Jehova mismo, solamente si Jesus an makasasabot kun ano an kahulogan nin pagkapot sa siring kalangkaw na katongdan. (Ikomparar an Mateo 11:27.) Kun siring, sa gabos na linalang nin Dios, solamente si Jesus an lubos na makasasabot sa ngaran na ini. Minsan siring, iiniiba ni Jesus an saiyang nobya sa pirang pribilehiyong ini. Kaya ipinanunuga nia ini: “An makadaog . . . isusurat ko sa saiya . . . an sakong bagong ngaran.”​—Kapahayagan 3:12.

9. Ano an ipinaririsa kan (a) pagkasamno ki Jesus “nin pan-ibabaw na gubing na winirikan nin dugo”? (b) pag-apod ki Jesus na “An Tataramon nin Dios”?

⁹ Idinugang ni Juan: “Asin sia nasasamnohan nin pan-ibabaw na gubing na winirikan nin dugo, asin an inginaran sa saiya An Tataramon nin Dios.” (Kapahayagan 19:13) Kiisay na “dugo” ini? Posible na iyan dugo ni Jesus, na pinabolos para sa katawohan. (Kapahayagan 1:5) Pero, sa kontekstong ini, mas posible na iyan nanonongod sa dugo kan saiyang mga kaiwal na paboboloson kun sinda hokoman na ni Jehova. Ipinagigirumdom sato an naenot na bisyon na dian an ubasan kan daga ginuno asin binatayan sa dakulang ligisan kan kaanggotan nin Dios sagkod na an dugo nakaabot “sagkod sa mga busal kan mga kabayo”​—na nangangahulogan nin dakulang kapangganahan sa mga kaiwal nin Dios. (Kapahayagan 14:​18-20) Siring man, an dugo na nawiwirik sa panluwas na gubing ni Jesus nagpapatunay na an saiyang kapangganahan dai mapagdududahan asin kompleto. (Ikomparar an Isaias 63:​1-6.) Ngonyan si Juan nagtaram liwat manongod sa pag-apod ki Jesus sa sarong ngaran. Ngonyan iyan bantog nang ngaran​—“An Tataramon nin Dios”—​na ipinamimidbid an Guerrero-Hadeng ini bilang an Pangenot na Parataram ni Jehova asin Paradepensa sa katotoohan.​—Juan 1:1; Kapahayagan 1:1.

An mga Kapwa Guerrero ni Jesus

10, 11. (a) Paano ipinaheheling ni Juan na si Jesus dai nagsosolo sa pakilaban? (b) Ano an ipinaririsa kan bagay na an mga kabayo maputi asin an mga nangangabayo nagugubingan nin “maputi, malinig, pinong lino”? (c) Siisay an minakompuwesto sa langitnon na “mga hukbo”?

¹⁰ Dai nagsosolo si Jesus sa pakikilaban na ini. Sinasabi sato ni Juan: “Siring man, an mga hukbo na yaon sa langit nagsusurunod sa saiya na nangangabayo sa maputing mga kabayo, asin sinda nagugubingan nin maputi, malinig, pinong lino.” (Kapahayagan 19:​14) An bagay na “maputi” an mga kabayo nagpaparisa nin matanos na ralaban. An “pinong lino” angay sa mga nangangabayo kan Hade, asin an makintab, malinig na kaputian kaiyan nagpaparisa nin malinig, matanos na kamugtakan sa atubangan ni Jehova. Kun siring, siisay an minakompuwesto sa “mga hukbong” ini? Daing duwa-duwa, kaiba dian an banal na mga anghel. Sa kapinonan kan aldaw kan Kagurangnan na ihinolog ni Miguel asin kan saiyang mga anghel si Satanas asin an saiyang mga demonyo hale sa langit. (Kapahayagan 12:​7-9) Saro pa, “an gabos na anghel” naglilingkod ngonyan ki Jesus mantang sia nagtutukaw sa saiyang mamuraway na trono asin naghohokom sa mga nasyon asin tawo sa daga. (Mateo 25:​31, 32) Tunay na, sa pangultimong guerra, kun gibohon na an paghokom nin Dios sagkod na matapos, si Jesus iibanan giraray kan saiyang mga anghel.

