SEROSEMANA, an kadaklan na kongregasyon kan Mga Saksi ni Jehova nag-aareglo nin pampublikong diskurso sa sarong tema na sono sa Kasuratan. Kun kamo magurang sa kongregasyon o ministeryal na lingkod, nagtatao daw kamo nin ebidensia na kamo epektibong nagpapahayag sa publiko, sarong paratokdo? Kun iyo, tibaad imbitaran kamong tumao nin pampublikong pahayag. An Teokratikong Paadalan sa Pagmiministro nakatabang sa manampulong ribong tugang na makualipikar para sa pribilehiong ini nin paglilingkod. Kun naasignaran na tumao nin pampublikong pahayag, saen daw kamo maninigong pumoon?

Adalan an Outline

Bago kamo magsiyasat, basahon an outline asin horophoropon iyan sagkod na makua nindo an kahulogan kaiyan. Itanom sa isip an pinakatema, na iyo an titulo kan diskurso. Ano an dapat nindong itokdo sa mga nagdadangog sa saindo? Ano an obheto nindo?

Magin pamilyar sa prinsipal na mga titulo. Analisaron an prinsipal na mga puntong iyan. Paano konektado sa pinakatema an kada saro? Sa irarom kan kada prinsipal na punto, may nalilistang dakol na sekondaryong punto. An mga punto na nagsusuportar sa sekondaryong mga punto nalilista sa irarom kaini. Estudyaran kun paano an kada kabtang kan outline ginagamit na basehan an naeenot, minapasiring sa kasunod, asin nakatatabang na magibo an obheto kan pahayag. Oras na masabotan nindo an pinakatema, an obheto kan pahayag, asin kun paano nagigibo kan prinsipal na mga punto an katuyohan na iyan, andam na kamong pumoon na bilogon an materyales.

Sa primero tibaad maheling nindong nakatatabang na isipon na an saindong diskurso apat o limang haralipot na pahayag, na an kada saro may prinsipal na punto. An mga ini saro-sarong andamon.

An itinaong outline sarong kasangkapan sa pag-andam. Bakong intension na iyan an magserbing nota nindo sa pagpahayag. Iyan garo kalabera. Kaipuhan na iyan bugtakan nindo nin laman, sabi ngani, tawan nin puso asin buhayon.

Paggamit kan Kasuratan

Ibinasar ni Jesu-Cristo asin kan saiyang mga disipulo an saindang pagtotokdo sa Kasuratan. (Luc. 4:16-21; 24:27; Gibo 17:2, 3) Iyan magigibo man nindo. An Kasuratan iyo an maninigong magin basehan kan saindong pahayag. Imbes na ipaliwanag asin iaplikar sana an mga sinasabi sa itinaong outline, mansayan kun paano suportado kan Kasuratan an mga sinasabing iyan, dangan magtokdo gikan sa Kasuratan.

Sa pag-andam kan saindong pahayag, siyasaton an kada bersikulong sitado sa outline. Obserbaran an konteksto. An nagkapirang teksto tibaad nagtatao sana nin nakatatabang na impormasyon sa likod. Iyan dai gabos kaipuhan na basahon o komentohan sa saindong pagpahayag. Pilion an pinakamarahay para sa mga magdadangog sa saindo. Kun makonsentrar kamo sa mga tekstong sinitar sa imprentadong outline, dai na gayod nindo kaipuhan na gumamit nin dagdag na mga teksto.

An kapangganahan kan saindong pahayag depende, bakong sa kun pira an tekstong ginamit, kundi sa kualidad kan pagtotokdo. Kun iiniintrodusir an mga teksto, ipaliwanag kun taano ta ginagamit an mga iyan. Tawan nin panahon an pag-aplikar kaiyan. Pakabasaha nindo kan sarong teksto, papagdanayon na bukas an saindong Biblia mantang tinotokar nindo an teksto. Posibleng marhay na iyan man an gigibohon kan mga nagdadangog sa saindo. Paano nindo mapupukaw an interes kan mga nagdadangog sa saindo asin matatabangan sindang mas lubos na makinabang sa Tataramon nin Dios? (Neh. 8:8, 12) Magigibo nindo iyan paagi sa eksplikasyon, ilustrasyon, asin aplikasyon.

