pagkatapos kan pagtiripon, pinag-olayan nin duwang sister an paising ini. An saro nagpahayag nin kagayagayahan asin marahay na kamawotan para sa bagong payunir. Kinuestion kan saro pa an motibo kan payunir asin ipinarisa na gusto sana kaining magin prominente sa kongregasyon. Siisay sa duwang sister an gusto mong magin amiga? Bakong depisil na maaraman kun siisay sa sainda an mas posibleng marhay na magin dahelan nin kasulo sa kongregasyon paagi sa saiyang pagtaram.

5. Tanganing masigbo an kalayo nin daing kontrol na pagtaram, anong pagsiyasat sa sadiri an dapat niatong gibohon?

⁵ Paano niato masisigbo an kalayo nin daing kontrol na pagtaram? Si Jesus nagsabi: ‘Sa kapanoan nin puso nagtataram an ngoso.’ (Mat. 12:34) Kaya, an enot na lakdang iyo na siyasaton an satong puso. Linilikayan daw niato an negatibong mga saboot na nagpapalaad nin nakakadanyar na pagtaram? Halimbawa, kun maaraman niato na an sarong brother naghihingoang makaabot nin pribilehio nin paglilingkod, kita daw dai nag-aalangan na maniwalang dalisay an motibo nia, o nag-iisip kitang sadiri sanang intereses an nagpahiro sa saiya? Kun igwa kita nin tendensiang magin negatibo, marahay na girumdomon na kinuestion kan Diablo an motibo kan maimbod na lingkod nin Dios na si Job. (Job 1:9-11) Imbes na magin mapagduda sa satong tugang, marahay na aramon niato kun taano ta kinikritika niato sia. Igwa daw talaga kita nin marahay na dahelan na magin siring kaiyan? O naolakitan na daw an satong puso kan bakong mamomoton na kaisipan na lakop na marhay sa huring mga aldaw na ini?—2 Tim. 3:1-4.

6, 7. (a) Ano an nagkapirang dahelan kun taano ta tibaad kinikritika niato an iba? (b) Ano an maninigo na magin reaksion niato kun kita piglalait?

⁶ Isip-isipa an nagkapirang dahelan kun taano ta tibaad kinikritika niato an iba. An saro iyo na tibaad mawot niatong mas marisa nin iba an satong mga nagibo. Garo man sana pinoprobaran niatong ipahiling na mas halangkaw kita paagi sa pagmenos sa iba. O tibaad pinoprobaran niatong takopan an dai niato pakagibo nin positibong aksion. Baga man kapalangkawan, pagkauri, o kakulangan nin kompiansa sa sadiri an nagpapahiro sa sato, nakakadanyar an resulta.

⁷ Tibaad sa hiling niato rasonable sana an pagkritika niato sa saro. Tibaad nagin biktima kita kan saiyang daing kontrol na pagtaram. Kun iyan an nangyari sa saindo, bakong solusyon an pagbalos. Orog sana kaiyan na papalaadon an kalayo asin kaoyon iyan kan kabotan kan Diablo, bako nin Dios. (2 Tim. 2:26) Marahay na arogon niato si Jesus sa bagay na ini. Kan sia piglalait o pig-oolog-olog, sia ‘dai nagbalos na mag-olog-olog.’ Imbes, saiyang ipinagkatiwala o ‘idinolot an saiyang buhay sa naghohokom nin matanos.’ (1 Ped. 2:21-23) May kompiansa si Jesus na aasikasohon ni Jehova an mga bagay-bagay segun sa Saiyang paagi asin itinalaan na panahon. Dapat na arog man kaiyan an pagtitiwala niato sa Dios. Kun ginagamit niato an satong pagtaram tanganing makapaomay, nagtatabang kita na mapagdanay an ‘[bogkos] nin katoninongan’ sa satong kongregasyon.—Basahon an Efeso 4:1-3.

DULAGAN AN SIOD NIN TAKOT ASIN PANGGIGIPIT

8, 9. Taano ta kinondenar ni Pilato si Jesus na gadanon?

⁸ An hayop na nasiod dai na makahirong marhay. Kaagid kaiyan, an tawong nagpapadaog sa takot asin panggigipit mayo na nin lubos na kontrol sa saiyang buhay. (Basahon an Talinhaga 29:25.) Pag-olayan niato an halimbawa nin duwang magkalaen na marhay na lalaki na nagpadaog sa panggigipit asin takot dangan aramon niato kun ano an manonodan ta sa eksperyensia ninda.

