KUN kinakaolay nindo an iba manongod sa mga katuyohan nin Dios, baga man sa pribado o sa plataporma, an pagtokar nindo maninigo na nakasentro sa kun ano an yaon sa Tataramon nin Dios. Parate na kalabot digdi an pagbasa nin mga teksto sa Biblia, na dapat na gibohon nin toltol.

Kalabot an Pagsaboot sa Tamang Pagdodoon. An mga teksto maninigong basahon na may pagsaboot. Estudyare an nagkapirang halimbawa. Kun binabasa nindo nin makosog an Salmo 37:11, maninigo na an saindong boses magpahayag nin maogmang pag-antisipar sa katoninongan na ipinanunuga dian. Kun binabasa nindo an Kapahayagan 21:4 mapadapit sa katapusan nin pagdusa asin kagadanan, maninigo na ipabanaag kan saindong boses an may init na pag-apresyar sa makangangalas na kaginhawahan na ihinuhula. An Kapahayagan 18:2, 4, 5, na may pakiolay na lumuwas sa pano nin kasalan na “Dakulang Babilonya,” dapat na basahon na may pagkaapurado. Siempre, an ipinahahayag na pagsaboot maninigong odok sa puso alagad bakong sobra. An tamang sokol nin emosyon dinedeterminaran kan mismong teksto asin kan pagkagamit dian.

Idoon an Tamang mga Termino. Kun an komento nindo sa sarong bersikulo nakasentro sa saro sanang kabtang kaiyan, maninigo na isentro nindo an atension sa kabtang na iyan kun binabasa an teksto. Halimbawa, kun binabasa an Mateo 6:33, dai nindo tatawan nin prinsipal na istres an “saiyang katanosan” o an “ini gabos na ibang bagay” kun an intension nindo analisaron an kahulogan kan “hanapon nguna an kahadean.”

Sa sarong pahayag sa Pagtiripon sa Paglilingkod, tibaad plano nindong basahon an Mateo 28:19. Anong mga termino an maninigo nindong idoon? Kun gusto nindong enkaminaron an kahigosan sa pagpoon nin mga pag-adal sa Biblia, tawan nin istres an “gumibo kamo nin mga disipulo.” Sa ibong na lado, kun plano nindong tokaron an paninimbagan nin Kristiano na ipaabot an katotoohan kan Biblia sa mga dayo o gusto nindong enkaminaron an nagkapirang parahayag na maglingkod kun saen mas dakula an pangangaipo, puede nindong tawan nin istres an “mga tawo kan gabos na nasyon.”

Sa parate, iinaatubang an sarong teksto bilang simbag sa sarong hapot o bilang suporta sa sarong argumento na sa pagheling nin iba puedeng pagdebatehan. Kun parareho an pagdodoon sa lambang ideya na ipinahahayag sa teksto, tibaad dai maheling kan nagdadangog sa saindo an koneksion. Tibaad sayod na sayod para sa saindo an punto alagad sa sainda bako.

Halimbawa, kun binabasa an Salmo 83:18 sa Biblia na igwa kan ngaran nin Dios, kun ibubugtak nindo an gabos na pagdodoon sa fraseng “an Kaharohalangkawe,” tibaad dai masabotan nin kagharong an garo baga sayod na sayod na bagay na an Dios may personal na ngaran. Maninigo na tawan nindo nin istres an ngaran na “Jehova.” Minsan siring, kun ginagamit nindo an teksto man sanang iyan sa orolay manongod sa soberaniya ni Jehova, maninigo na tawan nindo nin prinsipal na pagdodoon an fraseng “an Kaharohalangkawe.” Kaagid kaiyan, kun ginagamit an Santiago 2:24 tanganing ipaheling an halaga na padisan nin gibo an pagtubod, an pagtao nin prinsipal na pagdodoon sa “ipinahahayag na matanos” imbes na sa “mga gibo” tibaad magin dahelan na an punto dai makua nin nagkapira na nagdadangog sa saindo.

