Watchtower ONLINE NA LIBRARYA
Watchtower
ONLINE NA LIBRARYA
Bicol
  • BIBLIYA
  • PUBLIKASYON
  • PAGTIRIPON
  • pe kap. 29 p. 238-249
  • Ginigibong Mapanggana an Buhay Pamilya

Mayong video na available para digdi.

Sori, may error sa pag-load kan video.

  • Ginigibong Mapanggana an Buhay Pamilya
  • Puwede Kamong Mabuhay Sagkod Lamang sa Paraiso Digdi sa Daga
  • Mga Subtema
  • Kaagid na Materyal
  • KUN PAANO LINALANG NIN DIOS AN LALAKI ASIN BABAE
  • AN PAPEL KAN AGOM NA LALAKI
  • PAG-OTOB KAN PAPEL NIN AGOM NA BABAE
  • AN KABTANG KAN MGA AKI SA PAMILYA
  • MAPANGGANANG PAGRESOLBER SA MGA PROBLEMA SA PAMILYA
  • Kun Paano Gigibohon na Maogma an Saindong Buhay Pampamilya
    Ano Man Nanggad an Itinotokdo kan Biblia?
  • Duwang Liabe sa Nagdadanay na Pag-agoman
    An Sekreto sa Kaogmahan nin Pamilya
  • Puwedeng Magin Maugma an Saimong Pamilya
    Ano an Itinutukdo Sato kan Bibliya?
  • Paano Magigin Maugma an Pamilya Mo?—Kabtang 1
    Mabuhay nin Maugma Sagkod Pa Man!—Interactive na Pag-adal sa Bibliya
Puwede Kamong Mabuhay Sagkod Lamang sa Paraiso Digdi sa Daga
pe kap. 29 p. 238-249

Kapitulo 29

Ginigibong Mapanggana an Buhay Pamilya

1. (a) Paano nagpoon an pamilya? (b) Ano an katuyohan nin Dios dapit sa pamilya?

KAN lalangon ni Jehova Dios an enot na lalaki asin babae, pinagsaro nia sinda tanganing bumilog nin sarong pamilya. (Genesis 2:21-24; Mateo 19:4-6) Katuyohan nin Dios na magdakol an mag-agom na ini, paagi sa pagkaigwa nin mga aki. Dangan, pagdakula kan mga aki, an mga ini mag-aaragom man tanganing bumilog nin sadiri nindang mga pamilya. Katuyohan nin Dios na, sa pag-agi nin panahon, igwa nin maoogmang pamilya na nag-eerok sa kada parte nin daga. Gigibohon ninda an daga na sarong magayon na paraiso saen man na lugar.—Genesis 1:28.

2, 3. (a) Taano ta dai mababasol an Dios sa pagkasudya kan mga pamilya? (b) Ano an kaipuhan tanganing magkaigwa nin mapangganang buhay pamilya?

2 Alagad ngonyan, an mga pamilya nagkakasurosiriblag, asin dakol an nag-iiribanan pa ngonyan na bakong maogma. Kaya puwedeng maghapot an saro: ‘Kun talagang an pamilya linalang nin Dios, bako daw na mas marahay na resulta an dapat niatong laoman?’ Minsan siring, an Dios dai mababasol sa pagkasudya kan mga pamilya. An sarong kagsadiri nin pabrika puwedeng magpaluwas nin produkto na igwang kaibang mga susondon dapit sa paggamit kaiyan. Kasalan daw kan kagsadiri kan pabrika kun maraot an produkto huli ta dai sinunod kan nagbakal an susondon? Dai nanggad. An produkto, maski iyan marahay na klase mararaot kun iyan dai ginagamit nin tama. Arog man kaiyan an pamilya.

3 Nagtao si Jehova Dios nin mga susondon sa Biblia dapit sa buhay pamilya. Kun palilimanlimanan an mga instuksiyon na ini, ano an mangyayari? Maski ngani sangkap an areglo nin pamilya, puwedeng magkabaranga iyan. Asin an mga miembro kan pamilya dai magigin maogma. Sa ibong na lado, kun sinusunod an mga giya sa Biblia, ini matabang para sa mapanggana, maogmang pamilya. Mahalaga kun siring, na saboton niato kun paano linalang nin Dios an lambang miembro kan pamilya, asin kun ano an papel na itinao nia na saindang gigibohon.