⁹ Aram kan Romanong Gobernador na si Poncio Pilato na daing sala si Jesus asin minalataw na habo niang kolgan ini. Sa katunayan, sinabi ni Pilato na si Jesus ‘dai nin ano man na [maninigo sa] kagadanan.’ Minsan siring, kinondenar sia ni Pilato na gadanon. Taano? Huling nagpadaog si Pilato sa panggigipit kan mga nagsururog. (Luc. 23:15, 21-25) “Kun butasan mo [an tawong] ini, bako kang katood ni Cesar,” an kurahaw kan mga paratumang, sa siring ginipit ninda sia tanganing masunod an saindang gusto. (Juan 19:12) Tibaad natakot si Pilato na mawawara sa saiya an posisyon nia—o posibleng an buhay nia—kun makampi sia ki Cristo. Kaya pinabayaan niang gamiton sia tanganing mangyari an gusto kan Diablo.

10. Ano an nagtulod ki Pedro na negaran si Cristo?

¹⁰ Si apostol Pedro saro sa pinakadayupot na kairiba ni Jesus. Hayagan niang sinabi na si Jesus an Mesiyas. (Mat. 16:16) Nagdanay na maimbod si Pedro kan an ibang mga disipulo dai nasabotan an kahulogan kan sinabi ni Jesus asin binayaan Sia. (Juan 6:66-69) Asin kan mag-abot an mga kaiwal tanganing arestaron si Jesus, naggamit si Pedro nin espada tanganing idepensa an saiyang Kagurangnan. (Juan 18:10, 11) Minsan siring, kan huri, nagpadaog si Pedro sa takot asin nagnegar pa ngani na midbid nia si Jesu-Cristo. Sa halipot na panahon, an apostol nasiod nin takot sa tawo asin nakapugol ini sa saiya na humirong may kosog nin boot.—Mat. 26:74, 75.

11. Anong negatibong mga impluwensia an tibaad kaipuhan niatong labanan?

¹¹ Bilang mga Kristiano, kaipuhan niatong labanan an panggigipit na gumibo nin mga bagay na ikinakaanggot nin Dios. Tibaad probaran nin mga among o nin iba na piriton kitang magin madaya o tibaad hingoahon nindang tentaran kita na gumibo nin seksuwal na imoralidad. Puedeng mapaatubang an mga estudyante sa kairiba na nagpoprobar na gipiton sindang magdaya sa mga exam, maghiling nin pornograpiya, magsigarilyo, magdroga, mag-abuso sa inomon na de alkohol, o gumibo nin salang paggawe sa sekso. Kaya, ano an makakatabang sa sato na dulagan an siod nin takot asin nin panggigipit na gibohon an ikinakaanggot ni Jehova?

12. Anong mga leksion an manonodan niato ki Pilato asin Pedro?

¹² Aramon niato kun ano an satong manonodan sa halimbawa ni Pilato asin Pedro. Dikit sana an aram ni Pilato manongod ki Cristo. Sa ibong kaiyan, aram nia na si Jesus daing sala asin bakong ordinaryong tawo sana. Pero si Pilato mayo nin kapakumbabaan asin pagkamoot sa tunay na Dios. Madali sana siang nadakop na buhay kan Diablo. Si Pedro igwa nin tamang kaaraman sagkod pagkamoot sa Dios. Pero, may beses na sia nagkulang nin kababaan nin boot, natakot, asin nagpadaog sa panggigipit. Bago arestaron si Jesus, ipinaghambog ni Pedro: “Minsan an gabos magkasiringkog, alagad ako dai.” (Mar. 14:29) Mas nagin andam kutana an apostol sa maabot na mga pagbalo kun inarog nia an kaisipan kan salmista na nagsarig sa Dios asin nag-awit: ‘Si Jehova uya sa sakuya; dai ako matatakot kun ano an maginibo sa sako nin tawo.’ (Sal. 118:6) Kan huring banggi kan buhay Nia digdi sa daga, iiniba ni Jesus si Pedro asin an duwa pang apostol sa ereenotan pa sa laog kan hardin nin Getsemane. Minsan siring, imbes na magdanay na puka, si Pedro asin an kairiba nia napatorog. Pinukaw sinda ni Jesus asin sinabihan: ‘Magpuka kamo asin mamibi, tanganing dai makalaog sa sugot.’ (Mar. 14:38) Alagad napatorog giraray si Pedro asin paghaloyhaloy nagpadaog sa takot asin panggigipit.

