Naihapot mo na daw: ‘Ano talaga an nangyayari pag an tawo nagadan? Nagsasakit daw sa kinamumugtakan ninda an mga nagadan tang mahal sa buhay? Mahihiling ta pa daw sinda? Paano kita makakasiyerto?’ Pag-isipan tabi kun ano talaga an itinutukdo kan Kasuratan. Inot, aramon ta kun ano an sinasabi kan Bibliya dapit sa kagadanan. Dangan, pag-ulayan ta an paglaom na inaalok kan Tataramon nin Diyos, an Bibliya.

Ano an kamugtakan kan mga gadan?

AN SIMBAG KAN BIBLIYA: ‘An mga buhay nakakaaram na sinda magagadan, alagad an mga gadan mayo ni anong pakaaram; dai na sinda nin tandan, huli ta padagos na sindang nalilingawan. An gabos na magigibo kan kamot mo, gibuha mantang may kusog ka pa, huli ta mayo nin gibo o rason o kadunungan sa Sheol na padudumanan mo.’a​—Qohelet [Parahulit] 9:5, 10, An Banal na Biblia.

Sa simpleng pagtaram, an Sheol o Lulubngan iyo an padudumanan kan mga tawo pag nagadan sinda; saro iyan na simbolikong lugar o kamugtakan kun sain an saro dai nang pag-aram o gibo. Ano an pakasabot ni Job sa Lulubngan? Nawara an gabos niyang pagsadiri saka nagadan an gabos niyang aki sa saro sanang aldaw, dangan nagkaigwa siya nin makulugon na pigsa sa bilog niyang hawak. Nakimahirak siya sa Diyos: ‘O marahay pang ako taguon mo sa lulubngan [“sa impiyerno,” Catholic Douay Version].’ (Job 1:13-19; 2:7; 14:13) Malinaw na an pakasabot ni Job sa Lulubngan bakong nagkakalayong impiyerno, kun sain mas magrabe pa an pagsakit niya. Imbes, iniisip niya na lugar iyan kun sain matatapos an pagsakit niya.

May saro pang paagi na maaraman an kamugtakan kan mga gadan. Puwede tang pag-adalan an ipinasabong na mga rekord sa Bibliya mapadapit sa walong tawo na nabuhay liwat.​—Hilingon an kahon na “Walong Pagkabuhay Liwat na Mababasa sa Bibliya.”

Sa walong iyan, ni saro daing nag-istorya na napaduman sinda sa lugar nin labi-labing kaugmahan o pagpasakit. Kun napaduman sinda, bako daw na inistorya kutana ninda iyan sa iba? Saka bako daw na iiiba kutana iyan sa Bibliya tanganing mabasa kan gabos? Daing mababasang arog kaiyan sa Kasuratan. Malinaw na daing masasabi dapit diyan an walong tawong idto. Taano? Huling dai sindang pag-aram kaidto, na garo nanok na nagtuturog. Kun beses, ginagamit talaga kan Bibliya an pagturog bilang pagkumparar tanganing ipaliwanag an kagadanan. Halimbawa, an maimbod na si David asin Esteban parehong ‘nagturog’ sa kagadanan.​—Guibo 7:60; 13:36.

Kun siring, ano an paglaom para sa mga gadan? Puwede daw sindang pukawon sa pagturog na ini?

Mabubuhay pa daw an mga gadan?

AN SIMBAG KAN BIBLIYA: ‘An oras madatong na an gabos na nasa lulubngan makakadangog kan tingog ni Jesus asin maruluwas.’​—Juan 5:28, 29.

Kaya ihinula ni Jesus na maabot an panahon, sa pamamahala kan saiyang Kahadian, mawawaran nin laog an Lulubngan. “Ngalason ako kan primero kong mabasa an Juan 5:28, 29,” an nagigirumduman ni Fernando na nasambit sa inot na artikulo. “Nagtao iyan sako nin tunay na paglaom, asin nagin positibo na an kaisipan ko dapit sa maabot na panahon.”

Inaasahan kaidto kan maimbod na tawong si Job na pag nagadan siya, maabot an panahon na bubuhayon siya nin Diyos. Naghapot si Job: ‘Kun an tawo magadan, mabubuhay pa daw siya?’ Dangan may pagtitiwala siyang nagsimbag na mahalat siya sa Lulubngan sagkod na buhayon siya. Sabi niya: “Maapod ka, asin ako masimbag sa saimo.”​—Job 14:14, 15.