KUN PAANO LINALANG NIN DIOS AN LALAKI ASIN BABAE

4. (a) Anong mga pagkakalaen igwa an babae asin lalaki? (b) Taano ta linalang nin Dios an siring na mga pagkakalaen?

4 Maski siisay makakaheling na dai linalang ni Jehova an lalaki asin an babae na magkapareho. Totoo, magkapareho sinda sa dakol na paagi. Alagad maliwanag na igwa nin pagkakalaen sinda sa saindang pisikal na itsura asin seksuwal na pagkagibo. Saro pa, magkalaen an saindang mga emosyonal na namamatean. Taano ta may pagkakalaen? Linalang sinda nin Dios na siring kaiyan tanganing matabangan an lambang saro na otobon an lambang papel ninda. Pagkalalanga kan lalaki, sinabi nin Dios: “Bakong marahay na an lalaki magsolo-solo. Magibo ako nin katabang para sa saiya, bilang komplimento nia.”—Genesis 2:18.

5. (a) Paano linalang an babae bilang “komplimento” sa lalaki? (b) Saen enot na nangyari an enot na pag-agom? (c) Taano ta tunay na maogma an areglo nin pag-agom?

5 An komplimento iyo an sarong bagay na ipinapareha o ibinabagay sa iba, tanganing magin kompleto ini. Linalang nin Dios an babae bilang sarong nakakakontentong kapareha nin lalaki tanganing tumabang saiya sa pag-otob kan itinao nin Dios na mga pagboot na panoon asin atamanon an daga. Kaya pagkatapos lalangon an babae hale sa sarong kabtang kan lalaki, isinagibo nin Dios an enot na kasal duman sa hardin nin Eden paagi sa ‘pagdara sa saiya sa lalaki.’ (Genesis 2:22; 1 Corinto 11:8, 9) An pag-aragoman sarong maogmang areglo huli ta kapuwa an lalaki asin an babae linalang na igwa kan pangangaipo na kayang ikatao kan kada saro. An saindang magkalaen na mga kalidad nakakatimbang sa lambang saro. Kun magkakasinabotan an mag-agom asin apresyaron an lambang saro asin magtinabangan kaoyon sa saindang itinaong papel, kapuwa sinda sa saindang kabtang naghahaman nin sarong maogmang harong.

AN PAPEL KAN AGOM NA LALAKI

6. (a) Siisay an ginibong payo kan pamilya? (b) Taano ini ta tama asin praktikal?

6 An pag-aragoman o an pamilya nangangaipo nin pangengenot. An lalaki linalang na igwa kan siring na mga kakayahan asin kosog tanganing gamiton sa siring na pangengenot. Huli sa rason na ini an Biblia nagsasabi: “Huli ta an lalaki iyo an payo kan saiyang agom kun paanong si Cristo iyo man an payo kan kongregasyon.” (Efeso 5:23) Ini praktikal, huli ta kun saen an daing nangengenot yaon an ribok asin karibarawan. Para sa sarong pamilya na mayong mangengenot magigin siring sa sarong awto na mayong manibela. O, kun an agom na babae iyo an mahipno kan siring na pagkapayo, iyan magigin arog sa sarong awto na duwa an nagmamaneho, an lambang saro igwa nin manibela na nagkokontrol nin tigsaro sa ruweda sa enotan.

7. (a) Taano an nagkapirang babae ta habo an ideya nin pagkapayo nin lalaki? (b) Igwa daw nin namamayo an lambang saro, asin taano an areglong ini nin Dios sa pagkapayo ta madonong?

7 Minsan siring, kadakol na babae an habo sa ideya na an lalaki iyo an magin payo sa pamilya. Sarong dahelan kaini iyo an kadaklan na lalaki an dai minasunod sa mga instruksiyon nin Dios dapit sa tamang pagkapayo. Sa ibong kaini, totoo na tanganing an sarong organisasyon maghiro nin mahusay kaipuhan na igwa nin sarong magtatao nin paggiya asin magibo nin ultimong desisyon. Kaya may kadonongan na nagsasabi an Biblia: “An payo kan lambang lalaki iyo an Cristo; an payo man nin babae iyo an lalaki; an payo man kan Cristo iyo an Dios.” (1 Corinto 11:3) Sa areglo nin Dios, an Dios sana an dai nin namamayo. An gabos na iba, kaiba na si Cristo Jesus, asin magin an agom na lalaki o babae, kaipuhan na umako nin paggiya asin magpasakop sa desisyon nin iba.

