1. Paano ta ginagamit sa ministeryo an pamibi ni Jesus na nasa Mateo 6:9-13?

TUOM kan dakul na tawo an Pamibi kan Kagurangnan o Ama Niyamo. Pag naghaharong-harong kita, parati tang ginagamit an pamibing ini tanganing tabangan an mga kagharong na masabutan na an Kahadian nin Diyos sarong tunay na gobyerno na mabalik kan Paraiso sa daga. Ginagamit ta man an inot na kahagadan sa pamibing iyan tanganing ipahiling na an Diyos may personal na pangaran na dapat pakangbanalon, o ibilang na banal.​—Mat. 6:9, NW.a

2. Paano ta naaraman na habo ni Jesus na termino por termino tang uruutruhon an modelong pamibi?

² Gusto daw ni Jesus na termino por termino tang uruutruhon iyan sa kada pagpamibi ta, arog kan ginigibo kan dakul sa Kakristiyanuhan? Dai. Bago itao ni Jesus an pamibing ini bilang arugan o modelo, sinabi niya: “Kun namimibi, dai nindo pagparauruutruhon an iyo man sanang mga tataramon.” (Mat. 6:7, NW) Sa ibang pagkakataon, sinambit niya giraray an pamibing ini pero ibang mga termino na an ginamit niya. (Luc. 11:1-4) Paagi kaiyan, itinutukdo sa sato ni Jesus kun anong mga bagay an kaipuhan tang hagadon asin kun ano an mas mahalaga uyon sa pagkakasunod-sunod kaiyan. Kaya angay ining apudon na modelong pamibi.

3. Ano an puwede tang ihapot sa sadiri mantang pinag-aadalan ta an modelong pamibi?

³ Sa artikulong ini asin sa masunod, pag-aadalan ta an mga kahagadan sa modelong pamibi. Mantang ginigibo ta iyan, haputon an sadiri, ‘Paano makakatabang an modelong pamibing ini para mas mapagayon an kalidad kan sako mismong pamibi?’ Asin an mas mahalaga, ‘Namumuhay daw ako kauyon kan pamibing iyan?’

“AMA NIYAMO NA NASA LANGIT”

4. Ano an ipinapagirumdom sa sato kan mga tataramon na “Ama niyamo,” asin paano si Jehova nagigin “Ama” para sa mga Kristiyano na may daganon na paglaom?

⁴ An paggamit kan mga tataramon na “Ama niyamo,” imbes na “Ama ko,” nagpapagirumdom sa sato na kabilang kita sa “bilog na kasararuan nin magturugang” na tunay na namumuot sa lambang saro. (1 Ped. 2:17, NW) Magayunon na pribilehiyo nanggad iyan! An linahidan na mga Kristiyano na may paglaom na mabuhay sa langit inampon na nin Diyos bilang mga aki niya, kaya lubos nindang maaapod si Jehova bilang “Ama.” (Roma 8:15-17) An mga Kristiyano na may paglaom na mabuhay sagkod lamang sa daga puwede man na apudon si Jehova bilang “Ama.” Siya an Kagtao kan saindang buhay, asin may pagkamuot niyang itinatao an pangangaipo ninda. Kun an mga may daganon na paglaom magin perpekto na asin mapatunayan nang maimbod sagkod sa pangultimong pagbalo, lubos na sindang maaapod na mga aki nin Diyos.​—Roma 8:21; Kap. 20:7, 8.

5, 6. Anong marahay na regalo an ikakatao kan mga magurang sa saindang mga aki, asin ano an dapat na gibuhon kan mga aki sa regalong ini? (Hilingon an ritrato sa kapinunan kan artikulo.)

⁵ Marahay na regalo para sa mga aki an itinatao kan mga magurang kun tinutukduan ninda sinda na mamibi asin tinatabangan sindang mamidbid si Jehova bilang saindang mapagmakulog na Ama sa langit. Sarong brother na naglilingkod ngunyan sa South Africa bilang paraataman nin sirkito an nagsabi: “Puon kan mamundag an duwa kong aking babayi, burubanggi kaming magkairibanan na namimibi, apuwera na sana kun mayo ako. Parating sinasabi kan mga aki ko na dai ninda natatandaan an eksaktong sinabi ko sa mga pamibing idto. Pero, natatandaan ninda kun gurano kasagrado kan pakikipag-ulay na idto sa satong Ama, si Jehova, asin an katuninungan saka katiwasayan na namatian ninda. Kan kaya na nindang mamibi, pinapakusugan ko sainda an pamibi ninda para madangog ko kun paano ninda sinasabi ki Jehova an iniisip saka namamatian ninda. Magayon na pagkakataon idto para maaraman ko kun ano an nasa puso ninda. Dangan mabuot ko sindang tinutukduan na iiba sa pamibi ninda an mahalagang mga bagay na nasa modelong pamibi tanganing magin makahulugan an mga pamibi ninda.”