Eksplikasyon. Kun nag-aandam na ieksplikar an sarong mayor na teksto, ihapot sa sadiri: ‘Ano an kahulogan kaiyan? Taano ta ginagamit ko iyan sa sakong pahayag? Ano daw an ihinahapot sa saindang sadiri kan mga nagdadangog manongod sa tekstong ini?’ Tibaad kaipuhan na analisaron nindo an konteksto, an kasaysayan sa likod, an pinangyarihan, an puersa kan mga tataramon, an intension kan pinasabngan na kagsurat. Ini nagkakaipo nin pagsiyasat. Makakakua kamo nin kadakol na mahalagang impormasyon sa mga publikasyon na itinao kan “fiel asin may diskresion na oripon.” (Mat. 24:45-47) Dai pagmaigotan na ieksplikar an gabos manongod sa bersikulo, kundi ieksplikar kun taano ta ipinabasa nindo iyan sa mga nagdadangog sa saindo may koneksion sa puntong tinotokar.

Ilustrasyon. An katuyohan nin mga ilustrasyon darahon an mga nagdadangog sa saindo sa mas hararom na pakasabot o tabangan sindang magirumdoman an sarong punto o prinsipyo na tinokar nindo. An mga ilustrasyon nakatatabang sa mga tawo na saboton an sinabi nindo sa sainda asin ikonektar iyan sa dati na nindang aram. Ini an ginibo ni Jesus kan itao nia an saiyang bantog na Sermon sa Bukid. An mga fraseng “mga gamgam sa langit,” “mga liryo sa oma,” “tatang hayakpit,” “harong sa ibabaw kan dakulang gapo,” asin dakol pang arog kaiyan ginibong may pagdodoon, malinaw, asin dai malilingawan an saiyang pagtotokdo.—Mat., kap. 5-7.

Aplikasyon. An pag-eksplikar asin pag-ilustrar nin sarong teksto matao nin kaaraman, alagad an pag-aplikar kan kaaraman na iyan iyo an nagkakabunga. Totoo, responsibilidad kan mga nagdadangog sa saindo na aksionan an mensahe kan Biblia, alagad matatabangan nindo sindang mamansayan kun ano an kaipuhan na gibohon. Oras na kompiado na kamo na nasasabotan na kan mga nagdadangog sa saindo an bersikulong pinag-oolayan asin naheheling an koneksion kaiyan sa puntong idinodoon, tawan nin panahon an pagpaliwanag sa sainda kan epekto kaiyan sa tinutubod asin gawe-gawe. Tawan nin pagdodoon an mga pakinabang sa pagtalikod sa salang mga ideya o gawe-gawe na bakong katama kan katotoohan na pinag-oolayan.

Mantang iniisip-isip nindo kun paano iaaplikar an mga teksto, girumdoma na an mga nagdadangog sa saindo gikan sa dakol na pinaghalean asin napapaatubang sa laen-laen na marhay na mga kamugtakan. Tibaad may mga bagong interesado, hoben, gurang, asin nasasakitan sa laen-laen na personal na problema. Gibohon na praktikal asin realistiko an saindong pahayag. Likayan an pagtao nin hatol na garo baga pira sanang indibiduwal an nasa isip nindo.

