Taano ta Dapat na Magpasalamat?

HELINGA an tutob kan magasin na ini. Tunay na iyan nagpapagirumdom sato na kadakol kan magagayon na bagay na nakababawi sa kanos asin karigsokan na naheheling sa gabos na lugar.

Inaapresyar daw nindo an magagayon na bagay? Isip-isipa an sarong hablondawani na may maaliwalas, pinong kombinasyon nin mga kolor pakalihis kan kadikloman nin sarong bagyo. Imahinara an nag-uulakbong busay. O probaring imahinaron an mga hayop na maogmang nakikikawat sa saindang mga ogbon. Iladawan sa isip an makawiwiling hardin nin mga burak o an abundang anihon na trigo. Iyo, an mga ini ordinaryo na sana para sa dakol. Alagad ta ano an epekto kan mga iyan sa saindo?

Madaling Dai Na Pagmangnohon

Sa parate, mientras na mas parateng naeeksperyensiahan an sarong bagay, orog iyan na nagigin ordinaryo—asin mas pasil na dai na iyan pagmangnohon. An pagkukulang na ini tibaad garo baga mas risa sa marikas an dalagan na ika-20 siglong ini. Alagad an dai pagtao nin panahon na horop-horopon o bilangon an mga bendisyon asin dahelan na magpasalamat poon pa kaidto saro na sa mga pagkukulang nin bakong sangkap na tawo.

Sa ibong na kampi, an salmistang si David, sa irarom nin pasabong, parateng nagpapahayag nin pagpasalamat sa awit. An mga tataramon na ini na ipinanonongod sa Dios sa saro sa mga awit ni David pangenot na halimbawa nin pagpapasalamat:

“Kun naheheling ko an saimong kalangitan, an mga gibo kan saimong mga moro,

An bulan asin mga bitoon na saimong hinaman,

Ano an magagadanon na tawo ta sia ginigirumdom mo,,

Asin an aki nin daganon na tawo ta sia inaataman mo?

Ipinasakop mo sa saiya an mga gibo kan saimong mga kamot;

An gabos ibinugtak mo sa irarom kan saiyang mga bitis;

An saradit na baka asin kapon na baka, sinda gabos:

Siring man an mga hayop sa kapatagan,

An mga gamgam kan kalangitan asin an mga sira sa dagat,

An ano man na nag-aagi sa mga dalan kan kadagatan.

O Jehova na samong Kagurangnan, halangkawon nanggad an saimong ngaran sa bilog na daga!”​—Salmo 8:3, 4, 6-9.

An Pagpasalamat Puwedeng Makahale sa Kamondoan

An pagpasalamat kan salmista sa magagayon na bagay nakatabang na mapagian an ano man na kamondoan na bunga nin makakanos na bagay o masakit na mga situwasyon. Kamo man puwedeng magkaigwa nin kaparehong eksperyensia. Paano? Paagi sa paghihingoa na orog na apresyaron an dakol na magagayon na bagay sa palibot niato. Sa paaging ini, madudugangan nindo an kaogmahan nindo asin kan mga nasa palibot nindo.

Kaya taano ta dai togotan na an magagayon na paghelingon asin makangangalas na mga bagay sa aroaldaw pumukaw nin odok sa pusong pagpasalamat sa satong matinaong Kaglalang? Helinga ngonyan an iba pang dugang na dahelan na magpasalamat.

Dugang Pang mga Dahelan na Magpasalamat

AN BANWAAN nin suanoy na Israel igwa nin mas dakol na dahelan kisa iba na magpasalamat sa Kaglalang. Taano ta masasabi niato ini?

Bueno, kapareho nin gabos na ibang tawo, an mga Israelitas may dahelan na magpasalamat sa gabos na magagayon asin makangangalas na mga bagay na linalang nin Dios. Alagad sinda may dugang na dahelan na magpasalamat huli ta pinili sinda kan Makakamhan sa gabos na magin saiyang espesyal na banwaan asin inataman sinda. (Amos 3:1, 2) Helinga an nagkapira sa saindang pambihirang mga dahelan na magpasalamat.

