Pagigin Namundag Giraray—Iyo daw an Paagi Tanganing Maligtas?

PAANO nindo sisimbagon an hapot na, “Namundag giraray (born again) kamo?” Sa bilog na kinaban, minilyon na naniniwala an masimbag nanggad nin “Iyo!” Naniniwala sinda na an pagigin namundag giraray tanda nin gabos na tunay na Kristiano asin iyo sana an paagi tanganing maligtas. Minaoyon sinda sa pagmansay nin mga namomoon sa relihion na arog baga kan teologong si Robert C. Sproul, na nagsurat: “Kun an saro dai namundag giraray, . . . kun siring sia bakong Kristiano.”

Kamo daw kabilang sa mga naniniwala na an pagigin namundag giraray iyo an paagi tanganing kamo maligtas? Kun iyo, daing duda na gusto nindong tabangan an mga paryente asin katood nindo na maaraman an paaging iyan asin magpoon na sunodon iyan. Minsan siring, tanganing magibo ninda iyan, kaipuhan nindang masabotan an pagkakalaen nin indibiduwal na namundag giraray asin nin saro na dai. Paano nindo ipapaliwanag sa sainda kun ano an kahulogan nin pagigin namundag giraray?

Dakol an naniniwala na an pananaram na “namundag giraray” nanonongod sa saro na odok na nanugang maglingkod sa Dios asin ki Cristo saka, bilang resulta, sia nababago hale sa pagigin gadan sa espirituwal pasiring sa pagigin buhay sa espirituwal. Sa katunayan, an pakahulogan nin sarong diksionaryo ngonyan sa indibiduwal na namundag giraray “sa parate sarong Kristiano na guminibo liwat nin kapanugaan nin pagtubod o sinierto iyan nangorogna pakatapos nin emosyonal na gayong eksperyensia na konektado sa relihion.”​—⁠Merriam-Webster’s Collegiate Dictionary​—⁠Eleventh Edition.

Mapapangalas daw kamo kun maaraman nindo na an Biblia dai minaoyon sa pakahulogan na iyan? Gusto daw nindong maaraman kun ano talaga an itinotokdo kan Tataramon nin Dios manongod sa pagigin namundag giraray? Seguradong makikinabang kamo sa mas maingat na pagsiyasat sa temang ini. Taano? Huling an tamang pakasabot sa kahulogan nin pagigin namundag giraray magkakaigwa nin epekto sa buhay nindo asin sa mga inaasahan nindo sa ngapit.

Ano an Itinotokdo kan Biblia?

An pananaram na “namundag giraray” makukua sana sa Juan 3:​1-12, na nagsasaysay kan interesanteng pag-oolay ni Jesus asin nin sarong namomoon sa relihion sa Jerusalem. Maheheling nindo an pagkasaysay na iyan sa Biblia na kinotar nin bilog sa kahon na nasa sunod na pahina. Dinadagka niamo kamo na maingat na basahon iyan.

Sa pagkasaysay na iyan, itinampok ni Jesus an nagkapirang aspekto kan “bagong pagkamundag.”a Sa katunayan, an pakipag-olay ni Jesus nakakatabang sa sato na simbagon an limang mahalagang marhay na hapot na ini:

◼ Gurano kahalaga an pagkamundag giraray?

◼ Kita daw mismo an madesisyon na mamundag giraray?

◼ Ano an katuyohan kaiyan?

◼ Paagi sa ano iyan nangyayari?

◼ Anong pagbabago nin relasyon an nangyayari huli kaiyan?

Saro-saro niatong tokaron an mga hapot na ini.

