Posibleng nahihiling mo sinda na nakikipag-ulay sa iba dapit sa Bibliya sa harong-harong o sa pampublikong mga lugar, nagtatao nin mga babasahon na basado sa Bibliya, saka nag-aalok nin daing bayad na pag-adal sa Bibliya. Tibaad saro sa sainda an nagtao saimo kan magasin na ini. Pero, tibaad ihapot mo pa man giraray, ‘Siisay talaga an Mga Saksi ni Jehova?’ Posibleng naiisip mo man an arog kan mga nasambit sa inutan.

Kun naihahapot o naiisip mo man an arog kaiyan, sain ka makakakua nin simbag? Paano mo maaaraman kun ano man nanggad an tinutubod kan Mga Saksi ni Jehova? Sain sinda nagkukua nin pondo para sa saindang gibuhon saka mga lugar nin pagsamba? Taano ta pigbibisita ka ninda sa saindong harong o kinakaulay sa pampublikong mga lugar?

“Dakul akong nababasa sa Internet manungod sa Mga Saksi ni Jehova,” an sabi ni Cecilie, na sinambit sa inutan. “May nadadangog akong mga sabi-sabi saka mga istoryang kontra sainda. Kaya nagin maraot an paghiling ko sa mga Saksi ni Jehova.” Pero kan makaulay na mismo ni Cecilie an mga Saksi ni Jehova, nakontento siya sa simbag ninda.

Gusto mo man daw na makakua nin mapagtitiwalaan na simbag sa mga hapot mo manungod sa Mga Saksi ni Jehova? Magdulok tabi sa mas nakakaaram talaga kan bagay na iyan​—an mga Saksi ni Jehova mismo, an nagpublikar kan magasin na ini. (Talinhaga 14:15) Naglalaom kami na matatabangan ka kan masurunod na artikulo na maaraman kun siisay kami asin an mga tinutubod mi, saka masabutan an dapit sa gibuhon mi.

Internasyonal an organisasyon mi. Dai kami konektado sa ibang grupo nin relihiyon. Nasa Estados Unidos an pambilog na kinaban na headquarters mi, pero an kadaklan na mga Saksi ni Jehova nakaistar sa iba-ibang nasyon. Sa katunayan, mga walong milyon kami na nagtutukdo nin Bibliya sa labing 230 kadagaan. Ginigibo mi ini bilang pagsunod sa sinabi ni Jesus: ‘Ining ebanghelyo kan Kahadian ihuhulit sa bilog na kinaban sa pagpapatotoo sa gabos na nasyon.’​—Mateo 24:14.

Sain man kami nakaistar, sadiyosan ming sinusunod an ley kan gobyerno. Pero hinihinguwa ming magdanay na neutral pag-abot sa pulitika. Huli ini sa pagsunod mi sa sinabi ni Jesus sa mga Kristiyano na dai magin kabtang kan kinaban. Kaya dai kami nakikilabot sa mga aktibidad saka mga isyu sa pulitika o nagsusuportar sa giyera. (Juan 15:19; 17:16) Sa katunayan, kaidtong World War II, an mga Saksi ni Jehova prineso, pinasakitan nin grabe, asin ginadan pa ngani huling habo nindang ikompromiso an saindang neutralidad. An sarong dating obispong Aleman nagkomento: “Masasabi nanggad ninda na sinda sana an nagsayumang magsuldados huli sa saindang konsiyensiya kaidtong Third Reich.”

Sa ibong kaiyan, dai kami namumuhay na suway sa iba. Ipinamibi kaidto ni Jesus sa Diyos an mga parasunod niya: ‘Dai ako nakikimahirak na halion mo sinda sa kinaban.’ (Juan 17:15) Kaya, mahihiling mo kami na nagtatrabaho, namamakal, asin nag-eeskuwela sa satong komunidad.

Nagtutubod kami na ‘an gabos na Kasuratan ipinasabong nin Diyos asin kapaki-pakinabang.’ (2 Timoteo 3:16) Ginagamit mi an Bibliya bilang praktikal na giya para makanuod dapit sa Kaglalang asin magkaigwa nin kapaki-pakinabang na buhay.

Sinasabi kan Bibliya: ‘Magpakamidbid sinda na an saimong ngaran Jehova; ika sana an halangkawon sa ibabaw nin daga.’ (Salmo 83:18) Kaya si Jehova sana an Diyos na sinasamba mi. Bilang mga Saksi niya, hinihinguwa mi man na sabihon sa iba an personal na pangaran niya.​—Isaias 43:10-12.

Bilang mga Kristiyano, nagtutubod kami na si Jesus, ‘an Aki nin Diyos,’a nagdigdi sa daga asin nagin Mesiyas. (Juan 1:34, 41; 4:25, 26) Nagadan siya, binuhay liwat, asin suminakat sa langit. (1 Corinto 15:3, 4) Pag-abot nin panahon, nagin Hadi siya kan Kahadian nin Diyos. (Kapahayagan 11:15) An Kahadian na iyan sarong totoong gobyerno na mabalik kan Paraiso digdi sa daga. (Daniel 2:44) Asin sa Paraiso, ‘an mga mahuyo magmamana kan daga asin mararanga nin labi-labi sa katuninungan,’ an sabi kan Bibliya.​—Salmo 37:11, 29.