An saro pang nakatatabang na halimbawa yaon sa Roma 15:7-13. Kabtang ini nin surat ni apostol Pablo sa sarong kongregasyon na kompuesto nin mga Hentil sagkod natural na mga Judio. Digdi nangangatanosan an apostol na an nakikinabang sa ministeryo ni Cristo bako sanang an tinuring mga Judio kundi pati an mga tawo kan mga nasyon tangani na “an mga nasyon magpamuraway sa Dios huli sa saiyang pagkaherak.” Dangan kinotar ni Pablo an apat na teksto, na dinadara an atension sa oportunidad na iyan para sa mga nasyon. Paano daw nindo maninigong basahon an mga kotasyon na iyan tangani na ikadoon an puntong nasa isip ni Pablo? Kun minamarkahan nindo an mga frase na tatawan nin istres, puede nindong markahan an “mga nasyon” sa bersikulo 9, “kamong mga nasyon” sa bersikulo 10, “kamo gabos na nasyon” asin “an gabos na banwaan” sa bersikulo 11, asin “mga nasyon” sa bersikulo 12. Probaran na basahon an Roma 15:7-13 na igwa kan pagdodoon na iyan. Mantang ginigibo nindo iyan, an enterong argumento ni Pablo magigin mas malinaw asin mas pasil na saboton.

Mga Paagi nin Pagdodoon. An mga terminong igwa kan ideya na gusto nindong lumataw puedeng tawan nin istres sa dakol na paagi. An paaging gagamiton nindo maninigo na komporme sa teksto asin sa klase kan pahayag. May itinatao digding nagkapirang suhestion.

Istres paagi sa boses. Ini ano man na pagbago kan boses tangani na an mga terminong igwa kan ideya lumataw sa natatada pa kan sentence. Puedeng magibo an pagdodoon paagi sa pagbago kan kosog nin boses​—magsalang dugangan iyan o inaan iyan. Sa dakol na lenguahe, an pagbago kan tono nakatatao nin pagdodoon. Minsan siring, sa nagkapirang lenguahe, tibaad mabago kaiyan nin biyo an kahulogan. Kun ginagamitan nin mas maluway na rikas an mayor na mga frase, an mga iyan natatawan kaini nin puersa. Sa mga lenguahe na dai puede an istres paagi sa boses bilang paagi na ikadoon an nagkapirang termino, kaipuhan na gibohon an ano man na pinagkatodan sa lenguaheng iyan tangani na makamtan an minamawot na mga resulta.

Pagpondo nguna. Magigibo ini bago o pagkatapos na basahon an mayor na kabtang nin sarong teksto​—o pareho. An pagpondo nguna bago nindo basahon an sarong prinsipal na ideya nagbubunga nin pag-antisipar; an pagpondo nguna pagkatapos pinarararom an nagibong impresyon. Minsan siring, kun kadakol kan pagpondo nguna, mayo nin malataw.

Pag-otro. Matatawan nindo nin pagdodoon an sarong partikular na punto paagi sa pagpondo asin pagbasa giraray kan termino o frase. An paagi na sa parate mas marahay iyo na taposon nguna an teksto dangan otrohon an mayor na termino.

Mustra. An hiro kan hawak saka an panlauog parate na nakatatao nin emosyon sa sarong termino o frase.

Entonasyon kan boses. Sa nagkapirang lenguahe, an mga termino kun beses puedeng basahon sa entonasyon na nakaiimpluwensia sa kahulogan kaiyan asin isinisiblag an mga iyan. Digdi maninigo man na gamiton an diskresion, nangorogna sa paggamit nin pagtuyatuya.

Kun Iba an Nagbabasa kan Teksto. Kun kagharong an nagbabasa kan teksto, tibaad mga terminong dai dapat an matawan nia nin istres o mayo siang matawan nin istres. Kun siring, ano an magigibo nindo? Sa pankagabsan pinakamarahay na linawon an kahulogan paagi sa pag-aplikar nindo kan mga teksto. Pakaaplikaran, puede nindong isentro an espesyal na atension sa mismong mga termino sa Biblia na igwa kan ideya.

KUN nagtotokdo sa iba, an hinahagad bako sanang pagbasa nin mga bersikulo sa Biblia. Nagsurat si apostol Pablo sa kaibaiba niang si Timoteo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.”​—2 Tim. 2:15.