Duwang Pagkaligtas sa Kagadanan

Kanigoan an pagpasalamat kan gabos na magurang na Israelita,kan banggi nin Nisan 14, 1513 B.C.E.! Sa mahalagang bangging idto, an anghel nin Dios nagdara nin kagadanan sa “gabos na matua sa daga nin Egipto, magpoon sa tawo sagkod sa hayop.” Pero linihisan nia an mga harong na Israelita na dian an dugo kan mga hayop nin Pascua iwinirik sa mga harigi asin balagbag sa itaas kan mga pinto. Napasa an katoninongan kan magpoon an “kanigoan na kinurahaw kan mga taga-Egipto huli ta mayo nin harong na mayo nin gadan.” Pero, an mahal na matua kan kada pamilyang Israelita buhay asin marahay.—Exodo 12:12, 21-24, 30.

Dai nahaloy, seguradong nagsulwak an pagpasalamat sa puso kan mga Israelitas kan maheling ninda an milagrosong pakikilabot ni Jehova kan garo baga sinda naiipit sa mga baybayon kan Dagat na Pula, na naglalapag an hukbo kan Faraon nin Egipto. Enot, naheling ninda an hariging panganoron na nangengenot sa sainda na puminaduman sa likod ninda, na epektibong pinaluya an mga naglalapag. Dangan naheling kan mga Israelitas na inunat ni Moises an saiyang kamot sa ibabaw kan dagat, asin napangalas sinda kan papangyarihon nin Dios na an makosog na doros hale sa subangan maghuyop magdamlag, na binanga an dagat asin pinamara an irarom kan dagat. An mga Israelitas dai nang gayo kinaipuhan na sadolon na maghidale sa itinao nin Dios na maaagihan na ini sa pagdulag.

Alagad, ngonyan, may bago na naman na ikatatakot! An mga taga-Egipto nagrulugsad sa dagat, na kompiadong malalapag ninda an mga Israelitas. Alagad ta uya! kan an gabos na Egipcio yaon na sa agihan na nalalanoban nin tubig, nagkatarangkas an mga ruweda sa saindang mga karuwahe, asin dai nahaloy nagkatararanta sinda. Dangan, kan an gabos na Israelitas yaon na sa ibong na baybayon, sinabihan giraray ni Jehova si Moises na unaton an saiyang kamot, “asin an dagat nagpoon na bumalik sa dating kamugtakan kaiyan kan nagmamaaga.” An resulta? Mayo ni saro sa mahal na hukbo ni Faraon an nakaligtas sa pagkalamos, ni an maabhaw na hade mismo. (Exodo 14:19-28; Salmo 136:15) Maiimahinar daw nindo kun gurano an pagpasalamat ki Jehova kan ilinigtas na mga Israelitas?

An Pambihirang mga Paagi nin Dios sa Pakikilaban

Minsan ngani nagpapasalamat sa saindang pagkaligtas sa Egipto asin sa dai malilingawan na pag-agi ninda sa Dagat na Pula, an mga Israelitas dakol pang nakapapagal na mga eksperyensia an aatubangon bago sinda makaabot sa Dagang Panuga. Alagad an kada eksperyensia sa saindang 40 taon na pagbaklay sa kapatagan maninigo kutanang nagin dugang pang dahelan na espesyal na magpasalamat ki Jehova.

Sa katapustapusi, an mga Israelitas nagdakit sa Salog nin Jordan asin yaon na sa dagang itinao sa sainda nin Dios Dai nahaloy naheling ninda an halimbawa kan pambihirang paagi ni Jehova sa pakikilaban para sa sainda. Paano man? Tara, paagi sa makangangalas na pagkabihag asin paglaglag sa enot na siudad na Canaanita na inabotan ninda—an Jerico! (Josue, kapitulo 6) Pambihira nanggad an ipinagboot nin Dios na estratehiya nin pagmartsa sa palibot nin Jerico mantang dara-dara an kaban kan tipan! Sa anom na sunod-sunod na aldaw, nagmartsa sinda sa palibot kan lanob sarong beses kada aldaw. Kan ikapitong aldaw, pitong beses sindang nagmartsa sa palibot kan lanob. Kan patanogon kan mga saserdote an saindang mga amodyong, pinasa an katoninongan kan mga Israelitas paagi sa “makosog na kurahaw sa ralaban,” asin “an lanob na nagpoon na matumpag”! (Jos 6 Bersikulo 20) Solamente an harong ni Rahab asin an kabtang kan lanob na nasa sirongan kaiyan an nagdanay na nagtitindog. An lanob kan garo baga dai malalaog na siudad na ini natumpag na dai man lamang nagpalupad ni sarong pana si Josue asin an saiyang hukbo! Tunay na an eksperyensiang idto sa Jerico sarong pambihirang dugang pang dahelan na magpasalamat sa Dios.