[Nota sa Ibaba]

[Kahon/Ritrato sa pahina 4]

“Kamo Dapat na Mamundag Giraray”

“Ngonyan may sarong tawo na kabilang sa mga Fariseo, Nicodemo an ngaran nia, sarong namamahala sa mga Judio. An sarong ini nagduman sa saiya kan banggi asin nagsabi sa saiya: ‘Rabi, aram niamo na ika bilang paratokdo naggikan sa Dios; huli ta mayo nin makakagibo kan mga tandang ini na saimong ginigibo apuera sana kun an Dios nasa saiya.’ Sa pagsimbag si Jesus nagsabi sa saiya: ‘Totoong-totoo na sinasabi ko sa saimo, Kun an saro dai namundag giraray, dai nia maheheling an kahadean nin Dios.’ Si Nicodemo nagsabi sa saiya: ‘Paano mamumundag an sarong tawo kun sia gurang na? Makakalaog daw sia sa matris kan saiyang ina sa ikaduwang beses asin mamumundag?’ Si Jesus nagsimbag: ‘Totoong-totoo na sinasabi ko sa saimo, Kun an saro dai namundag sa tubig asin espiritu, dai sia makakalaog sa kahadean nin Dios. An namundag sa laman laman, asin an namundag sa espiritu espiritu. Dai ka magngalas na ako nagsabi sa saimo, Kamo dapat na mamundag giraray. An doros minahuyop kun saen kaiyan gusto, asin nadadangog mo an tanog kaiyan, alagad dai mo aram kun saen iyan minahale asin kun saen iyan minaduman. Siring man an gabos na namundag sa espiritu.’ Sa pagsimbag si Nicodemo nagsabi sa saiya: ‘Paano mangyayari an mga bagay na ini?’ Sa pagsimbag si Jesus nagsabi sa saiya: ‘Paratokdo ka sa Israel alagad ta dai mo aram an mga bagay na ini? Totoong-totoo na sinasabi ko sa saimo, An naaaraman niamo sinasabi niamo asin an naheling niamo pinapatotoohan niamo, alagad dai nindo inaako an patotoo na itinatao niamo. Kun nagsabi ako sa saindo nin daganon na mga bagay alagad ta dai kamo nagtutubod, paano kamo matubod kun magsabi ako sa saindo nin langitnon na mga bagay?’ ”​—⁠Juan 3:​1-12.

Pagkamundag Giraray—Gurano Kahalaga?

DURANTE kan pakipag-olay ni Jesus ki Nicodemo, idinoon nia na dakula an kahalagahan kan pagkamundag giraray. Paano nia iyan lininaw?

Mangnohon kun paano idinoon ni Jesus sa pakipag-olay nia ki Nicodemo an kahalagahan kan pagkamundag giraray. Sia nagsabi: “Kun an saro dai namundag giraray, dai nia maheheling an kahadean nin Dios.” (Juan 3:⁠3) An mga tataramon na ‘kun dai’ asin “dai” nagdodoon na kaipuhan an pagkamundag giraray. Sa pag-ilustrar: Kun may magsabi, “Kun an saldang dai magsirang, dai magkakaigwa nin liwanag,” an boot niang sabihon talagang kaipuhan na magsirang an saldang tanganing magkaigwa nin liwanag. Kaagid kaiyan, sinabi ni Jesus na an pagkamundag giraray talagang kaipuhan tanganing maheling an Kahadean nin Dios.

Ultimo, tanganing garo baga haleon an ano man na natatada pang pagduda manongod sa temang iyan, si Jesus nagsabi: “Kamo dapat na mamundag giraray.” (Juan 3:⁠7) Malinaw nanggad, segun ki Jesus, an pagkamundag giraray sarong kahagadan​—⁠kaipuhan​—⁠tanganing an saro ‘makalaog sa Kahadean nin Dios.’​—⁠Juan 3:⁠5.

Huling minansay ni Jesus na siring kadakula an kahalagahan kan pagkamundag giraray, maninigong siertohon nin mga Kristiano na tama an pakasabot ninda sa temang ini. Halimbawa, sa paghona daw nindo puedeng magdesisyon an sarong Kristiano na sia mamundag giraray?