8. (a) Kiisay na halimbawa an kaipuhan sunodon nin mga agom na lalaki sa pagkapayo? (b) Anong leksion an kaipuhan manodan nin mga agom na lalaki sa arogan na iyan?

8 Boot sabihon kaini na tanganing maotob an papel bilang agom na lalaki, kaipuhan akoon nin lalaki an pagkapayo ni Cristo. Saro pa, kaipuhan nindang sunodon an halimbawa nia paagi sa pangengenot sa saindang agom siring sa ginibo nia sa saiyang kongregasyon. Paano pinakiibanan ni Cristo an saiyang makadagang mga parasunod? Iyan perming sa maboot asin makonsiderasyon na paagi. Dai sia nagin maringis o aranggoton, maski sinda maluway sa pag-ako nin paggiya. (Marcos 9:33-37; 10:35-45; Lucas 22:24-27; Juan 13:4-15) Katunayan, bulontad na itinao nia an saiyang buhay para sainda. (1 Juan 3:16) Kaipuhan maingat na pag-adalan nin Kristianong agom na lalaki an halimbawa ni Cristo, asin gibohon nia an gabos na makakaya ngonyan sa pakiiba sa saiyang pamilya. Bilang resulta, dai sia magigin dominante, makasadiri, o daing konsiderasyon na payo nin pamilya.

9. (a) Anong reklamo igwa an kadakol na mga agom na babae? (b) Ano an madonong na isaisip nin mga agom na lalaki sa pagsagibo nin pangengenot?

9 Sa ibong na kampi, minsan siring, kaipuhan horophoropon ini nin mga agom na lalaki: An saindong agom daw nagrereklamo na dai nindo ginigibo an pagigin payo sa pamilya? Sia daw nagsasabi na dai kamo nangengenot sa harong, pinaplano an mga aktibidad sa pamilya asin isinasagibo an responsibilidad tanganing gumibo kan ultimong desisyon? Alagad ini an hinahagad nin Dios saindo na gibohon, bilang agom na lalaki. Siyempre, magigin madonong para sa saindo na magin bukas sa mga suhestiyon asin mga pinipili kan ibang mga miembro kan pamilya asin tinatawan nin lugar an mga suhestiyon na ini mantang nagpapaheling nin pagkapayo. Bilang agom na lalaki, tunay na yaon saindo an mas magabat na papel sa pamilya. Alagad kun sinsero nindong hingoahon na otobon iyan, mapapahiro an saindong agom na tumabang asin magsuportar.—Talinhaga 13:10; 15:22.

PAG-OTOB KAN PAPEL NIN AGOM NA BABAE

10. (a) Anong kurso nin mga agom na babae an dinadagka kan Biblia? (b) Ano an nangyayari kun an mga agom na babae dai sinusonod an sadol kan Biblia?

10 Siring sa sinasabi kan Biblia, an babae ginibong katabang kan saiyang agom na lalaki. (Genesis 2:18) Konektado sa papel na iyan, an Biblia nagdadagka: “Magpasakop an mga agom na babae sa saindang agom.” (Efeso 5:22) Ngonyan uso an pagigin agresibo nin mga babae asin pakipagkompitensia sa mga lalaki. Alagad kun an babae magin pangahas, na hinihingoang iyo an magin payo, iyan parateng nagbubunga nin ribok. Dakol na lalaki an nagsasabi: ‘Kun gusto niang mangenot sa pamilya, di bahala sia.’

11. (a) Paano puwedeng matabangan nin agom na babae an saiyang agom na mangenot? (b) Kun inootob nin agom na babae an itinao nin Dios na papel, ano an magigin epekto kaini sa saiyang agom?

11 Sa ibong na kampi, tibaad namamatean nindo na napipiritan kamo na mangenot, huli ta dai ginigibo kan saindong agom. Alagad igwa pa daw kamong magigibo tanganing tabangan sia na pasanon an saiyang mga paninimbagan bilang payo nin pamilya? Ipinapaheling daw nindo na kamo naghahalat saiya sa saiyang pangengenot? Naghahagad daw kamo saiya nin suhestiyon asin paggiya? Linilikayan daw nindo an pagtatsar sa saiyang ginigibo? Kun talagang hihingoahon nindong gibohon an itinao nin Dios na papel sa pamilya, siyempre an saindong agom na lalaki mapasan kan saiyang kabtang.—Colosas 3:18, 19.