¹¹ May iba man na magigin kalabot. Kan ipinadara an saiyang mensahe sa kongregasyon sa Tiatira, si Jesus nanuga: “An makadaog asin nag-ootob kan sakong mga gibo sagkod sa katapusan tatawan ko nin kapangyarihan sa mga nasyon, asin papastoran nia an mga tawo paagi sa sogkod na batbat kaya sinda magkakaparasa siring sa mga koron, siring kan inako ko sa sakong Ama.” (Kapahayagan 2:​26, 27) Daing duwa-duwa, pag-abot kan panahon, an mga tugang ni Cristo na yaon na sa langit magkakaigwa nin kabtang sa pagpastor sa mga tawo asin nasyon paagi sa sogkod na iyan na batbat.

12. (a) Makikikabtang daw an mga lingkod nin Dios digdi sa daga sa pakikilaban sa Armagedon? (b) Paano kalabot sa Armagedon an banwaan ni Jehova sa daga?

¹² Alagad, kumusta man an mga lingkod nin Dios digdi sa daga? An grupong Juan dai magkakaigwa nin aktibong kabtang sa pakikilaban sa Armagedon; ni an maimbod na kairiba kaiyan, an mga tawo hale sa gabos na nasyon na burunyog na nagraralaog sa espirituwal na harong nin pagsamba ni Jehova. An matoninong na mga tawong ini dinaragopdop na an mga minasbad na magin mga tarom nin arado. (Isaias 2:​2-4) Pero, kalabot nanggad sinda! Arog kan nasabi na niato, an garo baga daing depensang banwaan ni Jehova an maringis na sasalakayon ni Gog asin kan gabos niang kaburunyogan. Iyan an senyal tanganing an Guerrero-Hade ni Jehova, na suportado kan mga hukbo sa langit, pumoon na makipaglaban sa sarong guerra nin pagpara tumang sa mga nasyon. (Ezequiel 39:​6, 7, 11; ikomparar an Daniel 11:​44–​12:1.) Bilang mga paramasid, an banwaan nin Dios digdi sa daga magigin interesado nanggad. An Armagedon mangangahulogan kan saindang kaligtasan, asin sinda mabubuhay sagkod lamang bilang mga nakaheling mismo kan dakulang ralaban sa pagbindikar ki Jehova.

13. Paano niato naaaraman na an mga Saksi ni Jehova bakong tumang sa gabos na gobyerno?

¹³ Ini daw nangangahulogan na an mga Saksi ni Jehova tumang sa gabos na gobyerno? Bako man! Kinukuyog ninda an hatol ni apostol Pablo: “An lambang kalag magpasakop sa haralangkaw na kapangyarihan.” Aram ninda na sagkod na nagdadanay an presenteng palakaw, an “haralangkaw na kapangyarihan” nag-eeksister sa pagtogot nin Dios para sa pagpapadanay sa kadikit na areglo sa sosyedad nin tawo. Kaya, an mga Saksi ni Jehova nagbubuhis, nagkukuyog kan mga ley, iginagalang an mga ordinansa sa trapiko, nag-ootob sa mga pagparehistro, asin iba pa. (Roma 13:​1, 6, 7) Saro pa, nagkukuyog sinda sa mga prinsipyo kan Biblia sa pagigin sadiosan asin honesto; pagpaheling nin pagkamoot sa kataed; pagtogdok nin makosog, moral na pamilya; asin pagtotokdo sa saindang mga aki na magin arogan na mga siudadano. Sa paaging ini itinatao ninda “ki Cesar an ki Cesar, alagad sa Dios an sa Dios.” (Lucas 20:​25; 1 Pedro 2:​13-17) Mantang ipinaheheling kan Tataramon nin Dios na temporaryo an mga kapangyarihan sa gobyerno kan kinaban na ini, an mga Saksi ni Jehova nag-aandam ngonyan para sa mas kompletong buhay, an tunay na buhay, na sa madali na makakamtan sa pagsakop kan Kahadean ni Cristo. (1 Timoteo 6:​17-19) Minsan dai sinda makikikabtang sa pagpabagsak sa mga kapangyarihan kan kinaban na ini, an mga Saksi nakakamate nin magalang na paghanga sa sinasabi kan ipinasabong na Tataramon nin Dios, an Banal na Biblia, manongod sa paghokom na gigibohon ni Jehova sa Armagedon.​—Isaias 26:​20, 21; Hebreo 12:​28, 29.