[Blurb sa pahina 5]

“Kun an saldang dai magsirang, dai magkakaigwa nin liwanag”

Pagkamundag Giraray—Personal daw na Desisyon?

SIISAY an nagpapangyari kan pagkamundag giraray? Kun kinokombensir an mga naghihinanyog sa sainda na magin namundag giraray na mga Kristiano, kinokotar nin nagkapirang ministro an mga tataramon ni Jesus: “Kamo dapat na mamundag giraray.” (Juan 3:⁠7) Ginagamit kan siring na mga ministro an mga tataramon na ini bilang pagboot. Sa siring, ihinuhulit ninda na an lambang naniniwala mismo an madesisyon na kuyogon si Jesus asin gibohon an kaipuhan na mga lakdang tanganing mamundag giraray. Segun sa siring na pangangatanosan, an pagkamundag giraray personal na desisyon. Alagad an pagmansay daw na iyan kaoyon kan sinabi ni Jesus ki Nicodemo?

Paagi sa maingat na pagbasa sa mga tataramon ni Jesus, maheheling niato na dai nia itinokdo na an tawo mismo an madesisyon tanganing mamundag giraray o dai. Taano ta sinasabi niato ini? An pananaram sa Griego na trinadusir na “namundag giraray” puede man itradusir na “maninigo na namundag gikan sa itaas.”a Sa siring, segun sa pakatradusir na iyan, an pagkamundag giraray “gikan sa itaas”​—⁠an boot sabihon, “gikan sa langit,” o “naggigikan sa Ama.” (Juan 19:11; nota sa ibaba; Santiago 1:17) Iyo, an Dios an nagpapangyari kaiyan.​—⁠1 Juan 3:⁠9.

Kun isasaisip niato an pananaram na “gikan sa itaas,” bakong depisil masabotan kun taano ta dai puede na an saro mismo an magpangyari na sia mamundag giraray. Isip-isipa na sana an literal na pagkamundag sa saindo. Kamo daw mismo an nagdesisyon na mamundag kamo? Siempre bako! Kamo namundag huling an ama nindo an nagpangyari na kamo mamundag. Kaagid kaiyan, puede sana kitang mamundag giraray kun papangyarihon iyan nin Dios, an langitnon na Ama niato. (Juan 1:13) Huli kaini, si apostol Pedro tamang nagsabi: “Pag-omawon an Dios asin Ama kan satong Kagurangnan na Jesu-Cristo, huli ta segun sa saiyang dakulang pagkaherak tinawan nia kita nin bagong pagkamundag.”​—⁠1 Pedro 1:⁠3.

Pagboot daw Iyan?

Pero, tibaad isipon nin nagkapira, ‘Kun totoo na mayo nin siisay man na puedeng magdesisyon sa saiya mismo na mamundag giraray, taano ta itinao ni Jesus an pagboot na: “Kamo dapat na mamundag giraray”?’ Rasonable an hapot na iyan. Total, kun an mga tataramon ni Jesus talagang pagboot, pinagbobotan nia kita na gibohon an sarong bagay na dai niato kaya. Iyan garo bakong rasonable. Kun siring, paano maninigong saboton an mga tataramon na kamo dapat na “mamundag giraray”?

Paagi sa mas maingat na pagsiyasat sa mga tataramon na iyan sa orihinal na lenguahe kaiyan, maheheling niato na si Jesus dai nagboboot, kundi sia nagsasabi sana. Sa ibang pagtaram, kan sinabi ni Jesus na kamo dapat na “mamundag giraray,” sia nagsasabi sana nin sarong katunayan, dai nagtatao nin pagboot. Sia nagsabi: “Kaipuhan na kamo mamundag gikan sa itaas.”​—⁠Juan 3:​7, Modern Young’s Literal Translation.