12. Ano an nagpapaheling na an agom na babae puwedeng magpahayag kan saiyang mga opinyon, maski pa ini habo kan saiyang agom?

12 Dai boot sabihon kaini na an agom na babae magdanay na sanang daing girong kun an saiyang opinyon laen sa saiyang agom. Tibaad tama an saiyang pagmansay, asin tibaad pakinabangan kan saindang pamilya kun dangogon kan saiyang agom. An agom ni Abraham na si Sara sarong arogan para sa mga Kristianong mga agom na babae huli sa pagpapasakop nia sa saiyang agom. (1 Pedro 3:1, 5, 6) Siring man igwang isinuhirir siang solusyon sa sarong problema sa pamilya, asin kan dai si Abraham mag-oyon saiya, sinabi nin Dios ki Abraham: “Dangogon mo sia.” (Genesis 21:9-12) Siyempre, kun an lalaki guminibo nin ultimong desisyon sa sarong bagay, kaipuhan suportaran nia ini kun an saiyang paggibo kaini dai mahuholog sa pagbalga sa pagboot nin Dios.—Gibo 5:29.

13. Ano an ginigibo nin sarong marahay na agom na babae, asin ano an magigin epekto para sa saiyang pamilya?

13 Sa tamang pag-otob kan saiyang papel, dakula an magigibo kan agom na babae sa pag-ataman kan pamilya. Halimbawa, makakapagluto sia nin masustansiyang mga kakanon, maiingatan na magin malinig an harong asin makakatabang sa pagtokdo sa mga aki. Dinadagka kan Biblia an mga may agom na babae na “mamoot sa saindang mga agom na lalaki, na mamoot sa saindang mga aki, magin mayokod, mabini, mga paragibo sa harong, maboot, na nagpapasakop sa saindang mga agom na lalaki, tanganing an tataramon nin Dios dai mapaglanghadan.” (Tito 2:4, 5) An agom asin ina na mag-ootob kan mga paninimbagan na ini siertong magkakamit nin daing sagkod na pagkamoot asin paggalang kan saiyang pamilya.—Talinhaga 31:10, 11, 26-28.

AN KABTANG KAN MGA AKI SA PAMILYA

14. (a) Ano an tamang posisyon nin mga aki sa pamilya? (b) Ano an manonodan nin mga aki sa halimbawa ni Jesus?

14 Pinagbotan ni Jehova an enot na mag-agom: “Pangagbunga asin pangagdakol kamo.” (Genesis 1:28) Iyo, sinabihan sinda nin Dios na mangaki. Katuyohan na an mga aki magin balaog sa pamilya.” (Salmo 127:3-5) Mantang sinda napapairarom sa pagboot kan saindang mga magurang, ikinokomparar kan Biblia an kamugtakan nin aki sa oripon. (Talinhaga 1:8; 6:20-23; Galacia 4:1) Maski si Jesus nagdanay sa pagsunod sa saiyang mga magurang kan sia sarong aki. (Lucas 2:51) Boot kaining sabihon na sinunod nia sinda, ginibo an saindang ipinagboot. Kun siring man kaini an gibohon nin gabos na aki, iyan tunay na magkokontribuwir sa kaogmahan kan pamilya.

15. Taano ta parateng an mga aki kolog-boot nin mga magurang?

15 Pero, imbes na magin balaog sa pamilya, an mga aki sa ngonyan parateng gikanan nin kolog-boot nin mga magurang. Taano? Iyan huli sa dai pakapag-aplikar kan mga aki, siring man kan mga magurang, sa saindang buhay sa saindang pamilya kan mga instruksiyon sa Biblia. Ano an nagkapira sa mga intruksiyon asin mga prinsipyong ini nin Dios? Siyasaton niato an nagkapira kaiyan sa masunod na mga parapo. Mantang pinag-oolayan, helingon kun baga dai kamo maoyon na, sa pag-aplikar kaiyan, makakakontribuwir kamo sa kaogmahan kan saindong pamilya.