13. Paano niato malalabanan an panggigipit na gumibo nin sala?

¹³ An halimbawa ni Pilato asin Pedro makakatokdo sa sato nin saro pang mahalagang marhay na leksion: Tanganing mapangganang malabanan an panggigipit, kaipuhan niato an tamang kaaraman, kapakumbabaan, kababaan nin boot, pagkamoot sa Dios, asin takot ki Jehova, bako sa mga tawo. Kun an satong pagtubod nakabasar sa tamang kaaraman, ipapakipag-olay niato an satong mga tinutubod nin may kosog nin boot asin karigonan. Matatabangan kita kaini na labanan an panggigipit asin daogon an takot sa tawo. Siempre, dai dapat na sumobra an pagtitiwala niato sa sadiri tang kosog. Imbes, maninigo na mapakumbaba tang midbidon na kaipuhan niato an kapangyarihan nin Dios tanganing malabanan an panggigipit. Kaipuhan niatong mamibi na tawan kita ni Jehova kan espiritu nia, asin an pagkamoot sa saiya dapat na magpahiro sa sato na suportaran an saiyang ngaran asin mga pamantayan. Dugang pa, kaipuhan niatong mag-andam para sa panggigipit bago kita mapaatubang sa pagbalo. Halimbawa, an patienot na pag-andam na may kaibang pamibi makakatabang sa satong mga aki na maaraman an dapat na gibohon kun an kairiba ninda nagpoprobar na tentaran sindang gumibo nin sala.—2 Cor. 13:7.a

LIKAYAN AN SILO NA BIYONG NAKAKAPANGLUYA—AN LABI-LABING PAKAMATE NIN KASALAN

14. Mapadapit sa satong nakaaging mga sala, ano an gusto kan Diablo na isipon niato?

¹⁴ Kun beses an litag sa hayop igwa nin magabat na troso o gapo na nakabitay sa ibabaw kan lugar na parateng inaagihan kan bibiktimahon. Matatamaan kan daing kaaram-aram na hayop an nakatagong alambre o pisi, na mapabagsak kan troso o gapo sa biktima tanganing biyong paluyahon ini. An labi-labing pakamate nin kasalan puedeng iagid sa magabat na pasan na iyan na biyong nakakapangluya. Kun iniisip niato an nakaaging sala, puedeng mamatean niato na kita “naroronot nin makuri” o biyong pinangluluyahan. (Basahon an Salmo 38:3-5, 8.) Gusto ni Satanas na isipon niato na dai na kita puedeng kaherakan ni Jehova asin dai niato kayang aboton an Saiyang mga kahagadan.

15, 16. Paano mo malilikayan an silo na magpadaog sa labi-labing pakamate nin kasalan?

¹⁵ Paano mo malilikayan an silong ini na biyong nakakapangluya? Kun nakagibo ka nin magabat na kasalan, humiro na ngonyan tanganing ikabalik an pakikikatood mo ki Jehova. Makipag-olay sa mga elder, asin hagadon an tabang ninda. (Sant. 5:14-16) Gibohon an makakaya mo tanganing itanos an sala. (2 Cor. 7:11) Kun ika dinisiplina, dai mangluya an boot. An disiplina seguradong tanda na namomotan ka ni Jehova. (Heb. 12:6) Magin determinadong dai na otrohon an mga bagay na suminagkod sa pagkakasala, asin humiro kaoyon kan desisyon na iyan. Pagkatapos mong magsolsol asin magbakle, magtubod na talagang matatakopan kan atang na pantubos ni Jesu-Cristo an saimong mga sala.—1 Juan 4:9, 14.

¹⁶ An nagkapirang indibiduwal padagos na nakokonsensia sa mga kasalan ninda na sa katunayan napatawad na. Kun arog kaiyan an namamatean mo, girumdomon na pinatawad ni Jehova si Pedro asin an iba pang apostol dawa binayaan ninda an Saiyang namomotan na Aki sa oras na orog na kaipuhan sinda ni Jesus. Pinatawad ni Jehova an lalaking itiniwalag sa kongregasyon sa Corinto huli sa iskandalosong imoralidad alagad kan huri nagsolsol. (1 Cor. 5:1-5; 2 Cor. 2:6-8) May mga nagkasala nin magabat na sinasambit sa Tataramon nin Dios alagad nagsolsol asin pinatawad nin Dios.—2 Cron. 33:2, 10-13; 1 Cor. 6:9-11.