Sa pag-ilustrar kun baga ini pagboot o pagsabi sana nin katunayan, isip-isipa an sarong pagkomparar. Imahinara an sarong siudad na may nagkapirang eskuelahan. An saro kaiyan eskuelahan na para sana sa mga aking taga baryo, na harayo sa siudad na iyan. Sarong aldaw, an sarong hoben na lalaki na bakong taga baryo nagsabi sa prinsipal kan eskuelahan na iyan, “Gusto ko pong magpaenrol digdi sa eskuelahan nindo.” An prinsipal nagsabi sa saiya, “Tanganing makaenrol ka digdi, dapat na taga baryo ka.” Siempre, an mga tataramon kan prinsipal bakong pagboot. Dai nia pinagbobotan an estudyante na, “Magin taga baryo ka!” Imbes, sinasabi nia na, “Tanganing makaenrol ka digdi, kaipuhan na taga baryo ka.” Sinasabi sana kan prinsipal an katunayan​—⁠an kahagadan tanganing makaeskuela sa eskuelahan na iyan. Kaagid kaiyan, kan sinabi ni Jesus na: “Kamo dapat na mamundag giraray,” sinasabi sana nia an sarong katunayan​—⁠an kahagadan tanganing an saro ‘makalaog sa Kahadean nin Dios.’

An huring nasambit na iyan dapit sa Kahadean nin Dios igwa nin koneksion sa saro pang aspekto kan pagkamundag giraray. Kalabot dian an hapot na, Ano an katuyohan kaiyan? An pakaaram sa simbag sa hapot na iyan mahalagang marhay tanganing masabotan nin tama an kahulogan kan pagkamundag giraray.

[Nota sa Ibaba]

[Ritrato sa pahina 6]

Ano an pagkakaagid kan pagkamundag giraray asin literal na pagkamundag?

Pagkamundag Giraray—Ano an Katuyohan Kaiyan?

DAKOL an naniniwala na an saro kaipuhan na mamundag giraray tanganing mag-ako nin daing sagkod na kaligtasan. Pero, mangnohon an sinabi ni Jesus mismo manongod sa katuyohan kan pagkamundag giraray. Sia nagsabi: “Kun an saro dai namundag giraray, dai nia maheheling an kahadean nin Dios.” (Juan 3:⁠3) Huli kaini, an saro kaipuhan na mamundag giraray tanganing makalaog sa Kahadean nin Dios, bakong tanganing mag-ako nin kaligtasan. ‘Alagad,’ tibaad sabihon nin nagkapira, ‘bako daw na an duwang pananaram na ini​—⁠an paglaog sa Kahadean asin pag-ako nin kaligtasan​—⁠nanonongod sa iyo man sanang balos?’ Dai, bako iyan magkapareho. Tanganing masabotan an pagkakalaen, tokaron nguna niato an kahulogan kan pananaram na “kahadean nin Dios.”

An kahadean sarong klase nin gobyerno. Kun siring, an pananaram na “kahadean nin Dios” nangangahulogan na “gobyerno nin Dios.” Itinotokdo kan Biblia na si Jesu-Cristo, an “aki nin tawo,” iyo an Hade kan Kahadean nin Dios asin na si Cristo igwa nin kairibang mamamahala. (Daniel 7:​1, 13, 14; Mateo 26:​63, 64) Apuera kaini, ihinayag nin sarong bisyon na naheling ni apostol Juan na an kairiba ni Cristo na mamamahala mga indibiduwal na pinili “hale sa lambang tribo asin lenguahe asin banwaan patin nasyon” saka “mamamahala bilang mga hade sa daga.” (Kapahayagan 5:​9, 10; 20:⁠6) Orog pang ihinayag kan Tataramon nin Dios na an mga mamamahala bilang hade iyo an “sadangoton na aripompon” na may bilang na 144,000 na indibiduwal “na binakal hale sa daga.”​—⁠Lucas 12:32; Kapahayagan 14:​1, 3.

