Mga Hapot Hale sa mga Parabasa
Noarin matatapos an pag-apod sa mga Kristiano para sa langitnon na paglaom?
An Biblia dai naghahayag nin eksaktong simbag sa hapot na iyan. Aram nanggad niato na an paglahid sa mga disipulo ni Jesus para sa saindang langitnon na mana nagpoon kan 33 C.E. (Gibo 2:1-4) Aram man niato na pagkagadan kan mga apostol, an tunay na linahidan na Kristianong “trigo” ‘tuminubo na kaiba’ nin palsipikadong mga Kristiano, na “mga doot.” (Mateo 13:24-30) Dangan, poon sa huring kabtang kan dekada nin 1800, an linahidan na mga Kristiano risang-risa giraray na nagin aktibo. Kan 1919 nagpoon an pag-ani kan “anihon sa daga,” pati an pagtipon kan mga pangultimo kan linahidan.—Kapahayagan 14:15, 16.
Poon sa huring kabtang kan dekada nin 1800 sagkod 1931, an pangenot na katuyohan kan gibohon na paghuhulit iyo an pagtipon kan natatada pang mga miembro kan hawak ni Cristo. Kan 1931 ginamit kan Mga Estudyante sa Biblia an ngaran na basado sa Biblia na Mga Saksi ni Jehova. Asin sa isyu kan The Watchtower na Nobyembre 15, 1933, ipinahayag an punto de vista na an daing kaagid na ngaran na ini iyo an “denario” na sinambit sa parabola ni Jesus na nakarekord sa Mateo 20:1-16. An 12 oras na sinambit sa parabola pinaniwalaan na katimbang kan 12 taon poon 1919 sagkod 1931. Sa laog nin dakol na taon pakalihis kaiyan, pinaniwalaan na an pag-apod para sa langitnon na Kahadean natapos na kan 1931 asin an mga inapod tanganing magin kaibang paramana ni Cristo kan 1930 asin 1931 iyo an “huri” na inapod. (Mateo 20:6-8) Minsan siring, kan 1966 iprinesentar an itinanos na pakasabot sa parabolang iyan, asin nagin malinaw na iyan mayong koneksion sa katapusan kan pag-apod sa mga linahidan.
Kan 1935 an “dakulang kadaklan” na yaon sa Kapahayagan 7:9-15 nasabotan na kompuesto nin “ibang mga karnero,” mga Kristianong may daganon na paglaom, na titiponon durante kan “huring mga aldaw” asin makakaligtas sa Armagedon bilang sarong grupo. (Juan 10:16; 2 Timoteo 3:1; Kapahayagan 21:3, 4) Pakalihis kan taon na iyan, an katuyohan kan paggibo nin mga disipulo iyo na an pagtipon kan dakulang kadaklan. Huli kaini, nangorogna pakalihis kan 1966 pinaniwalaan na an langitnon na pag-apod natapos na kan 1935. Ini garo baga napatunayan kan an haros gabos na nabautismohan pakalihis kan 1935 naniwala na sinda may daganon na paglaom. Pakatapos kaiyan, pinaniwalaan na an siisay man na inapod para sa langitnon na paglaom iyo an mga kasalida kan linahidan na mga Kristiano na nagin bakong maimbod.
Daing duda, kun an saro sa mga linahidan daing pagsolsol na suminuhay sa katotoohan, si Jehova minaapod nin saro pang indibiduwal bilang kasalida nia. (Roma 11:17-22) Minsan siring, an bilang kan tunay na mga linahidan na nagin bakong maimbod posibleng marhay na bakong dakol. Sa ibong na lado, sa pag-agi nin panahon, an nagkapirang Kristianong nabautismohan pakalihis kan 1935 nagkaigwa nin patotoo kan banal na espiritu na sinda may langitnon na paglaom. (Roma 8:16, 17) Huli kaini, minalataw na dai niato madedeterminaran an espesipikong petsa kan katapusan nin pag-apod sa mga Kristiano para sa langitnon na paglaom.
Paano maninigong mansayon an sarong tawo na nasierto sa saiyang puso na sia linahidan na ngonyan asin nagpoon nang makikabtang sa mga emblema sa Memorial? Dai sia maninigong husgaran. Sia asin si Jehova sana an nakakaaram kan bagay na iyan. (Roma 14:12) Minsan siring, an tunay na linahidan na mga Kristiano dai naghahagad nin espesyal na atension. Dai sinda naniniwala na an pagigin kaiba ninda sa mga linahidan nagtatao sa sainda nin espesyal na “mga pakarorop,” na nakakalabi sa pakarorop dawa kan nagkapirang may kabatidan na miembro kan dakulang kadaklan. Dai man sinda naniniwala na nakakalabi an banal na espiritu na yaon sa sainda kisa sa kairiba nindang ibang karnero; ni inaasahan man ninda na tatawan sinda nin espesyal na tratamiento o nag-iisip na an pakikikabtang ninda sa mga emblema ilinalangkaw sinda sa nombradong mga magurang sa kongregasyon. Mapakumbaba nindang ginigirumdom na an nagkapirang linahidan na lalaki kan enot na siglo dai nakualipikar na maglingkod bilang magurang sa kongregasyon o ministeryal na lingkod. (1 Timoteo 3:1-10, 12, 13; Tito 1:5-9; Santiago 3:1) An nagkapirang linahidan na Kristiano maluya pa ngani sa espirituwal kaidto. (1 Tesalonica 5:14) Asin an mga tugang na babae, minsan ngani linahidan, dai nagtokdo sa kongregasyon.—1 Timoteo 2:11, 12.
Huli kaini, an linahidan na mga Kristiano patin an kairiba nindang ibang karnero nagmamaigot na magdanay na makosog sa espirituwal, na kinukultibar an mga bunga kan espiritu asin pinapaoswag an katoninongan kan kongregasyon. An gabos na Kristiano, baga man linahidan o kabilang sa ibang mga karnero, nagmamaigot sa paghuhulit kan maogmang bareta asin paggibo nin mga disipulo sa pagdirehir kan Namamahalang Grupo. An linahidan na mga Kristiano kontentong gibohon ini sagkod na kabotan pa nin Dios na magdanay sinda sa daga bilang mga lingkod ni Jehova.