An mga Desisyon kan Nagpapahayag

An nagkapirang desisyon mapadapit sa diskurso nindo ginibo na para sa saindo. Malinaw na sinasabi an prinsipal na mga punto, asin malinaw na ipinaheheling kun guranong panahon an maninigo nindong gamiton sa pagtokar kan kada prinsipal na titulo. An iba kamo an madesisyon. Tibaad pilion nindong gumamit nin mas dakol na panahon sa nagkapirang sekondaryong punto asin nin mas kadikit na panahon sa iba. Dai ipamugtak na dapat parareho an pagtratar nindo sa lambang sekondaryong punto. Tibaad iyan magin dahelan na kamo maghidali asin mabigla an mga nagdadangog sa saindo. Paano nindo madedeterminaran kun arin an mas ipaliliwanag nindo asin kun arin an sasambiton sana nindo sa halipot, o papasadahan sana? Ihapot sa sadiri: Arin daw na mga punto an makatatabang sa sako na ikapasabot an prinsipal na ideya kan pahayag? Arin an may pinakadakulang potensial na pakinabangan kan mga magdadangog sa sako? An paglaktaw daw sa sarong sinitar na teksto asin konektadong punto mapaluya sa pagkasunodsunod nin ebidensiang iinaatubang?’

Maingat na likayan na ilaog an pagbanabana o personal na opinyon. Dawa an Aki nin Dios, si Jesu-Cristo, naglikay na magtaram nin hale ‘sa saiya man sana.’ (Juan 14:10) Midbidon na an dahelan na an mga tawo nag-aatender sa pagtiripon kan Mga Saksi ni Jehova madangog na pinag-oolayan an Biblia. Kun kamo midbid na matibay magpahayag, posibleng marhay na iyan huli ta kaugalean nindong apodon an atension, bakong sa saindong sadiri, kundi sa Tataramon nin Dios. Huli kaini, inaapresyar an saindong mga pahayag.—Fil. 1:10, 11.

Ngonyan na nagibo na nindong malaman na eksplikasyon kan Kasuratan an simpleng outline, kaipuhan na nindo ngonyan na ensayohon an saindong pahayag. Kapakipakinabang an pag-ensayo nin makosog. An importante seguradohon na nasa isip nanggad nindo an gabos na punto. Dapat na an puso nindo nasa saindong pagpahayag, natatawan nindo nin buhay an materyales, asin entusiastiko nindong ikinaaatubang an katotoohan. Bago itao an saindong pahayag, ihapot sa sadiri: ‘Ano an inaasahan kong magibo? Lataw daw an prinsipal na mga punto? Talaga daw na ginibo kong basehan kan sakong pahayag an Kasuratan? An kada prinsipal daw na punto natural na minapasiring sa kasunod? Pinakokosog daw kan pahayag an pag-apresyar ki Jehova asin sa saiyang mga probisyon? An konklusyon daw direktang konektado sa pinakatema, itinotokdo sa mga nagdadangog an gigibohon, asin minomotibar sindang gibohon iyan?’ Kun masisimbag nindo nin iyo an mga hapot na ini, kun siring nasa posisyon kamong ‘gamiton an kaaraman sa marahay na paagi,’ para sa kapakinabangan kan kongregasyon asin sa ikaoomaw ni Jehova!—Tal. 15:2.

ANO an pasohan nindo bilang paratokdo? Kun bago pa sana kamong nagin parahayag kan Kahadean, daing duwa-duwa na mawot nindong makanood kun paano pamamayohan an sarong pag-adal sa Biblia, mantang tinawan ni Jesus nin asignasyon an mga parasunod nia na gumibo nin mga disipulo. (Mat. 28:19, 20) Kun eksperyensiado na kamo sa aktibidad na ini, tibaad an pasohan nindo magin mas epektibo sa pagtaros sa puso kan mga hinihingoa nindong tabangan. Kun kamo magurang, segurado na gusto nindo na magin an klase nin paratokdo na makamomotibar sa saindong mga aki na idusay an saindang buhay sa Dios. (3 Juan 4) Kun kamo magurang sa kongregasyon o naghihingoa na magin siring, tibaad gusto nindong magin nagpapahayag sa publiko na mapatatalubo sa mga naghihinanyog sa saiya an mas hararom na pag-apresyar ki Jehova asin sa saiyang mga dalan. Paano nindo maaabot an mga pasohan na ini?