Yaon saen an Kahadean nin Dios? ‘An kahadean nin Dios’ inaapod man na “kahadean kan kalangitan,” na nagpapaheling na si Jesus asin an kairiba niang hade mamamahala hale sa langit. (Lucas 8:10; Mateo 13:11) Huli kaini, an Kahadean nin Dios sarong langitnon na gobyerno na an namamahala iyo si Jesu-Cristo kairiba an sarong grupo na pinili hale sa katawohan.

Kun siring, ano an boot sabihon ni Jesus kan sabihon nia na an saro dapat na mamundag giraray tanganing ‘makalaog sa kahadean nin Dios’? An boot niang sabihon iyo na an saro kaipuhan na mamundag giraray tanganing magin namamahala kaiba ni Cristo sa langit. Sa simpleng pagtaram, an katuyohan kan pagkamundag giraray iyo na andamon na magin langitnon na mga namamahala an sarong grupo nin mga tawo na limitado an bilang.

Sa puntong ini, nasabotan niato na dakula an kahalagahan kan pagkamundag giraray, an Dios an nagpapangyari kaiyan, asin iinaandam kaiyan an sarong grupo nin mga tawo na magin mga namamahala sa langit. Alagad paano talaga nangyayari an pagkamundag giraray?

[Blurb sa pahina 7]

An katuyohan kan pagkamundag giraray iyo na andamon na magin langitnon na mga namamahala an sarong grupo nin mga tawo na limitado an bilang

[Ritrato sa pahina 7]

Si Jesu-Cristo kairiba an sarong grupo na pinili hale sa katawohan iyo an namamahala sa Kahadean nin Dios

Pagkamundag Giraray—Paano Iyan Nangyayari?

SI Jesus nakipag-olay ki Nicodemo bako sanang manongod sa kahalagahan, kun siisay an nagpapangyari, asin katuyohan kan pagkamundag giraray, kundi manongod man sa kun paagi sa ano nangyayari an pagkamundag giraray. Si Jesus nagsabi: “Kun an saro dai namundag sa tubig asin espiritu, dai sia makakalaog sa kahadean nin Dios.” (Juan 3:⁠5) Sa siring, an saro namumundag giraray paagi sa tubig asin espiritu. Alagad ano an pinanonongdan kan pananaram na “tubig asin espiritu”?

“Tubig Asin Espiritu”​—⁠Ano Iyan?

Huling si Nicodemo sarong Judio na nag-espesyalisar sa relihion, mayong duda na sia pamilyar sa kun paano ginamit sa Hebreong Kasuratan an terminong “espiritu nin Dios”​—⁠an aktibong puersa nin Dios, na nakakaimpluwensia sa mga tawo na gumibo nin pambihirang mga bagay. (Genesis 41:38; Exodo 31:3; 1 Samuel 10:⁠6) Kaya kan gamiton ni Jesus an tataramon na “espiritu,” nasabotan ni Nicodemo na iyan iyo an banal na espiritu, an puersa aktiba nin Dios.

Kumusta man an pagsambit ni Jesus sa tubig? Isip-isipa an nakarekord na mga pangyayari bago asin pakatapos tolos-tolos kan pakipag-olay ki Nicodemo. Ipinapaheling kaini na si Juan na Bautisador sagkod an mga disipulo ni Jesus nagbabautismo sa tubig. (Juan 1:​19, 31; 3:22; 4:​1-3) An gibohon na ini nagin aram na marhay sa Jerusalem. Kun siring, kan si Jesus magtaram manongod sa tubig, nasabotan ni Nicodemo na an pinanonongdan ni Jesus bakong an tubig sa pangkagabsan, kundi an tubig para sa bautismo.a

Binautismohan “sa Banal na Espiritu”