Nagtutubod an Mga Saksi ni Jehova na nakakatabang sa mga tawo an mga prinsipyo sa Bibliya dawa ngunyan. (Isaias 48:17, 18) Kaya hinihinguwa mi talagang masunod iyan. Halimbawa, nagpapatanid an Bibliya dapit sa mga bagay na nakakapaati nin isip asin hawak, kaya dai kami nagsisigarilyo o nagdodroga. (2 Corinto 7:1) Piglilikayan mi man an mga bagay na direktang ipinagbabawal kan Bibliya, arog kan pagburat, seksuwal na imoralidad, asin paghabon.—1 Corinto 6:9-11.

Taon-taon, ginatos na milyon na Bibliya asin mga babasahon na basado sa Bibliya an iniimprenta mi saka ipinapanao. Nagtutugdok kami nin mga sangang opisina asin sadiri ming imprentahan sa iba-ibang parte kan kinaban. Manampulong ribong kongregasyon an nagtitiripon sa simple pero magayon na mga lugar nin pagsamba na inaapod na Kingdom Hall. Sain hali an pondo na ginagamit mi sa gabos na iyan?

An samong gibuhon suportado gabos nin boluntaryong mga donasyon. (2 Corinto 9:7) Kan 1879, an ikaduwang isyu kan magasin na ini nagsabi: “Nagtutubod kami na si JEHOVA an nagsusuportar sa ‘Zion’s Watch Tower’ [apod kaidto sa magasin na ini], kaya nungka ining makikimahirak o mahagad nin suporta sa mga tawo.” Iyan an paniniwala mi sagkod ngunyan.

An mga donasyon na nareresibi direktang ipinapadara sa mga sangang opisina o ihinuhulog sa donation box na yaon sa mga Kingdom Hall. Pero dai kami nin ikapo, koleksiyon, o nagpapabayad para sa mga serbisyo saka publikasyon mi. Dai kami binabayadan tanganing maghulit, magtukdo sa kongregasyon, o magtabang sa pagtugdok nin mga lugar nin pagsamba. Kauyon ini kan sinabi ni Jesus: “Inako nindong daing bayad, itao man nindong daing bayad.” (Mateo 10:8) Daing suweldong mga miyembro nin orden nin relihiyon an gabos na ministro sa mga sangang opisina mi asin sa samong pambilog na kinaban na headquarters, pati na an mga miyembro kan Namamahalang Grupo kan Mga Saksi ni Jehova.

Ginagamit man an mga donasyon pag may kalamidad. Handang magtabang an mga Kristiyano kaidtong inot na siglo sa mga biktima nin kalamidad. (Roma 15:26) Ngunyan, nagtatao man kami nin ayuda sa mga inagihan nin kalamidad, arog kan paghirahay kan saindang harong asin mga lugar nin pagsamba, saka pagtao nin kakanon, bado, asin bulong.

Midbid na marhay siguro kaming Mga Saksi ni Jehova huli sa samong mahiwas na pag-eebanghelyo o paghuhulit​—sa harong-harong, sa pampublikong mga lugar, asin sain man may tawo. Taano ta ginigibo mi iyan?

Naghuhulit kami huling gusto ming maumaw an Diyos asin ipamidbid an pangaran niya. (Hebreo 13:15) Gusto mi man na sunudon si Cristo Jesus, na nagtao kan pagbuot na ini: ‘Paduman kamo asin gibuhon nindong disipulo an gabos na nasyon, na tukduan sinda na utubon an gabos na ipinagbuot ko saindo.’​—Mateo 28:19, 20.

Apuwera diyan, namumutan mi an samong kapwa. (Mateo 22:39) Siyempre, aram mi na an kadaklan sa mga nakakaulay mi may sadiri nang relihiyon saka bakong gabos interesado sa mensahe mi. Pero nagtutubod kami na nakakapagligtas nin buhay an mga itinutukdo kan Bibliya. Kaya padagos kaming nakikipag-ulay sa iba, na ‘daing untok sa pagtukdo asin paghulit na si Jesus iyo an Cristo,’ arog kan ginibo kan mga Kristiyano kan inot na siglo.​—Guibo 5:41, 42.

Kadaklan sa mga nagbabasa kan babasahon mi bakong Saksi ni Jehova. Saka an minilyon na tinutukduan mi sa Bibliya iba an relihiyon. Pero nagpapasalamat sinda na binibisita sinda kan mga Saksi.

Posibleng may mga hapot ka pa dapit sa Mga Saksi ni Jehova. Aramon tabi an simbag. Puwede kang . . .

• Maghapot mismo sa mga Saksi ni Jehova.

• Maglaog sa website mi na www.jw.org.

• Mag-atender sa samong Kingdom Hall, na bukas sa gabos saka mayo nin koleksiyon.