Makanood sa Pangenot na Paratokdo, si Jesu-Cristo. (Luc. 6:40) Baga man si Jesus nagtataram sa sarong kadaklan sa gilid nin bukid o sa nagkapira sana mantang sinda naglalakaw sa dalan, an saiyang sinabi asin an pagkasabi nia kaiyan nagwalat nin nagdadanay na impresyon. Pinukaw ni Jesus an isip asin puso kan mga naghihinanyog sa saiya, asin praktikal an aplikasyon nia na masasabotan ninda. Magigibo daw nindo an kaagid kaiyan?

Manarig ki Jehova

An abilidad ni Jesus sa pagtotokdo napakarhay kan dayupot na relasyon nia sa saiyang langitnon na Ama sagkod kan bendisyon na espiritu nin Dios. Namimibi daw kamo nin odok ki Jehova na epektibong mapamayohan an pag-adal sa Biblia? Kun kamo magurang, regular daw nindong inaarang an paggiya nin Dios sa pagtotokdo sa saindong mga aki? Namimibi daw kamo nin odok sa puso kun nag-aandam na magpahayag o pamayohan an mga pagtiripon? An siring na mapagngayongayong pagsarig ki Jehova makatatabang sa saindo na magin mas epektibong paratokdo.

An pagdepende ki Jehova nahahayag man sa pagsarig sa saiyang Tataramon, an Biblia. Sa pamimibi kan ultimong banggi kan saiyang buhay bilang sangkap na tawo, sinabi ni Jesus sa saiyang Ama: “Itinao ko sa sainda an saimong tataramon.” (Juan 17:14) Dawa mahiwas an eksperyensia ni Jesus, nungka na sia nagtaram nin hale sa saiya man sana. Pirme niang itinataram an itinokdo sa saiya kan saiyang Ama, na paagi kaiyan nagtao sa sato nin halimbawang aarogon. (Juan 12:49, 50) An tataramon nin Dios, na prineserbar sa Biblia, may puersang impluwensiahan an mga tawo—an saindang gawe-gawe, kairairaroming kaisipan, asin saboot. (Heb. 4:12) Mantang nagtatalubo an saindong kaaraman sa Tataramon nin Dios asin nakakanood kamong gamiton iyan nin toltol sa saindong ministeryo, mapatatalubo nindo an abilidad sa pagtotokdo na nakaaakit sa mga tawo sa Dios.—2 Tim. 3:16, 17.

Tawan nin Onra si Jehova

An pagigin paratokdo na inaarog si Cristo bako sanang pakatao nin interesanteng diskurso. Totoo, pinagngalasan nin mga tawo an “managom na mga tataramon” ni Jesus. (Luc. 4:22) Alagad ano an obheto ni Jesus sa pagtaram nin toltol? Idto tanganing tawan nin onra si Jehova, bakong darahon an atension sa saiyang sadiri. (Juan 7:16-18) Asin sinadol nia an saiyang mga parasunod: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mat. 5:16) An hatol na iyan maninigong makaimpluwensia sa paagi kan satong pagtotokdo. Dapat na magin katuyohan niato na likayan an ano man na irarayo an atension sa obhetong iyan. Kaya kun pinaplano an satong sasabihon o kun paano niato iyan sasabihon, marahay na ihapot sa satong sadiri, ‘Ini daw makaparararom sa pag-apresyar ki Jehova, o iyan daw maapod nin atension sa sako?’

Halimbawa, an mga ilustrasyon asin aktuwal na mga halimbawa epektibong magagamit sa pagtotokdo. Minsan siring, kun detalyadong ipinaliliwanag an sarong halawig na ilustrasyon o isinasaysay nin sobra kadetalyado an sarong eksperyensia, tibaad mawara an punto kan pagtotokdo. Siring man, an pag-estorya nin mga nakaaaling sana irinarayo an atension sa katuyohan kan satong ministeryo. Sa katunayan, dinadara kan paratokdo an atension sa saiyang sadiri imbes na otobon an tunay na pasohan nin teokratikong edukasyon.

