Pagpapahiwas kan Sanga Digdi sa Pilipinas

¹ Kaidtong kuwarentang taon na an nakaagi, kan Pebrero, 1948, ibinalyo kan sanga digdi sa Pilipinas an opisina kaiyan sa 186 Roosevelt Avenue, Quezon City. Poon kaidto, asin sagkod ngonyan, iyan nakapaglingkod sa intereses kan Kahadean digdi sa Pilipinas. Kan 1954, 1962, asin 1972, may idinugang na bagong mga edipisyo mantang nagririkas an pagdakol. Ngonyan saditon na naman an presenteng mga edipisyo para sa 107,679 parahayag sa nasyon asin minalataw na kabotan ni Jehova na magkaigwa nin dugang na pagpapahiwas sa iyo man sanang lugar.​—⁠Isa. 54:⁠2.

² Sa nakaaging pirang taon an Sosyedad nakabakal nin 23,251 metro kuwadradong daga sa likod kan daga sa Roosevelt Avenue asin may plano ngonyan na magtogdok nin onseng-eskalon na dormitoryo na 73 metros kalaba asin 23 metros kalakbang, saka nin duwang-eskalon na imprentahan na magigin 83 metros kalaba asin 53 metros kalakbang. Pagkatapos kan mga ini, an presenteng pabrika asin dormitoryo liliwaton na magin mga opisina asin bagong reception area saka Kingdom Hall an isasalida sa presenteng daan na mga edipisyo sa Roosevelt Avenue. An drowing nin arkitekto sa pahina 4 asin 5 makatatabang saindong maheling kun ano an itsura kan proyekto.

AN NAGIBO NA NGONYAN

³ Kan Abril, 1988, nakua an building permit sa lokal na mga autoridad na magtogdok nin dormitoryo asin imprentahan. Kan Mayo asin Hunyo, nagpoon na umabot an mga tugang hale sa Internasyonal na Boluntaryong mga Trabahador sa Pagtotogdok kan Sosyedad asin nagpoon na an trabaho. An dating mga edipisyo ginaba na, asin nagpoon na an pagdungkal para sa sirong kan dormitoryo.

⁴ An Namamahalang Grupo nagdesisyon na an kadaklan na trabaho gigibohon nin mga tugang na nagboluntaryo imbes na ipakontrata an trabaho sa ibang kompanya. An dormitoryo iyo an magigin pinakahalangkaw na edipisyo na itotogdok kan mga boluntaryong trabahador kan Sosyedad, asin siyempre, an bilog na proyektong ini iyo an pinakadakulang trabaho sa kasaysayan kan sanga digdi sa Pilipinas!

⁵ Tanganing may mapaistaran sa mga boluntaryo na madigdi sa Bethel, an Sosyedad nagbakal nin sarong dakulang edipisyo mga kabangang kilometro an rayo sa Bethel, asin ini gagamiton na temporaryong istaran nin magpoon 100 sagkod 200 na trabahador. Ginibo man an areglo para sa dugang na kakanan para sa mga boluntaryo, asin may tinindog na mga opisina kan pagtotogdok sa dagang totogdokan. Sa panahon na mabasa nindo ini, daing duwa-duwa na marahay na an dalagan kan trabaho.

GIKAN SA BOOT NA MGA BOLUNTARYO

⁶ Puwede daw na magtogdok nin arog kaini kadarakulang edipisyo na mga boluntaryo sanang trabahador an ginagamit? Iyan magigin imposible sa palakaw ni Satanas, alagad huli sa marahay na espiritu nin pagkasararo asin kooperasyon sa organisasyon ni Jehova, iyan magigibo. An Salmo 110:​3 nagsasabi na an “banwaan [ni Jehova] gikan sa boot na magpepresentar kan saindang sadiri sa aldaw kan saimong kapangyarihan,” asin ini totoo bako sanang sa paghuhulit asin paggibo nin disipulo, kundi pati sa mga proyekto nin pagtotogdok na arog kaini. Siyempre, sa gabos na ini, linalaoman niato si Jehova na bendisyonan an proyekto, ta an Salmo 127:​1 nagsasabi: “Sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan.”