17. Ano an magigibo sa sato kan pantubos?

¹⁷ Papatawadon asin lilingawan ni Jehova an nakaagi mong mga sala kun tunay kang nagsosolsol saka inaako an saiyang pagkaherak. Nungkang isipon na dai matatakopan kan atang na pantubos ni Jesus an saimong mga kasalan. Sa pag-isip nin arog kaiyan, mabibiktima ka nin saro sa mga siod ni Satanas. Sa ibong kan gusto kan Diablo na paniwalaan mo, puedeng matakopan kan pantubos an mga kasalan kan gabos na nagkasala asin nagsolsol. (Tal. 24:16) An pagtubod sa pantubos makakapagian sa pasan mo na labi-labing pakamate nin kasalan asin makakatao sa saimo nin kosog na paglingkodan an Dios sa bilog mong puso, isip, asin kalag.—Mat. 22:37.

BAKO KITANG IGNORANTE SA MGA PAKANA NI SATANAS

18. Paano niato malilikayan an mga siod kan Diablo?

¹⁸ Mayong pakiaram si Satanas kun arin na silo an makakasiod sa sato, basta madakop nia kita. Huling bako kitang ignorante sa mga pakana ni Satanas, puede niatong malikayan na masaroan kan Diablo. (2 Cor. 2:10, 11) Dai kita madadakop sa saiyang mga siod, o silo, kun namimibi kita para sa kadonongan na atubangon an mga pagbalo. ‘Kun igwa sa saindo nin nagkukulang nin kadonongan,’ an surat ni Santiago, “humagad sia sa Dios, na nagtatao sa gabos nin nagsosopay asin dai nagsasayuma; asin iyan itatao sa saiya.” (Sant. 1:5) Kaipuhan niatong humiro kaoyon kan satong mga pamibi paagi sa regular na personal na pag-adal asin pag-aplikar kan Tataramon nin Dios. An mga pantabang sa pag-adal sa Biblia na itinatao kan grupong maimbod asin mapagmansay na oripon nagtatao nin liwanag dapit sa mga silo na ginagamit kan Diablo asin nagtatabang sa sato na malikayan iyan.

19, 20. Taano ta maninigo niatong ikaongis an maraot?

¹⁹ Pinapatalubo sa sato kan pamibi asin pag-adal sa Biblia an pagkamoot sa kun ano an marahay. Alagad mahalaga man na pataluboon niato an pagkaongis sa maraot. (Sal. 97:10) An paghorophorop sa magigin resulta nin makasadiring mga kamawotan makakatabang sa sato na malikayan iyan. (Sant. 1:14, 15) Kun manodan niatong ikaongis an maraot asin tunay na mamotan an marahay, an paon na ibinubugtak ni Satanas sa mga silo nia ikakabalde niato; dai kita maaakit kaiyan.

²⁰ Ipinagpapasalamat nanggad niato na tinatabangan kita nin Dios tanganing dai kita masaroan ni Satanas! Paagi sa Saiyang espiritu, Tataramon, asin organisasyon, iliniligtas kita ni Jehova “sa [saro na] maraot.” (Mat. 6:13) Sa sunod na artikulo, manonodan niato kun paano malilikayan an duwa pang silo na nahiling kan Diablo na epektibo tanganing madakop nin buhay an mga lingkod nin Dios.

Marigon na Manindogan Asin Likayan an mga Silo ni Satanas!

‘Tumindog kamo tumang sa mga katusohan kan Diablo.’—EFE. 6:11.

ANO AN ISISIMBAG NINDO?

Paano malilikayan nin sarong lingkod ni Jehova na masilo nin materyalismo?

Ano an makakatabang sa sarong Kristianong may agom na dai mahulog sa kalot nin pagsambay?

Taano ta nagtutubod ka na kapakipakinabang na marigon na manindogan tumang sa materyalismo asin seksuwal na imoralidad?

1, 2. (a) Taano ta mayo nin pagmalasakit si Satanas sa mga linahidan asin sa ‘ibang mga karnero’? (b) Anong mga silo ni Satanas an pag-oolayan sa artikulong ini?

SI Satanas na Diablo mayo nin pagmalasakit sa mga tawo, nangorogna sa mga naglilingkod ki Jehova. Sa katunayan, nakikipaglaban si Satanas sa linahidan na mga natatada. (Kap. 12:17) Pinangengenotan kan marigon na mga Kristianong iyan an paghuhulit kan Kahadean sa presenteng panahon asin ibinubuyagyag si Satanas bilang an namamahala sa kinaban na ini. An Diablo mayo man nin pagkamoot sa ‘ibang mga karnero,’ na nagsusuportar sa mga linahidan asin igwa kan paglaom na buhay na daing katapusan—an oportunidad na mayo na ki Satanas. (Juan 10:16) Bako nanggad makangangalas na grabe an saiyang kaanggotan! Baga man sa langit o sa daga an paglaom niato, bako nanggad interesado si Satanas sa ikakarahay niato. An katuyohan nia iyo na biktimahon kita.—1 Ped. 5:8.