Kun an ‘pagkamundag sa tubig’ nanonongod sa pagigin binautismohan sa tubig, ano an kahulogan kan ‘pagkamundag sa espiritu’? Bago kan pakipag-olay ni Nicodemo ki Jesus, ipinaisi ni Juan na Bautisador na bako sanang tubig kundi patin banal na espiritu an igwa nin papel sa bautismo. Sia nagsabi: “Ako nagbautismo sa saindo sa tubig, alagad sia [si Jesus] magbabautismo sa saindo sa banal na espiritu.” (Marcos 1:​7, 8) Ilinadawan kan kagsurat nin Ebanghelyo na si Marcos an enot na beses na nangyari an siring na bautismo. Sia nagsurat: “Durante kan mga aldaw na idto si Jesus nagdatong hale sa Nazaret nin Galilea asin binautismohan ni Juan sa Jordan. Asin tolos-tolos kan paghawas sa tubig naheling nia na nabukasan an kalangitan, asin, siring sa salampati, an espiritu naghihilig sa saiya.” (Marcos 1:​9, 10) Kan si Jesus ilubog sa Jordan, sia binautismohan sa tubig. Kan oras na akoon nia an espiritu hale sa langit, sia binautismohan sa banal na espiritu.

Mga tolong taon pakabautismo ki Jesus, sinierto nia sa saiyang mga disipulo: “Kamo babautismohan sa banal na espiritu pirang aldaw na sana poon ngonyan.” (Gibo 1:⁠5) Kasuarin iyan nangyari?

Kan aldaw nin Pentecostes kan taon 33 C.E., mga 120 disipulo ni Jesus an nagkatiripon sa sarong harong sa Jerusalem. “Bigla na sanang nagdatong hale sa langit an ribok na siring sa hagobohob nin makosog na doros, asin iyan nakapano sa bilog na harong kun saen sinda nagtuturukaw. Asin an garo mga dila nin kalayo naheling ninda . . . , asin sinda gabos nagkaparano nin banal na espiritu.” (Gibo 2:​1-4) Kan aldaw man sanang iyan, an iba pa sa Jerusalem sinadol na magpabautismo sa tubig. Sinabihan ni apostol Pedro an sarong kadaklan: “Magsorolsol kamo, asin an lambang saro sa saindo magpabautismo sa ngaran ni Jesu-Cristo para sa kapatawadan kan saindong mga kasalan, asin aakoon nindo an daing bayad na balaog kan banal na espiritu.” Ano an nagin reaksion? “An mga maogmang nag-ako kan saiyang tataramon binautismohan, asin kan aldaw na idto mga tolong ribong kalag an nakadugang.”​—⁠Gibo 2:​38, 41.

Sarong Proseso na May Duwang Kabtang

Ano an ihinahayag kan mga bautismong ini manongod sa pagkamundag giraray? Ipinapaheling kaini na an pagkamundag giraray nangyayari paagi sa sarong proseso na may duwang kabtang. Mangnohon na si Jesus binautismohan nguna sa tubig. Dangan sia nag-ako kan banal na espiritu. Kaagid kaiyan, an enot na mga disipulo binautismohan nguna sa tubig (an nagkapira si Juan na Bautisador an nagbautismo), dangan sinda nag-ako kan banal na espiritu. (Juan 1:​26-36) Siring man, an 3,000 na nakombertir binautismohan nguna sa tubig, dangan sinda nag-ako kan banal na espiritu.

Mantang isinasaisip an mga bautismo na nangyari kan Pentecostes 33 C.E., ano an maninigo niatong asahan sa kun paano nangyayari ngonyan an pagkamundag giraray? Kapareho iyan kan nangyari sa mga apostol asin sa enot na mga disipulo ni Jesus. Enot, pinagsosolsolan nin saro an mga kasalan nia, nagbabakle, asin idinudusay an buhay nia ki Jehova tanganing sambahon asin paglingkodan sia, saka ipinapahayag sa publiko an pagdusay nia paagi sa bautismo sa tubig. Dangan, kun pilion sia nin Dios na maglingkod bilang namamahala sa Kahadean Nia, sia lalahidan nin banal na espiritu. An enot na kabtang kan prosesong ini na may duwang kabtang (bautismo sa tubig) nangyayari paagi sa sadiring kabotan kan indibiduwal; an ikaduwang kabtang (bautismo sa espiritu) nangyayari paagi sa kabotan nin Dios. Kun mangyari sa saro an duwang bautismong ini, sia namumundag giraray.