An paggibo kaini nangangahulogan na an eksplikasyon niato sa mga teksto dapat na kabagay kan itinotokdo mismo kan Biblia. Hinahagad kaini na konsideraron niato an konteksto, imbes na pumili sana nin mga pananaram na nagugustohan niato asin idugang an sadiri niatong mga ideya. Paagi ki propeta Jeremias, nagpatanid si Jehova tumang sa mga propeta na naghihingakong nagtataram gikan sa ngoso ni Jehova alagad an totoo “kapahayagan kan saindang puso” an iinaatubang. (Jer. 23:16) Pinatanidan ni apostol Pablo an mga Kristiano tumang sa pagsalak sa Tataramon nin Dios kan mga pilosopiya nin mga tawo kan sia sumurat: “Isinikwal niamo an rirong na mga bagay na maninigong ikasupog, na dai naglalakaw na may katusohan, ni hinahaloan man an tataramon nin Dios.” Kan mga aldaw na idto sinasalakan nin madayang mga negosyante nin arak an saindang arak tangani na iyan dumakol asin pagkakuartahan nin mas dakol. Dai niato hinahaloan an Tataramon nin Dios paagi sa pagsalak kaiyan sa mga pilosopiya nin tawo. “Kita bakong mga paratinda kan tataramon nin Dios arog nin dakol na tawo,” sabi ni Pablo, “kundi bilang gikan sa sinseridad, iyo, bilang isinugo nin Dios, na naheheling nin Dios, kaiba ni Cristo, kita nagtataram.”​—2 Cor. 2:17; 4:2.

Kun beses, tibaad kotaron nindo an sarong teksto tanganing matawan nin pagdodoon an sarong prinsipyo. An Biblia pano nin mga prinsipyo na nagtatao nin marahay na paggiya sa pag-atubang sa kadakoldakol na situwasyon. (2 Tim. 3:16, 17) Alagad maninigo na seguradohon nindo na tamang-tama an pag-aplikar nindo asin na dai nindo ginagamit sa sala an sarong teksto, na pinalalataw na sinasabi kaiyan an gusto nindong sabihon kaiyan. (Sal. 91:11, 12; Mat. 4:5, 6) An pag-aplikar dapat na kaoyon kan katuyohan ni Jehova, kabagay kan enterong Tataramon nin Dios.

Kabale man sa ‘paggamit kan tataramon kan katotoohan sa tamang paagi’ an pakasabot sa tunay na kahulogan kan sinasabi kan Biblia. Bako iyan na “pamukpok” na panakot sa iba. An relihiosong mga paratokdo na kontra ki Jesu-Cristo nagkotar sa Kasuratan, alagad pinipirong ninda an saindang mga mata sa mas importanteng mga bagay​—an mga may labot sa hustisya asin pagkaherak patin pagigin fiel​—na hinahagad nin Dios. (Mat. 22:23, 24; 23:23, 24) Kun nagtotokdo kan Tataramon nin Dios, ipinababanaag ni Jesus an personalidad kan saiyang Ama. An kaigotan ni Jesus para sa katotoohan pinadisan kan hararom na pagkamoot nia sa mga tawong tinotokdoan nia. Maninigo na hingoahon niato na arogon an saiyang halimbawa.​—Mat. 11:28.

Paano niato masisierto na tama an pag-aplikar niato nin sarong teksto? Makatatabang an regular na pagbasa kan Biblia. Kaipuhan na apresyaron man niato an probisyon ni Jehova na “fiel asin may diskresion na oripon,” an grupo nin mga Kristianong linahidan kan espiritu na paagi sa sainda sia nagtatao nin espirituwal na kakanon para sa kapamilya sa pagtubod. (Mat. 24:45) An personal na pag-adal saka an regular na pag-atender asin pakikikabtang sa mga pagtiripon kan kongregasyon makatatabang sa sato na makinabang sa pagtotokdong itinatao paagi sa grupong fiel asin may diskresion na oripon na iyan.

