Panglobong Pagpahayag kan Maogmang Bareta
AN Kahadean nin Dios namamahala na? Ini an pinakamarahay nanggad na bareta. Iyan an dahelan kun taano to kan 1989 an labing 3,700,000 Saksi ni Jehova sa bilog na kinaban entusiastikong gayong nagpahayag kan “maogmang bareta” na ihinula ni Jesus asin kan “maogmang bareta” na ipinahayag kan anghel sa bisyon ni Juan. (Mateo 24:14; Kapahayagan 14:6) Siring kan sinabi ni apostol Pablo: “An saindang tingog nakalakop sa bilog na daga, asin an saindang mga tataramon sagkod sa kaporoporohi kan ineerokan na daga.” (Roma 10:18) Asin an mga indibiduwal sa haros gabos na nasyon asin tribo asin tataramon asin mga banwaan maogmang naghimate sa saindang pagsabi na “matakot sa Dios asin pamurawayon sia.”—Kapahayagan 14:7.
Mayo Nang Pagpaseguro nin Buhay
An saro sainda iyo an lalaking taga-Inglaterra na naghahanap nin saiyang ikabubuhay hale sa pagkadaing kasegurohan nin buhay. Si Ken sarong ahente nin seguro, asin kan sia nagduman sa harong nin mga Saksi ni Jehova, hinapot sia ninda: “Mawot daw nindong mabuhay sa kinaban na dai na kaipuhan an pagseseguro nin buhay?” Ano an boot sabihon ninda? Na sono sa Biblia, sa pamamahala kan Kahadean nin Dios an kadakol na bagay na naggigibong bakong segurado an buhay ngonyan, kairiba na an helang asin kagadanan, mawawara na.
Posible daw an bagay na iyan? Iyo, an Dios mismo an nanuga kaiyan. Bilang halimbawa, an Biblia nagsasabi: “An Dios mismo masasakaibanan ninda [kan katawohan]. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:3, 4 ) Ano an magpapangyari kan siring na pagbago? An Kahadean nin Dios. Sono sa Tataramon nin Dios, dai na mahahaloy ini an “maronot asin matapos kan gabos na ining [modernong panahon na politikal na] kahadean, asin iyan magdadanay sagkod lamang.”—Daniel 2:44.
An mga kasuratan na siring kaini dinara sa atension sa ginatos na milyon na tawo kan mga Saksi ni Jehova durante kan saindang panglobong kampanya sa paghuhulit. Dakol an siring ki Ken, na nakarealisar na bako sana ining minamawot na gayong paghorophoropon. Mapaniniwalaan an mga patotoo. An banal na mga panugang ini masasarigan asin maootob sa dai na mahahaloy.
Sarong Naliwat na Pamantayan sa Buhay
An mga naghinanyog sa mga Saksi ni Jehova mantang saindang itinaram man an magayagayang pahayag kan anghel nakarealisar na an pagkatakot sa Dios asin pagpamuraway saiya naglalabot nin orog pa kisa sa pagtubod sana sa mga panuga kan Biblia. Liniliwat kaini an saindang bilog na pagmansay asin hinahale an kadakol na panluluya nin boot sa buhay.
Nanompongan ni Rafael asin kan saiyang agom na totoo ini. Nag-eerok sinda sa Argentina, asin kan magpakasal sinda labi nang 40 taon an nakaagi, ginibo nindang pangenot na pasohan sa buhay an mahigos na pagtrabaho asin pagtipon para sa seguradong ngapit. Alagad, 21 taon pakatapos, an ikapapaheling sana ninda huli sa saindang mahigos na pagtrabaho iyo an sadit na harong na perming nangangaipo nin pag-irahay. Dai sinda nakamateng mas tiwasay kisa kan enot kan ikinasal sinda.
Dangan nadangog ninda an maogmang bareta hale sa mga Saksi ni Jehova asin nanodan an mas marahay na klase nin kayamanan asin mas marahay na klase nin seguridad. Si Jesus, sa saiyang Sermon sa Bukid, nagtaram dapit kaini kan sabihon nia: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Kundi, magtipon kamo nin mga kayamanan sa langit, na duman an polilya ni takla dai nakararaot, asin an mga parahabon dai nagsasalakat asin dai naghahabon.”—Mateo 6:19, 20.