Mamotan asin Galangan an Saindong Agom na Babae

16. Ano an ipinagboot na gibohon nin mga agom na lalaki, asin paano tamang an mga pagboot na ini isinasagibo?

16 May banal na kadonongan, an Biblia nagsasabi: “An mga agom na lalaki kaipuhan na mamoot sa saindang agom siring sa saindang sadiring hawak.” (Efeso 5:28-30) Paoro-otro, an agi-agi nagpatunay na tanganing magin maogma an mga agom na babae kaipuhan na mamatean ninda na sinda namomotan. Ini nangangahulogan na an agom na lalaki tawan an saiyang agom na babae nin espesyal na atensiyon, pati na an kabootan, pagsabot asin pagpakosog. Kaipuhan nia na ‘sia igalang,’ siring sa sinasabi kan Biblia. Ini magigibo nia paagi sa pagkonsiderar saiya sa gabos niang ginigibo. Sa paaging ini makakamtan kan lalaki an paggalang kan saiyang agom.—1 Pedro 3:7.

Igalang an Saindong Agom na Lalaki

17. Ano an ipinapagibo sa mga agom na babae, asin paano ninda ginigibo ini?

17 Ano naman an mga agom na babae? “An agom na babae kaipuhan magkaigwa nin hararom na paggalang sa saiyang agom,” pahayag kan Biblia. (Efeso 5:33) An dai pakapagsunod sa sadol na ini iyo an pinakarason kun taano an mga agom na lalaki ta naaanggot sa saindang mga agom. An agom na babae nagpapaheling nin paggalang paagi sa pagsunod sa saiyang mga desisyon, asin paagi sa bilog na kalag na pagtabang na hamanon an mga patolodan sa pamilya. Paagi sa pag-otob kan basado sa Biblia na papel bilang ‘katabang asin komplimento’ sa agom na lalaki, ginigibo niang pasil na mamotan sia kan saiyang agom.—Genesis 2:18.

Magin Maimbod sa Lambang Saro

18. Taano ta kaipuhan magin maimbod an mag-agom sa lambang saro?

18 An Biblia nagsasabi: “An mga agom na lalaki asin mga agom na babae kaipuhan magin maimbod sa lambang saro.” Sa agom na lalaki iyan nagsasabi: “Mag-ogma ka sa saimong agom asin manompongan mo an kagayagayahan sa babae na saimong inagom . . . taano ta itatao mo an saimong pagkamoot sa ibang babae? Taano ta pipilion mo an gayon kan agom nin iba?” (Hebreo 13:4; Talinhaga 5:18-20, Today’ English Version) Iyo, an pagsambay tumang sa pagboot; iyan minagiya sa karibokan nin pag-inagoman. “Kadakol na tawo an nag-iisip na an pagsambay tibaad magpasiram sa pag-inagoman,” sabi nin sarong parasiyasat sa pag-agom, alagad sia nagdagdag na an gibong iyan perming minagiya sa “problema.”—Talinhaga 6:27-29, 32.

Hanapon an Ikakaogma kan Saindong Agom

19. Paano makakamtan kan mag-agom an tunay na kaogmahan sa seksuwal na relasyon?

19 An kaogmahan dai minagikan kun an saro naghahanap nin kaogmahan sa sekso na para sa saiya sana. Imbes, iyan makakamtan sa pagtao kan kaogmahan sa saiyang agom. An Biblia nagsasabi: “An agom na lalaki magtao sa agom kan manongod saiya; asin siring man an babae sa saiyang agom.” (1 Corinto 7:3) Idinodoon kaini an pagdolot, pagtao. Asin sa pagtao, an nagtao siring man minaako nin kaogmahan. Siring iyan sa sinabi ni Cristo Jesus: “Igwa nin orog na kaogmahan sa pagtao ki sa pag-ako.”—Gibo 20:35.

Magin Dayupot sa Saindong mga Aki

20. Taano an pagtao nin panahon sa mga aki ta importante?

20 An sarong aki na haros walong taon nagsabi: “Si Daddy perming nagtatrabaho. Perming mayo sia sa harong. Tinatawan nia ako nin dakol na kuwarta asin mga kawatan, alagad bihira ko siang maheling. Namomootan ko sia asin gusto ko dai sia perming magtrabaho tanganing danay ko siang maheling.” Abaa karahay an buhay pamilya kun sunodon nin mga magurang an pagboot kan Biblia na tokdoan an saindang mga aki ‘kun sinda nagtutukaw sa saindang harong asin kun naglalakaw sa dalan asin kun sinda naghihigda asin sa pagbangon’! An pagkadayupot sa saindong mga aki, pagtao nin orog na panahon sainda, tunay na magtatao nin kaogmahan sa pamilya.—Deuteronomeo 11:19; Talinhaga 22:6.