⁶ Nagin magayon an resulta kaini huling nagdakula na may marahay na espirituwalidad an saiyang duwang aki. May agom na sinda ngunyan asin maugmang naglilingkod nin bilog na panahon kaiba kan saindang agom. An pagtabang sa mga aki na magkaigwa nin haraning relasyon ki Jehova an pinakamarahay na regalong maitatao kan mga magurang sa saindang mga aki. Pero siyempre, nakadepende sa kada aki an pagpapadanay kan mahalagang marhay na relasyon na ini. Kaiba digdi an pakanuod na mamutan asin igalang nindang marhay an pangaran nin Diyos.​—Sal. 5:11, 12; 91:14.

“PAKANGBANALON AN NGARAN MO”

7. Ano an pribilehiyo kan mga lingkod nin Diyos, pero ano an hinahagad kaiyan sa sato?

⁷ Pribilehiyo nanggad niyato na, bako sanang maaraman an pangaran nin Diyos, kundi darahon man iyan bilang ‘sarong banwaan [para] sa saiyang ngaran.’ (Gui. 15:14; Isa. 43:10) Ipinapamibi ta sa satong Ama sa langit: “Pakangbanalon an ngaran mo.” Huli sa kahagadan na ini, mapapahiro ka man na hagadon ki Jehova na tabangan kang dai makagibo o makataram nin mga bagay na matao nin katuyawan sa saiyang banal na pangaran. Habo niyato na magin arog kan iba kaidtong inot na siglo na dai ginigibo an itinutukdo ninda. Dapit sa sainda, nagsurat si apostol Pablo: ‘An ngaran nin Diyos pinaglalanghadan sa mga [nasyon] huli sa saindo.’​—Roma 2:21-24.

8, 9. Magtao nin halimbawa kun paano binebendisyunan ni Jehova an mga gustong mapabanal an Saiyang pangaran.

⁸ Gusto tang mapabanal an pangaran nin Diyos. Sarong sister sa Norway, na may dos anyos na aking lalaki, an amay na nabalo. “Masakiton na panahon idto sa buhay ko,” an sabi niya. “Aroaldaw akong namimibi, haros oras-oras pa ngani, na tabangan akong makontrol an sakong emosyon ‘nganing dai ko matawan nin rason si Satanas na tuyaon si Jehova huli sa salang desisyon ko o gibo. Gusto kong mapabanal an pangaran ni Jehova, saka gusto ko man na mahiling giraray kan aki ko an saiyang ama sa Paraiso.”​—Tal. 27:11.

⁹ Sinimbag daw ni Jehova an pamibi niya? Iyo. Napakusog an sister na ini huli sa regular na pakikiasosyar niya sa mga kapagtubod, na nagmamakulog sa saiya. Pakalihis nin limang taon, nagin agom siya nin sarong elder. Bawtisado na an saiyang aki, na ngunyan 20 anyos na. Sinabi niya: “Ugmahon talaga ako ta tinabangan ako kan sakong agom sa pagpadakula saiya.”

10. Ano an kaipuhan tanganing lubos na mapabanal an pangaran nin Diyos?

¹⁰ Ano an kaipuhan tanganing lubos na mapabanal asin mawara an gabos na katuyawan na itinatao sa pangaran nin Diyos? Hahalion nguna ni Jehova an gabos na tuyong isinisikwal an saiyang soberaniya. (Basahon an Ezequiel 38:22, 23.) Dangan, luway-luway na magigin perpekto an katawuhan. Talagang gustong-gusto na niyatong umabot an panahon na pinapabanal na an pangaran ni Jehova kan gabos na lingkod niya sa langit asin daga! Asin sa katapos-tapusi, an satong mamumuton na Ama sa langit ‘magigin gabos sa gabos.’​—1 Cor. 15:28.

“DUMATONG LUGOD AN KAHADIAN MO”

11, 12. Kan 1876, ano an nasabutan kan tunay na mga Kristiyano sa tabang ni Jehova?