(Ipagpapadagos sa masunod na luwas.)

Tinatawan daw Nindo nin Dignidad an Iba Kun Kamo Nagtatao nin Sadol?

KANIGOAN karahay asin kapakipakinabang na sadolon na may dignidad! “An maboot, makonsiderasyon, mapagmakolog na sadol nagbubunga nin marahay na mga relasyon,” an sabi ni Edward. “Kun namamatean nindo na kamo tinatawan nin onra asin iginagalang kan parakonseho paagi sa pagpaheling nin pagigin andam na maghinanyog sa saindong lado kan estorya, mas madaling akoon an sadol,” an sabi ni Warren. “Kun an parakonseho tinatratar ako na may paggalang, namamatean ko na madali siang dolokon, na naghahagad saiya nin sadol,” an komento ni Norman.

An Natural na Diretso nin Tawo sa Dignidad

An mainit, makikatood, asin mamomoton na sadol talagang inaako. Kapakipakinabang an pagsadol sa iba sa paagi na gusto nindong sadolon. (Mateo 7:12) An marahay na parakonseho nagtatao nin panahon na maghinanyog asin nagmamaigot na masabotan an saro na sinasadol​—an saiyang kaisipan, an saiyang kamugtakan, asin an saiyang mga saboot—​imbes na tatsaran asin kondenaron.​—Talinhaga 18:13.

An mga parakonseho ngonyan, kaiba na an Kristianong mga magurang, kaipuhan na magin alisto na tawan nin dignidad an iba kun nagtatao nin sadol. Taano? Huli sa simpleng dahelan na an usong kaisipan sa sosyedad iyo na trataron an iba sa paaging mayo nin dignidad. Nakaoolakit ini. Sa pinakaparate an mga linalaoman nindo na paghahalean nin may dignidad na pagtratar iyo an mga dai nakatatao kaiyan, magin sinda mga propesyonal, relihiyosong mga poon, o iba pa. Sa pag-ilustrar, sa pinagtatrabawohan an pagsisante sa trabaho makolog na eksperyensia asin nagtatao nin tension kapwa sa among asin sa empleyado. Nakadadanyar iyan sa paggalang sa sadiri, nangorogna kun an sinisisante tinatratar na mayong dignidad. Sa situwasyon na ini an mga superbisor kaipuhan na makanood kun paano ipaaabot an “makolog na mensahe tanganing makaabot iyan na malinaw, nasa punto asin propesyonal, asin pinapagdadanay an dignidad kan indibiduwal,” an ibinabareta kan The Vancouver Sun. Iyo, an gabos na tawo maninigo sa may dignidad na pagtratar.