‘Paglaenon’

Tangani na magin talagang disipulo an sarong tawo, dapat na malinaw niang masabotan an itinotokdo. Dapat na madangog nia an katotoohan asin masabotan kun ano an kalaenan kaiyan sa ibang paniniwala. An pagpaheling kan kalaenan nakatatabang na magibo ini.

Paorootrong sinadol ni Jehova an saiyang banwaan na ‘paglaenon’ an malinig asin an maati. (Lev. 10:9-11) Sinabi nia na an mga maglilingkod sa saiyang dakulang espirituwal na templo totokdoan an mga tawo “sa kalaenan kan banal na bagay asin bakong banal na bagay.” (Ezeq. 44:23) An librong Talinhaga pano nin mga pagkakalaen kan katanosan asin karatan, kan kadonongan asin kamangmangan. Dawa an mga bagay na bakong magkabaliktad puedeng ipamidbid an kalaenan. Pinaglaen ni apostol Pablo an tawong matanos asin an tawong marahay, siring kan nasusurat sa Roma 5:7. Sa librong Mga Hebreo, ipinaheling nia an pakalabi kan paglilingkod ni Cristo bilang halangkaw na saserdote sa paglilingkod ni Aaron. Tunay nanggad, arog kan isinurat kan edukador na si Juan Amos Comenio kan ika-17 siglo: “An pagtotokdo daing ibang kahulogan kundi ipaliwanag kun paano nagkakalaenlaen an mga bagay sa saindang laen-laen na katuyohan, porma, asin ginikanan. . . . Kun siring, an matibay magpaliwanag kan kalaenan matibay magtokdo.”

Halimbawa, tinotokdoan nindo an saro manongod sa Kahadean nin Dios. Kun dai nia nasasabotan kun ano an Kahadean, puede nindong ipaliwanag kun paano na an sinasabi kan Biblia laen sa ideya na an Kahadean saro sanang kamugtakan sa puso nin sarong tawo. O puede nindong ipaheling kun paano an Kahadean napapalaen sa mga gobyerno nin tawo. Pero, para sa mga tawo na aram na an pundamental na mga katotoohan na ini, puede kamong magin mas detalyado. Puede nindong ipaliwanag sa sainda kun paano an Mesiyanikong Kahadean laen sa unibersal na pagkahade mismo ni Jehova, na sinasabi sa Salmo 103:19, o sa ‘kahadean kan Aki kan pagkamoot nin Dios,’ na nasasambitan sa Colosas 1:13, o sa “administrasyon,” na sinasabi sa Efeso 1:10. An paggamit nin mga pagkakalaen makatatabang na magin malinaw na marhay an importanteng katokdoan na ini sa Biblia para sa mga nagdadangog sa saindo.

Paorootrong ginamit ni Jesus an paaging ini nin pagtotokdo. Ipinaheling nia an kalaenan kan popular na pakasabot sa Ley ni Moises sa tunay na motibo kan Ley. (Mat. 5:21-48) Ipinaliwanag nia an kalaenan kan tunay na diosnon na debosyon sa mapagsaginsagin na mga gawe-gawe kan mga Fariseo. (Mat. 6:1⁠-⁠18) Ipinaheling nia an kalaenan kan espiritu kan mga “nagpapakangkagurangnan” sa iba sa mapagsakripisyong espiritu na ipaheheling kan saiyang mga parasunod. (Mat. 20:25-28) Sa saro pang okasyon, na nasusurat sa Mateo 21:28-32, inagda ni Jesus an mga naghihinanyog sa saiya na paglaenon mismo ninda an pagpakangmatanos asin an tunay na pagsolsol. Dinadara kita kaiyan sa saro pang mahalagang aspekto nin marahay na pagtotokdo.