Sa saro pang okasyon, nagkaigwa nin dugang pang pagpapaheling kan pambihirang mga paagi ni Jehova sa pakikilaban. Kan an mga taga-Gabaon makipagkatoninongan sa mga Israelitas, an limang hadeng Amorreo nagdeklarar nin guerra sa mga Gabaonita. Tinabangan sinda ni Josue, asin an milagrosong kamot ni Jehova orootrong ipinaheling sa suminunod na ralaban. Rinibaraw nin Dios an mga Amorreo, asin “kan sinda nagdudurulag sa atubangan nin Israel asin yaon duman sa pag-ibaba kan Bet-horon, si Jehova nagholog sa sainda nin darakulang gapo hale sa langit sagkod sa Azeca, kaya nagkagaradan sinda.” Mas dakol an nagadan sa mga gapong granisong idto kisa ginadan kan mga Israelitas sa hamo.—Josue 10:1-11.

“Sa pagheling kan Israel,” si Josue nakipag-olay ki Jehova asin nagsabi: “Aldaw, umontok ka sa Gabaon, asin, bulan, sa kababan nin Ayalon.” An resulta? “Kaya,” sabi kan tala, “an aldaw uminontok, asin an bulan tuminonong, sagkod na an nasyon makapamalos sa mga kaiwal kaiyan.”—Josue 10:12, 13.

Pambihira nanggad an mga pangyayaring idto! Asin iyan dugang pang pambihirang mga dahelan na magpasalamat an banwaan ni Jehova!

Madaling Nawara an Pagpasalamat

Pakatapos kan kada kapahayagan kan pangugunlabot ni Jehova, an mga Israelitas pano nin pagpasalamat. Posible na an lambang Israelita nagsabi sa saiyang puso na noarin man dai nia malilingawan an saiyang mga naheling. Pero, an pagpasalamat na iyan madalion na nawara. Paorootro, an mga Israelitas nagpaheling nin pagkaingrato. Kaya, an Dios “paorootro . . . itinao sinda sa kamot nin mga nasyon, tanganing an mga naoongis sa sainda maghade sa sainda.”—Salmo 106:41.

Alagad, ipinaheling ni Jehova an saiyang maboot na espiritu nin pagpapatawad kun an mga Israelitas nasasakitan, nagsosolsol sa saindang sala asin ingratong gibo, asin nag-aarang nin tabang sa saiya. “Naheheling nia an saindang kasakitan kun nadadangog nia an saindang inagrangay. Asin nagigirumdoman nia manongod sa sainda an saiyang tipan, asin sia nagbabasol huli sa kabalakidan kan saiyang dakulang mamomoton na kabootan.” (Salmo 106:44, 45) Paorootro, an saindang mapagpatawad na Dios kinalda sinda sa mga mapan-api asin inako sinda liwat sa saiyang pabor.

Sa ibong kan pakatios nin Dios asin kan saiyang paorootrong pagsugo nin mga propeta tanganing liwaton an saindang kaisipan, an mga Israelitas napatunayan na dai na magbabakle. Sa katapustapusi, naubos an pasensia ni Jehova, asin itinogot nia na an nasyon nin Juda madaog kan mga Babilonyo kan 607 B.C.E. An mga dai nagadan kan mga hukbo ni Hadeng Nabucodonosor dinarang bihag sa Babilonya.

Kapahapahamak nanggad na nasagkodan huli sa paorootrong pagkaingrato asin pagtraydor sa Dios! Asin ini nangyari sa ibong nin kadakol na dahelan na magpasalamat.

Paano daw an mga Kristiano ngonyan makalilikay sa iyo man sanang sala na dai makapagpaheling nin pagpasalamat sa gabos na ginibo para sa sainda ni Jehova Dios, labi pa sa mga karahayan nia sa pankagabsan na tawo? Ini pag-oolayan niato sa minasunod na artikulo.