‘Ikaoongis kan Gabos na Nasyon’

¹ Sa nag-agi pa sanang mga taon kita gabos naggayagaya sa makangangalas na mga bendisyon na nakamtan kan banwaan ni Jehova sa bilog na kinaban. An pagkalegalisar kan gibohon sa Malawi pakalihis nin 26 na taon nin maringis na pan-aapi pinaluha kita sa kagayagayahan. Naginhawahan kita kan an Komunismo bumagsak sa Sirangan na Europa na nagbunga kan pagkatalingkas kan rinibo niatong tugang. Nagmasid kitang may paghadit kan an satong katalingkasan sa pagsamba inangat sa Grecia; ogmahon kita kan kita manggana sa pinakahalangkaw na korte sa Europa. Naogma kitang mabaretaan an dapit sa paghiwas kan mga sanga kan Sosyedad na pinapangyari an pagprodusir nin kadakol na literatura para sa mga naghahanap sa katotoohan. Napangalas kita kan satong mabaretaan na labing 7,400 an nabautismohan sa kombension sa Kiev, Ukraine. Iyo, an dramatikong mga pag-oswag na ini sa gibohon sa Kahadean talagang nagpaorog kan satong kagayagayahan!

² Mantang dakol an dahelan niato na maggayagaya, kaipuhan kitang mag-ingat sa pagigin labi-labi kaogma. An nagkapirang paborableng bareta puwedeng papaghonaon kita na an pagtumang nagdidiit asin na an banwaan ni Jehova nagkakamit nin pag-oyon sa bilog na kinaban. An siring na pag-isip puwedeng makadaya. Minsan ngani nagkamit kita nin pirang kapangganahan asin nagin mapanggana sa paghale kan mga kaolangan sa maogmang bareta sa ibang kadagaan, dai niato dapat lingawan na an satong relasyon sa kinaban dai nagbago. Kita “bakong kabtang kan kinaban.” Bilang siring, kita seguradong ‘ikaoongis kan gabos na nasyon.’ (Juan 15:19; Mat. 24:9) Sagkod na nagpapadagos an palakaw na ini nin mga bagay, mayong makaliliwat sa prinsipyo na “an gabos na nagmamawot na mamuhay sa kabanalan kaibahan ni Cristo Jesus paglalamagon man.”​—2 Tim. 3:12.

³ Pinatutunayan kan kasaysayan an pagigin totoo kan patanid na ini. Minsan ngani si Jesus makangangalas na nagpatotoo sa atubangan nin mga poon asin mga sakop ninda, sia nag-agi nin pag-abuso aroaldaw asin perming namemeligrong gadanon. Minsan ngani an saiyang mga apostol nakagibo nin dakol na disipulo, nakikabtang sa pagsurat kan Kristianong Griegong Kasuratan, asin nagpaheling nin milagrosong mga balaog kan espiritu, sinda ikinaongis asin minaltrato man. Apesar kan saindang marahay na gawe asin pagkamoot sa kataed, an mga Kristiano pinagheling na daing kuwentang “sekta” na ‘pinaglibak sa gabos na lugar.’ (Gibo 28:22) Minsan ngani an Kristianong kongregasyon ngonyan ginamit ni Jehova sa makangangalas na paagi sa pag-otob kan saiyang kabotan, iyan padagos na tinumang kan gabos na elemento kan maraot na palakaw na ini nin mga bagay. Daing dahelan na maglaom na an pagtumang na iyan maontok.