An Pankagabsan na Asamblea kan Naciones Unidas nagpoproklamar: “An gabos na tawo namundag na talingkas asin parareho sa dignidad asin mga diretso. Tinawan sinda nin pag-isip asin konsensia asin maninigong humiro sa kada saro na may espiritu nin pagkamagturugang.” Mantang inaatake an dignidad nin tawo, may marahay na dahelan na an Carta kan Naciones Unidas asin an introduksion sa Unibersal na Deklarasyon kan mga Diretso nin Tawo minimidbid an kuwalidad na ini. Pinatutunayan kaiyan an “pagtubod sa pundamental na mga diretso nin tawo, sa dignidad asin halaga kan tawo.”

Linalang ni Jehova an Tawo na May Natural na Dignidad

Si Jehova Dios na may dignidad. Tama an pagkakasabi kan saiyang ipinasabong na Tataramon: “An dignidad asin kamurawayan nasa saiyang atubangan,” asin, “[an Saiyang] dignidad ipinahahayag sa itaas nin kalangitan.”​—1 Cronica 16:27; Salmo 8:1.

Bilang may dignidad na Dios asin Unibersal na Soberano, itinatao nia an dignidad sa gabos niang linalang, langitnon asin daganon. An nangongorog sa mga tinawan nin onra iyo an saiyang pinamuraway asin namamahalang Aki, an Hade, si Cristo Jesus. “An dignidad asin kamurawayan itinao mo saiya,” makahulang nagsurat si David.​—Salmo 21:5; Daniel 7:14.

Makamomondo, an pundamental na diretsong ini nin tawo inabuso nang gayo sa bilog na historya. An sarong makapangyarihan na anghel, na paagi sa saiyang mga gibo nagin Satanas na Diablo, inangat an pagigin may diretso, pagkamakatanosan, asin pagigin angay kan soberaniya nin Dios. Sa paggibo kaiyan nagpaheling sia nin dai paggalang ki Jehova asin dai tinawan nin onra an Saiyang may dignidad na ngaran mantang inaangat an Saiyang diretso na mamahala. Kinamkam nia an sobra-sobrang dignidad para sa saiyang sadiri. Siring kan Diablo, an makapangyarihan na mga hadeng tawo, arog baga ki Nabucodonosor kan mga panahon kan Biblia, naghambog manongod sa saindang ‘kapangyarihan asin sa saindang kamurawayan.’ Inatake ninda an dignidad ni Jehova, na iinaatribuwir an bakong makatanosan na dignidad sa saindang sadiri. (Daniel 4:30) An maringis na pamamahala ni Satanas, na ipinirit sa kinaban nin katawohan, inatake asin nagpapadagos na atakihon an dignidad nin tawo.

An saindo daw na dignidad minenus na? Kan sinasadol, ipinamate daw saindo an grabeng pagkakasala, pagkapasopog, pagduhagi, o pagmenus? “Dai ko namatean an pagmakolog, pakikidamay, asin dignidad. Ipinamate sako na ako daing halaga,” an sabi ni André, na idinudugang: “Nagbunga ini nin mga pagmate nin pagkadisganar asin kahaditan, depresyon pa ngani.” “Depisil na umako nin sadol gikan sa saro na namamatean nindo na mayo kan saindong pinakamarahay na intereses sa saiyang puso,” an sabi ni Laura.

Sa dahelan na ini, an Kristianong mga paraataman sinasadol na trataron an aripompon nin Dios na may paggalang asin onra. (1 Pedro 5:​2, 3) Kun lumataw an mga situwasyon na kaipuhan asin kapakipakinabang na sadolon an iba, paano nindo mapoprotehiran an saindong sadiri sa kaisipan asin paggawe nin kinabanon na mga tawo na, mayong pag-alangan, inaatake an dignidad nin iba? Ano an makatatabang saindo na papagdanayon an dignidad nin mga kapwa Kristiano, siring man kan saindong sadiri?​—Talinhaga 27:6; Galacia 6:1.