¹¹ Bago magsakat si Jesus sa langit, hinapot siya kan saiyang mga apostol: ‘Kagurangnan, ibabalik mo ngunyan an Kahadian sa Israel?’ Sinabi ni Jesus na bako pang panahon para maaraman ninda kun nuarin mapuon an pamamahala kan Kahadian nin Diyos. Ipinahiling niya sa saiyang mga disipulo na an kaipuhan nindang tawan nin pokus iyo an mahalagang gibuhon na pagpapatotoo. (Basahon an Guibo 1:6-8.) Pero, itinukdo man niya sa sainda na antisiparon an pagdatong kan Kahadian nin Diyos. Kaya puon pa kan panahon kan mga apostol, ipinapamibi na kan mga Kristiyano na dumatong na iyan.

¹² Kan madali nang mamahala sa langit an Kahadian nin Diyos sa irarom kan pamamahala ni Jesus, tinabangan ni Jehova an saiyang mga lingkod sa daga na maaraman kun nuarin iyan mangyayari. Kan 1876, ipinublikar sa magasin na Bible Examiner an sarong artikulong isinurat ni Charles Taze Russell na may titulong “Gentile Times: When Do They End?” Sinasabi diyan na an 1914 sarong mahalagang taon. An “pitong panahon” sa hula ni Daniel ikinonektar kan artikulo sa ‘panahon kan mga Hentil’ na sinambit ni Jesus.b​—Dan. 4:16; Luc. 21:24.

13. Ano an nangyari kan 1914, asin ano an pinapatunayan kan mga pangyayari sa kinaban puon kan taon na iyan?

¹³ Kan 1914, nagkagiyera sa pag-ultanan kan mga nasyon sa Europa na luminakop sa bilog na kinaban. An giyerang iyan na natapos kan 1918, nagresulta sa grabeng tiggutom. Nagkaigwa man nin epidemya nin trangkaso na mas dakul na tawo an ginadan kisa sa giyera. Kaya nagpupuon nang mautob kaidto “an tanda” na sinabi ni Jesus na magpapatunay kan saiyang dai nahihiling na presensiya bilang bagong Hadi sa daga. (Mat. 24:3-8; Luc. 21:10, 11) Dakul na ebidensiya an nagpapatunay na kan taon 1914 itinao an “korona” sa satong Kagurangnan na Jesu-Cristo. Siya “nagluwas na nandadaog asin tanganing tapuson an saiyang pandadaog.” (Kap. 6:2, NW) Lininig niya an langit paagi sa pakikigiyera ki Satanas asin sa mga demonyo kaini, dangan ihinulog niya sinda sa daga. Puon kaidto, nagkakatotoo na sa katawuhan an ipinasabong na mga tataramon na ini: ‘Hirak man kan daga asin kan dagat, huli ta an Diyablo buminaba na diyan sa saindo na igwa nin dakulang kaanggutan, sa pakaaram na siya igwa na sana nin kadikit na panahon.’​—Kap. 12:7-12.

14. (a) Taano ta importanteng ipamibi pa niyato sagkod ngunyan na dumatong an Kahadian nin Diyos? (b) Igwa kita nin anong pribilehiyo?

¹⁴ Sinisimbag sa sato kan hula sa Kapahayagan 12:7-12 kun taano ta pagkamundag kan Kahadian nin Diyos sa langit, nagpuon man na magkaigwa nin kapaha-pahamak na mga pangyayari sa daga na nagpapasakit sa katawuhan sagkod ngunyan. Si Jesus, an Hadi kan Kahadian nin Diyos, nagpuon na maghadi mantang namamahala pa an saiyang mga kaiwal. Sagkod na dai pa natatapos an saiyang pandadaog asin dai pa niya napapara an karatan sa daga, padagos ta pang ipapamibi na dumatong an Kahadian nin Diyos. Kasabay kaiyan, dapat kitang mamuhay kauyon kan pamibing iyan paagi sa pakikikabtang sa sarong gibuhon na mautob kan pinakaimportanteng kabtang kan “tanda.” Si Jesus naghula: ‘Ining ebanghelyo nin Kahadian ihuhulit sa bilog na kinaban sa pagpapatotoo sa gabos na nasyon, dangan madatong an katapusan.’​—Mat. 24:14.

“MANGYARI LUGOD AN BUOT MO . . . SA DAGA”

15, 16. Paano kita mamumuhay kauyon kan kahagadan na mangyari an kabutan nin Diyos sa daga?