Kun may Reasoning From the Scriptures sa saindong lenguahe asin manodan nindong gamiton iyan nin toltol, madalion nindong makukua an paggiyang kaipuhan nindo para sa tamang pag-aplikar nin ginatos na teksto na parateng ginagamit sa satong ministeryo. Kun plano nindong gumamit nin tekstong bakong pamilyar, pahihiroon kamo nin kababaan nin boot na gibohon an kinakaipuhan na pagsiyasat tangani na pagtaram nindo, magagamit nindo an tataramon kan katotoohan sa tamang paagi.​—Tal. 11:2.

Linawon an Pag-aplikar. Kun nagtotokdo sa iba, seguradohon na malinaw nindang naheheling an koneksion sa pag-oltanan kan temang tinotokar nindo asin kan mga tekstong ginagamit nindo. Kun may hapot kamo bago an teksto, maninigo na maheling kan mga naghihinanyog sa saindo kun paano sinisimbag kan teksto an hapot na iyan. Kun ginagamit nindo an teksto bilang suporta sa sarong deklarasyon, seguradohon na malinaw na naheheling kan estudyante kun paano pinatutunayan kan teksto an punto.

Parate na bakong igo an pagbasa sana kan teksto​—dawa may pagdodoon. Girumdoma, an ordinaryong tawo bakong pamilyar sa Biblia asin dai gayod masasabotan an punto nindo sa saro sanang barasahan. Darahon an atension sa kabtang kan teksto na direktang aplikado sa saindong pinag-oolayan.

Parate na hinahagad kaini na isiblag nindo sa iba an mga terminong makahulogan, an mga direktang konektado sa puntong pinag-oolayan. An pinakasimpleng paagi sabihon giraray an mga terminong igwa kan ideya. Kun nakikipag-olay kamo sa sarong indibiduwal, puede kamong gumamit nin mga hapot na matabang sa saiya na mamidbid an mga terminong makahulogan. Kun nakikipag-olay sa sarong grupo, mas gusto nin nagkapirang nagpapahayag na otobon an obheto ninda paagi sa paggamit nin mga kakahulogan o paagi sa pagsabi giraray kan ideya. Minsan siring, kun pinili nindong gibohon ini, magmaan na dai malingawan kan mga nagdadangog an koneksion sa pag-oltanan kan puntong pinag-oolayan asin kan pagkasabi sa teksto.

Mantang ikinasiblag na nindo sa iba an mga terminong makahulogan, nakabugtak na kamo nin marahay na pundasyon. Ngonyan ipadagos nindo iyan. Iinintrodusir daw nindo an teksto na malinaw na ipinaririsa an dahelan nindo sa paggamit kan teksto? Kun iyo, sabihon kun paano an mga termino na dian saindong isinentro an atension konektado sa ipinaantisipar nindo sa mga nagdadangog sa saindo. Isabi nin malinaw kun ano an koneksion na iyan. Dawa kun dai kamo naggamit nin siring kaklarong introduksion sa teksto, dapat na may pagpapadagos.

Hinapot kan mga Fariseo si Jesus nin sa paghona ninda depisil na hapot, arin na baga: “Sono daw sa ley na idiborsio nin lalaki an saiyang agom na babae sa gabos na klase nin dahelan?” Ibinasar ni Jesus an saiyang simbag sa Genesis 2:24. Mangnoha na isinentro nia an atension sa saro sanang kabtang kaiyan, dangan ginibo nia an kaipuhan na pag-aplikar. Pakatapos na sabihon na an mag-agom nagigin “sarong laman,” nagkonklusyon si Jesus: “Kun siring, an pinagsaro nin Dios dai pagsuwayon nin siisay man.”​—Mat. 19:3-6.

Guranong eksplikasyon an maninigo nindong itao tanganing linawon an pag-aplikar nin sarong teksto? An maninigong magdeterminar dian kun sairisay an mga nagdadangog sa saindo asin an halaga kan puntong pinag-oolayan. An magin obheto nindo pagigin simple asin direkta.