Mga Prinsipyo na Pinapagdadanay an Dignidad

An Tataramon nin Dios bakong toninong manongod sa temang ini. An ekspertong parakonseho magbubugtak nin bilog na pagtitiwala sa sadol kan Tataramon nin Dios, imbes na laoman an kadonongan kan kinaban na ini. An Banal na Kasuratan naglalaman nin mahalagang hatol. Kun kinukuyog, tinatawan kaiyan nin dignidad kapwa an parakonseho asin an saro na tinotokdoan. Kaya an pagboot ni Pablo sa Kristianong paraataman na si Timoteo iyo ini: “Dai mo pagtatsaran nin labi-labi an sarong gurang. Kundi pakiolayan mo sia siring sa ama, an hoben na mga lalaki siring sa mga tugang na lalaki, an gurang na mga babae siring sa mga ina, an hoben na mga babae siring sa mga tugang na babae sa bilog na kabinian.” (1 Timoteo 5:​1, 2) Dakol nanggad na kamondoan, mga kolog nin boot, asin pagkapasopog an nalilikayan paagi sa pagkuyog sa mga pamantayan na ini!

Mangnoha na an liyabe sa mapangganang pagsadol iyo an tamang paggalang sa sarong tawo asin sa saiyang diretso na trataron sa may dignidad, nagmamakolog na paagi. An Kristianong mga magurang, kabale na an nagbibiyaheng mga paraataman, nagmamaigot na kuyogon an sadol na ini. Pinagmamaigotan nindang determinaran kun taano an saro na nangangaipo nin pagtatanos ta nag-iisip asin naghihiro nin siring kaiyan. Boot nindang madangog an saiyang punto-de-vista. Ginigibo an gabos na paghihingoa tanganing malikayan an pagpasopog, pagmenus, o pagduhagi sa saro na tinatabangan.

Bilang sarong magurang, ipaaram sa saindong tugang na nagmamakolog kamo asin boot nindong tabangan sia sa saiyang mga problema. Iyan an ginigibo nin doktor kun minadalaw kamo sa saiyang opisina para sa pisikal na eksaminasyon. An pag-isip-isip manongod sa paghuba nin gubing sa daing kabuhaybuhay, malinigon na kuwarto tibaad magpamate saindo nin kasopganan asin pagkawara nin onra. Inaapresyar nanggad nindo an doktor na nagpapaheling nin pagkasensitibo sa saindong paggalang sa sadiri asin tinatawan kamo nin dignidad paagi sa pantahob na gubing mantang ginigibo nia an kinakaipuhan na pagsiyasat tanganing madeterminaran an dahelan kan saindong helang! Sa kaagid na paagi, an Kristianong parakonseho na nagpapaheling nin tamang paggalang para sa indibiduwal maboot asin marigon, pero ginugubingan nin dignidad an sinasadol. Sa kabaliktaran, an sadol na maisog, mayong simpatiya, asin mayong pagmakolog siring sa paghuba sa piguratibong paagi na nagpapangyari saindo na mapasopog, maduhagi, asin mahubaan kan saindong dignidad.

An mga paraataman sa Teokratikong Paadalan sa Pagmiministro nangorognang maingat sa pagsadol na may dignidad. Kun nagsasadol sa mga gurang, ipinaheheling ninda an kaparehong pagkamoot na ipinaheheling ninda sa saindang mga magurang sa laman. Sinda makonsiderasyon, makikatood, asin mamomoton. Kaipuhan an siring na pagkasensitibo sa pagmate nin iba. Nagpoprodusir iyan nin kamugtakan na nakadadagka sa tamang pagtao asin pag-ako nin sadol.

Mga magurang, isaisip na an praktikal na sadol nakaeengganyar, nakapakokosog, nakaparirigon, asin positibo. Nagsasabi an Efeso 4:29: “Dai kamo magpaluwas nin maraot na tataramon sa saindong ngoso, kundi ano man na tataramon na marahay para sa pagpakosog siring sa kinakaipuhan, tanganing iyan makapagtao nin karahayan sa mga nagdadangog.”