² Tanganing magibo an saiyang katuyohan, naggagamit si Satanas nin manlaenlaen na silo, o siod. Huling ‘binubuta nia an isip’ kan mga dai nagtutubod, dai ninda inaako an maogmang bareta asin dai nahihiling an mga silong ini. Minsan siring, nasisiod man kan Diablo an nagkapirang nag-ako kan mensahe kan Kahadean. (2 Cor. 4:3, 4) Ipinahiling sa sinundan na artikulo kun paano niato malilikayan an tolo sa mga silo ni Satanas: (1) daing kontrol na pagtaram, (2) takot asin panggigipit, asin (3) labi-labing pakamate nin kasalan. Pag-olayan niato ngonyan kun paano kita marigon na makakapanindogan tumang sa duwa pang silo o siod ni Satanas—an materyalismo asin sugot na magsambay.

MATERYALISMO—AN SILO NA NAKAKAPUOT

3, 4. Paano puedeng magresulta sa materyalismo an mga kahaditan sa sistemang ini nin mga bagay?

³ Sa saro sa mga ilustrasyon ni Jesus, sinambit nia an banhi na isinabwag sa mga tunok. Sinabi nia na puedeng dangogon nin sarong tawo an tataramon, alagad ‘an kahaditan kan kinaban asin an kadayaan nin kayamanan minalamos kan tataramon, asin sia dai nagbubunga.’ (Mat. 13:22) Iyo, an materyalismo sarong siod na ginagamit kan satong kaiwal na si Satanas.

⁴ Duwang bagay an magkasabay na minalamos o minapuot kan tataramon. An saro iyo “an kahaditan kan kinaban,” o sistemang ini nin mga bagay. Sa ‘mga panahon na makahahandal,’ dakol an puedeng makapahadit sa saimo. (2 Tim. 3:1) Huli sa mahal na barakalon asin pagdakol nin mga daing trabaho, tibaad madepisilan kang pagkanigoon an ginaganar mo. Puedeng nahahadit ka man sa mangyayari sa maabot na panahon asin naiisip mo, ‘Igwa pa daw ako nin igong kuarta kun gurang na ako asin dai na makatrabaho?’ Huli sa siring na kahaditan, an nagkapira nagmamaigot na yumaman, na iniisip na an kuarta minagarantiya nin seguridad.

5. Sa anong paagi puedeng magin mapandaya an kayamanan?

⁵ Sinambit ni Jesus an saro pang bagay—“an kadayaan nin kayamanan.” Ini, kaiba kan kahaditan, puedeng makapuot kan tataramon. Sinasabi kan Biblia na proteksion o “kalasag an pirak.” (Par. 7:12) Minsan siring, an pagmamaigot na yumaman bakong madonong. Naaraman nin dakol na mantang mas naghihingoa sindang yumaman, mas nasisilo sinda nin materyalismo. An nagkapira nagin oripon pa ngani nin kayamanan.—Mat. 6:24.

6, 7. (a) Paano posibleng magin peligro an materyalismo sa pinagtatrabahohan nin saro? (b) Anong mga bagay an maninigong isipon nin Kristiano kun pinapa-overtime sia?

⁶ An pagmawot na yumaman puedeng magpoon na dai naririsa. Halimbawa, isip-isipa an eksenang ini. Nagrani sa saimo an among mo dangan nagsabi: “May maogma akong bareta! Nakakua an kompanya nin dakulang kontrata. An boot sabihon kaini parate kang ma-overtime sa trabaho sa masunod na pirang bulan. Pero sinesegurado ko sa saimo na sulit nanggad an sueldo.” Ano an magigin reaksion mo sa siring na alok? Siempre, an pagsustento sa saimong pamilya sarong seryosong paninimbagan, alagad bako sana iyan an paninimbagan mo. (1 Tim. 5:8) Igwa pa nin nagkapirang bagay na dapat mong konsideraron. Gurano kadakol na overtime an kalabot? Makakaolang daw an trabaho mo sa saimong espirituwal na mga aktibidad, kaiba na an mga pagtiripon kan kongregasyon asin an saindong banggi nin Pampamilyang Pagsamba?