⁴ Kan enot na siglo, pinaglamag ni Satanas an mga disipulo ni Jesus sa laen-laen na paagi. An mga paratumang nagsaysay nin direktang mga kaputikan na nagmisrepresentar sa sainda. (Gibo 14:2) Naggamit sinda nin mga paghuma sa paghihingoang patakoton sinda. (Gibo 4:​17, 18) An anggot na mga kadaklan nagprobar na pasilensiohon sinda. (Gibo 19:​29-34) Ibinilanggo sinda na mayong dahelan. (Gibo 12:​4, 5) An mga paralamag parateng naggamit nin pisikal na kadahasan. (Gibo 14:19) Sa ibang mga kaso an mga inosente ginadan. (Gibo 7:​54-60) Si apostol Pablo mismo tinagalan an kadaklan sa mga pan-aabusong ini. (2 Cor. 11:​23-27) An mga paratumang ginamit an gabos na oportunidad na olangon an paghuhulit asin papagsakiton an maimbod na mga trabahador na ini.

⁵ Ngonyan ginagamit ni Satanas an parehong mga taktika. An direktang mga kaputikan falsong ilinaladawan kita na ilinagalag na sekta o kulto. Sa ibang kadagaan, ibinawal kan mga autoridad an satong mga literatura. Hayag na pinagtuya an satong paggalang sa kabanalan nin dugo. Kan mga taon nin 1940, an anggot na sururog na luminaad an kaanggotan huli kan isyu dapit sa pagsaludo sa bandera sinalakay an satong mga tugang asin rinaot an mga rogaring kaini. Rinibo an napreso huli sa isyu manongod sa neutralidad. Sa mga nasyon na totalitaryo an satong mga tugang putik na pinagsahotan na mga subersibo, na nagresulta sa ginatos na pinasakitan asin ginadan sa mga bilanggoan asin kampo de konsentrasyon. An pangigipit na ini malinaw na nagpapaheling na kita ikinaoongis na mayo nin makatanosan na dahelan.​—Helingon an Proclaimers, kapitulo 29.

⁶ Ano an Natatagama sa Ngapit? Minsan ngani an banwaan ni Jehova tibaad nakagiginhawa sa panapanahon sa ibang parte kan kinaban, an pankagabsan na situwasyon pareho man sana. An Diablo padagos na anggot huli sa pagkapalayas saiya sa langit kan 1914. Aram niang halipot na an saiyang panahon. Seguradong maorog an saiyang kabangisan mantang nagrarani an dakulang kahorasaan. Nakikilaban sia nin maigot tumang sa natutukaw na sa tronong Hade, si Cristo Jesus, asin desidido siang makipaglaban sagkod na matapos. Sia asin an saiyang mga demonyo ikakapahayag sana an saindang kaanggotan sa banwaan ni Jehova digdi sa daga, na maimbod na “nagkukuyog sa mga pagboot nin Dios asin igwa kan gibohon nin pagpatotoo ki Jesus.”​—Kap. 12:​12, 17.

⁷ Kaya mantang nagtatanaw kita sa ngapit, kaipuhan niatong magin realistiko. Mayo nin dahelan na maghona na an Diablo maatras o masuko. An pagkaongis sa sato sa kinaban na ini puwedeng pumutok ano man na oras asin dawa saen. Sa dakol na nasyon an satong katalingkasan sa paghuhulit nagdatong sana pakalihis nin halawig na pagsakit. An katalingkasan na iyan tibaad matapo na marhay. An dramatikong grabeng kariribokan puwedeng mangyari nin bigla, na magdadara nin karibarawan asin mga pan-aabuso sa mga diretso nin tawo.

⁸ An presenteng prosperidad asin katalingkasan na nakakamtan niato sa ibang nasyon puwedeng matapos sa panale, na magkacausa kan parehong mga pan-aabuso na inagihan kan satong mga tugang kan nakaagi. Dai niato puwedeng togotan an satong sadiri na inaan an pagbantay huli sa espiritu nin pagkaindeperente, na naghohona na an satong mga kaiwal daog na. An pagkaongis kan kinaban na ini tibaad dai perming lubos na nahahayag, pero nagdadanay iyan na makosog. Ipinaheheling kan Tataramon nin Dios na an pagtumang kan kinaban maorog mantang naghaharani an katapusan. Kaya kaipuhan kitang mag-ingat, na ipinaheheling an sadiri na “maingat siring sa mga halas alagad mahoyo siring sa mga salampati.” (Mat. 10:16) Maninigo niatong marealisar na kita ‘makikipaglaban nin maigot’ sagkod sa katapusan, asin an pakatagal iyo an liyabe sa satong kaligtasan.​—Jud. 3; Mat. 24:13.

