Nagigirumduman mo kan mapadapla ka kan aki ka pa? Tibaad nalugadan an kamot mo o nabakrusan an tuhod mo. Nagigirumduman mo kun paano ka pinaalo ni Mama mo? Tibaad lininigan niya su lugad mo tapos binendahan. Grabe an hibi mo. Pero dahil sa mga tataramon asin kugos niya, nagrahay-rahay na an pagmati mo. Kan mga panahon na idto sa buhay mo, yaon an Mama mo para rangahon ka.

Pero mantang nagdadakula kita, bako nang arog kaiyan kasimple an mga bagay-bagay. Nagigin mas dipisil na an mga problema, asin bako nang arog kaiyan kadali na maranga kan iba. An problema kan mga adulto dai na basta masosolusyunan nin benda asin kugos nin sarong ina. Hilinga an nagkapirang halimbawa.

• Naeksperyensiyahan mo na daw na mahadit na marhay dahil sa pagkawara nin trabaho? Sinabi ni Julian na kan masisante siya sa trabaho, nabigla siya asin nahadit. ‘Pa’no na an pamilya ko?’ an sabi niya. ‘Pagkatapos nin pirang taon na pagmamaigot ko sa trabaho, taano ta garo daing saysay sa kompanya an ginibo ko?’

• Tibaad grabeng kulog nin buot an namatian mo dahil sa pagkaraot kan relasyon nindong mag-agom. “Kan bayaan ako kan agom ko 18 bulan na an nakaagi, grabe talaga su kamunduan ko. Garo sinaksak an puso ko,” an paliwanag ni Raquel. “An kulog kaiyan bako lang sa pisikal kundi sa emosyonal. Natakot ako sa kun ano an mangyayari.”

• Tibaad may malala kang hilang na garo dai nagrarahay. Kun minsan, tibaad may mga panahon na nasasabi mo an arog kan pag-agrangay kan patriyarkang si Job: ‘Habo ko na; habo ko nang mabuhay pa.’ (Job 7:16, An Marahay na Bareta Biblia) Posibleng namati mo na man an kapareho kan ki Luis na labi nang 80 anyos. Sinabi niya, “Kun minsan pagmati ko naghahalat na sana akong magadan.”

• O tibaad nagadanan ka nin namumutan kaya gusto mong maranga. “Kan magadan an aki ko dahil sa aksidente sa eroplano, dai ako makapaniwala kan inot,” an sabi ni Robert. “Dangan namati ko an grabeng kulog na kapareho kan sinambit sa Bibliya na garo may halabang espada na luminagbas sako.”—Lucas 2:35.

Sa ibong kan masakiton na kamugtakan na iyan ni Robert, Luis, Raquel, asin Julian, nakakua sinda nin karangahan. Rinanga sinda kan Saro na pinaka may kakayahan na magtao kaiyan—daing iba kundi an Diyos na Makapangyarihan sa Gabos. Sa anong mga paagi itinatao nin Diyos an pagranga? Itatao niya man daw saimo an pagranga na kaipuhan mo?

Inapod ni apostol Pablo si Jehovaa na ‘Diyos nin bilog na karangahan, na nagraranga sa sato sa gabos niyatong kasakitan.’ (2 Corinto 1:3, 4) Kaya sinisigurado sa sato kan Bibliya na mayong tawo an dai kayang tabangan nin Diyos asin mayong trahedya an sobra kadakula para dai kita maranga kan satong Ama sa langit.

Siyempre, may dapat kitang gibuhon kun gusto niyatong maranga nin Diyos. Paano kita matatabangan nin sarong doktor kun dai kita mapakonsulta sa saiya? Naghapot si propeta Amos: “Sabay na maglalakaw daw an duwang tawo na dai nagkasundo?” (Amos 3:3, An Banal na Biblia (Paulines) Kaya sinasabi sa sato kan Kasuratan: ‘Rumani kamo sa Diyos, asin siya marani sa saindo.’—Santiago 4:8.