Enkaminaron an mga Naghihinanyog na Mag-isip-isip

Sa Mateo 21:28, mababasa niato na pinonan ni Jesus an pagkokomparar nia nin paghapot: “Ano sa paghona nindo?” An paratokdong may kakayahan dai sana isinasaysay an mga detalye o itinatao an mga simbag. Imbes, ineenkaminar nia an mga naghihinanyog sa saiya na kultibaron an kakayahan sa pag-iisip. (Tal. 3:21; Roma 12:1) Sa sarong kabtang ginigibo ini paagi sa paghapot. Arog kan maheheling sa Mateo 17:25, naghapot si Jesus: “Ano sa paghona mo, Simon? Kiisay nag-aako an mga hade sa daga nin mga impuesto o buhis sa kada payo? Sa saindang mga aki o sa mga dayo?” An nakapupukaw nin isip na mga hapot ni Jesus nakatabang ki Pedro na magkaigwa kan sadiri niang tamang konklusyon manongod sa pagbayad kan buhis sa templo. Siring man, kan sinisimbag an tawo na naghapot, “Siisay man nanggad an sakuyang kapwa?” ipinaheling ni Jesus an kalaenan kan hiro-hiro nin sarong saserdote asin sarong Levita sa hiro-hiro nin sarong Samaritano. Dangan ihinapot nia ini: “Siisay sa tolong ini an sa paghona mo ginibo an saiyang sadiri na kapwa kan lalaki na naholog sa kamot kan mga parahabon?” (Luc. 10:29-36) Digdi giraray, imbes na mag-isip para sa naghihinanyog sa saiya, inagda sia ni Jesus na simbagon an sadiri niang hapot.—Luc. 7:41-43.

Pagmaigotan na Mataros an Puso

An mga paratokdo na nakasasabot sa kahulogan kan Tataramon nin Dios nakarerealisar na an tunay na pagsamba bako sanang pagtuom nin nagkapirang detalye asin pagsunod sa nagkapirang reglamento. Iyan napapasikad sa marahay na relasyon ki Jehova asin apresasyon sa saiyang mga dalan. Kalabot an puso sa siring na pagsamba. (Deut. 10:12, 13; Luc. 10:25-27) Sa Kasuratan, an terminong “puso” parateng nanonongod sa bilog na persona sa laog, kaiba an mga bagay na arog kan mga kamawotan, kapadangatan, saboot, asin motibasyon.

Aram ni Jesus na mantang panluwas na itsura an pinagheheling nin mga tawo, naheheling nin Dios kun ano an puso. (1 Sam. 16:7) An paglilingkod niato sa Dios maninigong minomotibar kan satong pagkamoot sa saiya, bakong nin mga paghihingoa na gulaton an mga kapwa niato tawo. (Mat. 6:5-8) Sa ibong na lado, dakol an ginibo kan mga Fariseo na panluwas sanang pasale. Tinawan ninda nin dakulang importansia an pagsunod sa mga detalye kan Ley asin an pagkuyog sa mga reglamento na gibo ninda. Alagad dai ninda ikinapaheling sa saindang buhay an mga kualidad na magpapamidbid na sinda kapareho kan Dios na hinihingako ninda na saindang sinasamba. (Mat. 9:13; Luc. 11:42) Itinokdo ni Jesus na minsan ngani importante an pagkuyog sa mga kahagadan nin Dios, an halaga kan siring na pagkuyog nadedeterminaran kan nasa puso. (Mat. 15:7-9; Mar. 7:20-23; Juan 3:36) An pagtotokdo niato makagigibo kan pinakadakulang karahayan kun aarogon niato an halimbawa ni Jesus. Importante na tabangan niato an mga tawo na maaraman kun ano an hinahagad sa sainda nin Dios. Alagad importante man na saindang mamidbid asin kamotan si Jehova bilang sarong persona tangani na an saindang gawe-gawe magpabanaag kan pagpahalaga ninda sa aprobadong relasyon sa tunay na Dios.