⁷ Kun tinuturotimbang an saimong desisyon, ano an ibibilang mong pangenot—an dagdag na deposito mo sa bangko huli sa pag-overtime o an puedeng magin epekto kaiyan sa saimong espirituwalidad? Huli sa pagmawot na magkaigwa nin dakol na kuarta, dai mo na daw eenoton sa buhay an intereses kan Kahadean? Aram mo daw kun paano ka maaapektaran nin materyalismo kun papabayaan mo an espirituwal na salud mo asin kan saimong pamilya? Kun siring kaini an situwasyon mo, paano ka marigon na makakapanindogan asin makakalikay na mapuot nin materyalismo?—Basahon an 1 Timoteo 6:9, 10.

8. Anong mga halimbawa sa Kasuratan an makakatabang sa sato na siyasaton an satong estilo nin pamumuhay?

⁸ Tanganing malikayan na mapuot nin materyalismo, siyasaton sa panapanahon an saimong estilo nin pamumuhay. Nungka mong gugustohon na magin arog ni Esau, na ipinahiling paagi sa saiyang mga ginibo na pigmenos nia an espirituwal na mga bagay! (Gen. 25:34; Heb. 12:16) Asin siertong dai ka dapat magin arog kan lalaking mayaman na dinagka na ipabakal an mga rogaring nia, itao sa mga dukha, asin sumunod ki Jesus. Imbes na gibohon iyan, an lalaki ‘naghale na mamondo; huli ta sia igwa nin darakulang pagsadiri.’ (Mat. 19:21, 22) Huling nasiod kan kayamanan, dai nakamtan kan lalaking iyan an sarong dakulang pribilehio—na magin parasunod kan pinakadakulang tawo na nabuhay kasuarin man! Mag-ingat na dai mawara an pribilehio bilang disipulo ni Jesu-Cristo.

9, 10. Sono sa Kasuratan, ano an maninigo niatong magin pagmansay sa materyal na mga bagay?

⁹ Tanganing malabanan an sobrang paghadit sa materyal na mga bagay, himateon an konseho ni Jesus: ‘Dai kamo mahadit, na magsabi, “Ano an samong kakakanon?” o, “Ano an samong iinomon?” o, “Ano an samong gugubingon?” Huli ta an gabos na bagay na ini hinahanap nin mga Gentil; huli ta naaaraman kan saindong Amang langitnon na kinakaipuhan nindo an gabos na bagay na ini.’—Mat. 6:31, 32; Luc. 21:34, 35.

¹⁰ Imbes na mabiktima kan mapandayang kapangyarihan nin kayamanan, magmaigot na arogon an kaisipan kan kagsurat sa Biblia na si Agur, na nagsabi: “Dai mo ako pagpabayaan na magin pobrehon o mayamanon. Itao mo sana sa sako an kaipuhan ko.” (Tal. 30:8, Contemporary English Version) Malinaw na nasabotan ni Agur an nakakaprotektar na kahalagahan nin kuarta saka an mapandayang kapangyarihan nin kayamanan. Tandaan na an mga kahaditan kan sistemang ini asin an mapandayang kapangyarihan nin kayamanan puedeng magresulta sa espirituwal na kapahamakan. Huli sa sobrang paghadit sa materyal na mga bagay, puedeng maubos an panahon asin kosog mo, kaya an pagmawot mong enoton an intereses kan Kahadean dikit na sana o mayo na ngani. Kun siring, magin determinado kang dai madakop sa silo nin materyalismo ni Satanas!—Basahon an Hebreo 13:5.

PAGSAMBAY—KALOT NA MAY KATUSOHAN AN PAGKATAGO

11, 12. Paano puedeng mabiktima nin pagsambay an sarong Kristiano sa pinagtatrabahohan?

¹¹ An mga paraayam na gustong makadakop nin makosog na hayop puedeng magkalot sa lugar na parateng inaagihan kan bibiktimahon. Sa parate an kalot binubugtakan nin mahimpis na tahob na kompuesto nin mga bala asin daga tanganing dai marisa. An saro sa pinakamapangganang mga sugot ni Satanas kaagid kan silong iyan. Iyo iyan an kasalan na imoralidad. (Tal. 22:14; 23:27) May mga Kristianong nahulog sa kalot na iyan huling tinogotan ninda na mamugtak sinda sa mga situwasyon na madalion na sanang magkompromiso. An nagkapirang Kristianong may agom nagpadaog sa sugot na magsambay pagkatapos na magkaigwa nin salang romantikong relasyon.