Paano kita nakakasigurado na marani sa sato an Diyos? Inot, pauruutro niyang sinasabi sa sato na gusto niya kitang tabangan. (Hilingon an kaibang kahon.) Ikaduwa, igwa kita nin nakakakumbinsir na mga patotoo hali sa totoong mga tawo na rinanga nin Diyos, kaidto asin sa ngunyan.

Arog kan dakul na tawo ngunyan na naghahagad kan tabang nin Diyos, nag-agi man si Hading David nin dakul na trahedya. ‘Hinanyuga an sakuyang mga pakimahirak kun nag-aagrangay ako saimo,’ an ipinakiulay niya minsan ki Jehova. Nagsimbag daw an Diyos? Iyo. Sinabi pa ni David: ‘Tinabangan niya ako, huli kaiyan naugma an sakuyang puso.’—Salmo 28:2, 7.

AN PAPEL NI JESUS SA PAGRANGA SA MGA NAGMUMUNDO

Ihinula nin Diyos an dakulang papel ni Jesus sa pagtao nin karangahan. Kaiba sa mga gibuhon na itinao sa saiya an ‘pagbugkos sa mga nalugadan an puso’ asin ‘pagranga kan gabos na nagmumundo.’ (Isaias 61:1, 2, An Banal na Biblia (Paulines) Arog kan ihinula, tinawan ni Jesus nin espesyal na atensiyon an mga tawong ‘napapagal asin nagagabatan.’—Mateo 11:28-30.

Rinanga ni Jesus an mga tawo paagi sa pagtao sainda nin madunong na sadol, mabuot na pagtrato sainda, asin pagbulong pa ngani kun minsan sa mga hilang ninda. Sarong aldaw, nakiulay saiya an sarong may leproso: ‘Kun buot mo, mapapalinig mo ako.’ Nahirak si Jesus kaya sinabi niya: ‘Buot ko, luminig ka.’ (Marcos 1:40, 41) Naumayan an may leproso.

Sa ngunyan, mayo na sa daga an Aki nin Diyos para personal kitang maranga. Pero an saiyang Ama na si Jehova, ‘an Diyos nin bilog na karangahan,’ padagos na nagtatabang sa mga nangangaipo kaiyan. (2 Corinto 1:3) Pag-isipan an apat na panginot na paagi na ginagamit nin Diyos tanganing rangahon an mga tawo.

• An Bibliya. ‘An gabos na isinurat kaidto, isinurat sa pagtukdo sa sato, tanganing huli sa pakatagal asin sa pagranga kan mga Kasuratan, magkaigwa kita nin paglaom.’—Roma 15:4.

• Banal na Espiritu nin Diyos. Dai nahaloy pagkatapos kan mamundong pagkagadan ni Jesus, nakamati nin katuninungan an bilog na Kristiyanong kongregasyon. Taano? ‘Naglakaw sinda sa pagkatakot sa Kagurangnan asin sa pagranga kan banal na espiritu.’ (Guibo 9:31) An banal na espiritu o aktibong puwersa nin Diyos saro nanggad na makusugon na puwersa. Puwede iyan gamiton nin Diyos tanganing rangahon an siisay man sa sato ano man an satong kamugtakan.

• Pamibi. ‘Sa ano man dai kamo mahadit,’ an sadol sa sato kan Bibliya. Imbes, sinasabi kaiyan na, ‘ipahayag nindo sa Diyos an saindong mga hinahagad. Asin an katuninungan nin Diyos na minalampas sa gabos na pakasabot, maingat kan saindong mga puso asin kan saindong mga pag-isip.’—Filipos 4:6, 7.

• Mga Kapwa Kristiyano. Puwede ninda kitang rangahon bilang tunay na mga amigo na maaasahan sa masakit na mga sitwasyon. Sinabi ni apostol Pablo na an saiyang mga amigo ‘nagin karangahan’ niya sa panahon nin ‘kahurasaan asin kasakitan.’—Colosas 4:11; 1 Tesalonica 3:7.

Pero tibaad maisip mo, ‘Paano man ini magigin totoo sako?’ Aramon ta pa nin urog an nangyari sa mga tawong napaatubang sa mga problema na sinambit sa nainot na artikulo. Arog ninda, mapapatunayan mo man na inuutob nin Diyos sagkod ngunyan an nakakapahirong panugang ini: ‘Siring kan pagranga kan ina, siring ko kamo rarangahon.’—Isaias 66:13.

