Pag-aatubang kan Maogmang Bareta—Sa mga Piyesta Opisyal

¹ Minsan ngani an dakol na selebrasyon sa Navidad asin Bagong Taon may paganong ginikanan, labing sarong bilyon na naghihingakong Kristiano an nagseselebrar kaini taon-taon. Paano niato maaabot an puso nin siring na mga tawo kan maogmang bareta sa panahon nin piyesta opisyal?

² Magin Makonsiderasyon Asin Magalang: An kamagurangan naggigibo nin espesyal na mga areglo para sa paghuhulit sa mga panahon nin piyesta opisyal, nangorogna sa Disyembre 25 asin Enero 1. Sa satong ministeryo, posible na makakanompong kita nin dakol na sibot-sibot sa pag-asikaso sa mga bisita asin sa pagluto. Huli sa konsiderasyon, puwede niatong gibohon na halipot sana asin diretso sa punto an satong mga komento. Tibaad bukasan kaini an dalan para sa dugang na pagpatotoo sa ngapit.

³ Dai kita nakikikabtang sa kinabanon na relihiyosong mga selebrasyon, asin dai kita naggagamit nin mga pataratara sa Navidad o Bagong Taon. Kun siring, kaipuhan an taktika kun paano niato sisimbagon an siring na mga pataratara. Dai kaipuhan na gibohon iyan na isyu, pero sa kadaklan puwede sana niatong pasalamatan an kagharong sa marahay niang kamawotan para sa sato. Kun ihahapot nin mga tawo an satong pagtubod, puwede niatong sabihon sainda na kita tunay na nagtataong onra ki Cristo Jesus, ta ini kaipuhan sa mga nagtataong onra sa Dios. (Juan 5:23) Kun boot nin mga indibiduwal an dugang na impormasyon sa panahon na iyan o sa maabot, puwede niatong ihiras sainda an yaon sa librong Reasoning sa pahina 176-8 asin 180.

⁴ Introduksion: Tibaad manompongan niato na an mga tawo mas mahilig na makipag-olay manongod sa Dios sa panahon na ini kan taon. Puwede niatong aprobetsaran ini sa satong introduksion. Halimbawa, puwede niatong sabihon: “Sa panahon na ini nin Navidad, parate niatong nadadangog an mga tawo na nagpapahayag kan paglaom na magkakaigwa nin katoninongan sa daga asin marahay na boot sa mga tawo. Sa paghona daw nindo papangyayarihon nin Dios an katoninongan sa satong panahon?” Dangan puwede niatong ipaheling na si Jesu-Cristo an ihinulang “Prinsipe nin Katoninongan.” (Isa. 9:​6, 7) Bilang an nombradong Hade sa gobyerno nin Dios, madali nang humiro si Cristo sa pagpangyari nin nagdadanay na katoninongan sa daga.​—Dan. 2:44; Kap. 21:​3-5.

⁵ Minsan ngani an kadaklan indiperente sa mensahe kan Kahadean asin wiling-wili sa saindang falsong relihiyosong mga piyesta opisyal, seguradong bebendisyonan ni Jehova an satong mga paghihingoa na manompongan an mga naghahanap nin katotoohan asin gigiyahan nia sinda sa saiyang organisasyon.​—Juan 4:​23, 24.

Areglo nin Pag-adal sa Libro kan Kongregasyon

Kabtang 5: Pagsongko kan Paraataman sa Paglilingkod

¹ An paraataman sa paglilingkod maninigong sarong paraebanghelyo asin paratokdo. Sia may mahalagang kabtang sa pagtabang sa kongregasyon na maotob an paninimbagan kaiyan na ihulit asin itokdo an maogmang bareta sa teritoryong itinao dian.​—Mar. 13:10.

² An paraataman sa paglilingkod nagkokonsentrar sa pagpukaw nin orog pang aktibidad sa ministeryo sa langtad. Ini sa pangenot ginigibo paagi sa Pag-adal sa Libro kan Kongregasyon. Sa kadaklan, an paraataman sa paglilingkod iinaasignar na mangenot sa sarong pag-adal sa libro, pero sarong beses kada bulan puwedeng sumalida saiya an saiyang katabang mantang sinosongko nia an ibang grupo.​—kmBI 12/81 p. 1, 3.

³ Preparasyon Para sa Pagsongko: Bago an semana kan pagsongko, maninigong siyasaton kan paraataman sa paglilingkod an mga Congregation’s Publisher Record card kan mga miembro sa grupo. Maninigong iareglo man niang makaolay an nangengenot asin repasohon an aktibidad kan mga parahayag na asignado sa grupo. Maninigong ipagirumdom sa nangengenot sa pag-adal na an pag-adal 45 minutos sana tanganing tawan nin panahon an 15-minutos na pahayag kan paraataman sa paglilingkod.

⁴ An pahayag na ini maninigong magpaoswag sa pag-apresyar sa ministeryo. Kun an mga parahayag nagkakaipo nin tabang sa pirang kabtang kan ministeryo, an paraataman sa paglilingkod maninigong tumao nin praktikal na mga suhestion para sa ikaooswag. An saiyang mga komento maninigong positibo asin nakapakokosog tanganing dai sumupog o magpaluya sa boot nin siisay man huli sa negatibong mga komento. An saiyang pahayag maninigong makadagka sa gabos na umoswag.

⁵ An paraataman sa paglilingkod naghihingoa na makaiba sa paglilingkod an pinakadakol na mapupuwede. Mantang iniibanan an mga parahayag sa harong-harong, puwede siang magtao nin nakatatabang na mga suhestion sa mga paagi na mapaoswag an saindang pag-aatubang. Ini maninigong gibohon bakong sa paaging mapagtatsar kundi may odok na kamawotan na tumabang. Puwede man siang mag-opresir na ibanan an mga parahayag sa mga pagdalaw liwat asin pag-adal sa Biblia. Kun may siisay man sa grupo na garo baga nagkakaipo nin personal na tabang, puwede niang songkoon sinda sa semanang iyan tanganing matabangan sinda. An mainit, personal na atension na ini nagin pampakosog sa nagkapira na luminuya sa saindang paglilingkod sa langtad.

⁶ Pagtiripon Bago Maglingkod: An mga pagtiripon bago maglingkod sa langtad sa semanang iyan maninigong pangenotan kan paraataman sa paglilingkod. Kaipuhan na pumoon sa oras dawa kun pipira sana an yaon. An pagtiripon dai maninigong lumabi sa 10 sagkod 15 minutos. Bago pahaleon an grupo, maninigong aram kan gabos kun saen sia maglilingkod asin kun siisay an kaiba nia. (1 Cor. 14:​33, 40) Maninigong sadolon an gabos kan paraataman sa paglilingkod na dai mag-atraso sa pagpasiring sa paglilingkod sa langtad.

⁷ An regular na mga pagsongko kan paraataman sa paglilingkod sa mga grupo nin pag-adal sa libro puwedeng magin dakulang bendisyon sa kongregasyon. Paagi sa pagkooperar kan lambang saro sato kun sia minasongko, an satong ministeryo magigin areglado asin epektibo. Dugang pa, sia magigin magayagaya sa saiyang gibo.​—Heb. 13:17.