Magrason Hale sa Kasuratan. Mapadapit sa ministeryo ni apostol Pablo sa Tesalonica, sinasabi sa sato kan Gibo 17:2, 3 na sia ‘nagrason hale sa Kasuratan.’ Ini abilidad na maninigong pagmaigotan na makultibar kan lambang lingkod ni Jehova. Halimbawa, isinaysay ni Pablo an mga detalye mapadapit sa buhay saka ministeryo ni Jesus, ipinaliwanag na an mga ini ihinula sa Hebreong Kasuratan, dangan itinao an mapuersang konklusyon sa pagsabi: “Iyo ini an Cristo, an Jesus na ini na ipinahahayag ko sa saindo.”

Kan nagsurat sa mga Hebreo, si Pablo paorootrong nagkotar sa Hebreong Kasuratan. Tanganing ikadoon o linawon an sarong punto, parate niang isinisiblag sa iba an sarong termino o halipot na frase dangan ipinaheheling an kahulogan kaiyan. (Heb. 12:26, 27) Sa salaysay na yaon sa Hebreo kapitulo 3, nagkotar si Pablo sa Salmo 95:7-11. Mangnoha na pinalaba nia an saiyang sinabi manongod sa tolong kabtang kaiyan: (1) an pagkasambit sa puso (Heb. 3:8-​12), (2) an kahulogan kan tataramon na “Ngonyan” (Heb. 3:7, 13-​15; 4:6-​11), asin (3) an kahulogan kan deklarasyon na: “Dai sinda malaog sa sakong kapahingaloan” (Heb. 3:11, 18, 19; 4:1-​11). Hingoahon na arogon an halimbawang iyan mantang iinaaplikar nindo an kada teksto.

Obserbari kun gurano kaepektibo kan pagrason ni Jesus hale sa Kasuratan sa salaysay na yaon sa Lucas 10:25-37. An sarong lalaki na madonong sa Ley naghapot: “Paratokdo, paagi sa paggibo nin ano na ako magmamana nin buhay na daing katapusan?” Sa pagsimbag inagda nguna ni Jesus an lalaki na ipahayag an opinyon nia sa bagay, dangan idinoon ni Jesus an halaga nin paggibo kan sinasabi kan Tataramon nin Dios. Kan magin malinaw na dai nasasabotan kan lalaki an punto, tinokar ni Jesus nin lubos an saro sanang termino sa teksto​—an “kapwa.” Imbes na ipaliwanag sana an kahulogan kaiyan, naggamit sia nin sarong ilustrasyon tangani na matabangan an lalaki na makaabot mismo sa tamang konklusyon.

Risang-risa na kun nagsisimbag sa mga hapot, si Jesus dai sana nagkotar nin mga teksto na nagtatao nin direkta, sayod na sayod na simbag. Pinag-analisar nia an sinasabi kan mga ini dangan iinaplikar iyan sa yaon na hapot.

Kan kinukuestion kan mga Saduceo an paglaom sa pagkabuhay liwat, isinentro ni Jesus an atension sa sarong espesipikong kabtang kan Exodo 3:6. Alagad dai sia nagpondo pakakotara kan teksto. Nagrason sia dian tangani na ipaheling nin malinaw na an pagkabuhay liwat kabtang kan katuyohan nin Dios.​—Mar. 12:24-27.

An pagigin eksperto sa abilidad na magrason nin tama asin epektibo hale sa Kasuratan magigin dakulang bagay sa saindong pagigin ekspertong paratokdo.

BAGA man sarong indibiduwal o mas dakulang grupo an kaolay nindo, bakong madonong na ipamugtak na magigin interesado sa tema nindo an naghihinanyog sa saindo huli sana ta interesado kamo dian. Importante an mensahe nindo, alagad kun dai nindo mahimong linawon an praktikal na halaga kaiyan, dai gayod maghahaloy na marhay an interes kan mga nagdadangog sa saindo.

Totoo ini dawa sa mga nagdadangog sa Kingdom Hall. Tibaad sa isip ninda mag-intindi sinda kun minagamit kamo nin ilustrasyon o eksperyensia na dai pa ninda nadangog. Alagad tibaad dai na sinda mag-intindi kun an sinasabi nindo mga bagay na dati na nindang aram, nangorogna kun dai nindo madugangan an mga bagay na iyan. Kaipuhan na tabangan nindo sindang masabotan kun taano asin paano na an saindong sinasabi tunay na kapakipakinabang para sa sainda.