An pagkabuhay liwat bako nang bago ki Marta na tugang ni Lazaro. Pagkagadan ni Lazaro, sinabi saiya ni Jesus: “An saimong tugang mabubuhay liwat.” Nagsimbag si Marta: ‘Aram ko na siya mabubuhay liwat sa huring aldaw.’ Dangan sinabi sa saiya ni Jesus: ‘Ako iyo an pagkabuhay liwat asin an buhay. An minatubod sa sako, minsan magadan mabubuhay.’ (Juan 11:23-25) Dangan, tulos na binuhay ni Jesus si Lazaro! An nakakaugmang salaysay na iyan nagtatao sa sato nin dikit na patanaw kan mas dakulang mga pangyayari sa maabot na panahon. Imahinara na sana na nangyayari sa bilog na kinaban an siring na pagbuhay liwat!

May mga bubuhayon daw pasiring sa langit?

AN SIMBAG KAN BIBLIYA: Ipinapahiling kan Tataramon nin Diyos na an pagkabuhay liwat ni Jesus ibang-iba sa walong pagkabuhay liwat na mababasa sa Bibliya. An walong idto nabuhay liwat digdi sa daga. Pero dapit sa pagkabuhay liwat ni Jesus, mababasa ta: ‘Si Jesu-Cristo nasa tuo nin Diyos, huling siya nagpalangit na.’ (1 Pedro 3:21, 22) Si Jesus sana daw an bubuhayon liwat pasiring sa langit? Sinabihan kaidto ni Jesus an saiyang mga apostol: ‘Kun ako magduman asin mag-andam saindo nin lugar, ako madigdi liwat asin iiiba ko kamo, tanganing kun sain ako, duman man kamo.’​—Juan 14:3.

Si Cristo nagpalangit asin nag-andam para sa pag-abot kan nagkapirang disipulo niya. Pag-abot nin panahon, an mga bubuhayon pasiring sa langit maabot sa bilang na 144,000. (Kapahayagan 14:1, 3) Pero ano an gigibuhon duman kan dayupot na mga parasunod ni Jesus?

Sinda magigin sibot na marhay! Sinasabi sa sato kan Kasuratan: ‘Paladan asin banal an igwa nin kabtang sa inot na pagkabuhay liwat; sa sainda an ikaduwang kagadanan dai na nin kapangyarihan, kundi sinda magigin mga saserdote nin Diyos asin ni Cristo, patin maghahadi sa kaibahan niya sa laog nin sangribong taon.’ (Kapahayagan 20:6) An mga bubuhayon liwat pasiring sa langit mamamahala bilang mga hadi asin saserdote kaiba ni Cristo sa bilog na daga.

Sairisay an sunod na bubuhayon?

AN SIMBAG KAN BIBLIYA: Yaon sa ipinasabong na Kasuratan an mga tataramon na ini ni apostol Pablo: ‘Ako may paglaom sa Diyos na pinaghahalat man kan mga ini, na magkakaigwa nin pagkabuhay liwat an mga matanos asin bakong matanos.’​—Guibo 24:15.

Sairisay an kaiba sa sinambit ni Pablo na ‘mga matanos’? Magkua kita nin halimbawa. Kan madali nang magadan an maimbod na si Daniel, sinabihan siya: ‘Magagadan ka, alagad mabangon ka tanganing akuon an balos sa katapusan kan panahon.’ (Daniel 12:13, BPV)a Sain mabangon si Daniel hali sa pagkakaturog sa kagadanan? ‘Masasadirihan kan mga matanos an daga asin mag-iirok sinda diyan sagkod lamang.’ (Salmo 37:29, BPV) Ihinula man ni Jesus: “Paladan an mga mahuyo, huli ta sinda an magmamana kan daga.” (Mateo 5:5, BPV) Si Daniel asin an iba pang maimbod na mga lalaki saka babayi bubuhayon liwat tanganing mag-istar giraray digdi sa daga, nin daing sagkod pa ngani.

Sairisay an kaiba sa sinambit ni Pablo na ‘mga bakong matanos’? Sinda an binilyon na tawong nagadan, na an dakul dai lamang nagkaigwa nin oportunidad na masabutan asin maiaplikar an itinutukdo kan Bibliya. Pag binuhay na sinda, mamimidbid asin mapapahalagahan ninda si Jehovab asin si Jesus. (Juan 17:3) An gabos na nagdesisyon na maglingkod sa Diyos magkakaigwa nin oportunidad na mabuhay sagkod na nabubuhay si Jehova​—daing katapusan.

Ano an magigin kamugtakan sa daga?

AN SIMBAG KAN BIBLIYA: ‘Papahidon nin Diyos an gabos na luha sa saindang mga mata, an kagadanan madadai na, asin dai na magkakaigwa nin pagmundo ni pagtangis ni kulog.’ (Kapahayagan 21:4) ‘Mapatindog sinda nin mga harong, asin mag-uuruntok sinda diyan; magiribo sinda nin mga ubasan asin kakakanon an mga bunga kaiyan.’​—Isaias 65:21.