⁷ Ngonyan pa naheheling na niato an espiritu nin internasyonal na kooperasyon sa pagplano kan dakulang proyektong ini. An Opisina sa Pagtotogdok sa Brooklyn, saka an sanga sa Hapon, nagpagal sa paggibo kan mga plano. An mga trabahador hale sa dakol na laen-laen na nasyon, na duman sinda nagtrabaho sa iba pang pagtotogdok nin sanga. Makangangalas nanggad na maheling an paghiro kan tunay na pagkasararo kan Bagong Kinaban!

“PUWEDE DAW AKONG MAGBOLUNTARYO?”

⁸ Sierto na an hapot na ini tolos an minasabong sa isip nindo. Siyempre, dai puwede na an gabos magtrabaho sa pagtotogdok. Minsan siring, an Sosyedad nagpadara na nin surat, na may petsang Mayo 1, 1988, kaiba an mga Information Sheet tanganing itao sa mga gustong mag-aplay bilang temporaryong mga trabahador sa proyekto. An mga aapodon tatawan nin mas detalyadong Questionnaire tanganing llenaran ninda dangan, kun maaprobaran, sinda paiisihon asin iimbitaran. An grupong ini iyo an magigin mayor na grupo nin mga trabahador na regular na magtatrabaho sa proyekto.

⁹ Minsan siring, sa huri susuratan mi an mga kongregasyon asin ipaliliwanag mi kun paano an iba na makadidigdi sana sa laog nin sarong semana o sarong bulan puwedeng makapakikabtang minsan sa halipot sanang panahon sa proyekto. May maabot na dugang na impormasyon sa puntong ini.

¹⁰ Dugang pa, mantang an boluntaryong mga trabahador magtatrabaho sa Sabado asin Domingo, an mga kongregasyon sa palibot kan Metro Manila tibaad apodan na magpadara nin sarong klase nin mga boluntaryo tanganing tumabang sa mga Sabado asin Domingo. Sa paaging ini, dakol na tugang an makakapakikabtang.

¹¹ Siyempre, boot ming idoon na mayo nin dapat na magsadiring magdigdi sa Bethel kun dai iniimbitaran, ta ini makariribong na marhay. Ini nangorognang totoo kun Sabado asin Domingo, kun may mga kongregasyon na iniimbitaran na makikabtang. An pag-imbitar gigibohon nin turnuhan asin an saindong kongregasyon iimbitaran sono sa pangangaipo, kun kamo nasa lugar na bakong gayong harayo sa Metro Manila. Kaya sinasadol mi an gabos na tabi maghalat sagkod na may pag-apod bago iareglo an siisay man na magboluntaryo. Sa siring an gabos mangyayari “sa disente asin aregladong paagi.”​—⁠1 Cor. 14:⁠40.

¹² Kun siring, an mga igwa nin espesyal na abilidad sa pagtotogdok na gustong tumabang puwedeng kumua nin Information Sheet sa kamagurangan kan saindang kongregasyon asin llenaran iyan. An mga dai puwedeng magdigdi nin bilog na panahon pero makatatao nin kadikit na panahon sa proyekto maninigong maghalat sagkod na ipadara an dugang pang impormasyon sa kongregasyon sa puntong ini.

“PAANO PA DAW AKO MAKATATABANG?”

¹³ Kun dai kamo pisikal na makapagboboluntaryo sa proyekto, tibaad minasabong sa isip nindo an hapot na ini. An totoo iyo na an bilog na banwaan ni Jehova digdi sa Pilipinas makatatabang paagi sa regular na pagpadara nin boluntad na mga ambag sa Sosyedad. Ini an pinakamagastos na proyekto kan Sosyedad digdi sa Pilipinas. Sa pagtogdok paagi sa mga boluntaryo imbes na ipakontrata, dakula an maeekonomiya sa idinusay na kuwarta kan Sosyedad. Pero, dakula pa man giraray na kantidad nin kuwarta an kaipuhan. An mga tugang sa ibang nasyon, sa pamamahala kan Namamahalang Grupo, nagpapadara nin kuwarta sa sato tanganing makatabang sa proyekto. Aram mi na kamo gusto man na makikabtang, minsan gurano kasadit, sa pagsuportar sa gibohon.