Itao an Maninigong Disiplina

21. Ano an sinasabi kan Biblia dapit sa pagtao nin disiplina sa mga aki?

21 An satong langitnon na Ama nagtatao sa mga magurang nin tamang arogan paagi sa pagtao sa saiyang banwaan nin nagtatanos na instruksiyon, o disiplina. An mga aki nangangaipo nin disiplina. (Hebreo 12:6; Talinhaga 29:15) Sa pagmidbid kaini, an Biblia nagdadagka: “Kamong mga ama, . . . padakulaon [an saindong mga aki] sa disiplina asin pagtotokdo ni Jehova.” An pagtao nin disiplina, maski mangahulogan iyan nin paghampak o paghale nin nagkapirang pribilehiyo, iyan ebidensiya kan pagkamoot nin mga magurang sa saindang mga aki. An Biblia nagsasabi: “An namomoot sa saiyang [aki] saiyang dinidisiplina sia.”—Efeso 6:4; Talinhaga 13:24; 23:13, 14.

Mga Hobenes—Tumangon an Dalan kan Kinaban

22. Anong paninimbagan igwa an mga hobenes, asin ano an napapalabot sa pag-otob kaiyan?

22 Hinihingoa kan kinaban na balgahon kan mga hobenes an mga pagboot nin Dios. Siring kan sinasabi kan Biblia, “an kakablasan nakagakot sa puso nin aki.” (Talinhaga 22:15) Kaya iyan sarong pakilaban na gumibo nin tama. An Biblia nagsasabi pa: “Mga aki, sarong paninimbagan nindo bilang Kristiano na magin masinunod sa saindong mga magurang, huli ta ini an tamang gibohon.” Iyan magtatao nin mayaman na mga bendisyon. Kaya, mga aki, magpakadonong kamo. Isagibo an sadol: “Girumdoma an saindong Kaglalang mantang kamo aki pa.” Tumangon an tukso nin droga, pagkaburat, pakikisaro asin an paggibo nin ibang mga bagay na tumang sa pagboot nin Dios.—Efeso 6:1-4; Parahulit 12:1; Talinhaga 1:10-19, Today’s English Version.

Mag-adal nin Iriba sa Biblia

23. Anong mga pakinabang an makakamtan nin mga pamilya sa pag-aadal na iriba sa Biblia?

23 Kun an sarong miembro kan pamilya nag-aadal asin inaaplikar an mga itinotokdo kan Biblia, iyan magkokontribuwir sa kaogmahan kan pamilya. Alagad kun gabos—agom na lalaki, agom na babae asin mga aki—sarong dakulang bendisyon sa pamilya! Magkakaigwa nin mainit, dayupot na relasyon, na bukas an komunikasyon, mantang an lambang miembro kan pamilya naghihingoa na tumabang sa iba na maglingkod ki Jehova Dios. Kaya ugaleon na adalan an Biblia bilang sarong pamilya!—Deuteronomeo 6:4-9; Juan 17:3.

MAPANGGANANG PAGRESOLBER SA MGA PROBLEMA SA PAMILYA

24. Taano ta kaipuhan magpasensiya an mag-agom sa mga kakulangan nin lambang saro?

24 Maski sa mga pamilya na maogma, pana-panahon magkakaigwa nin problema. Ini huli ta kita gabos bakong sangkap asin gabos nakakagibo nin sala. “Kita nasisingkog nin dakol na beses,” sabi kan Biblia. (Santiago 3:2) Kaya an mga mag-agom dai dapat maglaom nin pagigin sangkap sa lambang saro. Imbes, ipagpasensia na an pagkukulang nin iba. Kun siring, siisay man sa mag-agom dai kaipuhan na maglaom nin sangkap na maogmang pag-inagoman, mantang ini imposible na makamtan nin bakong sangkap na tawo.