KUN MAWARAN NIN TRABAHO

“Sabay kaming nawaran nin trabaho ni agom,” an sabi ni Seth.a “Sa laog nin duwang taon, nag-asa kami sa mga tao-tao kan kapamilya saka kun ano-ano na sanang trabaho. Dahil diyan na-depress an agom kong si Priscilla. Pagmati ko man dai akong serbi.

“Paano mi iyan nakayanan? Pirming ginigirumdom ni agom an mga tataramon ni Jesus sa Mateo 6:34. Sinabi ni Jesus na dai kita dapat mahadit sa sunod na aga, huli ta an kada aga, igwa nin sadiri niyang kahaditan. An udok sa pusong pamibi nakatabang man saiya na magpadagos. Nakaranga man sako an Salmo 55:22. Arog kan salmista, pinasa ko ki Jehova an sakong pasan, asin nahiling ko na tinabangan niya talaga ako. Dawa may trabaho na giraray ako ngunyan, pinagdanay ming simple an samong buhay kauyon kan sadol ni Jesus sa Mateo 6:20-22. Urog sa gabos, mas naparani kami sa Diyos asin sa kada saro.”

“Natakot ako kun ano na an mangyayari sa samo kan malugi an sadit ming negosyo,” an sabi ni Jonathan. “Dahil sa krisis sa ekonomiya, mayong napadumanan an 20 taon na pinagpagalan mi. Pinag-iiwalan mi nang mag-agom an kuwarta. Dai mi na ngani ginamit su credit card mi ta natatakot kami na ‘baad dai na iyan akuon.

“Pero nakatabang samo an Tataramon nin Diyos asin an saiyang espiritu na gumibo nin marahay na mga desisyon. Nakanuod akong akuon an ano man na klase nin trabaho, saka binawasan mi an paggastos na dai man kaipuhan. Bilang mga Saksi ni Jehova, tinabangan man kami kan samong mga kapagtubod. Pinakusog ninda kami saka tinabangan kan mga panahon na masakiton talaga.”

KUN MARAÓT AN RELASYON NIN MAG-AGOM

“Kan bigla akong bayaan kan agom ko, nakulgan ako saka naanggot,” an sabi ni Raquel. “Sinundan iyan nin grabeng kamunduan. Pero nagrani ako sa Diyos, asin rinanga niya ako. Pinoprotektaran kan katuninungan na hali sa Diyos an sakong puso pag namimibi ako sa saiya aroaldaw. Pagmati ko binubulong niya an nalugadan kong puso.

“Nagpapasalamat man ako sa saiyang Tataramon, an Bibliya. Nahali ko an mga kaanggutan ko saka hinanakit. Isinapuso ko an mga tataramon ni apostol Pablo sa Roma 12:21: ‘Dai ka magpadaog sa maraot kundi daugon mo an maraot kan marahay.’

“Sarong marahay na amiga an nagsadol sako na akuon na an nangyari. Ipinahiling niya sako an Parahulit 3:6 dangan mabuot niyang sinabi na may panahon talaga na kaipuhan tang akuon na ‘wara’ na an sarong bagay. Bako idtong madali, pero idto talaga an kaipuhan kong gibuhon. Ngunyan, may bago na akong mga plano sa buhay.”

“Pag naraot an relasyon nindong mag-agom, kaipuhan mo nin tabang,” an sabi ni Elizabeth. “Itinao sako kan mabuot kong amiga an tabang na iyan, aroaldaw. Naghihibi siya pag naghihibi ako, rinaranga ako, saka ipinamati niya sako na padangat niya ako. Kumbinsido ako na ginamit siya ni Jehova tanganing bulungon an mga lugad sa sakong puso.”