¹⁴ Tibaad maghona an iba na an kantidad na kaya nindang iambag kadikiton na iyan dai puwede. Pero girumdoma an marabilis kan balo na sinasabi sa Lucas 21:​1-4. Kun an gabos sa labing 100,000 na parahayag digdi sa Pilipinas matao sana nin ₱5.00 kada bulan poon ngonyan sagkod na matapos an proyekto tibaad apat na taon poon ngonyan, magkakakantidad nin ₱24 milyones an total na ambag! Asin sierto na an dakol makatatao nin mas dakol pa digdi, depende sa saindang kamugtakan.

¹⁵ Sa pag-oolay sa suplementong ini sa pagtiripon sa paglilingkod, irinirekomendar mi na tawan kan kamagurangan nin kapidasong papel an lambang parahayag na yaon asin ipasurat sainda an kantidad na pinaghohona nindang ikatatao ninda, bilang indibiduwal o bilang pamilya, kada bulan sagkod na matapos an pagtotogdok. Dai maninigong bugtakan nin ngaran an mga kapidasong papel. An ibubugtak na kantidad iyo an kaya kan lambang saro apuwera sa ano man na iba pang lokal na obligasyon sa Kingdom Hall, abp. Dangan, basado sa kantidad na nasusurat sa mga kapidasong papel na ini, an kamagurangan makapag-aatubang nin resolusyon sa kongregasyon na sinasabi an kantidad na pinagkaoyonan nindang ipadara sa Sosyedad bulan-bulan para sa espesyal na katuyohan na ini. An areglong ini nagin epektibo para sa tabang sa pagbiyahe kan mga misyonero kan nakaaging taon, asin irinirekomendar mi na sundan iyan. Siyempre, an lambang saro maninigong tumao nin boluntad, “oyon sa napagdesisyonan nia sa saiyang puso.” (2 Cor. 9:7) Alagad oras na an saro boluntad na makapagdesisyon kun gurano an ikatatao nia bulan-bulan, sierto na magigin maimbod sia sa pag-otob sa pangakong ini nin regular sagkod na kaya niang gibohon iyan. An ambag kan kongregasyon bulan-bulan maninigong ibugtak sa ibang linya sa Remittance form, na may tandang “Branch Construction Donations.”

¹⁶ An iba tibaad gustong direktang magpadara nin ambag sa Sosyedad para sa proyektong ini, asin ini pasasalamatan nanggad. Dugang pa, tibaad may mga tugang na gustong magpautang nin kuwarta sa Sosyedad, puwedeng mayo nin interes o may singko-porsientong interes. An siring na mga indibiduwal puwedeng sumurat sa Sosyedad asin ipadara samo an kuwarta na may kaibang surat. Ipadadara mi an kasuratan sa pagbabayad pagkaresibi mi kan kuwarta. Sa ano man na oras na kaipuhan kan tawo an ipinautang na kuwarta, puwede nia iyan na kuanon. Minsan siring, tanganing makatabang sa proyekto, mas marahay na an kuwarta ipagamit sa Sosyedad sa laog nin kisuerra tolong taon sagkod sa mapupuwede.

¹⁷ Makaseseguro kamo na an saindong boluntad na mga ambag inaapresyar na gayo kan Sosyedad asin madonong na gagamiton tanganing matapos an dakulang proyektong ini para sa pag-oswag kan gibohon na pan-Kahadean digdi sa Pilipinas.

¹⁸ May saro pang bagay kamong magigibo tanganing makatabang. Ginigirumdom na kaipuhan an bendisyon ni Jehova, inaagda mi an saindong mga pamibi para sa kapangganahan kan gibohon. Nananarig kita na pahihiroon ni Jehova an puso kan gabos niang lingkod na suportaran an gibohon na ini sa gabos na paagi, asin ipaaaram mi saindo an progreso kan gibohon sagkod na matapos asin para sa ikaoomaw kan Saiyang banal na ngaran.