Siempre, tanganing makinabang sa siring na pagtotokdo, kaipuhan na atubangon nin mga tawo kun ano an nasa saindang puso. Inenkaminar ni Jesus an mga tawo na analisaron an saindang mga motibo asin siyasaton an saindang mga saboot. Kun itinatanos an salang punto de vista, hinahapot nia an mga naghihinanyog sa saiya kun taano ta iniisip, sinasabi, o ginigibo ninda an nagkapirang bagay. Pero, tangani na dai sana pabayaan na iyan nakabitin, iniibanan ni Jesus an hapot nia nin sarong tataramon, ilustrasyon, o aksion na nag-eenkaminar sa sainda na helingon nin tama an mga bagay. (Mar. 2:8; 4:40; 8:17; Luc. 6:41, 46) Matatabangan man niato nin arog kaiyan an mga naghihinanyog sa sato paagi sa pagsuherir na ihapot ninda sa saindang sadiri an mga hapot na arog kan: ‘Taano daw ta gusto ko an gigibohon kong ini? Taano daw ta arog kaini an reaksion ko sa situwasyon na ini?’ Dangan itao an motibasyon na helingon ninda an mga bagay sa punto de vista ni Jehova.

Itao an Aplikasyon

Aram nin marahay na paratokdo na “an kadonongan enot sa gabos.” (Tal. 4:7) An kadonongan iyo an abilidad na mapangganang iaplikar an kaaraman sa pagresolber sa mga problema, sa paglikay sa mga peligro, sa pakaabot sa mga pasohan, sa pagtabang sa iba. Responsibilidad nin paratokdo na tabangan an mga inaadalan na makanood na gibohon iyan alagad dai sinda ipagdesisyon. Kun pinag-oolayan an laen-laen na prinsipyo sa Biblia, tabangan an inaadalan na mangatanosan. Puede kamong sumitar nin sarong situwasyon sa buhay sa aroaldaw dangan ihapot sa inaadalan kun paano an prinsipyo sa Biblia na napag-adalan pa sana nindo makatatabang sa saiya kun mapaatubang sia sa situwasyon na iyan.—Heb. 5:14.

Sa diskurso nia kan Pentecostes 33 C.⁠E., si apostol Pedro nagtao nin halimbawa nin praktikal na aplikasyon na nakaapektar sa buhay nin mga tawo. (Gibo 2:14-36) Pakatokara nia kan tolong halipot na kotasyon sa Kasuratan na hinihingako kan kadaklan na saindang tinutubod, an mga ini iinaplikar ni Pedro na kinokonsiderar an mga pangyayari na naheling ninda gabos. Bilang resulta, namatean kan kadaklan an pangangaipo na aksionan an saindang nadangog. May arog daw kaiyan na epekto sa mga tawo an saindong pagtotokdo? An ginigibo daw nindo bako sanang pagsarosaro sa mga detalye asin tinatabangan an mga tawo na masabotan kun taano ta siring an mga bagay? Ineenkaminar daw nindo sinda na estudyaran kun paano maninigong makaapektar sa saindang buhay an mga nanonodan ninda? Tibaad dai sinda kumurahaw nin “Ano an gigibohon mi?” arog kaidtong kadaklan kan Pentecostes, alagad kun marahay an pagkaaplikar nindo kan mga teksto, mapahihiro sinda na isipon an paggibo nin tamang aksion.—Gibo 2:37.