Pero, taano ta ginamit ni Jesus sa pakipag-olay nia ki Nicodemo an pananaram na “namundag sa tubig asin espiritu”? Tanganing idoon na an mga binautismohan sa tubig asin espiritu makakaeksperyensia nin pambihirang pagbabago. Tinotokar kan sunod na artikulo an aspektong iyan kan pagkamundag giraray.

[Nota sa Ibaba]

[Ritrato sa pahina 9]

Binautismohan ni Juan sa tubig an nagsosolsol na mga Israelita

Pagkamundag Giraray—Ano an Nagigibo Kaiyan?

TAANO ta ginamit ni Jesus an pananaram na “namundag . . . sa espiritu” kan sia magtaram manongod sa bautismo sa banal na espiritu? (Juan 3:⁠5) Kun ginagamit bilang pananaram na may piguratibong kahulogan, an tataramon na “pagkamundag” nangangahulogan na “kapinonan,” siring baga kan pananaram na “an pagkamundag nin sarong nasyon.” Huli kaini, an terminong “bagong pagkamundag” nagpaparisa nin “bagong kapinonan.” Kun siring, an may piguratibong kahulogan na mga pananaram na “namundag” asin “bagong pagkamundag” nagdodoon na magkakaigwa nin bagong kapinonan sa relasyon nin Dios asin kan mga binautismohan sa banal na espiritu. Paano nangyayari an lubos na pagbabagong iyan nin relasyon?

Tanganing ipaliwanag kun paano nag-aandam an Dios nin mga tawo na magigin mga namamahala sa langit, si apostol Pablo naggamit nin ilustrasyon na kinua sa buhay pampamilya. Nagsurat sia sa mga Kristiano kan panahon nia na sinda makakaeksperyensia nin “pag-ampon bilang mga aki” asin kun siring, an magigin pagtratar nin Dios sa sainda “garo mga aki.” (Galacia 4:5; Hebreo 12:⁠7) Tanganing maaraman kun paano an halimbawa dapit sa pag-ampon makakatabang sa saro na masabotan an klase nin pagbabago na nangyayari kun an indibiduwal binautismohan sa banal na espiritu, isip-isipa giraray an ilustrasyon dapit sa hoben na lalaki na gustong mag-enrol sa eskuelahan na para sa mga estudyanteng taga baryo.

Sarong Pagbabago Huli sa Pag-ampon

Sa ilustrasyon, an hoben na lalaki dai makaenrol sa eskuelahan huling sia bakong taga baryo. Ngonyan, imahinara na sarong aldaw, may dakulang pagbabago na nangyari. Sia legal na inampon nin ama nin sarong pamilya na taga baryo. Ano an epekto kaiyan sa hoben na lalaki? Bueno, huling inampon bilang aki, sia puedeng igwa na ngonyan kan mga deretso na kapareho kan sa iba pang hoben na taga baryo​—⁠kaiba an deretso na mag-enrol sa eskuelahan na iyan. Biyong binago kan pag-ampon sa saiya an mga oportunidad nia.

Iiniilustrar kaini sa mas makahulogan nanggad na paagi an nangyayari sa mga namumundag giraray. Isip-isipa an nagkapirang pagkakaagid. An hoben na lalaki sa ilustrasyon aakoon sa eskuelahan solamente kun maabot nia an kahagadan tanganing makalaog dian​—⁠an pagigin taga baryo. Pero, kun sa saiya sana, dai nia maaabot an kahagadan na iyan. Kaagid kaiyan, may mga tawo na aakoon na magin namamahala sa Kahadean nin Dios, o langitnon na gobyerno, alagad solamente kun maabot ninda an kahagadan tanganing makalaog dian​—⁠an pagigin “namundag giraray.” Pero, kun sa sainda sana, dai ninda maaabot an kahagadan na iyan huling an pagkamundag giraray nakadepende sa Dios.