PAG NAGHIHILANG O NAGGUGURANG NA

Si Luis na sinambit sa inot na artikulo, igwa nin seryosong problema sa puso asin duwang beses nang dikit-dikitan na magadan. Ngunyan, 16 na oras na siyang naka-oxygen kada aldaw. “Pirmi akong namimibi ki Jehova,” an sabi niya. “Asin pakapamibi sa Diyos, namamati kong pinapakusog ako kan saiyang espiritu. An pamibi nagtao sako nin kusog nin buot na magpadagos ta nagtutubod ako saiya saka aram kong nagmamalasakit siya sako.”

“Kadakul kong gustong gibuhon, pero dai ko na kaya,” an sabi ni Petra, na labing 80 anyos na. “Masakiton talaga pag nagluluya na. Garo mayo ka nang kusog saka kaipuhan nang mag-asa sa bulong. Pirmi kong naiisip an arog kan hinagad ni Jesus sa saiyang Ama na palampason saiya an kasakitan, kun posible. Pero pinakusog ni Jehova si Jesus, asin iyo man ako. An pamimibi an nagigin terapi ko aroaldaw. Mas nagrarahay an pagmati ko pagkatapos na makipag-ulay sa Diyos.”—Mateo 26:39.

Iyan man an namati ni Julian, na haros 30 taon nang nagsasakit huli sa multiple sclerosis. “Nagin wheelchair an dating executive chair na tinutukawan ko,” an sabi niya. “Pero nagin makahulugan an buhay ko ta ginagamit ko iyan sa paglilingkod sa iba. Nababawasan kan pagtao an sakit na namamati ta, asin talagang inuutob ni Jehova an panuga niya na papakusugon kita sa panahon na kaipuhan ta. Arog ni apostol Pablo, masasabi ko man: ‘Ako makakagibo kan gabos na bagay [huli] sa saiya na nagpakusog sa sako.’”—Filipos 4:13.

PAG NAGADANAN

“Kan magadan si Papa kan mabunggo nin awto, dai ako makapaniwala kan inot,” an sabi ni Antonio. “Garo bakong makatanusan—sarong inosenteng biktima na nagbabalyo sana sa tinampo. Pero mayo man akong magibo. Na-coma siya nin 5 aldaw bago siya nagadan. Pinupugulan kong maghibi pag yaon si Mama, pero pag solo na ako, grabe an hibi ko. ‘Ta’no?’ An pirmi kong hapot sa sadiri ko.

“Sa masakiton na panahon na iyan, pirmi kong hinahagad ki Jehova na tabangan akong makontrol an emosyon ko asin tawan ako nin katuninungan. Luway-luway na nagrahay an pagmati ko. Narumduman ko an sinabi kan Bibliya na puwedeng mangyari sa siisay man an mga dai inaasahan. Huling dai nagpuputik an Diyos, kumbinsido ako na mahihiling ko giraray si Papa pag binuhay na siya liwat.”—Parahulit 9:11; Juan 11:25; Tito 1:2.

Iyan man an namati ni Robert, na sinambit sa inot na artikulo. Sinabi niya: “Namati ming mag-agom an katuninungan nin isip na sinasabi sa Filipos 4:6, 7. Huli iyan sa pamimibi mi ki Jehova. Nakatabang iyan para masabi mi sa mga reporter an dapit sa samong paglaom na pagkabuhay liwat. Dawa mayo na an aki mi dahil sa aksidente sa eroplano, dakul man kaming puwedeng balikan na maugmang pangyayari na kaibanan siya. Iyan na sana an ginigirumdom mi.

“Kan sabihon samo kan mga kapwa mi Saksi na nahiling ninda kami sa TV na kalmadong ipinapaliwanag an samong paniniwala, sinabi mi sa sainda na siguradong dahil idto sa dakul na pamibi kan iba para samo. Tubod talaga ako na sinusuportaran kami ni Jehova paagi sa dakul na mensahe nin karangahan na nareresibi mi.”

Arog kan ipinapahiling kan mga halimbawang ini, kaya nin Diyos na rangahon an mga tawo ano man an problema asin kasakitan ninda. May inaagihan ka man daw na problema? Ano man iyan, siguradong may makukua kang tabang na makakaranga sa saimo.b Kaya ta’no ta dai maghagad nin tabang ki Jehova? Siya an ‘Diyos nin bilog na karangahan.’—2 Corinto 1:3.