An Sonar nin Dolphin

Nagpoprodusir an mga dolphin nin manlain-lain na siwit asin lagatik dangan dinadangog an mga tanog na nagbabalik sa sainda tanganing maaraman an tamang direksiyon asin an mga bagay sa palibot ninda. Huling napahanga sa natural na sonar nin bottlenose dolphin (Tursiops truncatus), naggigibo an mga siyentista nin underwater acoustic system tanganing masolusyunan an mga problema na dai pa kaya kan teknolohiya ngunyan.

Pag-isipan: Huli sa saindang sonar, nahahanap kan mga dolphin an sira na nagtatago sa baybay sa salog kan dagat saka nadedeterminaran ninda kun an sarong bagay sira o gapo. Sigun ki Keith Brown, sarong associate professor sa Heriot-Watt University sa Edinburgh, Scotland, kaya man nin dolphin na “madeterminaran an laog nin mga lalagan kun baga iyan tubig-tabang, tubig-dagat, syrup, o krudo sa [rayong] 10 metros.” Gusto kan mga siyentista na makagibo nin mga aparato na may arog kaiyan na kakayahan.

Pig-analisar kan mga parasiyasat an mga tanog na napoprodusir nin mga dolphin asin an pagdangog kaini dangan pinurbaran nindang arugon iyan sa saindang imbensiyon. An resulta sarong aparatong sonar na kadakul nin sopistikadong elektroniks na ilinaag sa sarong silindrikong lalagan na mayo pang sarong metro an laba. An aparatong ini, na ikinakabit sa sarong underwater robotic vehicle na garo torpedo, dinisenyo tanganing inspeksiyunon an salog kan dagat, hanapon an nakatalbong na mga bagay arog nin mga kable o tubo, asin analisaron iyan na dai na dinudutaan. Inaasahan kan mga naggibo kaiyan na magagamit an ideyang ini sa industriya nin krudo asin gas. An sonar na inarog sa mga dolphin makakatabang na mas madagdagan an impormasyon na nakukua nin mga sonar na aparato ngunyan tanganing matabangan an mga technician na mailaag sa pinakamarahay na lokasyon an saindang mga underwater equipment, maaraman kun may ano man na raot iyan—arog nin saraditon na gatak sa pinakabitis kan oil-rig—asin mahanap pa ngani an mga bara sa mga tubo.

Ano sa hiling mo? Resulta daw nin ebolusyon an sonar kan bottlenose dolphin? O may nagdisenyo kaiyan?