25. Paano reresolberan an mga dai pagkasarabotan sa pamilya?

25 Siyempre, an mag-agom gusto na likayan an nakakapaanggot sa lambang saro. Alagad gurano man an saindang paghihingoa, makakagibo pa giraray sinda nin nakakapaanggot sa lambang saro. Paano kun siring, an siring na dai pagkasinabotan huhusayon? Ini an sadol kan Biblia: “An pagkamoot nagtatahob nin kadakol na kasalan.” (1 Pedro 4:8) Ini nangangahulogan na dai uoro-otrohon an naginibong pagkukulang kan agom. Nagsasabi an pagkamoot, ‘Iyo, nasala ka. Alagad siring man ako nasasala. Kaya lilingawan ko an naginibo mo, asin siring man ika sa sako.’—Talinhaga 10:12; 19:11.

26. Kun minalataw an nagkapirang dai pagkasarabotan, ano an makakatabang na resolberan iyan?

26 Kun an mag-agom andam na umako nin pagkakasala asin hingoahon na itanos iyan, kadakol na iriwal asin kolog nin boot an malilikayan. An saindang patolodan kaipuhan na kun paano reresolberan an problema, bakong manggana sa diriskutiran. Maski pa an saimong agom iyo an sala, gibohon na pasil an pagresolber kan problema paagi sa pagigin maboot. Kun ika an nasala, humagad nin dispensasyon. Dai iyan idigson; husayon tolos an problema. “Dai pasolnopon an aldaw sa saindong kaanggotan.”—Efeso 4:26.

27. An pagsonod sa anong sadol kan Biblia an matabang sa mag-aragom na resolberan an mga problema?

27 Lalo na kun kamo igwa nang agom, kaipuhan nindong sunodon an pagboot na “magmangno, bakong para sa sadiri sana, kundi man an para sa iba.” (Filipos 2:4) Kaipuhan kamo sumonod sa pagboot kan Biblia na: “Isolog nindo an puso nin pagkaherak, kabootan, kahoyoan, kapakumbabaan, pagkamatinios. Na magpatiriostios, asin magpatarawadtawad, kun an siisay man igwa nin sumbong tumang sa saro. Siring na si Jehova nagpatawad saindo, siring man an gibohon nindo sa iba. Alagad, laen sa gabos na ini, isolog nindo an pagkamoot, na iyo an sangkap na bogkos nin pagkasararo.”—Colosas 3:12-14.

28. (a) An diborsiyo daw an paagi na resolberan an mga problema sa pag-agom? (b) Ano an solamenteng sinasabi kan Biblia na dahelan nin diborsiyo asin nagpapalibreng mag-agom liwat?

28 Kadakol na mag-aragom ngonyan an dai tinotogotan an sadol kan Tataramon nin Dios na tumabang sainda sa saindang problema, asin nagbuburulag. Inooyonan daw nin Dios an diborsiyo bilang pagremedyo sa problema? Dai, habo nia iyan. (Malaquias 2:15, 16) Boot nia na an pag-aragoman magin danay na areglo. (Roma 7:2) An Biblia minatogot nin saro sanang dahelan nin diborsiyo na nagpapalibre sa saro na mag-agom liwat, asin iyan iyo an pagsambay. Kun naginibo an pagsambay, dangan an daing sala na agom puwedeng madesisyon kun makikibulag o dai.—Mateo 5:32.

29. (a) Kun an saindong agom habong umiba sa Kristianong pagsamba, ano an saindong gigibohon? (b) Ano an posibleng magin resulta?

29 Ano kun an saindong agom habong mag-adal kan Tataramon nin Dios kaiba nindo, o tibaad magtumang kan saindong Kristianong gibohon? An Biblia dinadagka pa giraray kamo na makisaro sa saindong agom asin dai mansayon na an pakibulag sarong simpleng paagi na makadulag sa problema. Gibohon an saindong makakaya tanganing mapaoswag an kamugtakan sa saindong harong paagi sa pag-aplikar kan sinasabi kan Biblia dapit sa saindong gawe. Maabot an panahon, na huli kan saindong Kristianong gawe, madadara nindo an saindong agom. (1 Corinto 7:10-16; 1 Pedro 3:1, 2) Asin sarong dakulang bendisyon an mapapasaindo kun an saindong pagtiyaga balosan sa siring na paagi!

30. Taano ta importanteng marahay sa mga magurang na magpaheling nin marahay na halimbawa sa saindang mga aki?

30 Kadakol na mga problema sa pamilya ngonyan may labot sa mga aki. Ano an puwedeng gibohon kun ini an problema sa saindong pamilya? Enot sa gabos, bilang mga magurang kaipuhan kamong magpaheling nin marahay na halimbawa. Ini huli ta an mga aki mas parateng sinusonod an ano man nindong ginigibo imbes kan saindong sinasabi. Asin kun an saindong hiro laen sa saindong sinasabi, madaleng maheling iyan nin mga aki. Kaya, kun boot nindong an saindong mga aki mamuhay nin tanos, Kristianong buhay, kamo mismo magpaheling kan halimbawa.—Roma 2:21, 22.