Mantang dai itinotokdo sato kan Biblia na magin impraktikal dapit sa materyal na kayamanan, sinasadol kita kaini na dai niato ibugtak an satong paglaom sa mga bagay na ini. (Eclesiastes 7:12) Imbes, kaipuhan na maghingoa kitang magkamit nin espirituwal na kayamanan paagi sa pag-adal sa Biblia, pakanood kan kabotan nin Dios, asin enoton sa satong buhay an paggibo kan kabotan na iyan. (Mateo 6:33) Si Rafael asin an saiyang agom nagpoon na magtipon nin espirituwal na kayamanan na ini, asin ngonyan nakamate sindang tunay na mayaman, .bakong huli sa saindang pinansial na kamugtakan, kundi huh sa saindang relasyon sa Dios. (Kapahayagan 3:17, 18) An mensahe kan Kahadean nin Dios tunay nanggad na maogmang bareta sainda.
Sarong Nahusay na Pag-agoman
An maogmang bareta igwa nin tunay na puwersa na gumibo nin marahay. Bilang halimbawa, si John, na nag-eerok sa Inglaterra, bakong interesado sa Biblia, alagad an saiyang agom asin mga aki interesado. Kaya nagpoon sindang mag-atender sa mga pagtiripon kan mga Saksi ni Jehova mantang si John nakikipag-inoman sa saiyang mga amigo. Bilang resulta, napalabot sia sa grabeng pag-inom, paninigarilyo, asin pakatapos, sa inmoralidad. Katapustapusi, binayaan nia an saiyang agom tanganing makisaro sa ibang babae.
Nagpoon na an mga areglo sa diborsio. Alagad nagngalas si John kan maheling na an saiyang agom—na nakanood nin Kristianong paggawe hale sa saiyang pag-adal kan maogmang bareta—trinatar pa siang may konsiderasyon. Dai masabotan ni John kun taano. Tolong semana bago magin pinal an diborsio, an Kristianong paggawe kan agom ni John nagkaigwa kan epekto kaini. Nagpaheling sia nin tunay na kamondoan sa saiyang paggawe, asin inontok an mga areglo sa diborsio. Ngonyan nagsiyasat mismo si John kan maogmang bareta asin nakipag-adal kan Biblia sa mga Saksi ni Jehova. Ngonyan sia man saro nang Kristiano asin, kairiba an saiyang agom, nagbabareta sa iba kan maogmang bareta kan Kahadean.
Sa mga panahon na ini na nanluluya an mga pamantayan sa pamilya, an dakol nangangaipo nin tabang na inaalok kan basado sa Biblia na maogmang bareta. An saro sa mga Saksi ni Jehova sa Peru nagtutukaw kataed nin sarong koronel sa armada sa paglunad sa eroplano. Nag-olay sinda asin nagpoon na isaysay kan koronel an mga problema nia sa pamilya, kairiba an katotoohan na an saiyang agom adikto na sa droga asin haros babayaan.na sia tanganing makiiba sa mas hoben na lalaki. Mataktikang ipinaheling saiya kan Saksi na an Biblia nagtatao nin marahay, solidong sadol dapit sa mga bagay sa pamilya asin na iyan nakatabang saiya na resolberan an saiya mismong mga problema sa pamilya.—Efeso 5:21-6:4.
Pinasalamatan kan koronel an Saksi huh kan saiyang nakararangang mga tataramon asin nagsuskribe para sa mga magasin na Watchtower asin Awake! tanganing madugangan ma an saiyang kaaraman sa maogmang bareta. Dangan, kan mahale na an Saksi sa eroplano, may hoben na mag-agom na naghihidali sa paglapag saiya asin naghagad na makipag-olay sa saiya. “Nagtutukaw kami sa enotan mismo nindo,” an sabi ninda, “asin nadangog niamo an pag-oolay nindo asin kan lalaki. Mawot man niamong magsuskribe para sa mga magasin na idto.” Mawot man nindang makanood kan maogmang bareta na nagpapaoswag sa buhay.