Kun binabasa an Biblia kaiba kan saindong mga aki, kamong mga magurang may marahay na oportunidad na tokdoan sinda na mag-isip-isip kun manongod sa praktikal na aplikasyon kan mga prinsipyo sa Biblia. (Efe. 6:4) Halimbawa, puede kamong pumili nin pirang bersikulo sa babasahon sa Biblia para sa semanang iyan, ipakipag-olay an kahulogan kaiyan, dangan maghapot nin mga arog kaini: ‘Paano ini nagtatao nin giya sa sato? Paano niato magagamit an mga bersikulong ini sa ministeryo? Ano an ihinahayag kaiyan manongod ki Jehova asin sa saiyang paagi nin paggibo sa mga bagay, asin paano kaiyan napakokosog an satong pag-apresyar sa saiya?’ Enkaminaron an saindong pamilya na komentohan an mga puntong ini sa pagtokar kan tampok na mga kabtang kan Biblia sa Teokratikong Paadalan sa Pagmiministro. An mga bersikulong kokomentohan ninda posibleng marhay na iyo an matatandaan ninda.

Magtao nin Marahay na Halimbawa

Nagtotokdo kamo bako sanang paagi sa saindong sinasabi kundi paagi man sa saindong ginigibo. An mga gawe-gawe nindo nagtatao nin praktikal na halimbawa kun paano iaaplikar an mga sinasabi nindo. Ini an paagi na nakakanood an mga aki. Kun inaarog ninda an saindang mga magurang, nagtatao sinda nin ebidensia na gusto nindang magin kapareho kan saindang mga magurang. Gusto nindang maaraman kun anong klase an pag-arog sa ginigibo kan saindang mga magurang. Siring man, kun an mga tinotokdoan nindo ‘nagigin mga paraarog nindo siring na kamo paraarog ki Cristo,’ nagpopoon sindang maeksperyensiahan an mga bendisyon sa paglakaw sa mga dalan ni Jehova. (1 Cor. 11:1) An mga ginigibo sa sainda nin Dios nagigin kabtang kan sainda mismong mga eksperyensia.

Ini nakapapepensar na pagirumdom sa importansia nin pagtao nin tamang halimbawa. Dakulaon an ikakokontribwir kan kun “anong klaseng mga tawo [kita] sa banal na mga gawe asin gibo nin diosnon na debosyon” sa pagtao sa mga tinotokdoan niato nin buhay na pagpaheling kun paano iaaplikar an mga prinsipyo sa Biblia. (2 Ped. 3:11) Kun ineenkaminar nindo an sarong inaadalan sa Biblia na regular na basahon an Tataramon nin Dios, magmahigos sa pagbasa kaiyan mismo. Kun gusto nindo na an saindong mga aki makanood na magsusog sa mga prinsipyo sa Biblia, seguradohon na naheheling ninda na an saindong mga gawe-gawe kaoyon kan kabotan nin Dios. Kun tinotokdoan nindo an kongregasyon na magin maigot sa ministeryo, seguradohon na lubos an pakikikabtang nindo sa gibohon na iyan. Kun ginigibo nindo an saindong itinotokdo, nasa mas marahay kamong posisyon na motibaron an iba.—Roma 2:21-23.

Sa katuyohan na pakarhayon an saindong pagtotokdo, ihapot sa sadiri: ‘Kun ako nagtotokdo, ginigibo ko daw iyan sa paagi na iyan nagkakaepekto sa mga aktitud, pagtaram, o gawe-gawe kan mga nakakadangog kaiyan? Tanganing linawon an mga bagay, ipinaliliwanag ko daw an kalaenan nin sarong ideya o iginagawe sa saro pa? Ano an ginigibo ko tanganing matabangan an sakong mga inaadalan, an sakong mga aki, o an mga nagdadangog sa sako sa sarong pagtiripon na matandaan an sinasabi ko? Malinaw ko daw na itinotokdo sa mga naghihinanyog sa sako kun paano iaaplikar an saindang nanonodan? Naheheling daw ninda iyan sa sakong halimbawa? Nasasabotan daw ninda kun paano an reaksion ninda sa pinag-oolayan puedeng makaimpluwensia sa relasyon ninda ki Jehova?’ (Tal. 9:10) Padagos na tawan nin atension an mga bagay na ini mantang hinihingoa nindong pataluboon an abilidad bilang paratokdo. “Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana sagkod idtong naghihinanyog sa saimo.”—1 Tim. 4:16.