¹⁵ Kaidtong mga 6,000 na taon na an nakaagi, perpektong isinasagibo sa daga an kabutan nin Diyos. Kaya nasabi ni Jehova na an gabos ‘labi-labi karahay.’ (Gen. 1:31) Dangan nagrebelde si Satanas, asin puon kaidto, kakadikit na sanang tawo sa daga an naggigibo kan kabutan nin Diyos. Pero ngunyan, pribilehiyo niyatong mabuhay sa panahon na mga walong milyon nang Saksi an dai sana namimibi na lugod mangyari an kabutan nin Diyos sa daga kundi naghihinguwa man na mamuhay kauyon kan pamibing iyan. Ginigibo ninda iyan paagi sa pamumuhay na nakakapaugma sa Diyos asin sa maigot na pakikikabtang sa paggibo nin disipulo.

¹⁶ Halimbawa, sarong sister na nabawtismuhan kan 1948 asin nagin misyonera sa Africa an nagsabi: “Kauyon kan kahagadan na ini sa modelong pamibi, parati kong ipinapamibi na mahanap an gabos na arog-karnerong tawo asin matabangan sindang mamidbid si Jehova sagkod na may panahon pa. Saka bago ako magpatotoo, namimibi nguna ako na tawan ako nin kadunungan asin maabot ko an puso kan mga tawo. Asin kun dapit sa mga arog-karnero na nahanap ta na, ipinapamibi ko ki Jehova na lugod bendisyunan niya an mga paghihinguwa tang maataman sinda.” Kaya huli kaini, mapanggana an ministeryo kan 80 anyos na sister na ini asin dakul siyang natabangan na magin Saksi ni Jehova. Siguradong may naiisip ka man na mga tugang na garo ‘inatang’ an sadiri sa paggibo kan kabutan nin Diyos dawa nalilimitaran na kan saindang paggurang.​—Basahon an Filipos 2:17.

17. Ano an masasabi mo sa mga gigibuhon ni Jehova sa maabot na panahon bilang simbag sa kahagadan ta na mangyari sa daga an saiyang kabutan?

¹⁷ Padagos pa niyatong ipapamibi na mangyari an kabutan nin Diyos sagkod na yaon pa sa daga an mga kaiwal kan Kahadian nin Diyos. Dangan, maabot an panahon na mahihiling niyato na lubos nang nangyayari sa daga an kabutan nin Diyos pag binubuhay na liwat sa paraisong daga an binilyon na nagadan. Sinabi ni Jesus: ‘Dai kamo magngalas kaini huli ta an oras madatong na an gabos na nasa lulubngan makakadangog kan sakong tingog asin maruluwas.’ (Juan 5:28, 29) Marahayon nanggad na yaon kita sa panahon na iyan tanganing sabaton an binuhay liwat niyatong mga namumutan! ‘Papahidon nin Diyos an gabos na luha sa satong mga mata.’ (Kap. 21:4) Kadaklan sa mga bubuhayon liwat mga “bakong matanos” o mga tawong nagadan na dai naaraman an katotoohan manungod sa Diyos na Jehova asin sa saiyang Aki. Sarong pribilehiyo na itukdo sa sainda an kabutan asin katuyuhan nin Diyos tanganing matabangan sindang magkamit kan “buhay na dai nin katapusan.”​—Gui. 24:15; Juan 17:3.

18. Ano an mga pinakakaipuhan kan katawuhan?

¹⁸ Kun dumatong na an Kahadian nin Diyos, mapapabanal kaiyan an pangaran ni Jehova, asin magkakaigwa nin katuninungan saka pagkauruyon sa bilog na uniberso. Ini an mga pinakakaipuhan kan katawuhan na maitatao sana pag masimbag na an tulong inot na kahagadan sa modelong pamibi. Pero, may iba pa kitang importanteng mga pangangaipo na yaon sa huring apat na kahagadan sa modelong pamibi ni Jesus. Pag-uulayan iyan sa masunod na artikulo.

1-3. Taano ta sigurado an sarong sister na aram ni Jehova an mga kaipuhan niyato?