Sarong Nabagong Buhay
Orog pa, an basado sa Biblia na maogmang bareta nagbabago nin mga tawo. Siring kan sinabi ni apostol Pablo: “An tataramon nin Dios buhay asin mapuwersa.” (Hebreo 4:12) Totoo ini sa kaso kan sarong hoben na lalaki sa Macedonia, Grecia. Nagngalas siang maaraman na, sono sa Biblia, Jehova an ngaran nin Dios. Kaya pinakiolayan nia an saiyang amigo na hanapon an mga Saksi ni Jehova tolos-tolos kun posible. Duwang pag-orolay an inareglo sa mga Saksi, na an lambang saro naglawig nin haros apat na oras. Dangan an hoben na lalaki nagkaigwa nin regular na pag-adal sa Biblia, an enot naglawig sagkod sa alas dos nin aga!
Magpoon kan enot na pag-adal na iyan, an hoben na lalaki marikas na inoyon an saiyang buhay sa mga pamantayan kan Biblia. Nag-atender sia sa mga pagtiripon para sa pagsamba kairiba kan mga Saksi ni Jehova asin namotan na gayo an Kaglalang. Asin binendisyonan man sia ni Jehova. Kan enot na semana kan saiyang halabang pag-adal sa Biblia, ginunting nia an buhok. Kan ikaduwang semana, inontok na nia an pagduman sa mga kabaret asin mga disco tanganing magkaigwa nin nakaoogmang mga kairiba. Kan ikatolong semana, inapon nia an huri niang sigarilyo. Pakatapos mag-adal sa laog nin duwang bulan, nagpoon siang makiiba sa mga Saksi sa pagbabareta sa iba kan maogmang bareta kan Kahadean. Iyo, naoogma siang dinara kan mga Saksi ni Jehova an maogmang bareta sa saiya sa kabtang na idto nin daga.
An Maogmang Bareta sa Bilanggoan
Maski an mga rehas kan bilanggoan bakong olang sa maogmang bareta. Sa Espana sarong hoben na lalaking an ngaran Jose nagdudusa nin halawig na sentensia sa bilanggoan huli sa paghabon na armado asin iba pang kriminal na gibo. Alagad, nagin posible sa mga Saksi ni Jehova na ibareta saiya an maogmang bareta, asin an mensahe kan Biblia lubos na nagliwat kan saiyang pagmansay. Si Jehova ‵nagtao nin kapangyarihan’ sa saiya.—Filipos 4:13.
Sinasabi ni Jose na tibaad marahay na gamiton nia an natatada kan saiyang buhay sa sistemang ini nin mga bagay sa likod nin mga rehas huh kan saiyang dating paggawe. Alagad nabautismohan na sia asin ngonyan saro nang Kristiano. An saiyang agom marigon na nagsusuportar sa saiya, asin nagmamaigot siang tawan an saindang hoben na aking lalaki nin Kristianong pagpadakula. Mientras tanto, ihinihiras ni Jose an maogmang bareta sa mga kapuwa bilanggo, mga tawong masakit mapaabotan kan mga nasa luwas kan mga lanob kan bilanggoan. Ngonyan an kairiba nia sa selda saro na man na bautisadong Kristiano.
Ini dikit sanang halimbawa tanganing ipaheling an mga resulta kan panglobong kampanya sa paghuhulit kan mga Saksi ni Jehova. Tunay nanggad, an maogmang bareta na ihinayag kan dai naheheling na anghel ipinahahayag man kan mga Saksi ni Jehova “bilang maogmang bareta sa mga nag-eerok sa daga, asin sa lambang nasyon asin tribo asin tataramon patin banwaan.”
Ini an pinakamarahay na bareta, asin ini an solamenteng paglaom kan katawohan. Sinasadol niamo kamo na sunudon ini. Siring ki Ken asin John sa Inglaterra, siring ki Rafael asin kan saiyang agom sa Argentina, siring ki Jose sa Espana, asin siring kan riniboribong iba pa, kairiba kita kan anghel sa pagdagka sa gabos na “matakot sa Dios asin pamurawayon sia, huli to nag-abot na an oras kan saiyang paghokom, asin kaya sambahon an Saro na naglalang kan langit asin daga asin dagat asin mga burabod nin tubig.”—Kapahayagan 14:7.