Imahinara na nabubuhay ka sa arog kaiyan na kamugtakan kaiba an mga namumutan mo na binuhay liwat! Pero an hapot, Paano ka makakasiguro na magkakaigwa nin pagkabuhay liwat?

Bako daw realistiko na isipon na mabubuhay giraray an mga gadan? Bakong arog kaiyan an inisip ni apostol Pablo. Ipinasurat sa saiya nin Diyos: ‘Kun kita naglalaom ki Cristo sa buhay na ini sana, sa gabos na tawo kita an makahirak. Alagad ngunyan si Cristo binuhay na liwat sa mga gadan, an tinagba kan mga nagtuturog.’ (1 Corinto 15:19, 20) Para ki Pablo, sigurado an pagkabuhay liwat. Ginarantiyahan iyan kan pagkabuhay mismo ni Jesus.a (Guibo 17:31) Iyan an dahilan kaya inapod ni Pablo si Jesus na “tinagba,” o inot na bunga​—an kainot-inuting binuhay liwat na nagkamit nin buhay na daing sagkod. Kun si Jesus an inot, rasonableng isipon na igwa pang iba.

Uni pa an sarong dahilan kun taano ta makakasiyerto ka sa paglaom na pagkabuhay liwat. Si Jehova Diyos nin katotoohan. ‘An Diyos dai makakapagputik.’ (Tito 1:2) Nungkang nagputik si Jehova, asin dai niya nuarin man gigibuhon iyan. Manunuga daw siya nin pagkabuhay liwat asin ipapahiling pa ngani na kaya niyang gibuhon iyan, pero dai niya man sana iyan uutubon? Imposible iyan!

Taano ta pinagin posible ni Jehova na magkaigwa nin pagkabuhay liwat? Huli sa saiyang pagkamuot. ‘Kun an tawo magadan, mabubuhay pa daw siya?’ an hapot ni Job. ‘Maapod ka asin ako masimbag sa saimo; magmamawot ka kan gibo kan saimong kamot.’ (Job 14:14, 15) Kumbinsido si Job na an saiyang mamumuton na Ama sa langit magmamawot na buhayon siya liwat. Nagbago daw an Diyos? ‘Ako si Jehova, dai ako nagliliwat.’ (Malaquias 3:6) Minamawot pa man giraray nin Diyos na mahiling na mabuhay giraray an mga gadan, na makusog asin maugma. Arog nanggad kaiyan an mamawuton nin siisay man na mamumuton na magurang pagkatapos magadanan nin aki. An pagkakaiba sana ta may kapangyarihan an Diyos na gibuhon an gusto niya.​—Salmo 135:6.

Tatawan ni Jehova nin kapangyarihan an saiyang Aki tanganing magdara nin labi-labing kaugmahan sa mga nagmumundo sa pagkagadan kan mga namumutan ninda. Ano man an sabuot ni Jesus dapit sa pagkabuhay liwat? Bago buhayon si Lazaro, nahiling ni Jesus an grabeng kamunduan kan mga tugang saka amigo ni Lazaro, asin si Jesus mismo ‘nagtangis’ man. (Juan 11:35) Sa saro pang pagkakataon, nasabatan ni Jesus an sarong balong taga Nain na nagadanan kan saiyang solo-solong aki. Si Jesus ‘nahirak saiya asin nagsabi: “Dai ka magtangis.”’ Tulos na binuhay ni Jesus an aki. (Lucas 7:13) Kaya talagang nakukulgan si Jesus pag may nagmumundo asin nagagadan. Mauugma nanggad siya pag masalidahan na niya nin labi-labing kaugmahan an kamunduan sa bilog na kinaban!

Namatian mo na daw an grabeng kamunduan huli sa pagkagadan nin namumutan? Tibaad iniisip mong an kagadanan sarong problema na daing solusyon. Pero may solusyon​—an pagkabuhay liwat na gigibuhon nin Diyos paagi sa saiyang Aki. Tandaan na gusto nin Diyos na mahiling mo iyan. Gusto niyang yaon ka duman tanganing makugos giraray an saimong mga namumutan. Imahinara na magkairibahan kamong nagpaplano para sa maabot na panahon na daing katapusan, asin nungka na kamong magkakasuruwayan!

Si Lionel, na sinambit sa inot na artikulo, nagsabi: “Sa kahuri-hurihi, naaraman ko an dapit sa pagkabuhay liwat. Kan inot, masakit paniwalaan iyan, saka dai akong tiwala sa nagsabi kaiyan sako. Pero pighiling ko mismo iyan sa Bibliya asin naaraman ko na totoo iyan! Gustong-gusto ko nang mahiling giraray an lolo ko.”

Gusto mo daw na makaaram nin urog pa? Mauugma an Mga Saksi ni Jehova na ipahiling sa saimo sa sadiri mong Bibliya kun taano ta kumbinsido sinda na magkakaigwa nin pagkabuhay liwat.b