Ineenkaminar kita kan Biblia na isipon kun ano an praktikal. (Tal. 3:21) Si Juan na Bautisador ginamit ni Jehova na giyahan an mga tawo sa “praktikal na kadonongan nin mga matanos.” (Luc. 1:17) Ini kadonongan na gikan sa nakararahay na takot ki Jehova. (Sal. 111:10) An mga may pag-apresyar sa kadonongan na ini natatabangan na mapangganang makaatubang sa buhay ngonyan asin makapangapot sa tunay na buhay, an maabot na buhay na daing sagkod.​—1 Tim. 4:8; 6:19.

Paggibong Praktikal sa Sarong Pahayag. Tangani na magin praktikal an saindong pahayag, dapat na maingat nindong isip-isipon bako sanang an materyales kundi pati an mga magdadangog. Dai sinda isipon bilang saro sanang grupo. An grupong iyan kompuesto nin mga indibiduwal asin pamilya. Tibaad may mga akion pa, tinedyer, nasa edad na, asin nagkapirang may edad na. Tibaad may mga bagong interesado saka mga nagpoon na maglingkod ki Jehova bago kamo namundag. An nagkapira tibaad maygurang sa espirituwal; an iba tibaad impluwensiado pang marhay nin mga aktitud asin gibo kan kinaban. Ihapot sa sadiri: ‘Paano daw pakikinabangan kan mga magdadangog an sakuyang totokaron? Paano ko daw sinda matatabangan na makua an punto?’ Tibaad magdesisyon kamo na tawan nin prinsipal na atension an saro o duwa sana sa mga grupong nasambitan digdi. Minsan siring, dai biyong paglingawan an iba.

Ano kun naasignaran kamo na tokaron an sarong pundamental na katokdoan kan Biblia? Paano daw nindo magigibong kapakipakinabang an siring na pahayag sa mga nagdadangog na dati nang nagtutubod sa katokdoan na iyan? Hingoahon na pakosogon an kombiksion ninda dian. Paano? Paagi sa pagrason sa ebidensia sa Kasuratan na nagsusuportar dian. Maparararom man nindo an pag-apresyar ninda sa katokdoan na iyan kan Biblia. Magigibo ini paagi sa pagpaheling kun paano na an katokdoan kabagay kan ibang katotoohan sa Biblia asin kan personalidad mismo ni Jehova. Gumamit nin mga halimbawa​—kun puede aktuwal na mga eksperyensia—​na nagpapaheling kun paano an pakasabot sa partikular na katokdoan na ini nagtao nin pakinabang sa mga tawo asin nakaimpluwensia sa punto de vista ninda sa ngapit.

Dai paglimitaran an praktikal na pag-aplikar sa pira sanang halipot na komento sa katapusan kan saindong pahayag. Sa kapinonan pa sana, maninigo na mamatean kan balang saro sa mga nagdadangog sa saindo na “may labot ini sa sako.” Kun ikinabugtak na an pundasyon na iyan, padagos na gumibo nin praktikal na pag-aplikar mantang detalyado nindong ipinaliliwanag an kada saro sa prinsipal na mga punto sa mayor na parte kan pahayag saka sa konklusyon.

Kun ginigibo an pag-aplikar, seguradohon na gibohon iyan sa paagi na kabagay kan mga prinsipyo sa Biblia. Ano an boot sabihon kaiyan? Iyan nangangahulogan nin paggibo kaiyan sa mamomoton na paagi asin nin pagpaheling nin empatiya. (1 Ped. 3:8; 1 Juan 4:8) Dawa kan inaaksionan an masakit na mga problema sa Tesalonica, sinierto ni apostol Pablo na isentro an atension sa positibong mga aspekto kan espirituwal na pag-oswag kan saiyang Kristianong mga tugang na lalaki asin babae duman. Nagpahayag man sia nin pagkompiar na sa bagay na tinotokar kaidto, gugustohon nindang gibohon an tama. (1 Tes. 4:1-12) Abaa karahay na modelong aarogon!