31. (a) Anong mas importanteng rason na an mga aki kaipuhan na sumonod sa sadol kan saindang mga magurang? (b) Paano nindo ipapaheling sa saindong mga aki an kadonongan nin pagsonod sa pagboot nin Dios na nangangalad sa pakisaro?

31 Siring man, kaipuhan kamong mangatanosan sa mga aki. Bakong tama na basta na sana sabihan an mga hobenes: ‘Habo ko na gumibo kamo nin pakikisaro, huli ta iyan sala.’ Kaipuhan na ipaheling sainda na an saindang Kaglalang, si Jehova Dios, an nagsabing an pakikisaro sala. (Efeso 5:3-5; 1 Tesalonica 4:3-7) Maski ngani iyan bako pang igo. Nangangaipo pa an mga aki na maheling kun taano ta mahalaga an pagsunod sa pagboot nin Dios, asin kun paano ini ninda pakikinabangan. Halimbawa, tibaad darahon nindo sa orolay an makangangalas na pagkagibo nin sarong tawong omboy sa pagsaro kan similya nin lalaki asin babae, dangan maghapot: ‘Bako daw na an Saro na naggibong posible kan milagro nin pangaki mas nakakaaram kun paano gagamiton an itinao nin Dios na kakayahan sa pagdakol?’ (Salmo 139:13-17) O makakapaghapot kamo: ‘Sa paghona mo daw an satong Dakulang Kaglalang magibo nin pagboot na maghahabon sato kan kaogmahan sa buhay? Imbes, bako daw na mas magigin maogma kita kun sunodon niato an saiyang mga pagboot?’

32. (a) Ano an saindong magigin saboot kun an pagmansay kan saindong aki dai kaoyon sa sinasabi nin Dios? (b) Paano matatabangan an saindong aki na maheling an kadonongan kan sinasabi kan Biblia?

32 An siring na mga hapot magiya sa saindong aki na mangatanosan basado sa pagboot nin Dios dapit sa organo nin pagdakol. Apresyaron an saiyang mga pangangatanosan. Kun bako iyan an linalaoman nindo, dai kamo maanggot. Saboton na an kapagarakian kan saindong aki nakarayo nang marahay sa matanos na mga pamantayan kan Biblia, dangan ipaheling saiya kun taano an mga gibo kan imoral na kapagarakian na ini ta bakong madonong. Tibaad madadara nindo an atensiyon kan saindong aki sa sarong halimbawa nin seksuwal na imoralidad na nagdara sa daing amang mga aki, helang na beneryal o iba pa. Sa paaging ini natatabangan sia na maheling an pagigin makatanosan asin katamaan kan sinasabi nin Biblia.

33. Taano ta puwedeng makatabang sato an hale sa Biblia na paglaom na mabuhay na daing sagkod sa Paraiso sa daga na magkaigwa nin mapangganang buhay pamilya?

33 Orog na makakatabang an paglaom na basado sa Biblia na mabuhay na daing sagkod sa Paraiso sa daga na magkaigwa nin mapangganang buhay pamilya. Taano? Huli ta kun talagang boot niatong mabuhay sa bagong areglo nin Dios, maghihingoa kita na mamuhay na ngonyan siring sa linalaoman duman. Ini nangangahulogan na dayupot na ootobon niato an mga pagboot asin mga instruksiyon ni Jehova Dios. Bilang resulta, kokoronahan nin Dios an presenteng kaogmahan niato nin buhay na daing sagkod asin nagsosopay na kaogmahan sa nagdadangadang na daing katapusan.—Talinhaga 3:11-18.

    Bicol Publications (1983-2025)
    Mag-log Out
    Mag-log In
    • Bicol
    • I-share
    • Settings na Gusto Mo
    • Copyright © 2025 Watch Tower Bible and Tract Society of Pennsylvania
    • Kasunduan sa Paggamit
    • Palisiya sa Privacy
    • Privacy Settings
    • JW.ORG
    • Mag-log In
    I-share