¹² An salang romantikong relasyon tibaad magpoon sa pinagtatrabahohan mo. Sa katunayan, ihinayag nin sarong sekular na pag-adal na labing kabanga kan nagsambay na mga babae asin haros 3 sa 4 na nagsambay na lalaki an nagkaigwa nin bawal na relasyon sa sarong katrabaho. Dai daw malilikayan sa trabaho mo na makaibanan an mga bakong kasekso? Kun arog kaiyan, ano an relasyon mo sa sainda? Nagbubugtak ka daw nin mga limitasyon tanganing iyan mapagdanay na trabaho sana asin dai na lumampas pa dian? Halimbawa, pagkatapos nin paorootrong pakikipag-olay nin Kristianong sister sa sarong lalaking katrabaho, tibaad magtutuga na sia nin sekreto sa lalaking ini, na sinasabi pa ngani digdi an mga problema nindang mag-agom. Sa saro pang situwasyon, pagkatapos na makiamigo sa babaeng katrabaho, tibaad an sarong Kristianong lalaki magrason: “Pinapahalagahan nia an opinyon ko asin talagang dinadangog nia ako kun kaolay ko sia. Asin inaapresyar nia ako. Kutana arog man kaiyan an agom ko!” Nahihiling mo daw kun paano madali sanang makagibo nin pagsambay an mga Kristianong nasa siring na mga situwasyon?

13. Paano posibleng magpoon an salang romantikong relasyon sa laog nin kongregasyon?

¹³ Posibleng magpoon an salang romantikong relasyon sa laog nin kongregasyon. Isip-isipa an halimbawang ini na nangyari sa totoong buhay. Si Daniel asin an agom nia, si Sarah,a parehong regular payunir. Si Daniel man sarong “elder na nungkang minasayuma,” arog kan sabi nia. Entusiastikong inaako nia an kada pribilehiong itinatao sa saiya. Bilang kabtang kan saiyang ministeryo, limang hoben na lalaki an tinotokdoan ni Daniel sa Biblia—tolo sa sainda an nabautismohan. An bagong bautisadong mga brother na ini nangangaipo nin darudakulang tabang. Kan sibot si Daniel sa manlaenlaen na teokratikong asignasyon, si Sarah an parateng nagtatao kan tabang na iyan. Dai nahaloy arog kaini an parateng nangyayari: An dating mga tinotokdoan ni Daniel sa Biblia nangangaipo nin emosyonal na suporta, asin nakukua ninda iyan ki Sarah. Nangangaipo man si Sarah nin atension, asin nakukua nia iyan sa dating mga tinotokdoan ni Daniel sa Biblia. Nagin nakakagadan na silo iyan. “Huli sa dakol na bulan na pagparatabang kan sakong agom sa iba, sia nagluya sa espirituwal saka sa emosyonal na paagi,” an sabi ni Daniel. “Ini, kaiba na an katunayan na napabayaan ko sia, nagresulta sa kapahapahamak na pagbabago nin mga pangyayari. An agom ko nakagibo nin pagsambay sa saro sa dati kong mga tinotokdoan sa Biblia. Nagluya na palan sia sa espirituwal, pero sibot akong marhay sa mga pribilehio ko kaya dai ko iyan nariparo.” Paano mo malilikayan an siring na trahedya?

14, 15. Anong mga bagay an makakatabang sa mga Kristianong may agom na malikayan an kalot nin pagsambay?

¹⁴ Tanganing malikayan an kalot nin pagsambay, horophoropon an kahulogan nin kapanugaan sa pag-agom. Si Jesus nagsabi: “Idtong pinagsaro nin Dios, dai nin siisay man na magbulag sainda.” (Mat. 19:6) Nungkang isipon na mas mahalaga an teokratikong mga pribilehio mo kisa sa saimong agom. Dugang pa, girumdomon na kun parateng dai mo kaiba an saimong agom huli sa mga aktibidad na bakong mahalaga, iyan puedeng magparisa na may kulang sa pag-agoman nindo asin posibleng sumagkod sa sugot saka sa magabat na kasalan.

¹⁵ Pero, kun saro kang elder, paano an aripompon? Si apostol Pedro nagsurat: ‘Atamana nindo an aripompon nin Dios na yaon saindo, na mangnohon nindo, bakong huli sa kapiritan kundi sa sadiring boot; sono sa boot nin Dios; ni minsan huli sa maating pirak, kundi sa andam na pag-isip.’ (1 Ped. 5:2) An mga miembro kan kongregasyon na nasa pangangataman mo dai nanggad maninigong pagbaliwalaon. Minsan siring, sa pag-otob mo kan saimong papel bilang pastor, dai mo dapat pagpabayaan an saimong papel bilang agom. Magigin daing saysay—peligroso pa ngani—na ipokus an bilog mong atension sa espirituwal na pagpakakan sa kongregasyon mantang an saimong agom “nagugutom na marhay” sa harong. Si Daniel nagsabi, “Sayang sana kan paghihingoang asikasohon an mga pribilehio kun mapapahamak an saimong pamilya.”