Dai kinakaipuhan na gumamit nin maisog na mga termino, lenguahe, o pangangatanosan. Imbes, an paggalang sa sarong tawo asin an pagmawot na pagdanayon an saiyang mga saboot nin pagpahalaga asin paggalang sa sadiri nakapahihiro saindo na iatubang an mga bagay sa positibo, nakatatabang na paagi. Ponan an ano man na komento paagi sa gikan sa boot, tunay na komendasyon para sa saiyang marahay na mga ugale o kuwalidad, imbes na idoon an mga punto-de-vista na nakapamamate saiya na disganado asin mayong halaga. Kun naglilingkod kamo bilang magurang, gamiton an saindong ‘kapangyarihan tanganing magparigon asin bakong magpaluya.’​—2 Corinto 10:8.

Iyo, an epekto nin ano man na sadol gikan sa Kristianong mga paraataman maninigo na itao an kinakaipuhan na pagpapakosog, tanganing ikatao an marahay. Maninigo na iyan dai makapaluya nin boot o ‘makapatakot.’ (2 Corinto 10:9) Minsan an saro na nakakomitir nin grabeng pagkakasala kinakaipuhan na tawan nin paggalang sa sadiri asin dignidad. An sadol kaipuhan na timbangan nin maboot, alagad marigon, na mga tataramon nin pagsagwe tanganing mapahiro siang magsolsol.​—Salmo 44:15; 1 Corinto 15:34.

Makahulogan nanggad, an Pagboot nin Dios sa Israel igwa kan iyo man sanang mga prinsipyo. Tinogotan kaiyan an pagsadol asin pisikal na disiplina pa ngani, mantang kadungan na pinapagdadanay an diretso kan indibiduwal sa personal na dignidad. An paghampak ‘sa bilang na katimbang kan maraot na gibo’ itinogot, alagad ta dai ini dapat na masobrahan. Itinao an limite sa bilang nin hampak na itinatao tanganing an nagkasala dai “aktuwal na mapasopog.”​—Deuteronomio 25:​2, 3.

An pagmakolog sa mga saboot nin nagsosolsol na mga parakasala nagin karakteristiko man ni Jesus. Manongod saiya, naghula si Isaias: “Dai sia mabari nin ronot nang gaho; asin kun dapit sa mitsa na madiklom na an laad, dai nia iyan paparongon. Sa katotoohan paluluwason nia an hustisya.”​—Isaias 42:3; Mateo 12:​17, 20; Lucas 7:​37, 38, 44-50.

Dugang pang nagdodoon kan pangangaipo para sa empatiya iyo an mga tataramon ni Jesus sa Sermon sa Bukid: “Kaya an gabos na boot nindong gibohon sa saindo nin mga tawo, gibohon man nindo sa sainda.” (Mateo 7:12) Importanteng marhay an prinsipyong ini sa pagpalakop nin marahay na mga relasyon kaya iyan lakop na inaapod na Reglamento sa Paggawe. Bilang sarong Kristianong magurang, paano kamo matatabangan kaiyan na trataron an iba na may kabootan asin dignidad kun nagsasadol?

Girumdomon na nakakagibo man kamo nin mga sala. Arog kan sabi ni Santiago, “gabos nasisingkog nin dakol na beses.” (Santiago 3:2) An paggirumdom kaini makatatabang na pogolon an saindong mga komento asin kontrolon an saindong mga saboot kun kinakaipuhan na kaolayon an iba dapit sa saindang mga pagkukulang. Midbidon an saindang mga pagmate. Makatatabang ini saindo na malikayan an sobrang pagtatsar, na tinatawan nin atension an saradit na sala o diperensia. Idinoon ini ni Jesus kan sia magsabi: “Dai kamo maghokom tanganing dai man kamo hokoman; huli ta an paghokom na ihinohokom nindo, iyo man an ihohokom saindo; asin an sokol na isinosokol nindo, iyo man an isosokol ninda sa saindo.”​—Mateo 7:​1, 2.