Ano an nagpabago sa kamugtakan kan hoben na lalaki? An legal na proseso nin pag-ampon. Siempre, dai binago kan prosesong iyan an pagkatawo kan hoben na lalaki. Pakatapos kan pag-ampon sa saiya, sia pa man giraray an tawong iyan. Dawa siring, pakatapos na maabot an legal na mga kahagadan para sa pag-ampon, an hoben na lalaki nag-ako nin bagong kamugtakan (status). Tunay nanggad na sia nakaeksperyensia nin bagong kapinonan​—⁠sarong bagong pagkamundag, sabi ngani. Sia inako na bilang aki, na nagtao sa saiya nin deretso na makaeskuela sa eskuelahan asin magin kabtang kan pamilya kan ama na nag-ampon sa saiya.

Kaagid kaiyan, binago ni Jehova an kamugtakan nin sarong grupo nin bakong sangkap na mga tawo paagi sa paggibo nin legal na proseso na amponon sinda bilang mga aki nia. Si apostol Pablo, na kabilang sa grupong iyan, nagsurat sa mga kapagtubod: “Kamo nag-ako nin espiritu nin pag-ampon bilang mga aki, na paagi sa espiritung ini kita nagkukurahaw: ‘Abba, Ama!’ An espiritu mismo nagpapatotoo kaiba kan satong espiritu na kita mga aki nin Dios.” (Roma 8:​15, 16) Iyo, paagi sa proseso nin pag-ampon, an mga Kristianong iyan nagin kabtang kan pamilya nin Dios, o “mga aki nin Dios.”​—⁠1 Juan 3:1; 2 Corinto 6:⁠18.

Siempre, dai binago kan pag-ampon na iyan nin Dios an pagkatawo kan mga inampon, huling sinda nagdanay na bakong sangkap. (1 Juan 1:⁠8) Minsan siring, arog kan ipinaliwanag pa ni Pablo, pakatapos na maabot an legal na mga kahagadan para sa pag-ampon, sinda nag-ako nin bagong kamugtakan. Kadungan kaiyan, an inampon na mga aking iyan tinawan kan espiritu nin Dios nin makosog na pagtubod na sinda mabubuhay kaiba ni Cristo sa langit. (1 Juan 3:⁠2) An malinaw na makosog na pagtubod na iyan huli sa banal na espiritu nagtao sa sainda nin biyong bagong pagmansay sa buhay. (2 Corinto 1:​21, 22) Iyo, nakaeksperyensia sinda nin bagong kapinonan​—⁠sarong bagong pagkamundag, sabi ngani.

Manongod sa inampon na mga aki nin Dios, an Biblia nagsasabi: “Sinda magigin mga saserdote nin Dios asin kan Cristo, patin mamamahala bilang mga hade kaiba nia sa laog kan sangribong taon.” (Kapahayagan 20:⁠6) Kaiba ni Cristo, an inampon na mga aki nin Dios magigin mga hade sa Kahadean nin Dios, o langitnon na gobyerno. Sinabihan ni apostol Pedro an mga kapagtubod na sinda maako nin “dai nalalapa asin daing digta patin dai napaparang mana” na “nakatagama sa kalangitan” para sa sainda. (1 Pedro 1:​3, 4) Iyan tunay nanggad na mahalagang marhay na mana!

Minsan siring, an pamamahalang ini nagpapalataw man nin hapot. Kun an mga namundag giraray na iyan mamamahala bilang mga hade sa langit, sairisay an pamamahalaan ninda? An hapot na iyan sisimbagon sa sunod na artikulo.

[Ritrato sa pahina 10]

Ano an sinabi ni Pablo manongod sa pag-ampon?