16, 17. (a) Sa pinagtatrabahohan, anong praktikal na mga paagi an magigibo nin mga Kristianong may agom tanganing malinaw na ipahiling sa iba na dai sinda makikipagrelasyon sa bako nindang agom? (b) Magtao nin halimbawa nin ipinublikar na impormasyon na makakatabang sa mga Kristiano na malikayan an pagsambay.

¹⁶ Dakol na marahay na konseho an makukua sa An Torrengbantayan asin Awake! tanganing tabangan an mga Kristianong may agom na labanan an silo nin pagsambay. Halimbawa, An Torrengbantayan na Setyembre 15, 2006, nagtao kan sadol na ini: ‘Sa pinagtatrabahohan asin saen man na lugar, magmaan sa mga situwasyon na tibaad makaenkaminar nin kadayupotan. Halimbawa, an paggamit nin ekstrang mga oras na nagtatrabahong kaibaiba an bakong kasekso puedeng magtaong lugar sa sugot. Bilang may agom na lalaki o babae, maninigo na magin malinaw paagi sa saindong pagtaram asin hiro-hiro na kamo talagang dai makikipagrelasyon sa siisay man na bako nindong agom. Bilang saro na nagmamaigot na magibo an diosnon na debosyon, siertong dai nindo gugustohon na makaapod nin dai maninigong atension paagi sa pakigitilan o paagi sa pagigin bakong mabini sa saindong paggubing asin pag-alinyar. An pagbugtak nindo nin mga retrato kan saindong agom asin mga aki sa saindong pinagtatrabahohan magseserbing nahihiling na pagirumdom para sa saindo asin sa iba na pinapahalagahan nindo an saindong pamilya. Magin determinado na nungkang enkaminaron—o togotan pa ngani—an romantikong pang-aakit nin iba.’

¹⁷ An artikulo na may titulong “Marital Fidelity—What Does It Really Mean?” sa Awake! na Abril 2009 nagpapatanid tumang sa seksuwal na mga pagpantasia sa saro na bako nindong agom. Sinasabi kan artikulo na an mga pagpantasia sa sekso mas mapadakula kan posibilidad na makagibo ka nin pagsambay. (Sant. 1:14, 15) Kun may agom ka, madonong nanggad na sa panapanahon repasohon nindong mag-agom na magkaibanan an siring na impormasyon. An pag-agoman sarong areglo na inestablisar ni Jehova mismo, asin iyan sagrado. An pagtagama nin panahon na makipag-olay sa saimong agom dapit sa saindong pag-agoman sarong marahay na paagi na ikapahiling na pinapahalagahan mo an sagradong mga bagay.—Gen. 2:21-24.

18, 19. (a) Ano an mga epekto nin pagsambay? (b) Anong mga pakinabang an ibinubunga nin kaimbodan sa agom?

¹⁸ Kun natetentaran kang magkaigwa nin salang romantikong relasyon, horophoropon an nakakaraot na mga epekto nin pakikisaro asin pagsambay. (Tal. 7:22, 23; Gal. 6:7) An mga naggigibo nin imoralidad nakakapaanggot ki Jehova asin kinokologan an saindang agom saka an sadiri ninda. (Basahon an Malaquias 2:13, 14.) Sa kabaliktaran, horophoropon an mga pakinabang na makakamtan kan mga pinapagdanay an malinig na paggawe. Apuera sa paglaom na mabuhay nin daing sagkod, igwa man sinda kan pinakamarahay na buhay ngonyan, kaiba na an malinig na konsensia.—Basahon an Talinhaga 3:1, 2.

¹⁹ An salmista nag-awit: ‘Igwa nin dakol na katoninongan an mga namomoot sa pagboot nin Dios; asin manongod sa sainda mayo nin pagkadalinas.’ (Sal. 119:165) Kaya kamotan an katotoohan, asin ‘maanan nindo nin marhay kun paano an saindong paglakaw, bakong siring sa mangmang, kundi siring sa madonong’ sa maraot na mga panahon na ini. (Efe. 5:15, 16) An dalan na linalakawan niato pano nin mga silo na ginagamit ni Satanas tanganing siodon an tunay na mga parasamba. Alagad kita nasasangkapan na marhay tanganing protektaran an satong sadiri. Tinawan kita ni Jehova kan kaipuhan niato tanganing marigon na makapanindogan asin ‘masigbo an gabos na naglalaad na busog [kan saro na] maraot’!—Efe. 6:11, 16.