⁹ Sa satong nasyon, an gibong paghuhulit tibaad nag-ooswag na mayo nin ano man na pag-olang kan mga paratumang. Puwedeng papangyarihon kita kaini na maghona na mayo nin dahelan na maghadit nin marhay. Minsan siring, may pangangaipong magin puka. An mga kamugtakan puwedeng magbago tolos. Mayo nin patanid, an mga paratumang puwedeng magpalataw nin isyu asin gamiton iyan tumang sato. An mga apostata perming naghahanap nin ikarereklamo. An anggot na mga klerigo tibaad idenunsiar kita sa publiko. An satong mga planong magtogdok nin Kingdom Hall tibaad magpasilyab nin kontrobersia sa bilog na pagtaraed. An negatibong mga pahayag tumang sato tibaad gibohon sa mga peryodiko. An prominenteng mga tawo sa lokal tibaad tuyong imisrepresentar kita, na pinapangyayaring mauyam an satong kataraed kun kita minasongko. Pati an mga kaiba niato sa harong tibaad paglamagon kita. Kaya may pangangaipong magin mapagbantay, na sinasabot na an pakipag-iwal kan kinaban mainit na marhay, asin puwede iyan na lumataw ano man na oras.

¹⁰ Paano Ini Maninigong Makaapektar Sato? Ini gabos nakaaapektar sa satong pananaw sa ngapit. Sa anong paagi? Maninigo daw na satong ikatakot an tibaad titioson niato? Maninigo daw kitang magluwayluway sa satong paghuhulit huli ta an iba sa satong komunidad naiistorbo kaiyan? May dahelan daw kitang mapurisaw kun pinapakaraot kita? Dapat daw na makahale kan satong kagayagayahan sa paglilingkod ki Jehova an maringis na pagtrato? Mayo daw nin kasegurohan dapit sa magigin resulta? Dai, nungka! Taano ta dai?

¹¹ Dai niato noarin man dapat paglingawan na an mensaheng ibinabalangibog niato gikan, bakong sa sato, kundi ki Jehova. (Jer. 1:9) Obligado kitang sunodon an sadol na: “Mag-apod kamo sa saiyang ngaran. Ipaaram nindo sa mga banwaan an saiyang mga ginibo . . . sa bilog na daga.” (Isa. 12:​4, 5) Itinogot nia an pagmaltrato sa saiyang banwaan para sa sarong espisipikong katuyohan, arin na baga, ‘tanganing an saiyang ngaran ikapahayag sa bilog na daga.’ (Ex. 9:16) Ginigibo niato an sarong gibohon na ipinagboot ni Jehova, asin sia an nagtatao sato kan kapusoan na magtaram na may kosog nin boot. (Gibo 4:​29-31) Ini an pinakaimportanteng gibohon na magigibo sa huring mga aldaw na ini kan daan na palakaw.

¹² An kaaraman na ini nagtatao sato kan kapusoan na manindogan nin marigon tumang ki Satanas asin sa kinaban na ini. (1 Ped. 5:​8, 9) An pakaaram na si Jehova nasa sato pinapangyayari kitang magin ‘mapuso asin makosog,’ na hinahale an ano man na dahelan nin takot. (Deut. 31:6; Heb. 13:6) Minsan permi kitang magmamaigot na magin mataktika asin rasonable kun hinuhuma nin mga paratumang, lilinawon niato na kita determinadong “magkuyog sa Dios bilang poon kisa mga tawo” kun inaangat an satong pagsamba. (Gibo 5:29) Kun may oportunidad na makapagtaram sa pagdepensa sa sato, gigibohon niato iyan. (1 Ped. 3:15) Minsan siring, dai niato sasayangon an satong panahon sa pakipagdiskutiran sa matagas na mga paratumang na gusto sana kitang pakaraoton. Imbes na magprobar na bumalos kun sinasahotan kita nin putik, ‘pabayaan na sana niato sinda.’​—Mat. 15:14.