DAI malilingawan ni Lana an nangyari sa saiya sa Germany kan tig-init nin 2012. Namatian niyang sinimbag ni Jehova an duwang espesipikong pamibi niya. Kan nakasakay siya sa tren pa-airport, namibi siya ki Jehova na lugod may mapatotoohan siya. Pag-abot niya sa airport, naaraman niyang kanselado an flight niya asin sa sunod na aldaw pa siya makakahali. Namibi giraray siya ki Jehova huling haros ubos na an kuwarta niya asin mayo siyang matuturugan.

² Katatapos pa sana kan pamibi ni Lana kan may hoben na lalaking mag-apod sa saiya, “O Lana, nag-aano ka digdi?” Dati niya ining kaeskuwela. Hinatod ini kan saiyang ina asin lola sa flight kaini pa-South Africa. Kan maaraman kan ina, na an pangaran Elke, an sitwasyon ni Lana, inalok siya kaini na sa harong na ninda magturog. Inistimar na marhay kan ina asin lola si Lana saka dakul sindang hapot manungod sa mga paniniwala niya patin sa ginigibo niya bilang regular payunir.

³ Pagkaaga, pakapamahaw, dakul pang hapot ninda sa Bibliya an sinimbag ni Lana, asin hinagad niya an adres saka numero kan telepono ninda para may magdalaw sa sainda. Ligtas na nakapuli si Lana sa harong niya asin padagos siyang nagpapayunir. Sigurado siya na an ‘Paradangog nin pamibi’ an nasa likod kan magayon na mga nangyari sa saiya.​—Sal. 65:2.

4. Anong mga pangangaipo ta an pag-uulayan niyato?

⁴ Kun bigla kitang mapaatubang sa problema, madali sana sa sato na makapamibi para sa tabang, asin nauugma si Jehova na dangugon an pamibi kan maimbod na mga lingkod niya. (Sal. 34:15; Tal. 15:8) Pero kun huhurop-hurupon ta an modelong pamibi, maaaraman niyato na may iba pang bagay na mas kaipuhan niyato na tibaad nalilingawan tang ipamibi. Halimbawa, aramon ta kun paano ipinahiling sa tulong huring kahagadan sa modelong pamibi an satong mga pangangaipo sa espirituwal. Asin may iba pa daw kitang puwedeng gibuhon para makapamuhay kauyon kan ikaapat na kahagadan dapit sa satong kakanon para sa aldaw?​—Basahon an Mateo 6:11-13.a

“ITAO MO SA SAMO NGUNYAN AN SAMUYANG KAKANON PARA SA ALDAW NA INI”

5, 6. Taano ta importante an paghagad ta nin kakanon para sa aldaw dawa supisyente man kita?

⁵ Mangnuhon na bako sanang “sakuyang” kakanon an hinahagad sa pamibing ini kundi “samuyang” kakanon para sa aldaw. Si Victor, na sarong paraataman nin sirkito sa Africa, nagsabi: “Parati akong udok na nagpapasalamat ki Jehova na kaming mag-agom dai na gayong naghahadit kun sain mi kukuanon an sunod ming kakakanon o an arkila sa pig-iistaran mi. An mga tugang an nag-aasikaso kan mga kaipuhan mi aroaldaw. Pero ipinapamibi ko an mga nagtatabang sa samo na makaya ninda an sakit sa pagbuhay na inaatubang ninda.”

⁶ Tibaad may supisyente kitang kakanon, pero may mga tugang kita na nagtitios o mga naapektaran nin kalamidad. Bako sanang dapat ta sindang ipamibi, kundi dapat man kitang humiro kauyon kan satong pamibi. Halimbawa, puwede tang ihiras sa sainda an mga bagay na igwa kita. Puwede man na regular kitang magtao nin donasyon para sa pambilog na kinaban na gibuhon, huling aram niyato na nagagamit an mga pondong iyan sa pagtabang sa satong mga tugang.​—1 Juan 3:17.