Tawan nin Dignidad an Iba​—Tumangon an Diablo

An mga pakana ni Satanas dinisenyo tanganing halean kamo nin dignidad, tanganing magprodusir nin mga saboot nin pagkasopog, pagkadaing halaga, asin pagkadesesperar. Mangnoha kun paano nia ginamit an tawo bilang ahente tanganing pukawon an negatibong mga emosyon sa maimbod na si Job. An mapagsaginsagin na si Elifaz nagsabi: “Sa saiyang mga lingkod mayo sia [si Jehova] nin pagtubod, asin an saiyang mga mensahero [banal na mga anghel] inaakusar nia nin pagkakasala. Gurano pa daw an mga nag-eerok sa mga harong na laboy [makasalan na mga tawo], na an pundasyon nasa kabokabo! An saro rinoronot sinda nin mas madali kisa sa layuglayog.” (Job 4:​18, 19) Kaya sono sa saiya, si Job daing kalabihan sa layuglayog sa pagheling nin Dios. Tunay na, an sadol ni Elifaz asin kan saiyang kairiba, na dai nanggad nakaparirigon, hahalean kutana si Job pati kan paggirumdom sa marahay na mga panahon. Sa saindang pagmansay mayong halaga an saiyang nakaaging kaimbodan, pagsasanay sa pamilya, relasyon sa Dios, asin mga paglimos.

Siring man ngonyan, an nagsosolsol na mga parakasala partikularmenteng inaatake nin siring na mga saboot, asin yaon an peligro na sinda ‘madaog kan labi-labing kamondoan.’ Mga magurang, kun sinasadol an mga siring, “patunayan nindo an saindong pagkamoot” para sa sainda paagi sa pagtogot sainda na pagdanayon an dignidad. (2 Corinto 2:​7, 8) “Kun tinatratar na mayong dignidad pinadedepisil kaiyan an pag-ako nin sadol,” an pag-ako ni William. Mahalaga na pakosogon an saindang paniniwala na sinda mahalaga sa mata nin Dios. Ipagirumdom sainda na si Jehova “bakong biko na malingawan an [saindang] ginibo asin an pagkamoot na [saindang] ipinaheling para sa saiyang ngaran” durante kan saindang nakaaging mga taon nin maimbod na paglilingkod.​—Hebreo 6:10.

Anong dugang na mga bagay an makatatabang saindo na tawan nin dignidad an iba kun nagtatao nin sadol? Midbidon na an gabos na tawo igwa nin natural na diretso sa dignidad, huli ta hinaman sinda sa ladawan nin Dios. Pinahahalagahan sinda ni Jehova Dios asin ni Jesu-Cristo; an duwang probisyon kan pantubos asin kan pagkabuhay liwat pinatutunayan an bagay na iyan. Dinudugangan ni Jehova nin orog pang dignidad an mga Kristiano paagi sa “pagbugtak [sainda] sa sarong ministeryo,” na ginagamit sinda na dagkahon an maraot na kapag-arakian na makipagkatoninongan sa Dios.​—1 Timoteo 1:12.

Mga magurang, girumdomon na an kadaklan sa saindong Kristianong mga tugang linalaoman na mga miembrong pundasyon kan bagong sosyedad nin tawo sa lininigan na daga. Bilang pinahalagahan asin mahal na mga indibiduwal, maninigo sindang tawan nin onra. Kun nagsasadol, girumdomon kun paano kapwa si Jehova asin si Jesus nagpaheling nin konsiderasyon sa sainda, asin padagos na gibohon an saindong kabtang sa pagtabang sa saindong mga tugang na pagdanayon an pakamate nin dignidad asin pagpapahalaga sa sadiri sa atubangan kan mga angat ni Satanas.​—2 Pedro 3:13; ikomparar an 1 Pedro 3:7.