¹³ An pakatagal niato sa mga pagbalo nakakapaoyon ki Jehova. (1 Ped. 2:19) Ano an dapat na ibalos niato sa pag-oyon na iyan? Maglilingkod daw kita na mayong kagayagayahan dahelan ta kita ikinaoongis asin tinutumang? Dai nanggad! Si Jehova nanunugang balosan nin “kaogmahan asin katoninongan” an satong pagkamakinuyog. (Roma 15:13) Sa ibong kan makuring pagsakit, si Jesus nagdanay na maogma huli kan “kagayagayahan na ibinugtak sa atubangan nia.” (Heb. 12:2) Totoo man iyan sato. Huling dakulaon an balos para sa pakatagal, napahihiro kitang ‘mag-ogma asin lumukso huli sa kagayagayahan’ dawa ngani nag-aagi kita nin grabeng mga pagbalo. (Mat. 5:​11, 12) Minsan sa mga panahon nin kasakitan, an kagayagayahan na ini mismo sarong dahelan para sa pagtao nin kaomawan ki Jehova.

¹⁴ Mayo daw nin kasegurohan dapit sa pangultimong resulta, kaya iyan ikinatatakot niato? Dai, an resulta kan pag-iiwal kan organisasyon ni Jehova asin kan kinaban ni Satanas haloy nang dinesisyonan. (1 Juan 2:​15-17) Gurano man kagrabe kan pagtumang, itatao sato ni Jehova an kapangganahan. (Isa. 54:17; Roma 8:31, 37) Minsan ngani biyo kitang binabalo, mayo nin makaoolang sato sa pag-ako kan balos. Mayo kitang dahelan na “mahadit sa ano man na bagay,” huli ta tinawan kita ni Jehova nin katoninongan bilang simbag sa satong mga pagngayongayo.​—Fil. 4:​6, 7.

¹⁵ Kaya satuyang pinasasalamatan si Jehova kada bes na mabaretaan niato na an satong mga tugang naligtas sa paglamag o tinawan nin katalingkasan na maghulit sa dating may pagbabawal na mga lugar. Naggagayagaya kita kun may nabubuksan na bagong mga oportunidad para sa rinibong sinserong tawo na makadangog kan mensahe kan Kahadean. Nagpapasalamat kita kun itinatao sato ni Jehova an kapangganahan sa pakikihampang sa mga paratumang. Aram niato na bebendisyonan nia an satong gibohon sa ano man na paaging kaipuhan tangani na mapamuraway an saiyang tunay na pagsamba asin ikalaog an mga “kawiliwili” hale sa gabos na nasyon.​—Hag. 2:7; Isa. 2:​2-4.

¹⁶ Kadungan kaiyan, aram niato na an satong kaiwal, si Satanas, makosog na marhay, asin maigot nia kitang tutumangon sagkod sa katapusan. An saiyang mga pagsalakay puwedeng hayag asin risang gayo, o puwede iyan na patago asin tuso. An paglamag puwedeng mangyari sa panale sa dating matoninong na mga lugar. An mga paratumang puwedeng magin maisog sa mga paghihingoa na apihon kita. Sa itinalaan na panahon malilinaw sa gabos na iyan na sinda “mga parapakilaban tumang sa Dios,” asin saiyang paparaon sinda. (Gibo 5:​38, 39; 2 Tes. 1:​6-9) Mientras tanto, ano man an tioson niato, determinado kitang magdanay na marigon sa paglilingkod ki Jehova asin sa paghuhulit kan mensahe kan Kahadean. Kita an pinakamaogmang mga tawo sa ibabaw kan daga, sa pakaaram na ‘sa pagigin inooyonan aakoon niato an korona nin buhay.’​—Sant. 1:12.