7. Paano inilustrar ni Jesus an saiyang sadol na dai kita “nuarin man maghadit manungod sa masunod na aldaw”?

⁷ Kan sambiton ni Jesus an satong kakanon para sa aldaw, posibleng marhay na an buot niyang sabihon iyo an presenteng mga pangangaipo ta. Kaya inilustrar niya kun paano binabaduan nin Diyos an mga burak, dangan naghapot siya: “Bako daw na mas tatawan niya kamo nin ibabado, kamo na kakadikit an pagtubod? Kaya dai kamo nuarin man maghadit asin magsabi, . . . ‘Ano an isusulot mi?’” Bilang kongklusyon, sinabi niya giraray an mahalagang sadol na ini: “Dai kamo nuarin man maghadit manungod sa masunod na aldaw.” (Mat. 6:30-34, NW) Ipinapahiling kaini na dapat kitang magin kontento sa panginot na mga pangangaipo ta sa kada aldaw imbes na magin materyalistiko. Kaiba sa mga pangangaipong ini an satong istaran, trabaho para masustentuhan an satong pamilya, asin kadunungan tanganing makagibo kita nin tamang desisyon dapit sa satong salud. Pero kun an ipinapamibi sana niyato iyo an dapit sa mga pangangaipo ta sa pisikal, dai kita nagigin timbang. May pangangaipo kita sa espirituwal na mas importanteng ipamibi niyato.

8. Anong importanteng pangangaipo an ipinapagirumdom sa sato kan pagsambit ni Jesus dapit sa satong kakanon para sa aldaw? (Hilingon an ritrato sa kapinunan kan artikulo.)

⁸ Ipinapagirumdom sa sato kan pagsambit ni Jesus dapit sa satong kakanon para sa aldaw na kaipuhan ta an espirituwal na kakanon. Sinabi kan satong Kagurangnan: “Dapat na bakong sa tinapay sana mabuhay an tawo, kundi sa lambang tataramon na minaluwas sa nguso ni Jehova.” (Mat. 4:4, NW) Kaya dapat na pirmi tang ipamibi na padagos na itao sa sato ni Jehova an napapanahon na espirituwal na kakanon.

“IPATAWAD MO SA SAMO AN SAMONG MGA UTANG”

9. Taano ta masasabing “utang” ta ki Jehova an satong mga kasalan?

⁹ Taano ta ginamit ni Jesus an tataramon na “utang,” mantang sa saro pang pagkakataon, ginamit niya an tataramon na “kasalan”? (Mat. 6:12, NW; Luc. 11:4) Labi nang 60 taon an nakaagi, ipinaliwanag iyan kan magasin na ini: “Kun magkasala kita huli sa pagsuway ta sa ley nin Diyos, nagkakautang kita sa saiya. . . . Huli sa satong kasalan, puwedeng hagadon nin Diyos an satong buhay bilang bayad. . . . Puwede niyang bawion sa sato an saiyang katuninungan, kaya mawawara an matuninong na relasyon ta sa saiya. . . . Obligasyon ta na mamutan siya, na maipapahiling ta sa pagsunod sa saiya; kaya kun magkasala kita, dai kita nakakabayad kan satong utang na mamutan siya, huling an pagkakasala sa saiya bakong pagpahiling nin pagkamuot sa Diyos.”​—1 Juan 5:3.

10. Sa anong basehan puwedeng patawadon ni Jehova an satong mga kasalan, asin dapat pahiruon kita kaiyan na gibuhon an ano?

¹⁰ An aroaldaw tang pangangaipo para sa kapatawadan kan satong mga kasalan nagduduon kan pangangaipo ta sa iyo sanang legal na basehan para patawadon nin Diyos an satong mga kasalan​—an atang na pantubos ni Jesus. Haros 2,000 na taon na an nakaagi kan ibayad an pantubos na ini, pero dapat na pahalagahan ta iyan na garo baga sarong regalo na kakatao pa sana sato ngunyan. An “pantubos” na ibinayad para sa satong buhay ‘dakulang marhay an halaga,’ na mayo nin siisay man na bakong perpektong tawo an makakabayad kaiyan para sa sato. (Basahon an Salmo 49:7-9; 1 Pedro 1:18, 19.) Kaya, dapat na pirmi kitang magpasalamat ki Jehova huli sa mahalagang marhay na regalong ini. Siring man, ipinapagirumdom sa sato kan mga tataramon na “samong mga utang,” bakong “sakong mga utang,” na kita gabos sa kongregasyon nangangaipo kan probisyon na ini. Malinaw na gusto ni Jehova na isipon ta bako sana an satong espirituwal na kapakanan kundi pati man an sa ibang mga tugang, kabali na idtong nagkasala sa sato. Sa parati, sadit man sanang mga kasalan ini. Kun papatawadon ta an satong mga tugang, maipapahiling ta na namumutan ta sinda asin na andam kitang magpatawad kun paanong pinapatawad kita kan satong mahihirakon na Diyos.​—Col. 3:13.

