Naihapot mo na daw iyan sa saimong sadiri? Kun iyo, dai ka nagsosolo. Iniisip-isip kan mga tawo sa bilog na kinaban an mahahalagang hapot na iyan sa buhay. May makukua ka daw na simbag?

Minilyon an masabing “Iyo!” Taano? Huling nakua ninda sa Bibliya an nakakakontentong simbag sa mga hapot ninda. Gusto mong maaraman kun ano an sinasabi kan Bibliya? Kun iyo, tibaad gusto mong makinabang sa daing bayad na pag-adal sa Bibliya na iinaalok kan Mga Saksi ni Jehova.a

Totoo na pag-abot sa pag-adal nin Bibliya, igwa nin mga nagsasabi: “Mayo akong panahon.” “Masakiton maintindihan iyan.” “Habo kong mangako.” Pero lain man an opinyon kan iba. Gusto nindang maaraman kun ano an itinutukdo kan Bibliya. Hilingon ta an nagkapirang halimbawa:

• “Nagduduman ako sa simbahan nin Katoliko asin Protestante, sa templo nin Sikh, asin sa monasteryo nin Budista, saka nag-adal ako nin teolohiya sa unibersidad. Pero dai pa man giraray nasisimbag an dakul sa mga hapot ko manungod sa Diyos. Dangan, sarong Saksi ni Jehova an nagdalaw sa harong mi. Napahanga ako sa mga simbag niya na basado sa Bibliya, kaya nag-uyon akong mag-adal nin Bibliya.”​—Gill, Inglatera.

• “Dakul akong hapot manungod sa buhay, pero dai ako kontento sa mga simbag kan pastor mi sa simbahan. Pero, sarong Saksi ni Jehova an nakasimbag sa mga hapot ko na gamit sana an Bibliya. Kan haputon niya ako kun gusto kong makanuod pa, maugma kong sinabi na iyo.”​—Koffi, Benin.

• “Gustuhon kong maaraman kun ano an kamugtakan kan mga gadan. Nagtutubod ako na puwedeng kulgan kan mga gadan an mga buhay, pero gusto kong maaraman kun ano an sinasabi kan Bibliya. Kaya nakipag-adal ako nin Bibliya sa kaamigo kong Saksi.”​—Jose, Brazil.

• “Pigpurbaran kong basahon an Bibliya pero dai ko iyan masabutan. Dangan, may nagdalaw sako na mga Saksi ni Jehova asin malinaw nindang ipinaliwanag an nagkapirang hula sa Bibliya. Gusto kong maaraman kun ano pa an puwede kong manudan.”​—Dennize, Mexico.

• “Iniisip-isip ko kun talagang may pagmakulog sa sako an Diyos. Kaya namibi ako sa Diyos na sinasabi sa Bibliya. Kan suminunod na aldaw, may mga Saksi ni Jehova na nagtuktok sa pinto mi, asin inako ko an iinalok nindang pag-adal sa Bibliya.”​—Anju, Nepal.

An mga eksperyensiyang iyan nagpapagirumdom sa sato kan mga tataramon ni Jesus na ‘paladan an mga dukha sa espiritu’ o an mga nakakamating kaipuhan ninda nin espirituwal na mga bagay. (Mateo 5:3) Iyo, natural sa mga tawo na makamati nin pangangaipo na mamidbid an Diyos. An Diyos sana an makakatao kan pangangaipong iyan, asin ginigibo niya iyan paagi sa saiyang Tataramon, an Bibliya.

Kaya, ano an kalabot sa pag-adal sa Bibliya? Paano iyan makakatabang sa saimo? Sisimbagon an mga hapot na ini sa sunod na artikulo.

Midbid na marhay an Mga Saksi ni Jehova sa saindang pakikipag-ulay sa mga tawo manungod sa Bibliya. Pero aram mo daw na igwa man kami nin sarong programa nin pag-adal sa Bibliya na ginigibo sa bilog na kinaban?