An katuyohan daw kan saindong pahayag pukawon an pakikikabtang sa gibong paghuhulit asin pagtotokdo kan maogmang bareta sa iba? Pakosogon an entusiasmo asin pag-apresyar sa pribilehiong iyan. Minsan siring, mantang ginigibo iyan, girumdomon na nagkakalaenlaen an kayang gibohon na pakikikabtang digdi nin mga indibiduwal, asin kinokonsiderar ini kan Biblia. (Mat. 13:23) Dai pagabatan an saindong mga tugang nin mga pakamate nin kasalan. Sinasadol kita kan Hebreo 10:24 na “mandagka sa pagkamoot asin sa marahay na mga gibo.” Kun kita mandadagka sa pagkamoot, masunod an mga gibo na basado sa marahay na motibo. Imbes na hingoahon na idikta an pagsunod, midbidon na an gusto ni Jehova palakopon niato an “pagkuyog paagi sa pagtubod.” (Roma 16:26) Nasa isip ini, hinihingoa niato na pakosogon an pagtubod​—niato sagkod kan satong mga tugang.

Pagtabang sa Iba na Makua an Punto. Mantang naghuhulit kamo sa iba, dai paglingawan na isentro an atension sa praktikal na halaga kan maogmang bareta. Hinahagad kaiyan na konsideraron nindo an nasa isip kan mga tawo sa saindong teritoryo. Paano daw nindo maaaraman? Maghinanyog sa bareta sa radyo o telebisyon. Helingon an enot na pahina kan diaryo. Siring man, hingoahon na mapaayon sa orolay an mga tawo, asin maghinanyog kun sinda nagtataram. Tibaad madiskobre nindo na nakikitusayan sinda sa mga problema na kaipuhan na asikasohon tolos​—pagkawara kan trabaho, pagbayad kan arkila, helang, pagkagadan nin sarong miembro nin pamilya, peligro sa krimen, inhustisya sa kamot nin saro na nasa autoridad, pagkasuwayan nin mag-agom, paghihingoang makontrol an mga aki, asin iba pa. Matatabangan daw sinda kan Biblia? Iyo nanggad.

Kun pinoponan an orolay, posibleng marhay na may nasa isip kamong sarong tema. Minsan siring, kun iparisa kan kaolay nindo na may ibang bagay na dian sia may importanteng marhay na personal na interes, dai magduwaduwa na iyan an tokaron kun kaya nindo, o mag-opresir na bumalik dara an nakatatabang na impormasyon. Siempre, linilikayan niato na ‘mag-atom sa mga bagay na daing labot sa sato,’ alagad maogma niatong ipinaaabot sa iba an praktikal na hatol na itinatao kan Biblia. (2 Tes. 3:11) Siempre pa, an pinakamakatutudok sa isip nin mga tawo hatol kan Biblia na may labot sa saindang buhay.

Kun dai nasasabotan nin mga tawo kun paano sinda personal na apektado kan satong mensahe, tibaad taposon tolos ninda an orolay. Dawa kun pabayaan ninda kitang magtaram, an dai niato pakahimong ipaheling an praktikal na halaga kan tema tibaad mangahulogan na magigin kadikiton an epekto kan satong mensahe sa saindang buhay. Sa kabaliktaran, kun lilinawon niato an praktikal na halaga kan mensahe, an orolay niato puedeng magin an panahon nin dakulang pagbago sa buhay nin mga tawo.

Kun namamayo sa mga pag-adal sa Biblia, padagos na isentro an atension sa praktikal na pag-aplikar. (Tal. 4:7) Tabangan an mga inaadalan na masabotan an hatol, mga prinsipyo, asin halimbawa sono sa Kasuratan na nagtotokdo sa sainda kun paano malakaw sa mga dalan ni Jehova. Idoon an mga pakinabang sa paggibo kaiyan. (Isa. 48:17, 18) Mapahiro ini sa mga inaadalan na gibohon an kinakaipuhan na mga pagbago sa saindang buhay. Parigonon sa boot ninda an pagkamoot ki Jehova asin an kamawotan na panigoan sia, asin pabayaan na maghale sa boot ninda an motibasyon na iaplikar an hatol hale sa Tataramon nin Dios.