11. Taano ta mahalaga na magin mapagpatawad?

¹¹ Makamumundo, huling bako kitang perpekto, kun minsan nagtatanom kita nin raot nin buot sa iba. (Lev. 19:18) Kun ipapangistorya ta an salang ginibo sa sato, tibaad kampihan kita kan iba na maresulta nin pagkabaranga sa laog kan kongregasyon. Kun papabayaan ta an arog kaiyan na sitwasyon, dai ta pinapahalagahan an pagkahirak nin Diyos asin an pantubos. Kun dai kita magigin mapagpatawad, dai kita makikinabang sa pantubos kan saiyang Aki​—dai kita papatawadon kan satong Ama. (Mat. 18:35) Ipinaliwanag ini ni Jesus pagkatapos niyang sambiton an modelong pamibi. (Basahon an Mateo 6:14, 15.) Saro pa, tanganing patawadon kita nin Diyos, dapat kitang maghinguwang dai makagibo nin magabat na kasalan. Sa bagay na ini, makakatabang sa sato an sunod na kahagadan sa modelong pamibi.​—1 Juan 3:4, 6.

“DAI MO KAMI PAGPABAYAAN NA MADAOG NIN SUGOT”

12, 13. (a) Ano an nangyari ki Jesus pagkatapos tulos na siya mabawtismuhan? (b) Taano ta dai ta mababasol an iba kun madaog kita nin sugot? (c) Ano an pinatunayan ni Jesus kan magdanay siyang maimbod sagkod sa kagadanan?

¹² An paghurop-hurop sa nangyari ki Jesus pagkatapos tulos na siya mabawtismuhan makakatabang sa sato na masabutan kun taano ta kaipuhan an kahagadan na ini: “Dai mo kami pagpabayaan na madaog nin sugot.” Giniyahan si Jesus kan espiritu nin Diyos pasiring sa kaawagan. Taano? ‘Tanganing matentaran siya kan Diyablo.’ (Mat. 4:1; 6:13, NW) Dai kita mabibigla sa simbag na iyan kun aram ta an panginot na dahilan kan pagsugo nin Diyos sa saiyang Aki digdi sa daga. Iyan iyo na tanganing masimbag an isyu na naglataw kan isikwal ni Adan asin Eva an soberaniya nin Diyos. May naglataw na mga hapot na masisimbag sana kun papaagihon an panahon. Halimbawa, may sala daw sa pagkalalang nin Diyos sa tawo? Posible daw na masuportaran nin sarong perpektong tawo an soberaniya nin Diyos dawa ginigipit kan “saro na maraot”? Asin mas mapapakarhay daw an mga tawo kun mayo sinda sa pamamahala nin Diyos, arog kan pinapalataw ni Satanas? (Gen. 3:4, 5) Iyo, kaipuhan nin panahon para masimbag an mga hapot na iyan, pero papatunayan kaiyan sa mga tawo asin mga anghel na an paagi nin pamamahala ni Jehova iyo an pinakamarahay.

¹³ Banal si Jehova kaya nungka niyang tetentaran an siisay man na gumibo nin maraot. An talagang naggigibo kaiyan iyo an Diyablo, an inaapod na “Paratentar.” (Mat. 4:3, NW) Kaya kan Diyablo na gumibo nin nakakatentar na mga sitwasyon. Pero, nakadepende sa kada saro sa sato kun mapadaog kita sa sugot o dai. (Basahon an Santiago 1:13-15.) Pero si Jesus, linabanan niya tulos an kada pagtentar ni Satanas paagi sa pagkotar nin angay na mga teksto hali sa Tataramon nin Diyos. Ipinahiling ni Jesus na sinusuportaran niya an pagigin makatanusan kan soberaniya nin Diyos. Pero dai suminuko si Satanas. Hinalat ni Satanas “na matiyempuhan giraray” si Jesus. (Luc. 4:13, NW) Padagos na linabanan ni Jesus an ano man na gibuhon ni Satanas tanganing rauton an saiyang integridad. Sinuportaran ni Cristo an pagigin makatanusan kan soberaniya ni Jehova asin pinatunayan niyang kaya nin sarong perpektong tawo na magdanay na maimbod sa ibong nin grabeng pagbalo. Pero hinihinguwa man ni Satanas na sibaon an mga parasunod ni Jesus, asin kaiba ka diyan.