Kan 2014, labing 8,000,000 na Saksi sa 240 kadagaan an nagsasagibo nin haros 9,500,000 na pag-adal sa Bibliya kada bulan.a Sa katunayan, mas dakul pa an bilang kan mga tawo na nakikipag-adal nin Bibliya sa samuya kisa sa indibidwal na populasyon kan mga 140 nasyon!

Para magibo an pagtutukdo na ini, an Mga Saksi ni Jehova nagpupublikar nin haros saro may kabangang bilyon na Bibliya, libro, magasin, asin iba pang pantabang sa pag-adal sa Bibliya kada taon​—sa mga 700 na lengguwahe! Huli sa daing kaagid na paghihinguwang ini sa pagpublikar, nagin posible para sa mga tawo na mag-adal nin Bibliya sa lengguwahe na gusto ninda.

SIMBAG SA PARATING MGA IHINAHAPOT MANUNGOD SA SAMONG PROGRAMA NIN PAG-ADAL SA BIBLIYA

Paano ginigibo an pag-adal?

Pag-uulayan an manlain-lain na topiko sa Bibliya asin sisiyasaton an mga bersikulo sa Bibliya na may koneksiyon sa temang pinag-uulayan. Halimbawa, sinisimbag kan Bibliya an mga hapot na arog kaini: Siisay an Diyos? Anong klaseng Diyos siya? Igwa daw siya nin pangaran? Sain siya nakaistar? Puwede daw kitang magin dayupot sa saiya? Pero an hapot iyo kun sain hahanapon sa Bibliya an simbag.

Para tabangan an mga tawo na makua an simbag, sa parati, ginagamit mi an librong Ano Man Nanggad an Itinotokdo kan Biblia?b na may 224 pahina. Dinisenyo talaga an librong ini tanganing tabangan an mga tawo na masabutan an panginot na mga katukduan sa Bibliya. Kaiba diyan an manungod sa Diyos, ki Jesu-Cristo, pagsakit nin tawo, pagkabuhay liwat, pamibi, asin dakul pang iba.

Nuarin asin sain puwedeng gibuhon an pag-adal?

Puwedeng gibuhon iyan sa oras asin lugar na kumbenyente sa saimo.

Gurano kalawig an kada sesyon nin pag-adal?

Dakul an nagtatagama nin sarong oras o labi pa kada semana para sa pag-adal nin Bibliya. Pero an lawig kan pag-adal depende sa kamugtakan. Puwede ming ibagay iyan sa saimong iskedyul. An iba nag-aadal sa laog nin 10 o 15 minutos sana kada semana.

Gurano an bayad sa pag-adal?

Daing bayad an pag-adal saka an mga ginagamit sa pag-adal. Kauyon ini kan pagbuot ni Jesus sa saiyang mga disipulo: “Inako nindong daing bayad, itao man nindong daing bayad.”—Mateo 10:8.

Gurano kalawig an bilog na kurso nin pag-adal?

An lawig kan kurso nin pag-adal nakadepende sa saimo. An librong Ano Man Nanggad an Itinotokdo kan Biblia? may 19 leksiyon. Puwede mong pag-adalan an arin man na leksiyon o an gabos na leksiyon sa rikas na puwede sa saimo.

Kaipuhan ko daw na magin saro sa Mga Saksi ni Jehova?

Dai. Iginagalang mi an deretso kan kada indibidwal na pumili kan papaniwalaan ninda. Pero, an mga tawo na igwa na nin pundamental na kaaraman sa Bibliya puwedeng magdesisyon uyon sa nanudan niya.

Sain ako makakakua nin dagdag na impormasyon?

Makukua sa Web site na jw.org/bcl an tamang impormasyon manungod sa mga paniniwala asin aktibidad kan Mga Saksi ni Jehova.

Paano ako ma-request nin pag-adal sa Bibliya?

• Mag-submit nin request online sa www.jw.org/bcl.

• Sumurat sa pinakaharaning adres na nasa pahina 2 kan magasin na ini.

• Kontakon an mga Saksi ni Jehova sa lugar nindo.