14. Ano an kaipuhan tang gibuhon tanganing dai madaog nin sugot?

¹⁴ Huling dai pa natatapos an isyu manungod sa soberaniya nin Diyos, tinutugutan ni Jehova an Paratentar na gamiton an kinaban na ini tanganing tentaran kita. Dai kita dinadara nin Diyos sa sugot. Kundi, nagtitiwala lang siya sa sato na kaya tang magdanay na maimbod asin gusto niya kitang tabangan. Pero, huling iginagalang ni Jehova an satong libertad na magdesisyon, dai niya awtomatikong ililikay kita na mahulog sa sugot. Duwang bagay an kaipuhan tang gibuhon tanganing dai kita madaog nin sugot​—magdanay na puka sa espirituwal asin padagos na mamibi. Paano sinisimbag ni Jehova an satong mga pamibi?

15, 16. (a) Ano an pira sa mga sugot na kaipuhan tang labanan? (b) Siisay an dapat basulon kun an saro madaog nin sugot?

¹⁵ Tinatawan kita ni Jehova kan saiyang makapangyarihan na banal na espiritu tanganing pakusugon asin tabangan kita na malabanan an sugot. Patiinot man kitang pinapatanidan nin Diyos paagi sa saiyang Tataramon asin kongregasyon manungod sa mga sitwasyon na dapat tang likayan, arog kan paggamit nin sobrang panahon, kuwarta, asin kusog sa materyal na mga bagay na dai ta man talaga kaipuhan. An mag-agom na si Espen asin Janne nakaistar sa sarong mayaman na nasyon sa Europa. Dakul na taon sindang regular payunir sa sarong lugar sa nasyon ninda na dakula an pangangaipo. Kan mamundag an saindang matuang aki, kinaipuhan nindang magpundo sa pagpapayunir, asin ngunyan, duwa na an saindang aki. Sinabi ni Espen: “Parati ming ipinapamibi ki Jehova na tabangan kaming dai madara nin sugot lalo na ngunyan na mas diit an oras mi sa teokratikong mga aktibidad kumpara sa dati. Hinahagad mi ki Jehova na tabangan kaming mapagdanay an samong espirituwalidad saka kaigutan sa ministeryo.”

¹⁶ An saro pang sugot na kaipuhan tang labanan ngunyan na panahon iyo an paghiling nin pornograpiya. Kun madaog kita kaiyan, dai ta mababasol si Satanas. Taano? Huling dai man kita mapupuwersa ni Satanas asin kan saiyang kinaban na gibuhon an sarong bagay na habo ta. Nagpadara an iba sa sugot na ini paagi sa pagparaisip kan mga bagay na maraot. Pero kaya tang labanan iyan, arog kan nagibo kan dakul niyatong tugang.​—1 Cor. 10:12, 13.

“ILIGTAS MO KAMI SA SARO NA MARAOT”

17. (a) Paano kita makakapamuhay kauyon kan satong kahagadan na iligtas kita sa saro na maraot? (b) Anong kaginhawahan an madali na niyatong makamtan?

¹⁷ Tanganing makapamuhay kita kauyon kan kahagadan na “iligtas mo kami sa saro na maraot,” dapat na hinguwahon niyato na magin ‘bakong [kabtang] kan kinaban’ ni Satanas. Dapat na ‘dai kita mamuot sa kinaban ni Satanas, ni sa mga bagay na nasa kinaban.’ (Juan 15:19; 1 Juan 2:15-17) Kaipuhan digdi an padagos na paghihinguwa. Dakulang kaginhawahan nanggad kun simbagon na ni Jehova an kahagadan na iyan paagi sa paglaglag ki Satanas asin sa maraot na kinaban kaini! Pero, dapat niyatong tandaan na kan ihulog si Satanas sa daga, aram niyang halipot na sana an saiyang panahon. Huli sa grabeng kaanggutan, ginigibo niya an gabos tanganing rauton an satong integridad. Kaya dapat kitang padagos na mamibi na iligtas kita ki Satanas.​—Kap. 12:12, 17.

18. Tanganing makaligtas sa katapusan kan kinaban ni Satanas, ano an dapat na padagos niyatong gibuhon?

¹⁸ Minamawot mo na daw na mabuhay sa kinaban na mayo na si Satanas? Kun iyo, padagos mong ipamibi na lugod dumatong na an Kahadian nin Diyos, na mapabanal an pangaran niya, asin mangyari na an saiyang kabutan digdi sa daga. Padagos na manarig ki Jehova na itatao niya an mga pangangaipo mo sa espirituwal asin pisikal. Iyo, magin determinadong mamuhay kauyon kan modelong pamibi.